حرام ولا حلال اللى بيحصل ده يا جماعه !!!!!

[Terrible_DaRsH]

يعني هما مبيعملوش معاينة للعربية بتاعتك علشان يتأكدوا إن هيّ ده العربية إللي خبطت الراجل ده من عدمه؟!

ما هو الاخ ممدوح قالك العربية بتتحجز للفحص وحضرتك بتروح على النيابة وممكن تبات فى الحجز وطبعا هتقضى بعض الوقت فى قسم البوليس عقبال ما تخلص من المحضر ...

[MohaMed_Refaat]

واللى انا مش عارف اقول او اعلق على اى حاجة انا فعلا اتلغبطت من كتر التجارب والاراء المتعددة هو طبعا من حق الانسان اللى يتخبط انة يلاقى مساعدة من اى مواطن بس من حق اللى حينقذة وعمل خير انة يلاقى حقة ويلاقى شكر من السلطات مش بهدلة واتهام على الفاضى . يمكن انا مش عارف احكم علشان والحمد الله متحطتش فى الموقف دة قبل كدة بس انا رايى انة لا يصح الا الصحيح .

[MMamdouh]

ما هو الاخ ممدوح قالك العربية بتتحجز للفحص وحضرتك بتروح على النيابة وممكن تبات فى الحجز وطبعا هتقضى بعض الوقت فى قسم البوليس عقبال ما تخلص من المحضر ...

+1

الفحص بيحصل فعلا بس دة بعد ما تخلص المحضر و العرض على النيابة ثم العرض على رئيس المباحث... القصة فى احسن احوالها ممكن تاخد يوم و سهل اوى تمتد الى يومين تلاتة... انت و ظروفك حسب مواعيد النيابة و تواجد ضابط المباحث

MMamdouh

[badblood]

أؤيد رأى محمد ممدوح
وتحيا مصر

[wkisho2005]

[quote=Noha.M;420689]
فعلا زى ما انت قلت واحد لما يعدي على طريق سريع ولا دائري و عمال يتنطط بين العربيات يبقي دة عمل اصلا بالمبدأ دة ؟ لا طبعا !

انا طبعا معاكي في الكلام دا بس لو واحد عايز يعدي علي الدائري دا هيعمل ايه؟؟؟ادامه نفق او كوبري مشة مثلا وهو بيستعبط وبيعدي من الطريق؟؟ماهو لازم هيعدي بين العربيات

طبعا مش بقول انه مش غلطان بس مش كل الغلط عليه

[Mostafa Taher]

لا حول ولا قوة الا بالله

اتى علينا اليوم اللى بنتكلم فيه و نتناقش لو واحد مرمى بيموت في الشارع اساعده ولا اسيبه يموت ؟!!!

لا حول ولا قوة الا بالله العلى العظيم

البلد غااااااااارت في داهية يا جماعة خلاااااااااص

[magedomran]

حسبنا الله ونعم الوكيل

[Dr.SherifMansy]

اما بالنسبه لموضوع قلقك من انك لا تدري كيفيه التعامل مع المصابين مع انك دكتور, فانت اكدت كلامي, دوره الاسعافات الاوليه لا علاقه لها بكونك طبيب من عدمه, حاولو تشتركو فيها, انا خدتها في القصر العيني و الهلال الاحمر موجود بعد مشرحه زينهم علي الشمال قبل مجري العيون, و ممكن يدو دوراتهم لمجاميع بس لازم تحجز, و بالمناسبه دي و علي اساس ان المنتدي مش صغير, ممكن الاداره مشكوره تكلمني و اروح اتفق مع الهلال الاحمر و نشوف سنتر في كل منطقه قريبه من الاعضاء و نعمل دورات اسعافات اوليه, و الموضوع مش مكلف اطلاقا و قيمته الحقيقيه هتحسها لما تتحط في موقف صعب و تلاقي نفسك عارف تتصرف, و علي فكره الدوره دي مفيده كمان في حالات الاختناق و فقدان الوعي و الكسور و اللدغات و الازمات القلبيه و الحروق و الانعاش القلبي الرئوي للبالغين و الاطفال و حالات ابتلاع اشياء قد تؤدي الي غلق مجري التنفس و الغرق و غيره و غيره
بجد هتبقي خدمه بتؤديها لنفسك و من حولك, خاصه ان مباديء الاسعافات الاوليه موجهه بالاساس للجمهور العادي و بتوصله المعلومات و سبل التصرف بطريقه لا تحتاج تخصص طبي
مستني ردكم و رد الاداره

د/امير
معلش ماقريتش مشاركة حضرتك الا النهاردة بس
و لكن حضرتك استنتجت منين انى ماعنديش فكرة عن الأسعافات الأولية ؟
كلامى ما يحملش اى معنى من ده ...
انا اول دورة اسعافات اولية اخدتها كانت بره مصر و كان عمرى 12 سنة
و بغض النظر عن سرد الدورات اللى اخذتها و انى و الحمد لله باعرف اتصرف فى حالات الأسعافات الأولية بدءا من مناورة "هايمليخ" و حتى الشق الحنجرى و الحمد لله و لكن ما زلت عند رأيى ان الأسعاف هى دورها الحاجات دى
و مش كل عربيات الأسعاف صفيح و اللى فيها مش فاهمين حاجة غير النقالة و الشيل ، فيه عربيات مجهزة و فيها مسعفين مدربين ، مش كتير و لكن موجودة دلوقت
و بعدين مع كامل احترامى للدورات اللى بتقول عليها الا ان اكترها بيتلخص فى "ضرب الحقن" (زى ما بيقولوا فى الدورة) و قياس النبض و التنفس للمريض ، و لكن فين تدريبات الأنعاش القلبى الرئوى الفعلية (على دمية مخصصة مثلا و اشهرهم Emmy) ، يا دكتور ده ايام الأمتياز الناس كانت بتهرب من الحالات اللى زى كده فى الأستقبال ، مع ان دى احسن فرصة لتعليم ده
المفروض زى ما بتقول تعليم الأسعافات الأولية و لكن بجد مش فض مجالس
و تحياتى

[ahit]

لا حول ولا قوة إلا بالله العلى العظيم

كلام غريب و الله اللى واحد بيشوفو و يسمعو دا
نشوف حد بيموت و نهرب من غير حتى مساعدة

(من أحيى نفساً فكأنما أحيى الناس جميعاً و من قتلها فكأنما قتل الناس جميعاً )

( لو إجتمع الإنس و الجن على أن يضروك بشىء لن يضروك إلا بشىء قد كتبه الله لك و إن إجتمعو على أن ينفعوك بشىء لن ينفعوك بشىء إلا بشىء قد كتبه الله عليك )

كان سهل جداً تتصلو بالإسعاف من أقرب مكان أو حد شهم ينزل من العربية بعيد و يعمل نفسوا كان ماشى و شاف الراجل دا بالصدفة و يوقف العربيات أو يطلب الإسعاف و دا طبعاً لوجة الله و لن يخزله الله أبداً

اللهم أرحمنا فأنت بنا راحم , و عافنا فأنت علينا قادر

[goofy_in_love]

على رأى الشعراوى ( شعب اسف ان يكون سلبى )ود كانت كلمتة للريس

الله يرحمه بجد رجل قل في هذه البلد

و يرحم موتانا جميعا

[deee]

الناس اللى بتقول ازاى تسيب واحد مرمى فى طريق وهتسيبه وتمشى ويموت ويا قاسى يا مجرم ياللى معندكش انسانية يا وحش ..
كان من باب اولى ان النصايح دى تتقال للناس اللى بتعدى من حتت مينفعش يعدى منها بنى آدمين لأنها ممكن تؤدى للوفاه ..
مسألتوش نفسكوا كان هيجرا ايه لو كل واحد ماشى على رجله يكلف خاطر حضرته ويحس على دمه شوية ويعدى بعد إذن جنابه من المكان المخصص لل(بهوات) اللى بيعدوا الطريق ..
خلاص صفقه المليار دولار واقفه على الكام ثانية اللى هيستغرقها لما يعدى من الحته (المفترض) إنها بعد إذنه للمشاه ...
ولا هو (حياته) هو مش مسئول عنها بينما (حياته هو برده) تبأه مسئولية على الغلبان اللى القدر هيجمعه فى المكان فى نفس الوقت ..!!!!
الناس اللى بتقول للدرجادى البنى آدم رخص والبنى آدم بأه ملهوش تمن والكلام الشعارات ده ...
طب واللى (قطع) الطريق من مكان (غير مخصص) للمشاه (وهو عارف انه بنسبة حتى 1% ممكن يحصله حاجة) ومع ذلك ضرب بككككككككككككككل ده عرض الحائط ومهموش حياته هو الاول ويقول ان اللى معاه عربية معاه فرامل ولازم ياخد باله ..
طب وإنت معندكش عقل اللى هو اقوى من الفرامل عشان متمنعش المشكلة دى من الاساس ؟؟؟؟!!!!!!!!!!!!!!!!!!!!!!!!!!!!
إنتوا مبتشوفوش الناس اللى تيجى تعدى الطريق ومش باصة اساساً للطريق والعربيات اللى جاية ؟؟؟؟؟؟؟؟؟؟؟؟؟؟؟
ولو جيت تفرمل جامد وتعمل كللللللللللل اللى عندك عشان توقف العربية ناهيك عن الصدمة وضرورة إتخاذ قرار فى جزء من الثانية وانت مرتبك .. وبعد مجهود جبار عضوى ونفسى توقف العربية قبليه وفى الاخر يبصلك بصة إستحقار من فوق لتحت ويرميله كلمتين وياخد بعضه ويمشى !!!!!!!!!!!!!!!!!!!!!!!!!!!!!!!!
عموماً دايما الناس عندنا بتدافع عن الغلط (البين) وبتدين الصح فى كل حاجة .. مجاتش على دى يعنى .

[elhdry2000]

انا لو مكانك مش هعمل كدة ولو عملت هفضل طول عمرى ضميرى يعزبنى لان فى ناس كتير غلابة ومش متعلمة معندعاش وعى بمعنى اصح بتجرى على اكل عيشها وخلاص ازاى اسيب روح تزهق امامى ومساعدتهاش وربنا مقالش كدة
كان ممكن تقف بعرض عربيتك فى الشارع وتقفل الشارع كلة والناس كلها هتقف وتبلغوا الشرطة والاسعاف بلاغات جماعية وكتير ان فى حادثة وكدة معاك الدنيا كلها شهود وكلكم لاقتوة مرمى وانتو عربياتكوا سليمة مفيهاس اى ازاز مخبوط زى مقلت فكلة كان هيمشى فى وقتها
انا بقول كدة لانى يا جماعة عملت حادثة فى شهر خمسة اللى فات على الطريق الدائرة عند التجمع الخامس واتقلبت بالعربية ربنا ميكتبهاش على حد يا رب
مش قادر اوصفلكوا احساسى واوجاعى وقتها والشلل شبة التام اللى عشت فية لمد شهر فى السرير
ربنا يسامح يا اخى وياريت تكون استفادت

[Anxs111]

يا جماعة أنا بعتقد لو النيابة فيها ناس بتفكر صح العك دة ميحصلش وازي تلبيس الناس اللي بتساعد بهذه السهلة . أكيد في محامين ممكن يحمونا .

رد الفعل بتاع الزملاء عن إن اللي بيعدي الشارع يستاهل دة في منتهى الخطورة و خلاني حاسس بخوف غير عادي . هو اللي بيعدي الشارع دة مش بني أدم.

فين الرحمة . فين الرحمة . مبؤلش إن اللي خبطه غلطان لأ دة صاحب حق ١٠٠٪ و ممكن يطلب تعويض تصليح عربيته . والذي يعدي الشارع من النص غلطان أكيد .

لكن ليه نقول يستاهل فين احساسنا بالرأفة لواحد اتعرض إنه يفقد حياته وادغدغ حتى لو غلطان .

ممكن نقول ربنا يلطف بيه و بينا وأرحمنا و اللهم أغفر لينا جميعاً اسرافنا في أمرنا .
أكيد في فرق كبير .


بالنسبة للي مش بيساعد واحد مخبوط دي وجهت نظر. اللي موقفش عشان خايف يلبسها دي وجهة نظر وعنده اسبابه واللي أيده فالمية مش زي اللي ايدو في النار .

بس واجه نفسك انك عملت كدة عشان خايف مش عشان هو دة الصح و هو يستاهل . بلاش نحلل الغلط . في واحد خواف و في واحد جدع مش دي القضية .

القضية إن الخواف يقول لنفسو دة يستاهل اللي يحصلو .

أنك تقول لنفسك أنك خواف مش عيب فظيع . لكن أنك تقول لنفسك إن إنسان مخبوط وبيموت و محتاج لمساعدة يستاهل وأنك مش مقصر دي بقى مصيبة و ربنا يهديك .

[karimone]

انا قريت كل المشاركات و رغم ان ليا تجربه برده قبل كده في حادثه مماثله بس احنا هنا بنتكلم عن واحد مخبوط و نايم في نص الشارع (مش انت اللي خبطه)
طب نفرض ان واحد ماشي علي الرصيف و العربيه نطت فوق الرصيف و خبطته و جريت اهو الراجل مش غلطان نعمل معاه ايه نسيبه يموت و لا نساعده عشان هو مش غلطان و ماشي فوق الرصيف

انا شايف ان احسن حل هو الاتصال بالاسعاف من اقرب تليفون او موبايل و الحمد لله الاسعاف منتشره كتير في الشوارع اليومين دول يعني هاتيجي بسرعه مش لازم تاخده في عربيتك

و برده انا بنادي باعادة تخطيط شوارع القاهره عشان تبقي مناسبه للناس اللي ماشيه علي رجلها و العربيات اللي ماشيه في الشارع و التخطيط لوحده مش كفايه برده لازم يبقي في التزام في القانون من السائقين و المشاه علي حداً سواء