استشاره في شراء نيو اكسنت

[ashouhdy]

مش عارفه والله ما جربتش أبدا الأوتو وخايفه أجرب و أرجع أندم حيث لا ينفع الندم
لأنى لو ما قدرتش أتأقلم مع الاوتو مش هأقدر أبيعها على الأقل طول فتره القسط

الناس خوفونى من المعارض جدا لأن فى التوكيل العربيات بتيجى من المينا على عربيات كبيره لكن فى المعارض بتيجى بسواق وقالو ممكن لا قدر الله تكون أتخبطت أو أتحكت وصلحوها وباعوها من غير ما يقولو وكمان فى المعرض بتبقى أغلى شويتين

حضرتك بتقول عن الألوان الفاتحه مع أن الغوامق فيها جنان أنا رايحه كمان شويه أشوف النبيتى فى الشمس لأنى شوفتها بالليل أن شاء الله يطلع لون كويس
حكاية الأسم دى مش فارقه خالص أنا بس حبيت أتأكد من كلام التوكيل

جزاك الله كل خير

اللى بيجرب الاوتوماتيك فى السواقة مستحيييييييل يرجع للمانيوال تانى :))))))))))))

[zain2007]

اهلا وسهلا بحضرتك انا وصلتني رسالتك على البروفايل وقلت ارد هنا عشان اتكلم بالتفصيل ويمكن حد تاني يحب يستفيد اي معلومات موجودة في من ردي برده .
مبدئياً العربية النيو اكسنت معايا بقالها حوالي 5 او 6 شهور ومفيهاش مشاكل جوهرية والحمد لله (طبعاً للأمانة دي فترة غير كافية للحكم على اداء اي عربية لإن العربية لسة زيرو ) عموما قسم هيونداي فيه ناس كتير العربية معاهم بقالها فترة كبيرة يقدروا يدوكي معلومات اكتر مني طبعا لو حبيتي.
هي طبعاً زي ماناس كتير بتقول عنها العفشة بتاعتها ناشفة شوية وده موجود في عربيات كتير حديثة وكمان العفشة الناشفة عمرها الإفتراضي اطول وبتدي ثبات اكتر للعربية وعموما بالنسبة ليا مش فارقة كتير هو اينعم انتي بتسمعي صوت هبد او تخبيط (بتحسي بالعربية يعني) لو اخدتي مطب سخيف بطريقة غلط ولو ماشية في شارع مكسر مثلا بس انا بحاول اتعامل مع المواقف دي بإني باخد الملف براحة وبحاول الف العجل قبل ماطلع وارجعه تاني قبل مانزل من المطب ومبجريش في الشوارع المكسرة وكمان انا مجربتش عربية عفشتها ناعمة قبل كدة فمش حاسة بالفرق الفظيع يعني :oc_sun1[1]:.
طبعا زيها زي اي عربية بتظهر فيها مشاكل بسيطة بس بتتظبط لوحدها او في التوكيل بيظبطوها عادي زي مثلا اول ماجبتها كان الفتيس تقيل شوية واتظبط بعد التليين كمان لو مشغلة cd وحاطة الفلاشة ساعات لو اخدت مطب يقلب فلاشة او راديو لوحده وفي التوكيل قاللي حاولي تفصلي الفلاشة لما تكوني مشغلة ال cd والموضوع اختفي لوحده وعادي كمان السنتر عندي باب واحد ابتدي يعلق ولازم اقفله بإيدي لو فتحته وده هاروح التوكيل اشوف ايه نظامه وودي كلها مشاكل بسيطة والحمد لله غير كدة انا معنديش اي مشاكل والعربية مريحاني حتى الان وموفية احتياجاتي والحمد لله
بالنسبة للأبعاد كنت زيك تمام وكنت خايفة موت وحاسة ان العربية كبيرة بس مع الوقت ابتديت اتعود على ابعادها واكتشفت ان الاكسنت اصلا من العربيات الصغيرة مش كبيرة زي ماحنا متخيلين (يعني بالنسبة للانسر ولا الصني مثلا هاتحسي كإنك راكبة سفينة مش عربية ) بس طبعاً هي واقعياً اكبر من البيكانتو في الحجم.
وبرده العربية الصغيرة فيها ميزة انك بتمشي في شوارع ضيقة وانتي مش خايفة كمان لو بتركني في مكان صغير مش هايبقي في مشكلة
لكن برده الاكسنت فيها ميزة انها من جوه هاتكون اوسع وكمان موضوع الشنطة ده مهم خصوصا اني عرفت انك عندك طفلين منهم بيبي صغير وعربية البيبي أو كرسي البيبي اعتقد هيحتاجوا مكان كبير وكمان اعتقاد ان العربية الكبيرة اقيم واشيك وبرستيج ده صحيح عند بعض الناس خصوصاً انك ممكن تتعاملي وانتي سايقة في الطريق من المنطلق ده
يعني لو عربيتك صغيرة هاتلاقي ناس كتير تكسر عليكي وتدخل قبلك وتستفزك علي اعتقاد انها عربية لعبة :o_stupid[1]: او امكانياتها علي قدها مثلا (دي طبعاً مش وجهة نظري لكنها وجهة نظر بعض سائقي الميكروباص او ضيقي الافق مثلا ) .

عموما زي ماقلتلك هي مسألة وقت وهاتتعودي على الابعاد متخافيش خصوصا انك بتقولي سوقتي عربية جوزك وكانت سيدان فالاكسنت مش هاتكون صعبة بالنسبة ليكي.

بالنسبة للون انا معايا النبيتي وصورته موجودة في التوقيع ولونه مش باهت ولا حاجة وانا برده في البداية كان نفسي في الاسود لكني الحمد لله سمعت نصيحة الناس ومجبتوش لإنه بيتبهدل بسرعة فعلا وممكن يجرب بعد فترة كمان
مع ان النبيتي برده محتاج عناية مستمرة هو وكل الالوان الغامقة (بس ارحم من الاسود طبعاً) وكمان لو كل يوم تخلي سايس الجراج او البواب ينضفهالك وتغسليها مرة كل اسبوع او اسبوعين خلاص الموضوع انتهي يعني مش مشكلة.
انا عن نفس محبتش الكحلي وطبعاً الالوان دي وجهات نظر يعني :ka_che1[1]:
بس ناس كتير اجمعت ان النبيتي والفيراني هما افضل الوان ولو اني شايفة ان الفيراني رجالي شوية.
بالنسبة للفرش طالما ناوية على غامق يبقي مقدامكيش غير فرش بيج ممكن بعد كدة تبقي تركبي فرش تاني لو حسيتي انه هايتبهدل بس للأمانة الانتريور البيج مع اللون النبيتي رائع :s_thum1[1]:.

بالنسبة للتقسيط انا قسطت اسلامي مع البنك الوطني للتنمية (وهومش بيشترط تحويل مرتب على فكرة) حضرتك ممكن تشوفي موضوعي اللي في اللينك ده انا شرحت فيه الاجراءات بالتفصيل بس حاولي تقري كل الردود:

http://www.nilemotors.net/nile/86261-2010.html


وانا على فكرة برده اشتريت من موزع معتمد وخفت التوكيل يأخرني في الاستلام (هاتلاقي التفاصيل في موضوعي)


اه بالنسبة للجري الناس بتقولك متجريش بيها كتير لأن العربية جراية فعلا ولو نسيتي نفسك وانتي سايقة هاتلاقي العربية كسرت ال100 وانتي مش حاسة بحاجة لإن الموتور قوي ومساعد على الجري وطبعاً الجري في طرقنا الجميلة غير مأمون شوية وكمان في ناس بتقول ان الفرامل مش قوية مع اني محسيتش بالموضوع ده تماماً وكتير جريت بيها وفرملت وسيطرت عليها في وقت قليل والفرامل ساعدتني والحمد لله.
معلش ردي طويل شوية لا شويتين تلاتة كمان :o_stupid[1]: بس حبيت افيدك وارد على كل استفساراتك على قد ماقدر.
ولو في اي استفسار تاني انا تحت امرك .
ولو حبيتي تشوفي العربية وتجربيها كمان معنديش مانع

والله العظيم والله العظيم مهما قعدت أشكر فيكى من هنا لبكره مش أقدر أوفيكى جزاكى الله عنى خير الجزاء
أنسانه رائعه وخدومه ما بخلتيش عليا بأى معلومه جاوبتى على كل اللى سألته واللى ما سألتوش الله يكرمك بجد

شوفى يا قمر الأول ألف مليون مبروك على عربيتك ولو أنها متأخره شويه
أنا رحت النهارده غبور تانى عشان أشوف اللون بس للأسف برضه ما لحقتش النور
المهم رحت معرض بالصدفه فى الداون تاون قدام كارفور وبالصدفه البحته طلع المعرض وكيل أو موزع معتمد لغبور

وبالصدفه البحته جدا بقى المره دى لقيت عندهم النبيتى واقفه متلمعه ومتشال من عليها الشحم وواقفه ماشاء الله قمر أربعتاشر

وسألت عندهم قالولى نفس شروط ونفس البنك اللى كنت هاتعامل معاه برضه وهو أبو ظبى الأسلامىبس قالى حاجه غريبه ودى زعلتنى من غبور قوى قالتلى الفايده9% وغبور كان قايلى 8.5 ولما سألتها قالتلى البنك ده فايدته 9 على كل المعارض وبتوع غبور قالولك كده جر رجل وكانوهايطلعو الباقى من القسط

قمت أنا بقى قفشت عليهموقولت خلاص أنا هاتعامل مع المعرض المحترم ده وقالتلى بما أن اللون موجود فمجرد أنى أقدم أوراقى وتيجى الموافقه هأستلم بعديها على طول بدل غبور اللى قالى من عشرين يوم لشهر ده فى حالة أن الشحنه الجديده يكون فيها نبيتى
فكده أن شاء الله هاروحلهم يوم الأحد بأذن الله لو ربنا أراد

فى بقى سؤال مهم يا بونبونايه أنا بصيت على المكان اللى تحت الاكسدام الامامى مش لاقيت مكان للفوج لايت هل هى فعلا مش فيها مكان أفرضى أنا حابه أركب فوج مش هاينفع ولا أيه

تانى حاجه الاكراميات اللى بتدفعيها للراجل اللى بيروح معاكى المروربتبقى قد أيه تقريبا أصل أختك بطيخه فى المواضيع دى

وأخيرا ألف مليون مبروك ولو كنت فى القاهره كنت جيتلك مش عشان أشوف عربيتك
لاء يا قمر عشان أجيبلك بوكيه ورد لرد الكافى الوافى لكل أسألتى واتمنى تقبلينى صديقه وأدعيلى ربنا يتم الموضوع على خير ويقرب البعيد وعلى فكره أنا من أسكندريه واى حاجه عاوزاها من هنا أنا فى الخدمه

[zain2007]

اللون الاسود اعلى فى السعر عن اى لون تانى وكمان الراجل دا عايز يبيع اى لون غير الاسود علشان دا مطلوب كتير
انا اشتريت 3 عربيات لانسر من خمسين معرض علشان اللون الاسود العربيات كانت داخله دوره ايجار تابع بنك
وكان اللون مطلوب اسود فقط وصعب جدا ان حد يشترى او يلاقى هذا اللون

الحمد لله ربنا كرمنى وأستقريت على اللون النبيتى شوفته فى المعرض وطلع جونااااااااااااااان

ميرسى كتير لذوقك وتعبك معايا

[zain2007]

++++++++++++++++++++++ 100%

ألف شكر ولو أنى مش فاهمه

[zain2007]

اللى بيجرب الاوتوماتيك فى السواقة مستحيييييييل يرجع للمانيوال تانى :))))))))))))

تمام قوى بس أعتقد الأوتو أغلى 10 ألاف أنا أولى بيهم يا عم أروح أجيبلى سلسله ولا أسوره :b4_444:ولا أيه

[tabeb]

ليه ما تفكريش في اللوجان؟

[zain2007]

ليه ما تفكريش في اللوجان؟

الأكسنت أشيك مليون مره والحمد لله الحمد لله لقيت اللى الى عاجبنى وهأقدم أوراقى يوم الأحد أن شاء الله أدعيلى ربنا يتمها على خير ويجملها بالستر

[أبو صلاح]

طيب انتي لو بتدوري على مقدم معقول 30%
وفائدة 6% وبدون اي حوارات عن تجربة
يبقى مفيش غير ابو غالي اللي في شارع الميرغني

[minaghopreal]

الناس خوفونى من المعارض جدا لأن فى التوكيل العربيات بتيجى من المينا على عربيات كبيره لكن فى المعارض بتيجى بسواق وقالو ممكن لا قدر الله تكون أتخبطت أو أتحكت وصلحوها وباعوها من غير ما يقولو وكمان فى المعرض بتبقى أغلى شويتين



أنا هارد عليكي في نقطة واحدة بس وهي التوكيل (خاصةً توكيل غبور إيتامكو السلطان حسين ) لأني رحت عنده أحجز عربية ماتريكس و قاللي جاية خلال يومين واليومين بقوا عشر أيام والعشر أيام بقوا آخر الشهر و آخر الشهر بقوا آخر الشهر اللي جاي ..........
اللينك أهو

http://www.nilemotors.net/Nile/3872181750-post1095.html

و عايز أقول لك ان الموضوع في الآخر رسى اني سحبت فلوسي من غبور السلطان حسين و كمان قاللي الفلوس هاتطلع لك بـــشيك بعد عشر أيام

نصيحتي ليكي دلوقتي انك أولاً ماتشتريش من غــبــور
ثانياً لما تيجي تشتري من معرض ماتشتريش غير العربية اللي انتى شايفاها قدامك مش تحجزي وتبقى تجيلك و هنا أرشح معرضين معروفين ان العربيات عندهم مابتبقاش ماشية و فاصلة عداد و كدة : أولهم هو هورس موتورز اللي انتى رحتي عنده اللي جنب الداون تاون و ثانيهم هو رمسيس اللي في شارع ابو قير قدام اشارة الابراهيمية و ده أحسن لأنه موزع و العربيات بتجيله على تريللات فمابتبقاش ماشية و كمان بيجيب كميات كبيرة فهاتلاقي عنده معظم الألوان بس طبعاً الفيصل للي تلاقي عنده اللون اللي انتى عايزاه

لو مصممة تشتري من غبور يبقى يحدد لك معاد معين اللي هايسلم لك فيه العربية ماتقبليش فيه مماطلة و ماتدفعيش أكتر من الألف جنيه الحجز لغاية ماتشوفي العربية


نصيحة تانية لو عايزة تعرفي العربية ماشية كتير ولا لا : تشوفي فيه طينة في سقف العجل ولا لا و تشوفي الكيس اللي على ضهر كرسي السائق لو العربية ماشية كتير لازم هتلا قيه متشال علشان اللي سايقها يعرف يمشي بيها مسافات كبيرة

عموماً ربنا يوفقك ويكفيكي شرها . . . . أتمنى أكون أفدتك

[zain2007]

طيب انتي لو بتدوري على مقدم معقول 30%
وفائدة 6% وبدون اي حوارات عن تجربة
يبقى مفيش غير ابو غالي اللي في شارع الميرغني

6% بدون تحويل بدون ضامن وأسلامى وتسليم بعد الموافقه على طول ووكيل

مش صعبه شويه دى

[zain2007]

الناس خوفونى من المعارض جدا لأن فى التوكيل العربيات بتيجى من المينا على عربيات كبيره لكن فى المعارض بتيجى بسواق وقالو ممكن لا قدر الله تكون أتخبطت أو أتحكت وصلحوها وباعوها من غير ما يقولو وكمان فى المعرض بتبقى أغلى شويتين



أنا هارد عليكي في نقطة واحدة بس وهي التوكيل (خاصةً توكيل غبور إيتامكو السلطان حسين ) لأني رحت عنده أحجز عربية ماتريكس و قاللي جاية خلال يومين واليومين بقوا عشر أيام والعشر أيام بقوا آخر الشهر و آخر الشهر بقوا آخر الشهر اللي جاي ..........
اللينك أهو

http://www.nilemotors.net/nile/3872181750-post1095.html

و عايز أقول لك ان الموضوع في الآخر رسى اني سحبت فلوسي من غبور السلطان حسين و كمان قاللي الفلوس هاتطلع لك بـــشيك بعد عشر أيام

نصيحتي ليكي دلوقتي انك أولاً ماتشتريش من غــبــور
ثانياً لما تيجي تشتري من معرض ماتشتريش غير العربية اللي انتى شايفاها قدامك مش تحجزي وتبقى تجيلك و هنا أرشح معرضين معروفين ان العربيات عندهم مابتبقاش ماشية و فاصلة عداد و كدة : أولهم هو هورس موتورز اللي انتى رحتي عنده اللي جنب الداون تاون و ثانيهم هو رمسيس اللي في شارع ابو قير قدام اشارة الابراهيمية و ده أحسن لأنه موزع و العربيات بتجيله على تريللات فمابتبقاش ماشية و كمان بيجيب كميات كبيرة فهاتلاقي عنده معظم الألوان بس طبعاً الفيصل للي تلاقي عنده اللون اللي انتى عايزاه

لو مصممة تشتري من غبور يبقى يحدد لك معاد معين اللي هايسلم لك فيه العربية ماتقبليش فيه مماطلة و ماتدفعيش أكتر من الألف جنيه الحجز لغاية ماتشوفي العربية


نصيحة تانية لو عايزة تعرفي العربية ماشية كتير ولا لا : تشوفي فيه طينة في سقف العجل ولا لا و تشوفي الكيس اللي على ضهر كرسي السائق لو العربية ماشية كتير لازم هتلا قيه متشال علشان اللي سايقها يعرف يمشي بيها مسافات كبيرة

عموماً ربنا يوفقك ويكفيكي شرها . . . . أتمنى أكون أفدتك

يعنى أفهم من حضرتك ان هورس كويس
أنا لاحظت أنهم محترمين فى تعاملاتهم جدا و السيلز اللى بتشتغل هنا قالتلى النبيتى فى منها أتنين بس واحده فى المعرض ودى أنا شوفتها والكيس موجود على الكراسى والكنبه وعلى المخدع بتاع السواق وقالتلى أحجزيها ولو بألف لحد ما تخلصى أوراقكعشان لو كده تقول لأى حد ييجى يسأل عنها أنها محجوزه بدل ما أستنى شحنه تانيه ويا عالم يكون فيها نبيتى ولا لاء

أدعولى ربنا يتمملى على خير

وعلى فكره أحنا أتقرصنا من غبور السلطان حسين قبل كده أيام الأكسنت الشكل القديم وكنا هناخدها كاش ودفعنا نقص الثمن مقدم وماطلونا حوالى أربع أو خمس شهور وفى الأخر سحبنا فلوسنا وجبنا من بره برضه
عشان كده أنا مش متحمسه للتعامل معاهم نهائى

ألف شكر على النصيحه

[sss2000]

التقسيط الاسلامي معناة ان البنك يشتري السيارة وبعدين يبعها لك تاني ودة غالبا لا يحدث لو عايزة تتبعي التقسيط الاسلامي صح وعن تجربة شركة كونتاكت كار انا ماقصد معاها تقسيط اسلامي وبجد ناس محترمين جدا جدا

[zain2007]

التقسيط الاسلامي معناة ان البنك يشتري السيارة وبعدين يبعها لك تاني ودة غالبا لا يحدث لو عايزة تتبعي التقسيط الاسلامي صح وعن تجربة شركة كونتاكت كار انا ماقصد معاها تقسيط اسلامي وبجد ناس محترمين جدا جدا

على فكره بنك أبو ظبى الاسلامى بيمتلك العربيه برضه فى الاول ودى نقطه انا سألت فيها ولسه هاتأكد تانى منهم بكره ان شاء الله

كونتاكت فايدتهم عاليه قوى

أشكرك على النصيحه

[zain2007]

المحتوى المخفي لايقتبس

سورى انا فى الاول فهمت قصدك غلط

سورى مره تانيه على الغلط الغير مقصود

[R A N A]

والله العظيم والله العظيم مهما قعدت أشكر فيكى من هنا لبكره مش أقدر أوفيكى جزاكى الله عنى خير الجزاء

أنسانه رائعه وخدومه ما بخلتيش عليا بأى معلومه جاوبتى على كل اللى سألته واللى ما سألتوش الله يكرمك بجد

لا شكر على واجب وزي ماناس ساعدتني وانا بشتري فلازم اساعد غيري برده وده اقل واجب وميرسي جدا على الكلام اللي انا شايفاه كتير عليا اوي بصراحة

شوفى يا قمر الأول ألف مليون مبروك على عربيتك ولو أنها متأخره شويه

أنا رحت النهارده غبور تانى عشان أشوف اللون بس للأسف برضه ما لحقتش النور
المهم رحت معرض بالصدفه فى الداون تاون قدام كارفور وبالصدفه البحته طلع المعرض وكيل أو موزع معتمد لغبور

وبالصدفه البحته جدا بقى المره دى لقيت عندهم النبيتى واقفه متلمعه ومتشال من عليها الشحم وواقفه ماشاء الله قمر أربعتاشر

وسألت عندهم قالولى نفس شروط ونفس البنك اللى كنت هاتعامل معاه برضه وهو أبو ظبى الأسلامىبس قالى حاجه غريبه ودى زعلتنى من غبور قوى قالتلى الفايده9% وغبور كان قايلى 8.5 ولما سألتها قالتلى البنك ده فايدته 9 على كل المعارض وبتوع غبور قالولك كده جر رجل وكانوهايطلعو الباقى من القسط

قمت أنا بقى قفشت عليهم وقولت خلاص أنا هاتعامل مع المعرض المحترم ده وقالتلى بما أن اللون موجود فمجرد أنى أقدم أوراقى وتيجى الموافقه هأستلم بعديها على طول بدل غبور اللى قالى من عشرين يوم لشهر ده فى حالة أن الشحنه الجديده يكون فيها نبيتى
فكده أن شاء الله هاروحلهم يوم الأحد بأذن الله لو ربنا أراد

أولا مبروك انك استقريتي على اللون والحمد لله لإنها فعلا بتكون حيرة رخمة اوي موضوع اللون ده وانا برضة قعدت مترددة كتير قبل ماستقر على لون معين .
انا لسة واخدة بالي دلوقتي انك بتتعاملي مع نفس البنك اللي انا اتعاملت معاه وهو الوطني للتنمية (ابو ظبي الاسلامي) كده بصرة

بالنسبة لفايدة ال 8.5% اعتقد موجودة فعلا بس دي في حالة انك تكوني هاتحولي مرتب لكن انا اخترت اني محولش مرتب واروح ادفع القسط بنفسي وخلاص لإن تقريبا مكنش ينفع وقتها تحويل مرتب باين او مش فاكرة كان ايه العائق ولاقيت ان 0.5% مش حاجة ضخمة يعني وقسطت ب 9% وخلاص
عموما نصيحة مني طالما لاقيتي النبيتي موجودة في المعرض احجزيها وخدي رقم الشاسيه بتاعها عشان ده بيتكتب في عقد الشرا اللي بين المعرض والبنك قبل مانتي تشتري وبعدين يتكتب تاني في عقد الشراء بتاعك انتي مع البنك وقولليهم انا حجزت العربية دي برقم الشاسيه ده ولما استلم هاتأكد ان ده نفس رقم الشاسيه اللي انا حجزت بيه عشان نكون متفقين من البداية
طبعاً هاتقوليلي هاعرف رقم الشاسيه منين
رقم الشاسيه ياستي بيكون مكتوب على استكير بيتلزق على اجزاء كتيرة من العربية منهم ازاز الشباك الخلفي (يمين او شمال مش فاكرة) الرقم اللي مكتوب جنبيه Vin بيكون حوالي 14 رقم باين اكتبيه في ورقة واحتفظي بيها( هما بيكتبوا منه حوالي 4 او 5 ارقام في الرخصة والعقد كنوع من الاختصار يعني) بس اتأكدي ان الرقم صح

فى بقى سؤال مهم يا بونبونايه أنا بصيت على المكان اللى تحت الاكسدام الامامى مش لاقيت مكان للفوج لايت هل هى فعلا مش فيها مكان أفرضى أنا حابه أركب فوج مش هاينفع ولا أيه

بالنسبة لمكان الفوجات فعلا مفيش مكان ليها لو حبيتي تركبي فوجات بيقطع جزء على ادها في الاكصدام ويركب الفوجات فيه (وعلى فكرة البيكانتو الهاف اوبشن نفس النظام) ومتخافيش من الموضوع ده ناس كتير مبيكونش عندها مكان للفوجات وبتروح لكهربائي بيقص مكانه ويلزق فيه الفوج ويتركب عادي وفي التوكيل برده مكن يعملهولك عادي برده متقلقيش الاكصدام بيكون فيبر مش صاج .
بس عموما انا بفكر اركب فوجات بس لسة مقررتش حالياً .

تانى حاجه الاكراميات اللى بتدفعيها للراجل اللى بيروح معاكى المروربتبقى قد أيه تقريبا أصل أختك بطيخه فى المواضيع دى

بالنسبة للاكراميات انتي حضري نفسك على حبة فكة حلوين كدة قبل ماتروحي تستلمي
وانتي بتستلمي طبعاً بتلاقي حد بيقولك راضي الرجالة اللي بيغسلولك العربية واللي بيسلمك ملحقات العربية من عدة وكوريك واستبن وغيره وخدي بالك من كل شئ بتستلميه مع العربية وراجعي موضوعي واكتبي هاتستلمي ايه عشان متنسيش حاجة لو حبوا ميدوكيش وصلة MP3 لامضي معاهم لحد ماتاخديها منهم .
بصي انا عن نفسي دفعتلهم 50 جنيه وقلتلهم قسموها مع بعض وفي ناس بتدي 100 وفي ناس قالتلي 50 كتير فانتي وظروفك واعتبريها من صدقة العربية.
اما اللي هاييجي معاكي المرور فبعد مايخلصلك كل حاجة ويسلمك الرخصة اديله اللي يطلع من زمتك انا عن نفسي تقريبا اديتله 70 او 75 جنيه لإن المرور بتاع السلام ده مقرف بجد واضطرينا نروح يوم تاني عشان كان في خطأ في الرخصة (راجعي كل حرف مكتوب في الرخصة ورقم الموتور ورقم الشاسيه قبل ماتتحركي من المرور عشان مترجعيش تاني ) لإن البنك مش هايقبل بوجود اي خطأ ولو بسيط في الرخصة.
مصاريف الترخيص والضريبة بتترواح مابين 600 لـ 800 جنيه باين بصراحة مش فاكرة اوي لأنه خدهم مني على اجزاء بس راجعي وراه واسأليه دول بتوع ايه وكدة عشان تتأكدي.
وخدي معاكي صورة بطاقة عشان هايطلبوها في عمل الاستعلام (دي خطوة جديدة بيستعلموا عن اي حد بيقسط ويرخص جديد)

وأخيرا ألف مليون مبروك ولو كنت فى القاهره كنت جيتلك مش عشان أشوف عربيتك

لاء يا قمر عشان أجيبلك بوكيه ورد لرد الكافى الوافى لكل أسألتى واتمنى تقبلينى صديقه وأدعيلى ربنا يتم الموضوع على خير ويقرب البعيد وعلى فكره أنا من أسكندريه واى حاجه عاوزاها من هنا أنا فى الخدمه

الله يبارك فيكي ولو حبيتي تيجي القاهرة في اي وقت قوليلي قبلها بس واتشرف بمقابلتك وانا ليا الشرف اننا نكون اصدقاء

تمام قوى بس أعتقد الأوتو أغلى 10 ألاف أنا أولى بيهم يا عم أروح أجيبلى سلسله ولا أسوره :b4_444:ولا أيه

اعتقد ان الاوتو اغلي ب 6000 جنيه لإن المانيوال ب 78 الف والاوتو ب 84 الف دي كانت الاسعار ايام مانا اشتريت

طيب انتي لو بتدوري على مقدم معقول 30%
وفائدة 6% وبدون اي حوارات عن تجربة
يبقى مفيش غير ابو غالي اللي في شارع الميرغني

انا فعلا سمعت عن عرض البنك العربي الافريقي مع ابو غالي وليا اصحاب في الشغل مقسطين تبعه.
هو الفايدة فيه 6% بس زي ماحضرتك قلت بس بيشترط توكيل ونسخة مفتاح.
انا لما كنت بقول الموضوع ده قدام واحد زميلي قاللي هو عموما البنك مش هايضرك هو اهم حاجة عنده انه يحصل اقساطه في معادها وخلاص ومش هايستفيد شئ لما يستخدم التوكيل ضدك وكدة
بس بصراحة انا بعدت عن الموضوع ده عشان شبهة الربا وقلت اتحمل فايدة زيادة افضل عشان ابقي بعدت علي قد ماقدر عن الشبهات وكمان استفدت ان مفيش لا توكيل ولا نسخة مفتاح علي العربية بتاعتي وكمان مفيش غرامة تأخير علي الاقساط ودي بردة ميزة تحسب لبنك ابو ظبي الاسلامي + ان مفيش شيك اجمالي بتمن العربية كله (مش عارفة العربي الافريقي او البنوك التانية بتاخد شيك اجمالي ولا لأ) وكمان اجراءاته مختلفة شوية عن بنك ابوظبي يعني مبيعملش عقد شرا بينه وبين المعرض الاول (عشان يكون اسلامي يعني)