الحمد لله اتنصب عليه عند واحد بتاع كاوتش

[ahmedhilmy]

حسبي الله و نعم الوكيل حسبي الله و نعم الوكيل الواحد ميقدرش يقول غير كده علي الناس اللي بقت بلا ضمير و لادين و لا ذمه هيروحوا من ربنا فين دول ازاي بيستحل اللقمه اللي بيحطها في بقه .
كنت نازل من الدقي و مروح بيتي لقيت الفرده اليمين قدام مريحه شويه و العجله جديده زي الفل لني لسه مغير العجلتين اللي قدام و قلت لما ربنا ييسر الحال اغير الاتنين اللي ورا و قفت عند البيه و قلتله زودلي العجله قللي مش قبله هوا لف العجله عليه عشان املكها و هنا الطامه الكبري بهدل العجله الجديده اللي مبقلهاش اسبوعين (حسبي الله و نعم الوكيل) قللي فيها 12 خرم قلتله نعم مصدقتوش قلتله زودها و سيبها و الا مصصم يعملهم قلتله زودها و سبها هتبوظ قلتله ملكش فيه سبها انا قلت بيشتغلني سبته و رحت لمحل كبير بعديه ( الكلام ده في شارع البحر الاعظم) الراجل حل العجله و كشف عليها قليي 12 خرم علي الأقل اعملهم قلتله هتعمل ايه ده دمر العجله قللي انت مش اول واحد يعمل في كده دا لسه عاملها في ظابط شرطه و دخلت عليه و قلتله ركب شنبر لغايه مشوف وحده تانيه قللي اصلحهالك و امشي بيها قلتله 12 خرم في عجله قدام و امشي بيها ركبت شنبر و ماشي هتجنن .
حسبي الله و نعم الوكيل خدوا بالكم يا جماعه اوعي تركب عربيتك بعد متنزل عند بتاع كاوتش اعدل العجل اقلب العدل سيبه و امشي انا مضايق اوي علي العجله الجديده بس لا املك الا حمد الله و حسبي الله و نعم الوكيل في كل نصاب و ظالم و معندوش ضمير

[micromoud]

هما فى لمح البصر بيخرموا العجل 12 خرم مسافه ما بيغير وضعية العجل ؟؟

[ahmedhilmy]

هما فى لمح البصر بيخرموا العجل 12 خرم مسافه ما بيغير وضعية العجل ؟؟

ده اللي حصل فعلا انا مخدتش دقيقه و الله اقل من دقيقه

[micromoud]

بس دا كاوتش عشان تخرمه 12 خرم ورا بعض كده محتاج تتعافى عليه ويكون معاك حاجه تخرم بيها الكاوتش .... انا مش بكدب حضرتك ربنا يصبرك ويعوضك انا فعلا مش عارف هما بيعملوا ايه بالظبط عشان يلحق يخرم الكاوتش دا كله

[ahmedhilmy]

بس دا كاوتش عشان تخرمه 12 خرم ورا بعض كده محتاج تتعافى عليه ويكون معاك حاجه تخرم بيها الكاوتش .... انا مش بكدب حضرتك ربنا يصبرك ويعوضك انا فعلا مش عارف هما بيعملوا ايه بالظبط عشان يلحق يخرم الكاوتش دا كله

يعمل اكتر من 12 خرم طبعا كمان لان معاه الدراع ابو مسمار ده اللي بيخرجوا بيه المسامير من العجل ده بالأضافه انه مكنش لوحده كان في واحد معاه

[S O P H O S]

معلش يا باشا
ربنا مش هيبارك فظلم الناس

[AhMeD MeTwAlY]

12 خرم انا لو مكانك كنت رجعت عملته 11 خرم جمب عشان يبق شبه العجله

[mahmoudysf]

ربنا يعوض عليك وينتقم من كل حرامي ونصاب
انا اتعملت فيا من حوالي 8 سنين كانت لسة بداية الخوابير
خرملي العجلة 4 اخرام قولتلة اعملهم ولما عملهم بيقولي 40 جنية
اديتو 20 وسيبتو يهاتي ومشيت

[alaamousa]

قدر الله وما شاء فعل

[DOCTOReng]

حصلت معايا من حوالى 5 سنين وبعدها اشتريت كمبريسور لتزويد العجل ولا أذهب لورش الكاوتش الا للحام وغالبا لورشة اثق فيها

[Land_Cruiser]

منه لله و ربنا يعوض علي حضرتك و ياريت تقول للناس علي مكانه و اسمه علشان الناس تخللي بالها منه

[mido_soliman]

حصلت مع العضو raul_7 معانا هنا فى المنتدى وعند نفس الراجل فى الغالب فى البحر الاغظم وعلى فكرة الراجل دة مشهور جدا بالحركة دى
السؤال لية دة متساب لحد النهاردة بيبوظ فى حاجة الناس
لية ميتقبضش على امة ويتسوح
حسبى الله ونعم الوكيل فى كل واحد يقبل على نفسة مال حرام
ربنا يعوضك ان شاء الله فى حاجة احسن

[A_H_M_A_D]

للأسف العينه دي موجود منها كتير قوي دلوقتي وانا وقعت مع واحد منهم قريب, بوظلي فرده جديده خالص ومرضيتش انه يمد ايده عليها تاني و رحت ركبتلها شنبر برضه عند واحد تاني, الناس دي معدومة الضمير ومش هايشموا ريحة الجنة

[sewefy]

اللى عارف اى حد بالمنظر ده يقول مكانه فين والناس ماتتعملش معاه انا عن نفسلى اعرف واحد فى شارع فيصل الرئيسى عند شارع المستشفى امام البنزينه الراجل ده نصاب بردوا وربناه يعوضك خير

[amdd]

والله حاجة فى منتهى قلة الزوق والضمير
لازم الواحد تفضل عينيه على العجله وهو بيعمل فيها اى حاجه ويركز معاها لان تلفها هيكلف الواحد مش عجلة واحده لا عجلتين