حكايتي مع السوبارو (المشكله اتحلت الحمد لله)

[cars_lover]

بعد اذنك ...ممكن أعرف :

1- أنت قولت التوكيل و عايد قالوا جابت بستم . يعنى ايه : البستم نفسه ولا البييل ولا البينز و لا الشنبر ؟ أنا عارف ان محدش فك الموتور و لكن كل حاجه من دول لها صوت مميز ؟

2- عربيتك مانيوال و لا أوتوماتك ؟

3-عايد فى حرقيين السلام و لا الدويقه ؟

4- التوكيل و عايد قالوا لازم نص عمره و لا تغيير بستم ولا عمره كامله( طالما الموتور حيتخرط 010) .

5 - بعد حدوث المشكله حسيت بفرق فى سحب العربيه؟

ويارب أقدر أساعدك ؟ خلى بالك لا تثق فى كل الكلام اللى بيتقال .. ان شاء الله حتطلع المشكله بسيطه و اللى سمعته اشتغالات علشان تكع لما تقول كفايه ....

[cars_lover]

من الشائع أن صوت التك تك تك بيكون بسبب أى كستبان من كستبانات الصبابات ودى بسيطه ....

أتكلم بقلب جامد أنا بعد ما سألت كويس و بالرغم تأكدى المسبق ، لا بنزين وحش و لا جاز و لا عصير قصب يخلى الموتور يجيب بستم !!!!!!!!!

[cars_lover]

لا تنسى اذا وصلت لطريق مسدود معاهم . خذ منهم ورقه رسمى بتقول ان السبب هو الجاز . علشان حتحتاجها ضرورى جدا فى كل الحالات....

[cars_lover]

::::::::::: صيانة سوبارو بقت فى النازل ....... انا مش حاروح جسر السويس ده تانى .
-
الطقم كله اتغير وجه ناس جداد .. تخيل بيقولك حيغير فلاتر وتيل وزيوت قبل ما تدخل بالعربية
ومن غير كشف عليها .. ويطلب 1000 جنيه :؟!!!؟! من غير ما اشتكى من حاجة فى العربية ....
ولولا انى وقفتله وقلتله اعمل الصيانة العادية ب 350 جنيه دلوقتى .. قاللى انت حر بس دى لازم
تتعمل - المهم وصلنا لتغيير حاجات ب 500 جنيه وفوجئت ساعة الدفع ان المطلوب 680 جنيه
قال ايه عمالة ومصنعية وضرائب ؟؟!؟!!؟!! = 180 جنيه ؟!!!!!!؟؟!؟!؟!
---------------------------------------------------
حا بقى افتح موضوع تانى فى قسم سوبارو حول هذه النقطة .. مش وقته انا عارف
-
عموما ان أعرف ناس معاهم 2003 امبريزا اشتكوا من صوت خبط فى منتصف العربية كده . وطلع بلى العجل الخلفى . وتم تغييره للكل فى الضمان

اللى أعرفه أنه اذا جاء ميعاد الصيانه و كان من المفروض تغير الحاجات دى.. لازم تغيرها من غير ما تشتكى من حاجه..
هيه كانت صيانة الكام كيلو؟

[ahmedsrs]

حضرتك تنشرالايميل هنا
وجميع اعضاء المنتدى ياخدو نسخه منه
ويعيدو ارساله لنفس العناوين
عشان يعرفو حجم الدعايه السلبيه اللي ممكن تحصل لو محلوش المشكله

[cars_lover]

الاخوة الافاضل بعد ما قرات الموضوع ده امبارح استغربت و لجأت لموقع انجليزى بيعمل تقويم عن العربيات المستعملة و فعلا اتضح ان المشكلة دى كانت موجودة فى موديلات السوبارو امبريزا من سنة 93 لحد سنة 2000 كان بيحصل فشل فى البساتم اما الموديلات من 2000 لحد 2005 كان فيها مشاكل من نوع تانى، مشاكل فى راس الصبابات و الموضوع ده برضه بيعمل اصوات احتكاك معدنى واضح, الموقع ده اسمه
usedcarexpert.co.uk ياريت اللى عايز يدخل و يشوف بنفسه يعمل تسجيل ببلاش و يشوف الموضوع ده و الجزء اللى فى راس الصباب اسمه Tappet
و اعتقد طالما ان العربية خرجت من الضمان يبقى الموضوع حايخد سكة تانية.

يجب الاشاره الى أن هذا الموقع يقدم نصائح لمشترى السيارات المستعمله وما يجب أن يفعله للتأكد من عدم وجود عيوب معينه ، ويقول فى حالة وجودها حاول تتفاوض على مبلغ البيع ........

هذا ببساطه لان اغلبها مشاكل استخدام ..والدليل شوف السيارات المعروف عنها أن مواتيرها معمره زى المرسيدس و التويوتا و الليكزس حتلاقى عدد المشاكل المحتمله والـ recalls أكتر من السوبارو

[cars_lover]

معنى الكلام دا إنه عيب فى الإمبريزا و مالوش علاقة بالبنزين

يا جماعه مش عايزين نتبع مثل "اذا وقع الــ ..... تكتر سكاكينه ".

لازم نفتكر اننا بنتكلم على ماتور بوكسر مكسر الدنيا بره و واخد "Engine of the year" كذا مره . ومش حنلاقى أى موقع بيتكلم عن مواتير أو تعليق السوبارو بأى كلمه . أنا بضور بقالى يومين على أى recall على ماتور أى موديل سوبارو ..لم أجد.
وكل الـــ reviews بتقول رأى عن كل حاجة و تيجى عند الماتور و التعليق و تقول انها لا تحتاج الى كلام لانها معروفه .

واللى حصل لاخونا .. حيتضح قريبا بأذن الله و حيكون بسيط.

على فكره أنا مش من عيلت ابو غالى و لا عبد الهادى ولا عندى سوبارو..بس احب أعطى كل ذى حق حقه "زى ما بيقولوا"

[khalid_adel]

بجد انا عاجز عن الشكر لمساندتكم ليا
التلاته قالولي دي نقرة البستم ( ان البستم حصل في فراغ فبيلق وبيخبط في الشميز ) وده محتاج فك الموتور وتغيير بساتم كلها ب 010 والشميز والبينز ووش جوان السلندر ( كلام كتير يعني )
وعايد ده في حرفيين السلام
وانا نازل دلوقتي ان شاء الله رايح العبور حيث المركز الرئيسى لادارة ابوغالي وربنا يكرم

[khalid_adel]

اه صحيح العربيه مانيوال
والموضوع ده حصل بعد ماكنت راجع على الدائري كنت ماشي بتاع 160و170 واول لما وقفت عشان النزله سمعت الصوت
والعربيه سواء قبل او بعد التخبيط اللي بيحصل ده اداءها زي ماهو بالظبط مفيش اي تغيير (نفس السحب والتسارع وكله ) بس كمان بيبقى فيها رعشه كده في السلانسيه

[Sherif Khalifa]

ربنا معاك إن شاء الله و تلاقى حل النهردة

[وائل عطية]

ربنا معاك ياخالد .. وإن شاء الله تاخد حقك ويرتاح بالك
والله حاسس بيك ..كان الله في عونك

[fahd_628]

ربنا معاك و ابقى قولنا على كل جديد

[boody2]

استاذ خالد

ربنا معاك و يكون في عونك و ان شاء الله تطمنا اليوم و يا ريت حضرتك تقولنا اخر مرة حطيت بنزين كان من انهي محطة

و ربنا يوفقك اليوم مع التوكيل ان شاء الله

[mohahdy]

استاذ خالد
انا مرة حصل معايا موضوع الصوت تك تك تك تك في عربيتي و بس من غير ما تطلع دخان ابيض و لا حاجة و لما رحت للميكانيكي اتضح ان جنزير الكاتينة كان بيخبط في وش التقسيمة بعد ما الترس انكسرلأن انا عندي الكاتينة جنزير مش سير زي باقي العربيات انا معرفش السوبارو سير ولا جنزير بس يا ريت تتأكد.
بإذن الله تكون حاجة بسيطة و ربنا معاك إن شاء الله.

[khalid_adel]

انا اخر مره كنت ممون كان من بنزينه امارات مصر اللي على الدائري وطبعا دي بنزينه نضيفه اوي معتقدش انهم يغشو البنزين بالميه او الجاز والله اعلم انا لسه معملتش التحليل رحت لشيل قالولي بيعملو تحليل بيكشف وجود ميه بالبنزين او لأ وبس لكن مش تحليل كامل وتقرير وكده وده اللي انا محتاجه
فحاروح بكره ان شاء الله ادور على الهيئه دي اللي جنب انبي واعمل تحليل عندهم وربنا يسهل
موقف ايجابي حصل معايا النهارده وانا متفائل بيه ان شاء الله
انا كنت ناوي اروح الاداره في العبور بس للاسف طلعو اجازه النهارده والصيانه بس اللي شغالين السبت

المهم التوكيل اللي في المعادي كلمني الضهر وقالي فيه ايه وايه اللي حصل مننا بس عشان ده كلو وان في عملاء كتير راحلهم النهارده بيحكولهم على موضوعي وبيشتكو وقالولهم على موقع نايل موتورز والموضوع اللي مكتوب ده بالنص فبيقولي ان انا مقلتلهمش ليه قولتلو اني اصلا مش بشتكي حد وان ده مجرد موقف غريب حصل معايا في العربيه واني مش مصدقه فقلت احكيه للناس عشان حد يقف جنبي وهكذا قالي عالعموم احنا حنحاول نساعدك وكده وربنا يسهل
بعد شويه كلمني مركز بتاع جسر السويس وشرحتله موقفي بالظبط واللي حصل معايا واللي انا قلته هنا وكده قالي عالعموم انت عميل بتاعنا ولازم نرضيك لانك عميل سوبارو مش اي عربيه وحتي لو البنزين طلع فيه جاز هنساعدك برضه بس هما محتاجين اني اعمل التحليل للبنزين واديلهم الريبورت وهنقعد مع مدير مركز ابو غالي وكده كده حنحل لك الموضوع واهم حاجه انك تكون راضي عن العربيه وفخور بيها
قلتله خلاص ان شاء الله حعمل التحليل واجيلكو والصراحه انا انبسط من الاهتمام ده وانهم بيحاولو يحللولي المشكله دي وربنا يقدم اللي فيه الخير
انا قلت اقول كل اللي بيحصل في الموضوع وتطوراته وادعولي يتحل على خير ان شاء الله