انا و م/هيثم رايحين التوكيل (مشكلة الخبط فى الدركسيون)

[أبو عبدالله]

السلام عليكم ورحمة الله وبركاته

انا والحمد لله بقالي يومين او اكتر بشوف موضوع الصوت ده
والحمد لله مع كلامي للتوكيل وسؤالهم استطعت أني ااتوصل للأتي وهذا كلام الوكيل مع تحليل مني لأنهم لم يتحدثو اليا في التفاصيل الميكانيكية قوي يعني ولكن بما اني كنت عارف الموضوع من قبل فاستنتجت الأتي :

أولا : احب ان اعرف المشكلة أولا علشان عدم التعريف بالمشكلة بيجعل بعض الناس يفهم الكلام خطأ او يستنتج استنتاجات خطأ وعلشان كده وجب معرفة المشكلة تفصيلا

تعريف المشكلة :

هو عبارة عن صوت زي طقطقه كده خفيفه يصدر من اسفل السيارة من الامام على الجانب الأيمن في الغالب

هذا الصوت ليس مستمر اي ليس على طول الخط وانما هذا الصوت يصدر في حالة واحده بس لا يوجد غيرها
الا وهيا انك تمشي بسرعه معينه على مطبات خفيفه خلف بعضها ( اللي هيا التمويجات اللي بتبقى في الأسفلت ودي سمة مصرية اصيلة )

هذا الصوت ليس له أي تأثير سواء على العفشة او على الباوور او على الثبات او على اي شئ في العربيه من حيث الاداء او العمر الأفتراضي لأنه ليس عيب في التصنيع مؤثر على شئ وانما هو عدم توافق مع الحالة المذكورة مسبقا ولي له اي علاقة بعلبة الدركسيون .

سبب المشكلة :

سبب المشكلة اني من زمان ومن قبل ما اشتري السيريون وانا عارف ان البدلات بتاعت البنزين والفرامل وتصميم الدركسيون مصممين على انهم عند حدوث اي اصطدام لا قدر الله لا يتسببوا في اعاقة قائد السيارة او اصابته منهم
لأن حضراتكم لو عارفين ان في الاختبارات بتاعت التصادم الأوروبية ممكن لو دواسة البنزين مثلا طلعت من مكانها العربيه بتنقص نجمة لأن من الممكن انها تسبب اصابة لقدم السائق واعاقة له من ذلك
ودي انا كنت شوفتها مره في توب جير من قبل

المهم

كلنا عارفين ان السيريون حاصلة على اربعة نجوم في اختبارات التصادم الأوروبية

وانا والله اقعدت أدور على الشرح بتاع الموضوع ده لأني كنت بشوفه عالطول

ولكني اكتشفت ان الموقع بتاع دايهاتسو اتجدد وشال الشرح ده
وكمان مش موجود في الكتالوج بتاع العربيه موديل 2008
المهم انا كنت عارف اني شوفته كمان في الكتالوج واقعدت ادور لحد ما لقيت كتالوج ايطالي عندي لقيت فيه الصور والشرح وفعلا لما ترجمة الشرح لقيته فعلا مظبوط
والصورة اهه

المهم وده علاقته ايه بالموضوع

علاقته اني لما اتكلمت مع التوكيل لقيتهم بيقولوا كلام مشابه لذلك وبما انهم بيتكلموا مع عميل فأكيد هو له حد من الشرح لأنه مش بيتكلم مع مختص في الموضوع

ولكن انا ترجمت الكلام على هذا

اللي اتقالي ان دراع الدركسيون طويل لأنه مصمم للأمان
والصوت ليس له اي تأثير لأن العربيه فعلا كده وهو ليس مشكلة في التصنيع ومالهوش اي علاقة بعلبة الدركسيون فعلا زي ما انا قولت قبل ذلك

وده السبب الاول ان اليابان مش عاوزه تعمل حاجه لأنها شايفه ان العربيه مظبوطة كده
ودي مشكلة في طرق مصر وده بيدل ان المشكلة مش بتأثر على حاجه في العربيه لنها لو هتأثر كانو حلوها لأن الموضوع هيكبر منهم وهما اللي هيدفعوا تمن الحاجات اللي هتبوظ لأنها اكيد هتبقى داخله في الضمان ده غير سمعة العربيه

وان اليابان رفضه أنها تعدل الموضوع ده في الموديلات الجديده بتاعتها ( يعني علشان يتوافق مع الطرق المصرية ) لأنه هيسبب مشكلتين :

الأول : ان الباور بتاع العربيه هيتقل عن الأول .

الثاني : ودي المهمة لهم ان العربيه أمانها هيقل لأن الدراع مش هيبقى أمان للسائق .

وكمان لأنها ترى ان سيارتها جيده ولا يوجد فيها عيوب وهذا ليس بعيب في السيارة وانما عيب في الطرق المصرية



واي استفسار انا موجود وان شاء الله خير

------------------------------------------

[معاذ الشرباصى]

ابو عبدالله

اولا جزاك الله كل خير على اهتمامك

تعريف المشكلة :

هو عبارة عن صوت زي طقطقه كده خفيفه يصدر من اسفل السيارة من الامام على الجانب الأيمن في الغالب

هذا الصوت ليس مستمر اي ليس على طول الخط وانما هذا الصوت يصدر في حالة واحده بس لا يوجد غيرها
الا وهيا انك تمشي بسرعه معينه على مطبات خفيفه خلف بعضها ( اللي هيا التمويجات اللي بتبقى في الأسفلت ودي سمة مصرية اصيلة )

هذا الصوت ليس له أي تأثير سواء على العفشة او على الباوور او على الثبات او على اي شئ في العربيه من حيث الاداء او العمر الأفتراضي لأنه ليس عيب في التصنيع مؤثر على شئ وانما هو عدم توافق مع الحالة المذكورة مسبقا ولي له اي علاقة بعلبة الدركسيون .

هو الصوت فى الغالبية العظمى فى الناحية الشمال

فعلا ليس مستمر, بيظهر فى كذا حالة, منها الحالة اللى حضرتك ذكرتها

للي اتقالي ان دراع الدركسيون طويل لأنه مصمم للأمان
والصوت ليس له اي تأثير لأن العربيه فعلا كده وهو ليس مشكلة في التصنيع ومالهوش اي علاقة بعلبة الدركسيون فعلا زي ما انا قولت قبل ذلك

وده السبب الاول ان اليابان مش عاوزه تعمل حاجه لأنها شايفه ان العربيه مظبوطة كده
ودي مشكلة في طرق مصر وده بيدل ان المشكلة مش بتأثر على حاجه في العربيه لنها لو هتأثر كانو حلوها لأن الموضوع هيكبر منهم وهما اللي هيدفعوا تمن الحاجات اللي هتبوظ لأنها اكيد هتبقى داخله في الضمان ده غير سمعة العربيه

وان اليابان رفضه أنها تعدل الموضوع ده في الموديلات الجديده بتاعتها ( يعني علشان يتوافق مع الطرق المصرية ) لأنه هيسبب مشكلتين :

الأول : ان الباور بتاع العربيه هيتقل عن الأول .

الثاني : ودي المهمة لهم ان العربيه أمانها هيقل لأن الدراع مش هيبقى أمان للسائق .

وكمان لأنها ترى ان سيارتها جيده ولا يوجد فيها عيوب وهذا ليس بعيب في السيارة وانما عيب في الطرق المصرية

هو ده اللى هيجننى

مبرر الوكيل انه تصميم العربية كده

طيب ليه بيظهر عند ناس و ناس لأ؟!!!!!

لو الموضوع تصميم موحد, يبقى الكل لازم يظهر عنده الصوت ده, و لا ايه؟

[أبو عبدالله]

على فكره يا معاذ الموضوع ده في كل العربيات

[معاذ الشرباصى]

على فكره يا معاذ الموضوع ده في كل العربيات

يعنى حضرتك عندك الصوت ده؟

[hazem_khidr]

على فكره يا معاذ الموضوع ده في كل العربيات

و ازاي مش عندك يا ابو عبد الله؟؟؟

[أبو عبدالله]

يعنى حضرتك عندك الصوت ده؟

المشكلة يا معاذ اني مش قادر احدد لأن الموضوع ده مش بيجي وانت ماشي عالطول يعني وبعدين الصوت ده عامل زي صوت تخبيط العفشة يعني مش ملاحظ قوي لوحده
يعني صعب انك تفرقه خصوصا انه مش مستمر
ولكن يظهر علشان الحته اللي انت بتعدي عليها عالطول دي وبيحصل الصوت فيها هيا اللي مخلياك مركز معاه قوي

وبما اني من المنصورة والعفشة بتدخدخ بعد التربيط بيوم او اتنين بالكتير
فانا ماشي عالطلول وعارف ان العفشة عاوزه تتربط عالطلول
انت مش متخيل المنصورة شوارعها عامله ازاي


بس هو المفروض الصوت موجود في كل العربيات
بس المشكلة انك تجيبله الحاله بتاعت الاسفلت دي وتجربها عليه وبسرعه

[Sharky]

يعنى من الأخر يجب على جميع ملاك السيريون التكيف على هذا الصوت للأبد

شكرا يا أبو عبدالله على الشرح الوافى

[hazem_khidr]

يعنى من الأخر يجب على جميع ملاك السيريون التكيف على هذا الصوت للأبد

شكرا يا أبو عبدالله على الشرح الوافى

+1
دا عيب شنيع بصراحه
انا السويفت ال 93 ما اقبلش اني اسمع صوت فيها بالمنظر دا مش 2007 و 2008!!!!
التوكيل بيستهبل
طالما العربيه مش مناسبه للطرق المصريه ليه بتنزلوها من غير تعديل؟؟؟!!!!!!
ماهو لو كنا دوله خليجيه كان زمانهم عدلوها علشان خاطر عيونا
انما احنا المصريين لاء و نعدل لهم ليه ماهو كده كده حيركبوا

[عمرو عمارة]

بس هو المفروض الصوت موجود في كل العربيات
بس المشكلة انك تجيبله الحاله بتاعت الاسفلت دي وتجربها عليه وبسرعه

السلام عليكم

مش فاهم!!....يعني إيه يا أبوعبد الله الصوت دة مفروض يكون في كل العربيات!!؟؟....ما أنا عربيتي مافيهاش صوت التخبيط دة خالص...أنا ساكن في التجمع الخامس في منطقة الفيلل والمناطق دي لسة مش متسفلتة والشوارع كلها زلط ومطبات وزفت يعني...ومع ذلك ماعنديش أي تخبيط من المذكور

أنا مش عارف إنت بدافع عنهم ليه!!؟....إذا كنت إنت مش فارقة معاك أصوات التخبيط والتزيق....في ناس لا تُتيق صوت صغير جداً جوة العربية ويعملوه هسس في دماغه..... وأنا أول الناس دي

[أبو عبدالله]

السلام عليكم

مش فاهم!!....يعني إيه يا أبوعبد الله الصوت دة مفروض يكون في كل العربيات!!؟؟....ما أنا عربيتي مافيهاش صوت التخبيط دة خالص...أنا ساكن في التجمع الخامس في منطقة الفيلل والمناطق دي لسة مش متسفلتة والشوارع كلها زلط ومطبات وزفت يعني...ومع ذلك ماعنديش أي تخبيط من المذكور

أنا مش عارف إنت بدافع عنهم ليه!!؟....إذا كنت إنت مش فارقة معاك أصوات التخبيط والتزيق....في ناس لا تُتيق صوت صغير جداً جوة العربية ويعملوه هسس في دماغه..... وأنا أول الناس دي

يا أخي الحبيب عمر
والله يا اخي انا مبدافع عن حد

بلاش تحامل بداعي وبدون داعي يا جماعه عليا
الحق عليا اني بدور على اصل المشكلة

ما انا ممكن اقعد اهول زي ما ناس بتعمل واشتم في التوكيل ومش عارف ايه وبتاع

انا طرحت الامر من الجانبين من ناحية ملاك العربيه ومن ناحية الوكيل والمصنع نفسه

ايه بقه الدفاع في كده

الصوت يا اخواني ليس بالدرجه اللي انتم متخيلنها
وليس مستمر يعني كل فين وفين لو جيت على تمويجة للأسفلت وراه بعضها اكتر من واحده وبسرعه ساعتها الصوت هيظهر
هيا دي الحالة اللي بيظهر فيها الصوت

يعني معلش مش كل ما تركب العربيه او تدخل في حته مكسره هتسمعه

وبعدين برضه الصوت مش بيبقى عالي علشان كده هتلاقي غالب الملاك مش بيسمعوه اصلا ولا بيجي على بالهم

وبعدين مره اخيره يا اخي عمر الصوت مالهوش علاقة بحتت مكسره ولا اي شئ من هذا

انا كلامي واضح ومحدد الصوت بيظهر لما تمشي بسرعه على تمويجة في الأسفلت ورا بعضها

هيا دي الحالة الوحيده اللي بيحصل فيها الصوت

علشان كده حضرتك مش بتسمعه في الحتت المكسره ولا هتسمعه كمان ان شاء الله

ياريت تكون المعلومة وصلت وواضحه

انا والحمد لله لا يهمني الصوت في شئ وهذا ليس دفاع عن احد
لأن الصوت ليس كما يتصوره البعض وليس شنيع لأن محدش سمعه من اللي قالو رايهم للأسف
وليس مستمر وليس متكرر بصفة مستمره لأنه بيظهر في حاله نادرة الحدوث
ولذلك لا يعلم به الكثير
كل ما في الامر اني حاسس انه حصل تهويل عليه اكتر من اللازم

وانا على فكره لا اطيق اي صوت في العربيه ودائما بربط العفشة علشان بتضايق لما اسمع شخشخه من تحت او اي صوت
ولكن كما ذكرت الصوت له حاله واحده ونادرة الحدوث لأنها خاصة بتمويجة الاسفلت المتكررة ورا بعضها بسرعه وليس ببطء كمان
يعني حالة فريد داخل حاله فريده داخل حاله فريده

وانا مش كده ببقى بدافع عنهم مش معنى اني بقول حقيقة الوضع يبقى معنى كده اني بدافع عن احد
ولكن انا عرفت شئ وبوضحه

وشكرا لكل اللي شاركوا

[عمرو عمارة]

السلام عليكم

يا أبو عبدالله ماتزعلش مني أنا والله مش بتحامل عليك بس بدأت أضايق فعلاً مؤخراً من مبررات التوكيل وخايف نصبح يوم نلاقيه من النوع الغبوري

كلمة حق تُقال فعلاً....أنا لما بعدي بسرعة بطيئة على القطط المزفتة دي فعلاً بيبقى في صوت تخبيط....بس أنا شايف إن دة عادي خالص ولو هو دة الصوت الي باقي الملاك بيشتكوا منه يبقى العملية فعلاً زي ما أنت قولت تهويل.....بس ماعتقدش إن دة حال د.معاذ؟؟

[أبو عبدالله]

السلام عليكم

يا أبو عبدالله ماتزعلش مني أنا والله مش بتحامل عليك بس بدأت أضايق فعلاً مؤخراً من مبررات التوكيل وخايف نصبح يوم نلاقيه من النوع الغبوري

كلمة حق تُقال فعلاً....أنا لما بعدي بسرعة بطيئة على القطط المزفتة دي فعلاً بيبقى في صوت تخبيط....بس أنا شايف إن دة عادي خالص ولو هو دة الصوت الي باقي الملاك بيشتكوا منه يبقى العملية فعلاً زي ما أنت قولت تهويل.....بس ماعتقدش إن دة حال د.معاذ؟؟

والله يا عمر يعلم الله اني لا اجامل احد على حساب احد والحمدلله
واني لا ادافع عن احد وانا اول واحد مالك للسيارة واول واحد هيكون مضرور في الموضوع

ويعلم الله اني بعز حضرتك زي باقي الاخوة هنا
والواحد لم يدخل على المنتدى الا من باب فعل الخير للناس وليس للتوكيلات والمصانع
وانما هدف الواحد انه يفيد الناس لما هو خير لهم

المهم الصوت اللي انته بتسمعه ده تقريبا هو
لأن فعلا الصوت مش عالي ومش واضح وعلشان كده معاذ تعب علشان يسمعهم الصوت ده
لن معاذ بيسنعه في حته معينه بيعدي عليها دايما

وهو صوت زي اي صوت صادر من العفشة بتاعت العربيه يعني صعب انك تركز وتقول ده كذا وده كذا
ده غير انه بيظهر في حالات معينه

يعني موضوع تمويجة الأسفلت دي لازم تبقى ماشي بسرعه فوق مثلا 30 او 40 علشان تسمعها
وهو تقريبا بيجي من مفصلة في العمود ده
لأن العجل الامامي لما بيطلع وينزل بسرعه كبيره وورا بعض بيطلع الصوت ده
علشان كده بيظهر مع تمويجة الاسفلت
لأنه مش بينزل براحته وبيطلع براحته

يعني بالظبط اكن واحد ماسك العجل الامامي بيطلعها فوق وينزلها لتحت بسرعه وهيا بتلف بسرعه
فتقريبا المفصلة حضرتك لو عارف بتبقى حديده معشقة في حديده تانيه علشان تاخد الحركة من بعضها وتكون في نفس الوقت سهلة التحرك يمين وشمال فتقريبا كده هيا اللي بتعمل الصوت
وانا مش متأكد لن ده تحليل شخصي مني مش اكتر

[ahmedfd]

طبعاً أبو عبد الله مشكور على مجهوده و أنا رأيي إن كلامه منطقي لإن مناطق الـ Crumple Zone بتكون فيها وصلات كتير فعلاً، بس الأهم إن ملاك السيريون يتأكدوا بصورة نهائية إن ده هو السبب فعلاً و إن ملوش تأثير على أي حاجة تانية علشان يتطمنوا و بعد كدة موضوع التعديل من دايهاتسوا و رد فعل التوكيل و موجوج أو مش موجود في عربيات تانية و يصح و ميصحش تبقى خطوة تانية.

[mr_bambino_dent]

يعني ايه يا جماعة أنا كنت بافكر أشتري سيريون أدور علي حاجة تانية ولا ايه ؟؟
و لا أجيب ياريس و أشتري دماغي ؟؟؟

[aliabutaleb]

يعني ايه يا جماعة أنا كنت بافكر أشتري سيريون أدور علي حاجة تانية ولا ايه ؟؟
و لا أجيب ياريس و أشتري دماغي ؟؟؟

انا رأيي ان انت الوحيد اللي تقدر تجاوب على السؤال ده
هنا في قسم الدايهاتسو أكيد بالمرور على الموضوعات هاتكون كونت فكرة لا بأس بها عن السيريون وعن العيب اللي ظهر في بعض سياراتها
ولو على الياريس تقدر برضة تقرا تجارب أصحابها في قسم التويوتا وعلى الأساس ده توصل للرد على سؤالك ان شاء الله