ما هو تقييمك لوكيل هيونداي و مراكز الخدمه

[Lion_Heart]

السلام عليكم

اسمحوا لي يا جماعه كلام الاخ dooolaمظبوط جدا

انا مدير مركز وكيل والحمد لله مفيش عندنا اي شكاوي ولا مشاكل

المهم بالنسبه للوقت التنسيق مع المهندس المسؤول او مدير الفرع

وبكل صدق و امانه بيقولك على الوقت المتوقع

اما عن جوده الشغل و الاتقان من حقك تتابع كل الخطوات واكيد العربيه

مش بتتسلم الا بعد التجربه من المختصين في المركز و تجربتك

الشخصيه

بس فى مراكز بتكتب يفط و تقولك ممنوع الدخول منعا للاحراج فهل ده من حقهم ؟؟

[MOSTAFABASAL]

كنت مع والدي في ابو رواش امبارح عشان صيانه الخمستلاف
طبعا علقه سخنه من دمياط بس كنا رايحين ال ايه عشان الحج عاوز يركب فوانيس شبوره عشان بيسافر كتير و الكلاكس كان بيعلق و يغير الزيت و الفلتر و استعدال طاره الدركسيون (مستلمين العربيه طارتها معووجه و ما اتعملتش في صيانه الالف)حسبي الله و نعم الوكيل
طبعا لاكلاكس لسه بيعلق
الطاره خرجنا بيها بعد 4 ساعات انتظار معووجه وما اتعدلتش و اتخانقنا مع المهندس عشان ندخل التوكيل تاني و نعدلها من غير ما نستنى دور تاني
نظافة العربيه صفر على الشمال بعد الصيانه
كان في العربيه عملات معدنيه الحج سايبها في الدرج بقصده طبعا لم تتواجد بعد الصيانه
من الاخر بدي التوكيل 3.5 او 4 بالكتير من 10
طبعا طقم الشبوره ما اتركبش المهندس بتاع الصيانه يقولنا التركيب في الهياكل نروح الهياكل المهندس هناك يقول ولا ليه دعوه بالموضوع ده اساسا ده شغل الصيانه
نروح لمهندس الصيانه نقوله يا عم في الهياكل بيقولوا مش تبعهم اخر ما زهق مننا قال طب اسالو الراجل بتاع قطع الغيار موجوده ولا لا
سالنا الراجل بتاع قطع الغيار قال الطقم كله ب 1450 جنيه و متهيالي المصنعيه بتاعتو ب 300 يبقى 1750
الحج قال اوكيه
قالوا معلش اسف الزرار بتاع الفوجات مش موجود ولا الشبكه الاماميه بتاعتهم
(نظام فوت علينا بكره يا سيد)
نحن في زمن انعدمت فيه الضمائر و سلملي على غبور

[saeed85]

يا جماعه ده رايي عشان انا باخد عربيت اختي نيو اكسنت 2010 و بصراحه زباله و لا تزعق عشان يهتموا و يعملوا الي انت عايزه العربيه 2010 و مكملتش 1500 كم و حصل الاتي الكاست مبيسحبش اسطوانه و لا بيخرجها و الانذار مش شغال ولا السنتر و ريحه كممكمه بتظهر اما بتركن العربيه و تكون مشغل التكييف و تنزل العربيه تاني بعد شويه و طبعا التوكيل قالي الكاست مينفعش يتصلح ده عايز يتغير و معندناش منه في المخزن كنت هقل قدبي علي المهندس و طبعا قعدوا يهدوني و بعد كده غيروه و الله هما لازم تقل قدبك عليهم و تزعق عشان يهتموا و يعملوا الي انت عايزه لولا العربيه في الضمان والله مكنت عتبته ده غير الوقت الي بيروح عندهم تروح و تاخد معاك حد يسليك يعني لو صاحبتك جات معاك يكون زي الفل اهو احسن من الكوفي شوف انا صراحه بعمل كده :)

[mahmoud_afifi]

انا رحت اعمل صيانة ال20,000 و قالي هنغيرلك حاجات بسيطه وهنشيك على كذا وكذا وكذا. وقال التكلفه هتبقى حوالي 550 جنيه.
بعد لما خلصوا الصيانه اكتشفت انهم غيروا كل الحاجات حتى الي كانت كويسه ( طبعا اسهل ما يشيكوا عليها ويشوفوا كويسه ولا لأ) والصيانه اتكلفت 800 جنيه. لولا ستر ربنا وكان معايا مبلغ زياده كان زمان العربيه باتت عندهم. تاني حاجه حصلت انهم بوظولي فرش العربيه الاصلي وبقى كلـــــــــــه شحم بسبب ايدهم المشحمه. هما طبعا بيحطوا بلاستيك على كرسي السواق انما الباقي مبيحطوش عليه حاجه وبالتالي لما ييجوا يغيروا فلتر البنزين (اسفل الكنبه الخلفيه) طبعا لازم يوسخوا امها مش يراعوا نظافة العربيه.

قمه في التخلف بس مضطر اروح لغاية لما اطلع من الضمان

[mohamedassy]

انا عندى النترا و افيو بصراحة فى فرق كبييييييييييير بين غبور و منصور لصالح غبور طبعا
ممكن فى طغط عدد كبير مش بيروح غير قليوب و ابو رواش لكنة مركز جيد و خدمتة كويسة

[ramy_fiat_2000]

يا جماعه مركز الخدمه اللى فى طريق السندباد ده فاشل ابن فاشل وديه قصتى معاه امبارح السبت 7/8/2010
روحت لاقيت مهندس الاستقبال بيتعامل مع الناس نظام اقلب الزبون مش ناقصه وجع دماغ زباين تقرف المهم قلته عاوز اعمل صيانه العربيه ال 55000 قالى طيب ادخل اقعد فى الاستراحه طريقة فى قمه قله الذوق دلخت الاستراحه مكان والله مش اكتر من زنزانه والتكيف مش شغال وحاجه تقرف المهم قلت اتفرج عليهم وهما شغالين فى العربيه عالم بصراحه حسبى الله ونعمه الوكيل فيهم كسروا مسمار العجل واتخانقت معاهم والكمبيوتر عطلان بتاع كروت صرف قطع الغيار وبتاع المخازن جاى الشغل متاخر والزباين تولع المهم وقت الحساب قالى 209 جنيه قلته ليه فهمنى دول بتوع ايه قلى مسمار العجل 60 جنيه بصراحه قلت انتوا ( ولاد تيييييييييييت ) ومصنعيات وتربط عفشه وضريبه وكلام فاضى ومفيش اى فلتر اتغير اصلا غير ان فى كام واحد من اللى بيستلم العربيه اول لما بيركبها بيطلع بيها امريكانى وطبعا ده شئ مستفذ جدا
حسبى الله ونعمه الوكيل فيهم

[enhrmmo]

زى الزفت
العربيات تروح هناك مفيهاش حاجه
ترجع مش عارف بتبقى غريبه
حرام عليكم
خدمة عملاء مش معقوله
المفروض تسموها ايذاء العملاء
حرام عليكم اتقوا الله فينا
احهزه بايظه على سبيل المثال ( جهاز الترصيص بايظ ) زى مقالى المهندس المحترم بتاعهم
مش عارف ده مكان عمل صيانه فى ابو رواش معلش ده معهد للتدريب لتلامذة كى جى وان
علشان ااخذ معاد صيانه ادوخ السبع دوخات منكم لله
الرقم المشئوم بتاعهم قال 16101
خلونى كرهت رقم 6 و0 و1 وخلونى كرهت التليفون من اصله

[MEMES]

بصراحه انا روحت ابو رواش مره واحده وكالعاده اتخنقت واتخانقت وحاجه اخر اهمال واخر قله ذوق
وقررت ماروحش تانى ابدااااااااااااااا

و الحمد لله بتعامل مع مركز الغالى فى السويس و مركز حورس فى الزمالك والاتنين محترمين وممتازين فى شغلهم جدا جدا

اعتقد ان غبور لازم يعيد النظر فى اداء ابو رواش وقليوب

[mada_76]

انا حكيت حكايتي مع غبور ده كتير اوي
عشان كده هاختصر عليكوا واقولكوا انه المفروض يكون اسمه ( هبووووووووووووووووووووور ) مش غبور

[heshambek]

انا رحت اعمل صيانة ال20,000 و قالي هنغيرلك حاجات بسيطه وهنشيك على كذا وكذا وكذا. وقال التكلفه هتبقى حوالي 550 جنيه.
بعد لما خلصوا الصيانه اكتشفت انهم غيروا كل الحاجات حتى الي كانت كويسه ( طبعا اسهل ما يشيكوا عليها ويشوفوا كويسه ولا لأ) والصيانه اتكلفت 800 جنيه. لولا ستر ربنا وكان معايا مبلغ زياده كان زمان العربيه باتت عندهم. تاني حاجه حصلت انهم بوظولي فرش العربيه الاصلي وبقى كلـــــــــــه شحم بسبب ايدهم المشحمه. هما طبعا بيحطوا بلاستيك على كرسي السواق انما الباقي مبيحطوش عليه حاجه وبالتالي لما ييجوا يغيروا فلتر البنزين (اسفل الكنبه الخلفيه) طبعا لازم يوسخوا امها مش يراعوا نظافة العربيه.

قمه في التخلف بس مضطر اروح لغاية لما اطلع من الضمان

انا رأيي تعمل الاتى بسبب وساخة الفرش:-
1- تقول لمدير المركز ينظف الفرش او يغيره.
2- فى حالة عدم استجابته ترسل شكوى لجهاز حماية المستهلك.
3- فى حالة عدم الاستجابة ترسل شكوى للشركة الام فى كوريا و هما دول اللى هيجيبولك حقك.
الناس دول ما بيهزروش و ما عندهمش رحمة فى الشغل يعنى ممكن يعلقوا غبور من ......... علشان ما صلحش ما افسده الافندية بتوعه ....
و على فكرة الموضوع ده متجرب و هتلاقى فرق كبير اوى فى المعاملة..
و لازم نتفق جميعا على مبدأ:-
عدم تضييع حقوقنا فى بلدنا.
يعنى اى حد يشوف اى اهمال من اى نوع لازم يشتكى و ياخد حقه.
و لو ما خدش حقه فى مصر يلجأ للشركة الام و هما اكيد هيجيبولك حقك حفاظا على سمعتهم..
و لكم جزيل الشكر

[khaled65]

يا جماعة أنا شايف ان جميع المشاكل تتعلق بالناحية النفسية لسؤ الأستقبال و الأهمال الشديد في العمل وعلى فكرة أعتقد أن هذه المسئلة حالة عامة في معظم شعبنا المصري حيث أصبحنا جميعا بلا ضمير و أصبحت السلوكيات سيئة للغاية و أعتقد أن كل و احد منا يفعل ذلك في المكان الذي يعمل به فأصبحنا لا نخاف ربنا و لا نعتني بما نفعلة ، فماذا يفعل صاحب التوكيل أذا كان الموظفين لديه لا يملكون أي ضمير و لا يتابعون أعمالهم فهل سيقف وراء كل موظف و عامل لديه ، فأرجوا أن نصلح من حالنا لأن عندما يأتي صاحب التوكيل أو أي عمل آخر بأنها خدمات عامل أو موظف لسوء سلوكة أو أهمالة في العمل تقوم الدنيا و لاتقعد و ندعي دائما أن عندنا بطالة و لكن مع الأسف نحن شعب لا يريد أن يعمل و نتمتع فقط بالفهلوة و قلة الضمير. و أسف على الأطالة .

[amr_loveu]

يا جماعة حد راح المركز اللى فى العبور ولو حد راح ياريت يقولنا دا كويس ولا زى الباقى واكون شاكر جدا ليكوا

[houseiny]

انا رأيي تعمل الاتى بسبب وساخة الفرش:-
1- تقول لمدير المركز ينظف الفرش او يغيره.
2- فى حالة عدم استجابته ترسل شكوى لجهاز حماية المستهلك.
3- فى حالة عدم الاستجابة ترسل شكوى للشركة الام فى كوريا و هما دول اللى هيجيبولك حقك.
الناس دول ما بيهزروش و ما عندهمش رحمة فى الشغل يعنى ممكن يعلقوا غبور من ......... علشان ما صلحش ما افسده الافندية بتوعه ....
و على فكرة الموضوع ده متجرب و هتلاقى فرق كبير اوى فى المعاملة..
و لازم نتفق جميعا على مبدأ:-
عدم تضييع حقوقنا فى بلدنا.
يعنى اى حد يشوف اى اهمال من اى نوع لازم يشتكى و ياخد حقه.
و لو ما خدش حقه فى مصر يلجأ للشركة الام و هما اكيد هيجيبولك حقك حفاظا على سمعتهم..
و لكم جزيل الشكر

على فكرة انا عملت كده قبل كده ، وهللت في التوكيل لأن عربيتي قعدت لحد الساعة 10 بالليل ومخلصتش ومشيت بيها بايظة ومدير الورشة نزلتله الساعة تسعة قالي لو الساعة جت عشرة ابقى اتكلم ، الساعة جت عشرة ونص ومخلصتش مخلتش كلام يتقال يا معلمين وسمعتهم اصوات كريهة وشتائم لا تعد ولا تحصي وطبعاً كتبت تقرير زي الزفت في صندوق الشكاوي وكتبت اقرتاحاتي في تعديل سياسة المركز والله تاني يوم كلمني واحد بيترجاني اسكت لما مدير الفرع يتصل بيه وقالي هنعملك كل اللي انت عايزه بس حاول تصلح اللي انت كتبته ، طبعاً لما مدير الفرع كلمني قولتله اللي حصل وقولتله على الراجل قالهولي ، الراجل مشكور قالي بكره الساعة تسعة حضرتك تشرفني وهتتنتظرك أنسة نسمة تتابع معاك ، والله يا جدعان كان استقبال الملوك وطبعاً طبطبة عليه ومراضية اكتر من مرة وفي الأخر العربية خلصت في ساعة والسنتر أتغير بالكامل واللي عرفته من واحد صاحبي شغال اصلاً في غبور ان الفرع اتف.... الشهر ده في الحافز وعرفه ان الله حق ، خد حقك ومتسيبوش واشتكي ولو وصلت انك تقابل رؤوف غبور شخصيأ ماحدش ليه عندك حاجة وخاصة كلب السرايا اللي اسمه أحمد فريد اللي كان في الاستقبال ده / ده كانوا حطينه عشان يخوفوا بيه العملاء أنا ما عرفش موجود لسه ولا غار في دهية ، بس فعلاً انا من ساعتها بتعامل مع مركز معتمد ( مش هقول اسمه طبعاً غير لما ألإدارة توافق عشان ميبقاش اعلان) وبصراحة ناس أخر ادب وأمانة وسلملي عالكوري ، ان شاء الله هبيع وعمري ما هاركب كوري تاني لو هاشحت / الياباني يلباني برضه والاوروبي باشا بس ربنا يبعت ان شاء الله ، والله مش قصدي أجرح في حد بس حبيت انقل الموقف عشان كلنا نطلب حقنا حتى لو هنبات في التوكيل بس يانا يا هما

[Sh_sunsea]

بإذن الله الاسبوع القادم هاعمل صيانة 80 في مودرن سيرفس عند السندباد - كأول صيانة خارج أبورواش - أخيرا

حد عنده أي نصائح في التعامل معاهم

[ELGASERCBR]

فرع الغردقه
منتهي الروعه والاحترام انا روحت اعمل صيانه في غبور الغردقه وكنت واخد فكره سيئه عن غبور من كلام الاعضاء فكنت رخم جدا معاهم بس بسرعه بداءت اهداء من الاحترام في المعامله والاهتمام العالي بكل التفاصيل والغريبه ان مدير الفرع بيشرف علي كل حاجه بنفسه وكان عندي مشكله في المرايا اليمين وكان في مهندس عايز يصلحها والمدير قال تتغير واهم حاجه ان العربيه قدام عنيك مبتختفيش من قدام عنيك خالص انت قاعد في الكافتيريا وشايف الورش من زجاج الكافتيريا وعلي فكره عدد العربيات مش قليل الهيونداي في الغردقه مليانه بدرجه غريبه جدا تحس انهم بيوزعوها علي البطاقه