تقييم شامل لسيارات هيونداى ... من تجارب الأعضاء

[Mo3taz Selim]

الموضوع ده فى بالى من كام يوم و كنت عايز اخذ رأيكم فيه ...
كل واحد فينا من ملاك سيارات هيونداى يعمل تقييم شامل لعربيته منذ أن أشتراها حتى الأن يعنى أيه مميزاتها و أيه عيوبها .... و أيه اللى كان قلقان منه قبل الشراء و بعد ما أشترى لم يجد لهذا القلق وجود .... و هل فى عيب موجود فى سيارته و لم يستطيع حله حتى الأن ....
يعنى كل واحد كده يفكر و يكتب و هانخلى الموضوع ده زى مرجع لكل اللى عايز يشترى هيونداى بأى موديل ليها يقدر يقرأه و يلاقى كل اللى هو عايزه من تقييم من واقع تجارب عمليه و هابتدأ بنفسى :) :)

سيارتى إلانترا موديل 2007 مانيوال... اللون كحلى ... جميع الكماليات ... أستلمتها منذ 28 ديسمبر 2006 حتى الأن ... السياره دلوقتى عامله 14000 كم فى 8 شهور بصراحه السياره كلمة ممتازه ده قليل عليها جدا ... ثبات رائع ... تسارع جبار ... إتساع داخلى متميز (من أوسع السيارات فى فئتها) ... إضاءة تابلوه خلابه ... إستهلاك بنزين جيد جدا ... عزل داخلى ممتاز لدرجة إن صوت الماتور مش مسموع فى المشى العادى لكن عند التسارع و الجرى بيبقى ليه نغم ممتاز ... تكييف تلاجه بمعنى الكلمه ... علو مقبول عن الأرض ... تقفيل جذاب لحوض الماتور و شنطة العده ... من أكتر الحاجات اللى بتعجبنى فيها جدا (Power Steering) ...

العيب اللى كان موجود و أعتقد إن ده من داخلى (أى أحساس داخلى لأننى كنت راكب أتوماتيك من قبل) و هو الفيتيس كنت بحس إنه مش سلس الكلام ده فى الأول ... لكن دلوقتى بعد ما أتعودت عليها و على نقلاتها بحس إنه شبه بينقل لوحده بمعنى إنه بيروح على النقله اللى أنا عايزها...و فى برده عيب كمان ده كان حصل و أنا بفتح باب السائق من الداخل سمعت صوت طرقعه و لاقيت سقاطة الباب زى ما تكون مياه ... و الموضوع ده ظبطوه فى التوكيل بدون ولا مليم ...

الشىء اللى كنت مقلق منه قبل الشراء هو موضوع الثبات الخاص بالسياره ... لكن ماشاء الله السياره ثابته لدرجة إن كنت وصلت لسرعة 180 مره بدون ما أشعر غير لما بصيت على العداد


طبعا ده تقييم سريع و فى انتظار كل ملاك هيونداى لأضافة تقييماتهم :D :D

[Hossam Mounir]

أولاً : بشكر مشرفنا العزيز أ/ معتز سليم ... على الفكرة الحلوة دى ... وهيا أتاحة الفرصة لكل واحد انه يتكلم عن عربيتة ... ويقول مميزاتها وعيوبها فعلاً ... فكرة هايلة أحييك عليها يا معتز ...

ثانياً : عربيتى هيونداى ألنترا أتوماتيك رمادى ميتاليك ...

أستلمتها فى 03/06/2007 ... عامل بيها لحد النهاردة ... حوالي 3650 كم ...

راضي تماماً والحمد لله ... على العربية ككل ... وأرى أنها - بالنسبة لي - كان أختيار موفق جداً...

ثالثاً : المميزات ...
كل اللى قاله معتز + حاجتين :
- السحب ... يا جماعة فعلاً السحب فيها مش طبيعى ... أنا كنت خايف من الموضوع ده جداً ... جداً ... علشان الأتوماتيك ... الحقيقة بعد معايشة التجربة ... الموضوع مختلف عن اى عربية 1600 cc أنأ ركبتها ... وده رد على المشككين عالمياً ... فى تزوير قوة مواتير ال Hyundai ... عموماً أنا بقول العربية دى فعلاً باين فيها قوى ال 121 HP ... بالأضافة إلى العزم الجبار 15.6 Kg.m عند 4200 RPM وده الحقيقة أحدى أسباب نجاح العربية دى من وجهة نظرى فى السوق ...وده على أعتبار أن أرقام المبيعات اللى محقاقها العربية دى نجاح ...

- الشياكة اللى مش طبيعية ... والحقيقة الموضوع ده ... كان فارق معايا وأنا بشترى ... وخاصة مع الكاسيت ال Original والتكييف التاتش ... فرقين أوى فى شياكة العربية

رابعاً : العيوب ...
- أرتفاع سعر العربية ...مقارانة بمثيلتها من السيارات اليابانى فى نفس الفئة ... الانسر ... والصني ...
- توكيل دائماً مزدحم ... ولابد من الحجز ... لا مبالاة غير طبيعية من الأصطاف القائم بأعمل الصيانة من مهندسيين وفنيين ... وإن كنا ممكن نرجع هذا للضغط الشديد نتيجة تخمة المبيعات ... التى لا تقابل بزيادة مراكز الصيانة المعتمدة أو تنمية مهارات الكوادر الفنية ....لتواكب التكنولوجيا المستحدثة فى الموديلات الجديدة ...
- الصاج ... طبعاً ... وديه مصيبة سوداء ... أن الصاج ضعيف ... والأكصدمات اللى انا بعتبر أن الأسم ده غلط ... علشان ديه عبارة عن Cover - مصنوع من الفيبر المقوى -للشاسية ... حتى تكتمل شياكة السيارة ... ولهذا يجب أن تتم القيادة بمنتهى الحرص ... علشان صاحب العربية هيبقى هو اللى ندمان ... والستار موجود ...
- الركنة الصعبة جداً ... جداً ... بدون مبالغة ... لأنك مش شايف أى حدود للعربية بالأضافة لأن العربية عريضة ... فبعد ما بركن بحس أنى طالع فى الشارع يعنى بره حدود الركن مقارنة بالعربيات اللى أمامى واللى خلفى ... أثناء الركن موازياً للرصيف ...

تحياتى للجميع ...

م / حسام منير

[Tarek Fadl]

السلام عليكم ورحمة الله وبركاته
انا برده بعد ما بعت كوكة البعكوكة ال 128 اشتريت فيرنا 1500 / MT معايا بقي لها حوالي 20 يوم عملت بها حوالي 1500 كم منهم حوالي 600 كم سفر طوالي من القاهرة الي مرسي علم محستش فيها اني مسافر وتقييمي للسيارة :
1 - من الداخل الصالون معقول في الوسع بس التنجيد مش حلو اوي " لكن يمشي " والشنطة كبيرة وواسعة والتابلوه من وجهة نظري جيد والكاسيت كويس
2 - العفشة اكثر من ممتازة في امتصاص الصدمات والمرونة الكاملة في المطبات
3 - التكييف ثلاجة وعمري ما زودته عن 2
4 - الموتور صوته خشن وده اسوا حاجه في العربية لكنه قوي و السحب اكثر من ممتاز بالنسبة للفئة ال 1500 سي سي
5 - الثبات معقول لغاية 140 وانا مجربتش اكثر من كده لكن لغاية 140 كانت العربية كويسة وعلي ال 120 ممتازة خصوصا في الملفات مفيش اي مشكلة ويعيبها انك تحس فعلا ان العربية خفيفة
6 - الشكل الخارجي رائعة وتنافس فئات اعلي منها في الشكل الخارجي خصوصا ان كل ابعاد العربية واضحة وانت سايق
7 - استهلاك الوقود : اقتصادية جدا ( سافرت 600 كم ب 41 لتر بنزين مع التكييف اي 6.8 لتر / 100 كم )
8 - قطع الغيار والصيانة مش مكلفة
يارب ما اكونش طولت عليكم لكن ده تجربتي لغاية دلوقتي مع الفيرنا يعني من الاخر حاسس ان انا دفعت فلوسي في حاجة تستاهل ومش ندمان

[casperinoo]

السلام عليكم ورحمة الله وبركاته
انا معايا اتوس بريم 2008 وعملت بيها 1400 كم..وانا حيبها فول ابشن ب 60500 بس من غير كاسيت وسنتر
اولا انا طالب جامعي وكنت عايز حاجه صغيره كده علي قدي ويكون ال سي سي قليل طبعا علشان البنزين وكده((لسه باخد مصروف ))
العربيه سحبها كويس جدا ..قولت يمكن علشان جديده..بس ناس كتير من اللي كانو عندهم الاتوس القديمه برده قالو كده
من جوه واسعه نوعا ما والتكيف كويس جدا ..التابلوه البلاستيك بتاعه مش اللي هوا.,..بس التنجيد الكراسي والسقف كويس جدا

العربيه شكلها مش بطال..احسن كتييير جدا من القديمه..احسن من عربيات كتير في تمنها ((الاونو فاير والسبارك والشارد))
باستسناء البيكنتو

العربيه طويله شويه...بحس ان انا اعلي من الناس في الشارع :mrgreen: .....وكنت خايف ان ده يكون ياثر علي ثباتها بس جبت بيها 140 وكنت ماشيه هاديه برده ومش حاسس بيها


التكيف لما بشغله بيأثر علي اداء العربيه جامد..اللع اعلم ده الطبيعي ولا لأ
طبعا انا راضي بالعربيه والحمد لله((بس لو قدامك البيكانتو هاتها احسن))((حكمي علي اساس الشكل وكلام الناس عنها وعلشان تبعد عن غبور باشا)) :lol: :lol:

[abo3bdolrahman]

كانت معايا الفرنا 1600 أتوماتيك آخر 2004 و كانت تجميع كورى كانت ممتازة فى الثبات و السرعة و كل حاجة.
أهم العيوب كانت السعر نزل بسرعة كنت جايبها ب 90 الف و وصلت ل 74 الف فى سنة و نصف.
و العيب التانى التوكيل.

[bassam nagy]

الحمد اللة عدت سنة على امتالكى لسيارة هيونداى ماتريكس 7/2006 وماشاء اللة كل يوم بيزيد اقتناعى بيها المشكلة الوحيدة الية فى العربية الانذار الية مركبة غبور مايعديش علية شهر الا مايتصلح والمهم ان المفتاح كذا مرة القية فى جيبى مفكوك كذا حتة واجمعة بنفسى غيركدة ماشاء اللة العربية فوق الممتازة

أن الفيرنا موتورها ممتاز ووزنها أكيد مناسب لقوة الموتور

الفيرنا عليها موتور غريب بمعنى الكلمة عاوز يجرى لوحدة وتجميعا رهيب بس عيبها لايوجد ثبات على السرعات العالية من وجهة نظرى

[belal rashed]

يا ريت يا جماعه لو حد إكسل يكتب عن تجربته معاها لأنى بفكر اشتريها,وشكرا مقدما

[mohamed hatem]

سلام الله عليكم جميعا
بصراحة فكرة التقييم دي جامده جدا لان انا واحد من الناس بحب اسأل قبل ما اشتري وفعلا قاعدت ادور في المواقع المصرية العادية حتى اللي مش مصرية ملقيتش اللي يكفي الاحتياج...فربنا يكرمكم على مجهودكم
انا معايا اكسنت 2006 الشكل القديم.....طبعا انا حسيت بفرق كبير بيها لان كان معايا 128 قبلها ...بس بصراحة انا سوقت عربيات انواع كنير وراي بصراحه كالاتي :
- الهيونداي اللي بيتميز في جدا الموتور...يعني لو عايز حاجه قريبه للمواتير الياباني بسعر معقول يبقى الهيونداي بس طبعا مش زي الياباني ولا هيوصله حتى في الالنترا مع العذر للناس اصحابها ...لانهم لو جربو اللانسر 1600 او الكرولا 1600 وخصوصا المانيوال (وانا مبقطنعش بقياس السحب باتوماتيك) هيعرفو يعني ايه سحب طبعا انا بتكلم في الحجات اللي في نفس المستوى ملناش دعوه بالالماني و لا غيره
- بالنسبة للتقفيل فده في كلام كتييييييير طبعا التقفيل المصري نبقى غلطانين لو اتكلمنا عليه اصلا لانه لا يصلح لشء واسأله مجرب لان الاكسنت اللي معايا حاسس انها متركب فيها بلاستيك من اللي هو معمول من الزباله اللي معاد تصنعها ولو اتفك من مكانه مش هيرجع تانه ومش راكب على بعضه صح وتلاقي فروق ....لاني ركبت الهيونداي تقفيل بره ولقيت حاجه تانيه خالص بصراحه غبور بيكسب من التجميع بوهم
والغريب ان الدايو كان بيتجمع في مصر بس موصلش للسوء ده ..وده دليل على ان التوكيل نفسه هو اللي بيدور على شفط فلوسنا من كافة الاتجاهات
- من حيث الثبات و العفشة في الهيونداي يخسر قدام الدايو بصراحة انا جربت النوبيرا وقاعدت معايا فترة فرق تاني خالص حتى اللانوس فرقه كتير عن الهيونداي بس طبعا مشاكل العفشة و الثبات بيتحلو مع الجنوط و ظبط المساعدين وخلافه فا ممكن ما يبقاش مهم بالنسبة لناس معينه
-من حيث الصاج فده برده ما ينفعش نتكلم عنه لان كل الجديد كده ......و على اد فلوسك تاخد صاجك
- اما بالنسبة للسعر فا انا شايف انهم ابتدو يبقى مغالى فيه لان انا عن نفسي لما هاجي اغير مش هجيب هيونداي وفي ياباني بنفس السعر حتى لو 1300 زي الياريس لان 1300 في التويوتا قريب جدا من 1500 وممكن كمان 1600 في الهيونداي وطبعا اليابانى على معرفتي بيه ...موتور بيعيش لو ايدك فيه ومهتم بيه غير ان الصاج و العفشة في الياباني حاجه تانيه حتى الفيبر اللي راكب تحسه اجمد
- طبعا انا معاكو ان قطع الغيار عامل مهم وخصوصا للي معوش يدفع وبصراحه قطع غيار الهيونداي ارخص من الحجات التانيه بس لم معاك تدفع مش هتفرق ساعتها

مجمل القول ان الهيونداي تشترى في حالة ان معكش غير ثمن الهيونداي لان مجملها احسن من غيرها وخصوصا في مستوى الميزانيه القليله ..................لكن لو معاك فلوس فكر كويس وقارن كويس

[Ahmed Anwer]

اختلف معاك قليلآ يا أخ Mohamed Hatem ، اعتقد إن الفرق بين الياباني و الكوري بقي قريب جدا،
و اعتقد إن لحد 100 ألف هيبقي الأفضل الكوري لأنك هتاخد مواصفات و اوبشن كتير و جودة بسعر معقول في الكوري لكن في الياباني في الحدود دي مش هتاخد غير إن اسمها ياباني ده رأيي الشخصي و قارن بين الياريس و الأوبترا مثلآ
طبعا ، الناس اللي بتشتري بفلوس اكتر من كده مبتفرقش معاهم اوي فرق 10 الاف او حتي 20 الف من كوري لياباني فطبعا بيجيبوا الياباني و عشان كده تلاقي هيونداي مبتبعيش اوي في الموديلات العالية زي السوناتا لكن في الموديلات الشعبية هيا مكتسحة
بخصوص عمر العربية و التحمل فبصراحة في كل أنواع الصناعات و كل فئاتها و بلادها مبقاش حد يهتم بحكاية العمر و التحمل دي شوف الربيات بقي كلها فيبر و صفيح مش صاج لأنك لو مش هتغير عشان العربية فتحت بقها هتغير عشان التطور بقي أسرع بكتير
هضربلك مثل للمقارنة بين الكوري و الياباني في الفئة دي ، واحد قريبي كان عنده نوبيرا اتوماتيك (و انتا عارف سمعة النوبيرا و كمان تجميع مصري) و باعها فنجرة كده و قال اجيب ياباني اللي بنفس السعر كان ساعتها المرحومة الإيكو سيدان اتوماتيك برده (تويوتا بقه ،حاسب يعني) و ما استحملش الإيكو ست اشهر وكان بقوللي انا حسيت إنها عربية لعبة بالنسبة للنوبيرا و ندم اشد الندم علي التغيير ده

[eng_amrazek]

مفيش حد جرب النيو اكسنت يقول ملاحظاته عليها
ياريت للافادة

[amir]

اين المشرفيين!!!!!!!!!!!!!!!

بدون ذكر اسماء لاكن الراجل عامل الموضوع للافاده العامه, اللي تحولت لساحه تباهي و استعراض ( حقيقي او وهمي ) ارجو من المشرف ازاله الموضيع الخارجه عن اساس الموضوع بما فيهم رساتي دي و اتمني موضوع تقييم العربيات المملوكه يبقي متبت و يتم في باقي الموديلات و شكرا

[belal rashed]

إيه يا جماعه ما حدش جرب الإكسيل 1500 ccولا إيه؟؟؟

[MOH_EGYPT77]

السلام عليكم

ربنا وفقني واشتريت عربية هيونداي اكسنت 2006 موتور 1300

قدرة الموتور 1300 مناسبة جدا مع حجم العربية والتكيييف مش بطال والعربية ثابتة علي الطريق في السرعات العالية

بس لما اشتريت العربية كان بها خدوش ودهان العربية اصلا ضعيف مع عوامل التعرية بيدمر والله

سؤال ؟؟؟؟؟؟؟

هو انا لو رشيت اجزاء من العربية لزوم النظافة هل ده يقل من ثمن العربية ؟؟؟؟؟؟؟؟؟؟؟؟؟؟؟؟؟؟؟؟؟؟؟

[Ahmed Anwer]

سبحان الله ،،،
نفس العربية كل واحد بيقيهما بشكل ،،،
حكاية الدهان ضعيف و سهل الخدش في السيارات المحلي دي عندي برده
معتقدش ليه لازمه ترشها ،، وش نظافة ،، عشان تجاريح
لو في خبطات ماشي

[مدحت منيب]

اتنين ماتريكس اوتو و عادة2007 و 2008 ولا اى حاجة غلط الا طبعا الريموت الهباب اللى مش عارف غبور مصمم يدى حق توريدة و تركيبة ل عشم نوارة لية ...يقرب لة اية ؟ موش عارف ...و مراكز الخدمة ماليش دعوة بيها نهاى من اول ما اشترى اى عربية لحد ما ابيعها ف ما بعيطش كتير ( مبداى هين قرشك ,ولا تهين نفسك ) اما موضوع الشد و التسارع و الثبات دى مشاكل ما اعرفهاش اساسا لانى اكرة الجرى جدا وكل سفرياتى من 80 ل 95