الحمد لله اتنصب عليه عند واحد بتاع كاوتش

[أبو يوسف]

أن شاء الله يصرف كل ملبم حرام على مرضه
لأن المرض مر , ساعتها هايعرف طعه القرش الحرام

[sas5]

انا ايضا معى كمبرسور ومقياس عجل ولا اذهب الا لشخص معين انا اثق به فى حاله التاكد من وجود خرم فى العجل

[Karim Ibiza]

ربنا يعوض عليك
بتوع الكاوتش دلوقتى ما يصدقوا يتليموا على واحد غريب ولازم تدفع مش اقل من 50 جنيه
حاجة تفور الدم

[Sehsss]

لا حول ولا قوة إلا بالله.. ربنا ينتقم منه.. أنا ما بروحش غير لبريدجستون، أينعم اللحام عندهم أمريكي وغالي بس طبعا عمرهم ما هايعملوا حركة قذرة زي اللي عملها بتاع الكاوتش اللي انت روحتله.. وياريت تذكر اسم المحل ده علشان الإفادة

[abdulkhaleq]

معلش ربنا يصبرك
وهما فعلا بيعملوا كده
الا من رحم ربي

واحد منهم حب يعملها في راجل شكله صعيدي تقيل كان راكب مرسيدس تسعينات
قاله فيها مش عارف قد ايه
قاله اعملهم كللهم
وبعد ماعملهم مسك بتاع الكاوتش سلخه ضرب
وطبعا ماشافش منه مليم

[ahmedhilmy]

شاكر كل الردود و اكيد حسبي الله و نعم الوكيل ميت مره انا في العادي مش بصلح اي عجله الا عند بتاع كاوتش جاري و انا ساعه موقفت وقفت علي اساس ازود العجله بس الحمد لله محدش يعرف الخير فين ؟

الراجل في شارع البحر الاعظم قبل مدخل شارع المدبح طبعا مخدتش بالي من الأسم كوني عابر سبيل

[جيفارا]

ايه كمبرسور تزويد العجل ده ؟؟؟
بكام ومنين؟؟؟

[mahmoudysf]

الكومبريسور ده كومبريسور صغير بيتباع في هايبر وكارفور
وفيه منه في التوفيقية بيشتغل على ولاعة العربية
والنوع كويس بيبدا من 150 جنية وفيه نوع جديد في هايبر باتنين بستم تمنة معدي 200 جنية

[ahmedhilmy]

ايه كمبرسور تزويد العجل ده ؟؟؟
بكام ومنين؟؟؟

ده جهاز بيستخدم لتزويد العجل عن طريق توصيله بولاعه العربيه و بيتباع في حتت كتير كان في كارفور - هايبر- و اكيد طبعا في التوفيقه و سعره من اول 60 لغايه 200 تقريبا

[alrabeh]

الحمد لله الذى يقضى بالحق بين الناس يوم لا ينفع مال ولا بنون
وعند الله تجتمع الخصوم

[Raul_7]

حصلت معايا في شارع السودان بس الحمد لله لحقتوا علي 3 اخرام بس, و لحد دلوقتي كل ما امشي في شارع السودان حد يقول لي العجلة نايمة. أشكال عايزة الحرق.

[DOCTOReng]

بالنسبة لى حصلت فى محطة بنزين التعاون بشارع صلاح سالم قبل الجهاز المركزى مباشرة . لا تتعاملوا معه وفى حالة الضرورة فتحوا عينيكم كويس

[Amr Axel]

معلش يا باشا ربنا يعوض عليك

بس معلش مش فاهم يعني ايه اللي شوفته عمله لما لفيت العجلة عليه لأنك بتقول بهدل العجل

و ازاي 12 خرم في لمح البصر اولا صعب جداااااااااا لأن جدار الكاوتش سميك و سلك و كمان الكاوتش جديد يعني عشان مسمار يدخل فيها ممكن تحمل بوزن العربية كله مش مجرد بالايد حتي لو معاه كذا واحد يعني كبيره خرمين تلاتة بالعافية حتي لو معاه اداة تساعده و ديه صعبة يعني لو قدروا كمان بالاضافة لو فيها 12 خرم مكنتش اتنفخت اساسا و كانت نزلت في ساعتها

[A.Adel]

بص يا باشا

هو مش بيخرمها 12 خرم زي ما حضرتك فاكر
هو بيزود ضغط العجلة جامد و بيبقى معاه إزازة فيها مية بصابون
و بيزودوا عليها مية بطارية

لما يرش المية دي على العجل بيطلع فقاقيع صغيرة كده ,وده الطبيعي
هو بقى يقولك دي خرم و يروح رازع الفردة خبور

لو ركزت هتسمع صوت السلك بتاع الكاوتش وهو بيتقطع

كتير من بتوع الكاوتش بيعملوا الحركة دي
يا ريت الناس تاخد بالها

[haitham fares]

فى واحد فى نص شارع فيصل فى اتجاه المريوطية ادام بنزينة اعتقد انها توتال ..عمل معايا نفس الموقف ..والمثير للسخرية انو كل يوم بيوقف واحد يقولك العجلة نايمة ..وكل يوم برد علية واشتمة :)

انا بفكر اعمل حاجة مع الراجل دة خصوصا انى بلاقى ناس كتير وبالذات الغرب عن المنطقة بيقعوا فى القصة دية ..تفتكروا اقدر اعمل اية ؟؟ بعيدا عن العنف يعني :)