موقف حصلي وحاسس اني لازم اقوله

[Car's Sniper]

ثانيا انا عارف ان فيه ناس كتير هتهاجمني علي الكلام ده بس انا احترمت اوى صراحة ميمو في عرض تجربتة وعايز اتكلم بصراحة انا كمان ومينفعش تبقي رخصتي مسحوبة بسبب السرعة وانصحكم بحاجة انا مش بعملها بجد انا مش عارف اقول كلام زي اللي الاخوة قالوة عن السرعة وعواقبها (مع اقتناعي الكامل بيه) بس مع علمى بكل الكلام ده ومع تاريخي في سواقة العربيات اللي بيبداء بحادثة فى سنة 97 (3 ثانوى) بلاقى نفسي برضوا من الناس اللي بتجرى

ليه بجرى ؟ ببساطة لاني بحب السرعة وبحب الاحساس بالسرعة والهوا شايل العربية وبصراحة ده احساس مهما وصفته مفيش حد هيقدر يفهمة الا اللي بيحب السرعة وديه طبيعة شخصية في ناس كتير وبالاخص الشباب

انا لما كنت اصغر سنا بصراحة كنت نموزج مثالي للشاب العفريت اللي نازل يشاكل الناس ويسابقهم ويكسر علي سواقين الميكروباص وياخد غرز ويشد مع اي عربية بتجري زي ما يكون صوت الموتور وهو بيتسارع بيوحيلك بانك تعمل كده

دلوقتي انا اهداء كتير من زمان بس لسه محتفظ بحبي للسرعة ولسه مش قادر ابقي النموزج المثالي اللي بيمشي علي الدائري بسرعة 90 وده لاكتر من سبب

1- لو مشيت علي سرعة 90 هحس ان انا خانق العربية والموتور ولازم علي الاقل لو همشي بسرعة 90 اطلع كل دقيتين تلاتة لسرعة 110 120 وانزل تاني
2- لو ماشي علي سرعة 90 وده طبعا هيبقي علي الغيار الخامس وعايز اتخطي حد هلاقي نفسى لازم اسقط غيار واقرص علشان احس ان العربية عزمها كفاية للمناورة
3- استحالة امشي علي الدائري بسرعة 90 وانا عندي ميعاد لاني بطبيعتي (حتي قبل ما يبقي معايا عربية) مواعيدي زفت ودايما متاخر علي مواعيدي

بس انا بلزم نفسي بشوية قواعد لما احب اجري فوق السرعة المعتادة

- لازم اكون عارف الطريق كويس بتضاريسة ومنحنياتة وتقاطعاتة ويوتيرناتوه

- لازم ابقي عارف ان اي مناورة او تجاوز للسرعة فيه مخاطرة بشكل او باخر بس المخاطرة ديه لو هتعرض حياة شخص ماشي علي رجليه او راكب عربية يبقي الاولى التغاضي عنها نهائياً

- التاكد قدر المستطاع ان العربية بحالتها المثلى دائما (كاوتش فرامل مساعدين عفشة اضاءة) - زمان كنت كده كده بجري

- تجنب القيادة في حاله اي توتر نفسي (غضب شديد - حزن - انفعال - تحت تاثر اي مخدر او حتي دواء ليه اعراض علي الجهاز العصبي)

- تطنيش اي استفزازات ايا كانت وعدم التورط في اي مناورة او تجاوز بناء علي ( تسخين ) من شخص اخر وعلي العكس لما بكون عايز اجرى وده قراري من الاول ولقيت حد زي اخونا بتاع الانوس ده بسيب مسافة كفاية بيني وبينة وامشى وراة عشان يفتحلي طريق وطبعا نفس الكلام ورا عربيات الاسعاف

- ربط حزام الامان ليا ولباقي الركاب حتي اللي ورا - زمان كنت بكسف البسة

- لازم اكلبش في الدريكسيون باديا الاتنين بالوضع المناسب (ايد علي وضع الساعة 2.30 وايد علي 9.30) - زمان كانت ايدى الشمال علي الدركسيون وضع الساعة 12 وايد علي الفتيس

- ممنوع منعاً باتا تناول اي شيء ماكولات سجاير (مع اني مدخن) موبيل الخ اثناء القيادة

- التجاوز من الشمال فقط بعد انذار السائق امامي بشكل هادئ وبدون استفزاز (فلاشر مرة او اتنين بالكتير ولما احس باستجابة فلاشر كمان وانا بعدي )

- لازم احافظ علي مسافة كبيرة بيني وبين اللي قدامي بشكل يتناسب مع السرعة

- لو سرعتي هتعدى ال130 والدنيا ليل لازم انور النور العالي (مبيبقاش فيه حد قدامى قريب)

- لازم الكرسي يكون قريب من الدريكسون كفاية بحيث اقدر (افعص) الفرامل عند اللزوم

- لازم اخد بالي ان كفائة الفرامل بتتناقص بشكل متساوي لحمل العربية (علاقة طردية كل ما زاد الوزن كل ما قلت كفائة الفرامل

- تجنب عمل اي مناورة او التسارع المفاجئ او التباطوء المفاجئ علي ارض فيها ميه او تراب او حصى او منحدرات او تكسير او مطبات هوا

- عادة انا بحسب اى غرزة بتأني وبهدوء اعصاب بس مع عربيتي الجديدة (سابا) ومع اي عربية سيدان ومن غير سبيولر وعالية كمان يبقي اتقاء شر الغرزة افضل

- حالتين استحاله رجلي تقرب من الفرامل فيهم (1) في الملفات (2) عند انفجار الكاوتش

- في الملفات اهم معامل لتوازن العربية هو عزمها مش سرعتها بمعني انك ممكن تكون علي سرعة 90 والعربية تسرح منك لان عزمها ضعيف وبالتالي قدرتك علي التحكم في العربية (خاصة الجزء الخلفي) بتقل او تنعدم خاصة مع سيارات الدفع الامامي وعلي العكس كل ما كان عزم العربية عالي وانت في نص الملف كل ماكان التحكم في الجزء الخلفي من السيارة اعلي

- لازم اكون منتبة عشر اضعاف العادى وبالتالي بركز اكتر في كل المرايات وبدى اشارات بكل حركة او همسة او حتى نيه تحرك


ديه اهم الحاجات اللي انا فاكرها دلوقتي بس طبعا الموضوع مش موضوع قواعد تتبعها وبس لاء ديه ممارسة ومهارات عضليه عصبية مكتسبة بالخبرة والممارسة وممكن تكون كمان صفات وراثية بس المهم تبقي عارف ان القواعد ديه مبتضمنش ايه حاجة وقدر الله لاراد له بس بجد خد عهد بينك وبين نفسك (الكلام للناس اللي بتجرى) متخليش حبك للسرعة والمغامرة يبقي مخاطره بحياتك ومقامرة بحياة الناس



:p

والله انا كدة فعلا وبفكر كدة بردو سبحان الله كأنك بتقرا افكارى الحاجة الوحيدة المختلفة ان انا بحترم مواعيدى جدا وعمرى ماتأخرت على ميعاد
وحاجة زيادة انا بعملها انى اول ماعدى ال90 بامسك الدركسيون جامد جدا عشان لو كاوتش فرقع لا قدر الله ابقى مسيطر عالعربية مش هى اللى تسيطر عليا
وفعلا لو مشيت بسرعة بس عملت حساب غيرك وحساب اى مفاجأة ماظنش انها خطر غير لو الطريق كان زبالة

[Car's Sniper]

انا كنت فاكر ان انا الوحيد فى مصر اللى بيخلى الركاب اللى ورا يلبسوا حزام الامان

[kimo-nubira]

ياجماعه محدش واخد باله من حاجه ؟؟ التوبك ده من سنه 2007 صباح الخير

[aymansaad]

احمد ربنا

[Car's Sniper]

ههههههههههههههههههههههههه قصدك انه من ايام الزمن اللذيذ (الجميل سابقا)

[Amrrr]

ياجماعه محدش واخد باله من حاجه ؟؟ التوبك ده من سنه 2007 صباح الخير

زمان صاحبه نسي الموقف واحنا اللي فكرناه - هو نايل موتورز من زمان كدة ؟

[ابوهاشم]

الف سلامه ليك ومن معك
لالالالالالالالالالالالالا للسرعه

[kimo-nubira]

:c_laugh[1]: زمان صاحبه نسي الموقف واحنا اللي فكرناه - هو نايل موتورز من زمان كدة ؟

هههههههههههههههه

ايوه يا عمرو نايل موتروز اول منتدي سيرات مصري علي ما اعتقد والله اعلم

[zaza_lanos]

الاحتراف انك تعرف توقف مش تعرف تجرى

[Ashraf_Ashraf]

حمد الله على سلامتك وسلامه اللى حواليك
واكيد كلنا اتعرضنا للشيطان وغرنا نسابق ونعرض وغرز لكن بجد وعن امانه انك توصل بالسلامه انت واللى معاك بقت اهم من الجرى
وامتع انك مع الفوضى اللى موجوده على كل طريق انك تعرف ترجع بالعربيه سليمه صدقونى دى امتع من الجرى

[kasten]

الف حمد الله على السلامة بس بجد انا زعلان منك و من الأخ بتاع الانوس و كل اللى بيجروا و يتهوروا بالطريقة دى، ممكن أوى فى لحظة تضروا ناس كتير زى ما حصلى و عربيتى مركونه صح (كانت لانسر ما مشيتش 1000 كم) و اتنين بيتسابقوا واحد منهم رشق فيها و بعتها ب 23000 يعنى خصرت فيها 35000 فى اقل من شهرين.

لا حول ولا قوة الا بالله
ربنا يعوض عليك وبجد حاجه تزعل اوى

[khalid_adel]

فعلا انا من الناس اللي بحس بنشوه كده معينه لما اجري بسرعه مش عارف بحس اني مبسوط او مستلذ الموضوع ده
وفي مشكله تانيه لما بمشي براحه بجد بسرح وكذا مره حبقى اخبط ولا ادخل في رصيف ولا عربيه او المصيبه بقى ببقى عايز انام اوي فبضطر اجري كالعاده سواء عشان اركز في السواقه او اصحصح
مش عارف هل ده كده مرض ولا تعوض ومش لاقي حل بجد
على رأي الاغنيه i gotta need for speed :)