تقييم شامل لسيارات هيونداى ... من تجارب الأعضاء

[islamkoo]

العربية الهيونداى حلوة فى الشكل و الماكينة بس متهئالى كاهيكل ليس على المستوى المطلوب

[Ahmed Anwer]

يا جماعة أنا عملت بنصيحة ا/بايووو
و بعت ميلات للعنواين التالية
Email:aamer@ghabbour.com
ده البريد الأكتروني الخاص بشركة إيتامكو (غبور)

http://ir.hyundai-motor.com/eng/index.html

وده لينك للتعليق المباشر لدى الشركه الأم

ودول صندوقين بريد للشركة الأم

yangsh@hyundai-motor.com
gizi@hyundai-motor.com

لازم تنقل شكوتك لهم ويبقى عملت إللي عليك

المزيد فى هذا اللينك

http://www.nilemotors.net/Forum/viewtopic.php?t=6413

و اديتهم من المنقي ، و إزاي و كيف خامس أكبر شركة في العالم تحط علامتها علي عربية زي الفيرنا و دي عربية كذا و كذا و شركتها خالص
المهم مفيش أربع ايام لقيت م/هاني مصطفي مدير مركز أبو رواش بيكلمني شخصيا ،، أنا كنت اعرفه قبل كده ،، و قالي انتا زعلان ليه تعاللي عشان أعملك اللي انتا عايزه وكان كمان شوية هيعيط في التليفون ،، بصراحة أنا أصلآ مفيش حاجة مضايقاني للدرجة في العربية ، حاجات بسيطة مكنتش حاططها في دماغي ، فمعرفتش أقله أيه ،، قلتله أنا مش فاضي هاجيلك بعد العيد ،، أقعد يتحايل عليا أجي قبل العيد ، قلتله مفيش وقت ، قاللي براحتك عموما الملف بتاعك عندي شخصيا ، و اداني نمرة موبايله و قاللي كلمني في أي وقت
بفكر أروح أقولهم خدوا الفيرنا و ادوني سوناتا :D :D :D :D
فيا جماعة موضوع بعت ميل للشركة الأم ده فعال جدا ، و الناس بتهتم و ترد عالطول
كان في إقتراح إننا نبعت ميل بإسم أعضاء نايل موتورز أكبر سايت مصري للمهتمين بالسيارات ،،شوفوا بقه هتبعتوا تشتكوا من غبور في إيه ؟؟؟ و أنا مستعد أساهم معاكم

[M_HaFeZ]

يا ريت يا جماعه لو حد إكسل يكتب عن تجربته معاها لأنى بفكر اشتريها,وشكرا مقدما

باضم صوتى لصوت الاستاذ بلال لانى برضه ناوى باذن الله على شراؤها وعايز راى ناس حريفه سواقه مع عربيه نزلت من اكتر من 10 سنين فاكيد شافوا كتير معاها

[M_HaFeZ]

????????????????????????????????

[darkscorpion]

السلام عليكم
انا عندى فرنا 2007 مانوال كامله سوداء عامل بيها 18000 كم و احب ااكد على موضوع السحب بتاع الفرنا
موتور ممتاز و تكييف تحفه و عفشه ناعمة و شكل خارجى جميل
تقفيل سيء و خامة بلاستيك رديئة فى التابلوه و اطارات سيئه (175/70-R13) و اتزان سيء و فرامل ضعيفة
العربية اختيار موفق جدا جدا و عبوبها ما بتبنش الا فى السرعات العاليه
العيب الوحيد اللى بيبان فى لى سرعه و اسواء عيب هو الحدفه اليمين و حاولت معاه زوايا و ترصيص مفيش فايده
انا جربت العربيه على كل الطرق و راض عن ادائها بالنسبه لسعرها .. اللا موضوع الحدفه ده مقرف جدا

[Ahmed Anwer]

و اطارات سيئه (175/70-R13)

لو غيرت لجنوط 14 زي الفيرنا الأتوماتيك و كاوتش جديد

المشكلة دي هتروح عشان عندي في الأتوماتيك جنوطها بتنزل 14 و العفشة هيا هيا مفيش اختلاف

[darkscorpion]

هابدٍل جنوطى مع واحد صاحبى (60/195-R14) جديده و هاقوللك النتيجه
ااه و على فكره انا عاوز اعرف ازاى احط صورة زى اللادا الللى انت حاططها مع كل رساله :)

[Ahmed Anwer]

هابدٍل جنوطى مع واحد صاحبى (60/195-R14) جديده و هاقوللك النتيجه

يستحسن بالمرة مادام كده كده هتغير تغيرها بجنوط اسبور

منها تجمل شكل العربية و منها تبقي اثبت من الجنوط الحديد عشان بتعرض الكاوتش حتي لو نفس المقاس

علي فكرة انا غيرت الجنوط و الكاوتش علي حساب الضمان

ااه و على فكره انا عاوز اعرف ازاى احط صورة زى اللادا الللى انت حاططها مع كل رساله :)

بتحمل الصورة علي اي موقع تحميل صور زي www.0zz0.com

و بعد كده تحط لينك المنتديات في التوقيع من الملف الشخصي بس اختار صورة صغيرة او صغرها بنافسك عشان متبوظشي شكل الصفحات

[M_A_elSyofi]

يا ريت حد يدينا راييه في New Accent

[hofo]

احنا عندنا اكسل موديل 96 الهاتشباك و الصراحة العربية من اول ما جبناها عمرنا ما اشتكينا منها وكل اللى غيرناه فى العربية من ساعت ما جت هو الزيت والفلاتر وسير التقسية واسطوانة الدبرياج والكاوتش فقط لاغير


العربية 1300 سىسى ولا يوجد بها تكييف او بور فقط الكاسيت والسنترلوك ومروحة للصالون سخن و بارد والعربية انجكشن يعنى مفهاش كربيراتير واول ما جت كنا بنحط بنزين 80 لغاية سنة 99 تقريبا و بدأنا نحط بنزين 90 والصراحة محسناش بفرق والعربية لغاية دلوقتى عاملة 190 الف كيلو (اصل احنا من الاسكندرية والشغل فى الساحل الشمالى تقريبا 100 كيلو يوميا رايح جاى)


العيوب التى ظهرت على العربية فى الاونة الاخيرة :

اولا العربية بئت بتاكل بنزين كتير عن اول ماجت وبتعمل تقريبا 90 كيلو فى ال 10 لتر داخل البل
د
ثانيا الموتور ضعف وفعلا حاسس بضعف الموتور يعنى فى الاول لما كنت اركب فيها العمال (5 اشخاص+انا) واضغط بنزين الاقى العربية بتمشى وتتسارع بشكل ممتاز وكلما ضغط اكثر تستجيب العربية

اما الان عند نفس الحمولة ونفس ضغطة البنزين العربية لا تتسارع واسمع صوت كركرة فى الموتور وكل ما اضغط اكتر اسمع صوت الكركرة اعلى واعلى وعشان تزيد سرعتها لازم اضغط واحدة واحدة لغايو ما تاخد سرعتها (الموتور شكله عجز)
ملحوظة (حكاية الكركرة دية ما بتحصلش غير وانا معايا ناس كتير )

ثالثا صوت الموتور بئه عالى وعامل زى العربيات النص نقل بس ده لو انا واقف بره وفاتح الكبوت لكن بداخل الصالون تسمعه كأنه عادى

رابعا السرعة القصوى للسيارة فى الاول كانت بتجيب ال 160 عادى وساعات كانت بتعدى ال 160 (على حسب الطريق واتجاه الرياح)
لكن دلوقتى للاسف العربية اخرها 150 وده وانا جايب دواسة البنزين على الاخر وساعات ماتعديش ال 140

عموما العربية كويسة واحنا كان عندنا 128 ولادا
ال 128 اتكسرت ايوة اتكسرت بمعنى الكلمة والسبب انها عدت على حفرة جامدة واحنا ماشيين بسرعة مع العلم ان العربية على سرعة 100 كيلو تحس انها حتتفكك من بعضها
والادا اعفن عربية ركبتها فى حياتى صوتها كأنى فى ورشة وكنت أكنى راكب فى مرجيحة بترجنى وفى الاخر برده اتكسرت (العجل الامامى نزل تحت العربية )

واى سؤال عن العربية انا فى الخدمة


اه بالمناسبة انا ركبت عربية هيونداى سوناتا موديل 2004 ويا لهوى يا جماعة على اللى انا شفته العربية وهم بمعنى الكلمة وفعلا فخمة وتقعد جواها ولا تحس بالدنيا واحسن بكتير من اللانسر والالنترا والكورولا (على فكرة انا ركبت الكورولا والالنترا كتير) السوناتا دية كانت من ليبيا يعنى اكيد تجميع كورى مش زى بتاعتنا اللى فى مصر

[hofo]

اه نست بالنسبة للبيقول يبانى وكورى

انا واحد صاحبى وهو بيشترى معايا سنة 96 فضل يجيب السوزوكى سويفت لانها يابانى وانا جبت الاكسل دلوقتى فى سنة 2007 شوف العربيتين وشوف مين الاحسن
صاحبى وبدون شماته ندمان اشد الندم على اختياره وبيقولى يارتنى كنت سمعت كلامك وعلى فكرة لغاية دلوقتى دافع تمن العربية مرتين بسبب الصيانة التى لاتنتهى ومشاكل العفشة عنده بالجملة

ويمكن الحاجة الوحيدة اللى فى السويفت احسن من عندى هى الموتور لان الصراحة عربيته ماتورها حلو بس ده برده مش مقياس لانى ماشى 190 الف كيلو وهو ماشى 130 الف كيلو تققريبا

[Ahmed Anwer]

الإكسيل عموما ،، في ناس كتير بتعتبرها أفضل من الأكسنت ،،

يمكن ده بسبب إنها كانت سيارة ميتسوبيشي قلبا و قالبا حتي إنها كانت بتباع في أمريكا تحت اسم ميتسوبيشي ،،

لكن الأكسنت كانت أول محرك هيونداي تماما ،،،

و يمكن عشان كده محركها اشتكي بسرعة باعتباره أول جيل محركات صناعة هيونداي ،،

أكيد الأجيال اللاحقة اتحسنت ،،، او إحنا نتمني ذلك ،،،

[Khalid_Mostafa]

انا معايا هيونداي اتوس (الشكل الجديد ) موديل 2005 وشاريها في شهر 3 2006 ودي مش غبوريه ولكن بيطلق عليها (Dodge Atos) وتحمل بدج المواصفات الخليجي وهي تقابل الـ GL بس مفيهاش ساعة ولا عداد rpm يعني كده بقالها معايا سنتين تقريباً وعامله 20000 كيلو

تقييمي للسياره انها رائعة بجميع المقاييس وعلي الرغم من انها مش في توكيل وملهاش ضمان إلا اني محتجتش اني اغير فيها حاجه تقريباً لحد دلوقتي
اشترتها بـ 53500 وركبتلها كاسيت و سنتر و إنذار .

السيارة معقولة جداً من حيث العفشه و الفرامل كما انها تتميز بالثبات في السرعات بعكس ما كنت اتوقع و بالرغم من إرتفاعها و صغر عرض الكاوتش و بالمناسبة ملاك الأتوس القديم كانوا بيحبوها جداً بالرغم من شكلها القديم القبيح

الموتور زي الفل و بيشد جامد جداً وعديت الـ السرعة لقرب الـ 150 بس خفت اكتر عن كده عشان الرادارات و الحاجات دي وده كان علي طريق العين السخنه ولكن فيه واحد علي اليوتيوب وصل لـ 180 ومصورها

المساحة الداخلية كويسه جداً مقارنة بشريحتها بل وبالسيارات السيدان الأخري وذلك شهادة اصحابها . الكنبة الخلفية مريحة جداً بشكل خاص وتعطي إحساس رائع بسبب إرتفاعها

بالنسبه للتابلوه مفيهوش رفاهية جامده ولكنه عملي جداً بالنسبة لمثيلتها من السيارات الأوروبية والكورية مثل البيكانتو ومع ذلك فالأتوس الغبورية نزلت بعدادات مختلفة شويه حيث تشمل عداد الـ RPM وده حسن شكل العدادات شويه

الشنطه مساحتها معقولة جداً بالنسبة لشرحتها كما ان طي المقاعد يعطي مساحة كبيرة جداً خصوصاً ان سقفها مرتفع

التكييف يعتبر مذهل حيث انه لا يؤثر علي اداء السيارة إطلاقاً سواء في السرعات العالية او المنخفضة .إستهلاك البنزين رائع وبأهتبر مواتير 1100 عملية جداً في مصر حيث ان اقل من ذلك يؤثر علي اداء السيارة و اكثر من ذلك لا يتم الإستفادة منه في مصر بالتحديد

قطع غيارها اغلبها متوفر بسبب الموديلات القديمة منها ولو اني لم احتاج لتغيير اي حاجه لحد دلوقتي

عيوبها :

فلتر الزيت في مكان يصعب الوصول له مما يجعل اغلب المحطات ترفض تغييره ولكن يمكن التلب علي ذلك لو واحد صنايعي شاطر

الكاوتش الرفيع بيخلي منظرها وحش (إن شاء الله حغيره بعريض و جنوط بس ادوبه شويه)

و اخيراً ديه صورتها :



واخيراً ركبتلها عداد RPM ديجيتال مكان الزراير الثلاثه الموجوده في التابلوه

ودي صورتها :

[Karim_Monir]

ممكن سؤال
انت جبت ال RPM الجيتال ده منين
ويا تري في احجام تانية منه
وهل هو عملي
اصلي مابقتنعش غير بالانلوج لانك ببصة واحد تعرف حالة الموتور غير الديجتال

[Khalid_Mostafa]

ممكن سؤال
انت جبت ال RPM الجيتال ده منين
ويا تري في احجام تانية منه
وهل هو عملي
اصلي مابقتنعش غير بالانلوج لانك ببصة واحد تعرف حالة الموتور غير الديجتال

بص يا كيمو....العداد الديجيتال ده انا الي عامل دايرته وانا الي مركبه والشاشه دي إستاندرد لكل المشاريع و الدوائر الصناعية وفيه منها سطر واحد او سطرين وبالصدفه البحته مقاسها كان مناسب للمكان

اما بالنسبه للعدادات الأنلوج فأنا مبحبش يكون فيه حاجه متركبه علي التابلوه كما ان الرخيص منها بيكون مالوش لزمه لأنه بعطي قراءه غلط غيركده انا حطور الموضوع ده عشان يديني كمان درجة حرارة كبينة الركاب