لمن يمتلك سوبارو,,

[Mosso]

يا جماعه الـ TOPIC ده عشان اي حد معاه سوبارو يقدر يسأل او يجاوب الي هيسأل عن اي حاجه في العربيه
سواء قطع غيار او تعديلات او اي حاجه تتعلق بالسوبارو

انا عن نفسي هبدأ بكام سؤال كده ويا ريت الي عنده اجابه يفيدني,,
1-بالنسبه لنظام الصوت في العربيه هوه مش جامد اوي
لو عايز اركب سماعات اعمل ايه؟؟؟
2-بالنسبه للانذار العربيه نازله بريموت بس مفيهاش انذار
الي عايز يعمل انذار هل يتركب عادي ولا ايه النظام؟؟؟
3- يا ريت اي حد عامل اي تعديل يقول عليه ممكن يفيدنا و يبقى افيد كمان لو كل واحد عرض التعديل بصورته على العربيه يتاعته

شكرا,, ;)

[khalid_adel]

بص يا اخ موسو
1-بالنسبه للصوت هي فعلا دي نقطه ضعف فيها ودي حاجه معروفه بس اللي ممكن تعمله انك تغير سماعات الابواب وانا جبت alpine عشان المكان بتاع السماعه قليل ( عمق السماعه صغير ) فملاقيتش اي نوع يركب غير ال alpine
وبالنسبه للبورده الاحسن انك تشيل الفابريقه وتركب واحده خشب وسماعات عليها بس هتضطر تفك جهاز الحراره بتاع الازاز اللي ورا وتركبه على جنب وطبعا عايزه واحد كويس ونضيف هو اللي يعملك الموضوع ده زي ادريان مثلا او غيره
2- بالنسبه للانذار اكيد ممكن وسهل بس منصحش لانه ممكن يبوظ حاجه في الكهرباء انا عن نفسي مركب وحدة رفع زجاج فقط والحمد لله ماشيه كويس مفيش مشاكل

[Mosso]

طيب بالنسبه لوحدات الرفع ركبتها فين؟؟
انا في المعرض قاللي ركبها في التوكيل عشان متخرجش من الضمان الضمان,,
و ايه نظام ال ALPINE معاك ؟؟؟ و ركبتهم في ال 4 ابواب ولا 2 بس؟
و كلفوا كام تقريبا؟؟؟
انا كده كده اصلا العربيه اتخبطت و مستني اروح اوديها تتصلح ان شاء الله
الاكصدام الي ورا اتخبط قاللي ممكن يتصلح و لو متصلحش هيكلف 1540 اكصدام جديد
يلا الحمدلله انها جت على قد كده,,
دي اصلا عامله 750 كيلو بس لسه حتى مجبتلهاش دواسات :(

[khalid_adel]

قدر الله ماشاء فعل وربنا يعوض عليك
صلحه والحق امن على العربيه وربنا يحفظهالك من اي سوء
بالنسبه لوحدات الرفع عند ادريان وهو كويس
اما السماعات مركبها في الاربع ابواب والصوت مجسم بالعربيه surround وحلو بس طبعا مش عالي ومفيش bass
اما بكام مش عارف لان اخويا هو اللي ركبهم بس سعرهم في العادي يعني مش غالي
واي خدمه ياباشا انا تحت امرك (داحنا سوبارجيه زي بعض)

[Ahmed Hassan]

طيب بالنسبه لوحدات الرفع ركبتها فين؟؟
انا في المعرض قاللي ركبها في التوكيل عشان متخرجش من الضمان الضمان,,
و ايه نظام ال ALPINE معاك ؟؟؟ و ركبتهم في ال 4 ابواب ولا 2 بس؟
و كلفوا كام تقريبا؟؟؟
انا كده كده اصلا العربيه اتخبطت و مستني اروح اوديها تتصلح ان شاء الله
الاكصدام الي ورا اتخبط قاللي ممكن يتصلح و لو متصلحش هيكلف 1540 اكصدام جديد
يلا الحمدلله انها جت على قد كده,,
دي اصلا عامله 750 كيلو بس لسه حتى مجبتلهاش دواسات :(

قدر الله و ما شاء فعل.. و الله انا زعلت جدا لما عرفت.. بس فداك.

ممكن تصور الخبطه و ترفعلنا الصوره؟؟

الشكل القديم (2005) تقريبا كان فيه نفس الاكصدام الخلفي... فيه واحد اسمه (بدران) في الحرفيين كان عنده عربيه استيراد.. روح اسأل عنده يمكن تلاقيه.

[Mosso]

الحمدلله انها جت على قد كده و الحمدلله انها مجتش في الصاج او الفوانيس
انا عايز اشتري الحليه النيكل الي على الشكمان,,,
اجيبها منين؟؟
و بفكر اركب زينون بس مستني شويه عشان مقلق شكل العربيه يبقى وحش لان الفوجات لونها اصفر,,
و ان شاء الله هوديها التوكيل يوم السبت و هركب هناك وحدة رفع الازاز
ادعولي تخلص بسرعه بقه و ربنا يسهل و متاخدش وقت و ترجع زي الاول :(

[Mosso]

و الصوره ان شاء الله هحاول ارفعها
و هي الحمدلله مش جامده اوي بس المشكله ان ال كليبسات بتاعت الاكصدام اتكسرت و في قطع تحت الفانوس

[Ahmed Hassan]

التوكيل مش بيركب وحدات رفع... هما بيركبو زينون و باركينج سينسورز بس.
النيكل اللي على الشكمان تجيبه من اي محل اكسسوار.. فيه اشكال كتير تختار منها.
الزينون ممكن يركب في الفوجات بردو... بس منصحكش تعمل كده... انا مركب زينون عالي و واطي بس بستعمله في السفر بس... جوه البلد باستعمل الفوج لايت و سايبو اصفر زي ما هوه علشان ميضايقش حد.

[Mosso]

يا جماعه صحيح هو العربيه الاوتوماتيك بتتمور ازاي ؟؟
اصل المفتاح مش بيخرج من الكونتاكت غير لما بيبقى الفتيس على ال Park
و دي مشكله و خصوصا في شوارع مصر المحروسه الي كلها صف تاني

[Ahmed Hassan]

يا جماعه صحيح هو العربيه الاوتوماتيك بتتمور ازاي ؟؟
اصل المفتاح مش بيخرج من الكونتاكت غير لما بيبقى الفتيس على ال Park
و دي مشكله و خصوصا في شوارع مصر المحروسه الي كلها صف تاني

مش هتقدر تطلع المفتاح غير و الفتيس على الـ P يعني وداعا للصف التاني.

على فكره كل الاوتوماتيك الجديد كده

[khalid_adel]

طب وايه الحكمه من الحركه دي انا شايف انها رخمه اوي
انا اول مره حصلتلي كنت راكب كورولا 2004 وبعد ماركنت لقيت المفتاح مش عايز يطلع قلقت اوي اوي وخفت احسن اكون عملت حاجه بس الحمد لله اكتشفت الموضوع بتاع البارك الاول واضايقت اوي من الموضوع ده من ساعتها

[Ahmed Hassan]

يه مسأله امن... يعني مش هتخرج المفتاح من الكونتاكت و العربيه في حاله حركه.
العيب القاتل بالنسبه لينا في مصر(عدم القدره على الركن صف تاني) طبعا غير وارد بالنسبه للمصنعين لأن ميعرفوش موضوع السيرك اللي عندنا :)

[Mosso]

الحمد لله استلمت العربيه انهارده من التوكيل,
غيّر الاكصدام و رشه
و رحت سألت على السماعات لقيت ال Pioneer الصغيره الـ160w هي الي تناسب
كذا محل قاللي عليها و قالولي كويسه و هتبقى مناسبه للابواب عشان اكتر من كده مش هتبقى مستريحه عشان عمق الباب ضيق
فانا مش عارف بقى ايه نظامهم و في حاجه انضف من ال Pioneer ولا ايه؟
و هل الكاسيت بتاع العربيه اصلا يستحمل سماعات اكبر من الي عليه؟
و لو يستحمل يبقى اخره كام؟
انا رحت ركبت مكنتين الرفع عند ادريان و كانت المفاجأه الي صعقتني!!!
ان السماعات الي في الابواب 30w فقط لا غير!!!!!

[NaderNabil]

خد بالك ان فيه max. WATT و فيه nominal WATT أو RMS يعني أنا عندي سماعات Pioneer 400 watt عاملة 80 RMS watt

[Mosso]

الي راكبه مكتوب عليها Max 30w
افهم ايه بقه :d