حرام ولا حلال اللى بيحصل ده يا جماعه !!!!!

[human]

لا حول ولا قوة الا بالله

سيدى الفاضل دى من المرات القليله اللى بحس انى محتاج اعلق
التصرف السليم هو ان انت تنقذ انسان
اى حاجه تانيه تهون احنا حنقف قدام ربنا و نقله ايه؟ اصل هوا غاطان عشان معدى من هنا ف منقفش لما الراجل يتخبط؟ ايه الكلام ده
فكر انه ممكن يكون ابوك او قريبك

يا جماعه الاصل هى الروح البشريه ديه فوق كل حاجه ان احنا نبقى بنى ادمين فى المعامله مع بعض
الاخ ممدوح بيقول ان الراجل اللى خبطه غلطان عشان عدى فى صلا سالم
يا اخ ممدوح لما نلاقى واحد عايز يعدى موش لازم نلومه ده حقه انه يعدى و احنا اللى لازم نهدى و ناخد بالنا احنا راكبين العربيه و مريحين الجته و ده ماشى على رجليه المفروض نديله شويه احترام حتى لو هو غلطان عشان ده روحه اهم من العربيات اللى ماشيه كلها
و بعدىن صلاح سام اقسى سرعه المفروض 60 كيلو و فى مكرم عبيد المفرض اقل فا محدش يقول ان ده طريق سريع

حسنا الله ونعم الوكيل فى ادميتنا اللى احنا بندمرها

انا فاكلر من كام سنه كنت فىميلانو وماشى بتكلم مع واحد صاحبى قرب رصيف الشارع اللى المفروض انه طريق متوسط السرعه لقيت العربيات وقفت افتكرونى عايز اعدى و مكانش اشاره ولا حاجه ولا عبور مشاه

عشان هما خافو اكون عبيط واعدى حتى لو انا غلطان روحى اهم من اى حاجه
وروح الراجل الغلبان ده برضه

[MMamdouh]

الاخ ممدوح بيقول ان الراجل اللى خبطه غلطان عشان عدى فى صلا سالم
يا اخ ممدوح لما نلاقى واحد عايز يعدى موش لازم نلومه ده حقه انه يعدى و احنا اللى لازم نهدى و ناخد بالنا احنا راكبين العربيه و مريحين الجته و ده ماشى على رجليه المفروض نديله شويه احترام حتى لو هو غلطان عشان ده روحه اهم من العربيات اللى ماشيه كلها
و بعدىن صلاح سام اقسى سرعه المفروض 60 كيلو و فى مكرم عبيد المفرض اقل فا محدش يقول ان ده طريق سريع

كلام جميل ولا اختلف معاك... لكن مش فيه مكان لعبور المشاه؟؟.... الحادث وقع على بعد 40 متر من نفق لعبور المشاة... يعنى الراجل عدى من مطقة قريبة جدا من نفق عملاه الحكومة للعبور الامن بالاضافة ان صعب اوى تتوقع عبور حد على صلاح سالم

دا غير ان المرحوم عدى وسط العربيات و انا كان جنبى عربية جيب حاجبة الرؤية وبالتالى مشوفتش المرحوم الا و هو فى الحارة بتاعتى و بالتالى المسافة و الزمن المتاحين ليا عشان اعمل اى رد فعل كان ضيق جدا و قضاء الله كان اسرع من الكل... و على فكرة انا متاكد تمام التاكد ان المرحوم برضة مكنش شايفنى لانى لما حطيت نفسى مكانة مكنتش شايف الا العربية الجيب و بالتالى هو كان بيعدى و مش شايفى زى ما انا مش شايفة بالضبط... و هو دة السبب ان لازم عبور المشاه يكون و العربيات واقفة تماما و مش فى وضع حركة لتجنب المنطقة العمياء سواء للى بيعدى الطريق و اللى سايق

MMamdouh

[Samir Elshahawy]

كل عام وانتم جميعا بخير

بغض النظر عن اختلاف الاراء في مثل هذا الموقف , لكني أري ان الواجب و الدين يحتم علي ان اقف لمثل هذا الشخص الذي فقد حياته من جراء تهور شاب احمق مستهتر بأرواح الناس و ممتلكاتهم .

ياسادة ليكن عندكم ثقة بأن ماعند الله باق , و أن الخير الذي تصنعوه لن يذهب هباء و انه قد تكون العناية الالهية قد ارسلتكم لانقاذ شخص قد يكون يحتضر في وسط الطريق تخيلوا الاجر و الثواب من الله

فعندما تنقذ مثل هذا الشخص فتأكد ان الله سيرسل لك من ينقذك و يخرجك من مأزقك , و قد اثبتت الاحداث التي مررت بها ذلك و تأكدوا ان الله في عون العبد مادام العبد في عون اخيه

كفاكم الله شر الطريق ووقاكم من حماقات المستهترين

[Ramy_Ali]

القاهرة(د ب أ)صدمت سيارة نقل سيارة أخرى وهرب السائق دون أن ينقذ ركاب السيارة الثانية بعد أن اطمأن أن أحدا لم يلتقط رقم سيارته.
وذكرت صحيفة «الأخبار» القاهرية في عددها الصادر امس أنه عندما عاد الرجل إلى
قريته أقبل جيرانه عليه يقدمون له العزاء في مقتل زوج ابنته ويدعون لابنه الذي أصيب في حادث بالشفاء.
وعندما شرحوا له تفاصيل الحادث الذي أودى بحياة زوج ابنته وإصابة ابنه صرخ ودموعه
تسبق صرخاته «أنا القاتل .. أنا مجرم .. لم أعرف أنهما في السيارة التي صدمتها .»
كان مسئولو شرطة مركز السنبلاوين بمحافظة الدقهلية (120 كلم شمال القاهرة) قد تلقوا
بلاغا بالحادث وتبين أن سيارة تابعة لاحدى شركات البترول اصطدمت باخرى تابعة لشركة أدوية
ما أدى إلى اشتعال النار في السيارة الثانية وهروب سائق السيارة الاولى دون أن ينقذ المصابين.

[Sameh]

الموضوع على الرابط التالى مثال حى للمناقشة دى

http://www.nilemotors.net/Nile/showthread.php?p=431152#post431152

[نور القمر]

ليه بس يا جماعه مش لو انا اللي خابطاه هيبان على العربية
لا حول ولا قوة الا بالله العلي العظيم

يعني كل واحد بينصح بالتخلي عن المصاب يتخيل نفسه لا قدر الله هو المصاب
شوف شعورك هيكون ايه وقتها
والله سواء انا لاقدر الله اللي خبطاه او مش انا لا يمكن اتخلى عنه واللي يحصل يحصل
دي روح بني ادم يا جماعه مش قطه

[elassar2010]

كل الناس الى بتقول انها تقف مع المصاب وتنقلة المستشفى لو لقدر الله خبط حد وراح معاة المستشفى واتمسك فى القسم وبات فية مع المدمنين والحرامية والمخبرين انا متاكد انة هيغير راية
لو هو راح وبص بس على الحبس و الموجود فى القسم بما فيهم المخبرين
الناس الى بتقول انها تساعدة من بعيد هو دة الصح بعينة اساعدة من بعيد اطلب الاسعاف اة واروح وادفع تكاليف علاجة كمان من بعيد صدقة وهطلعها اة اظهر فى الصورة لا
لان لو اى واحد دخل وبات فى الاسم وشاف اية بيحصل فية هيغير راية مينفعش انى اعمل خير واتعذب علشانة دة ميرضيش حد

[MMamdouh]

تانى برضة.... يا بنت الحلال انا خبط واحد ووقفت.... و دخلت فى دوامة من يناير حتى اخر اكتوبر... و انا مش غلطان ووقفت

امال بقى لو مليش فى الموضوع اصلا و قدام الناس انا بنكر علاقتى بالموضوع من اساسة و مش عايز اتحمل مسؤلية حاجة؟؟؟

MMamouh

[elassar2010]

ليه بس يا جماعه مش لو انا اللي خابطاه هيبان على العربية
لا حول ولا قوة الا بالله العلي العظيم

يعني كل واحد بينصح بالتخلي عن المصاب يتخيل نفسه لا قدر الله هو المصاب
شوف شعورك هيكون ايه وقتها
والله سواء انا لاقدر الله اللي خبطاه او مش انا لا يمكن اتخلى عنه واللي يحصل يحصل
دي روح بني ادم يا جماعه مش قطه

هيبان ازاى؟؟؟؟؟؟؟؟؟؟؟؟؟؟؟؟؟؟
على اساس ان الظابط هيسالك ويتناقش معاكى لالالالالالالالالالالالالا
دى الى حضرتك بتشوفية فى الافلام الواقع هو هيكتب المحضر ويرممى الى قدامة فى الحجز تباتى وبعدين يعرضك على النيابة
والنيابة تقريبا هتنزلها جلسة فى المحكمة
وابقى اثبتى فى المحكمة انك بريئة والى يسالك انتى رايحة فين تقوليلة المحكمة وانتى جاية منين من المحكمة
دة ميرضيش ربنا انى اتعطل عن شغلى واتبهدل علشان عايز اساعد حد لان الفكرة فى الموضوع دة ان الى بيتكلم لاقى واحد مرمى على الارض مش هو الى اصابة فى حادثة

[MMamdouh]

الناس اصلها متخيلة ان الموضوع شهامة و جدعنة و شكرا... محدش فيهم دخل الحجز فى قسم و لا اترحل فى العربوكة (عربية الترحيلات) ولا اتكلبش (مش كلابش المرور) ولا دخل محكمة ولا اتركن مع المتهمين لحين صدور الحكم

و يا نور القمر... القصة اللى بتتكلمى فيها دى بتاعت المعاينة و كدة بتحصل لما يتعمل معاينة فنية للعربية بتاعتك عن طريق مهندس من المرور و هى محجوزة فى القسم...

و دة بيحصل بعد العرض على النيابة بفرض انك خرجتى بضمان محل اقامتك او بكفالة و النيابة مامرتش بحبسك...

و العرض عل النيابة دة بيحصل بعد ما تترحلى من القسم الى النيابة فى عربية الترحيلات... و لحد ما يجى معاد الترحيل من القسم سيادتك بتبقى مرمية فى الحجز

نسيت اقول ان حتى بعد ما النيابة تفرج عنك حترجعى القسم فى العربوكة برضة و تستنى العرض على مامور المباحث للتاكد انك مش مطلوبة على ذمة قضايا اخرى... و طبعا كالعادة لحين العرض على مامور المباحث بتكونى سيادتك فى الحجز برضة...

تفتكرى تجاربك فى الحياه محتاجة تجربة زى كدة تضاف ليكى عشان خاطر واحد فى الغالب استهتر بحياتة و عمل فهلوى و عدى وسط العربيات او كان فى غيبوبة و بدل ما يمشى على الرصيف نزل يتمشى فى وسط العربيات زى اللطخ؟؟؟؟؟؟؟

MMamdouh

[Terrible_DaRsH]

فكر انه ممكن يكون ابوك او قريبك

انا فكرت فى كده فعلا !!!
لاقيت ان كل واحد لما يحصل له مصيبة والعياذ بالله مش هيلاقى حد ينقذوا غير اهله !!

[MoToRiZeR]

بصراحة يا جماعة انا كنت مع الفريق اللي بيقول الناس اللي بتعدي هي اللي غلطانة لأني كنت بشوف كل يوم عالدائري الناس اللي بترمي نفسها عالعربية و اللي بيعدي و هو مش باصص و كنت بقول حلال فيه الخبط ، إذا كان هو مش خايف علي نفسه انا هخاف عليه ؟

و أثبتت لي التجربة إني مخطئ للغاية من تجربة قاسية للغاية و هي إن أختي خبطها عربية و جريت .. و لأن اللي خبطها خاف يقف قام من ربكته خبطها تاني و هو بيجري .. و جري .. و كل العربيات اللي حواليه جريت معاه لأن كل واحد خايف يلبس مصيبة .. و الناس اللي حوالين الحادثة قول "إن لله و إن إليه راجعون" كان أسهل لهم من محاولة المساعدة لذلك فسر الجميع الحادث إن اللي إتخبطت توفت أو كان هذا هو التفسير الذي يريحهم و يبعدهم عن المشاكل .. و النتيجة كانت إيه ؟ فضلت بتنزف في الشارع 10 دقائق لحد ما شخص أخيراَ عنده دم ظهر و نقلها لمستشفي و إتصل بي .

بجد في موقف زي ده المصاب بيبقي متعلق في قشاية و عايز أي حد يساعده و الثواني بتفرق .. تخيل أنك ملقي في الشارع بين الحياة و الموت بتتوسل لحد يساعدك و لكن كل الناس بتبعد عنك .. أي نوع من الإنسانية ده ؟ ده لو اللي بيعدي غلطان .. أو أهبل .. أو حتي أصلاً كان في نيته الإنتحار .. مش مبرر إني أخبطه و أجري .. فين أدميتنا اللي مسحناها بأستيكة زي ما قال أستاذ هيومان ؟

كل عربيات العالم و كل بهدلة العالم لا تساوي إنقاذ حياة إنسان .. و بالنسبة لتجربة باشمهندس محمد ممدوح فا انا متابعها من الأول و متعاطف معاه تماماَ و فرحت من قلبي اما الموضوع خلص علي خير .. و لكن المشكلة في القضية مش إنه توقف بعد ما خبط الراجل .. المشكلة إن أهل المتوفي كانوا ناس نصابين و حرامية و هذه قضية أخري .. لأن كان ممكن ببساطة باشمهندس محمد يجري و أكتر من واحد يلقط نمرته و يشهد إن هو اللي خبطه و ساعتها كان هيبقي الموضوع أبشع و يواجه نفس المشاكل و أكثر .. و لكن القضية الأصلية هي محاولة إنقاذ الشخص اللي إتخبط و ده اللي باشمهندس محمد عمله و لكن كان للقدر رأي أخر و المشاكل إبتدت بعد كدة، و عشان هو إتصرف تصرف الرجال و وقف .. ربنا نصره في الأخر و الموضوع خلص .

انا عارف طبعاَ يا باشمهندس إنك وقعت في مشاكل كنت في غني عنها مع ناس متعرفهاش و بهدلة و قضية و محاكم و لكن إحتسب عند الله إنك كنت بتحاول تنقذ حياة إنسان و دي غالية أوي .. ناس كتير طلعت و حاربت و ماتت لهذه البلد من أجل ناس في النهاية .. متعرفهاش! ده مجرد موقف رمزي لناس خاطرت بحياتها و منهم من فقدها فعلاَ لينقذوا حياة غيرهم ممن لا يعرفوهم بالضرورة ليضمنوا لهم الحياة و دي قمة الإنسانية .

انا شفت بهدلة الأقسام و عذابها و لكن لا أعتقد إنها تساوي النوم اللي الواحد مش هيعرف ينامه بقية حياته لأنه عارف إنه كان في إيده ينقذ حياة إنسان خبطه أو حد تاني خبطه و لكنه هرب و سابه غرقان في دمائه ليموت .

مش هقول أقف عشان الإنسانية و أخوك بيعاني و كلام الجرايد ده .. هقولك أقف لأن ممكن محدش غيرك يقف !

[Terrible_DaRsH]

و أثبتت لي التجربة إني مخطئ للغاية.

التجربة اقرب دليل ...
ومحدش بيحس غير لما يجرب .. وانا حسيت فعلا انى كنت غلطان علشان موقفتش للرجل ده ....
عموما ربنا يحفظ الكل من المواقف دى ..
ويقوم اختك بالسلامة لان اتكتب لها عمر جديد فعلا ...

[ibrahimsaad]

للاسف كل واحد بقى مايهموش غير نفسه وبس ومن ورائه الطوفان

منتهى الانانيه ومنتهى القسوه

لذلك فسدت مصر وخربت الضمائر

وعدل الله باق وعلى العجله تدور الدوائر

فمن تركناه اليوم ينزف او يترك مصيره وحده ليموت دون ادنى مساعده من الغير

فمايدربنا لعلنا نلقى نفس المصير دون مساعده ايضا من احد

وتذكروا ان الله هو العدل ولن يضيع ابدا مظلوم

وجدت يوما رجل ملقى فى الشارع فى قارعه الطريق صحيح انه مش زحمه ومافيش سيارات فيه كثير لكنه كان فى الشارع ومعرض لاى شئ

بصراحه انا شفته اتخضيت من شكله ومن الموقف لانه كان شكله زى الميت

قربت منه وبصيت له لقيته مش ميت لكن مغمى عليه فقمت بمحاوله اجلاسه وبسرعه قمت باعطائه احد المشروبات السكريه حتى افاق وهو يبكى وعلمت انه تائهه ويريد السفر لابنه
فما كان منى الا ان افقته وقمت باعطائه ماقدرنى الله عليه وارشدته الى طريق السفر

ومع ذلك كنت اتألم من الموقف واحسست اننى عاجز امامه

بصراحه لم افكر فيما قد يحدث لى لو كان ميت لاقدر الله ولم افكر الا فى انقاذ روح قد تكون ابى او امى او اختى او اى شخص عزيز

واكيد اننى لو حدث لى لاقدر الله مثل ذلك الموقف سوف اجد من يقف بجانبى من اصحاب الضمائر التى لاتخشى الا الله

فالجزاء من جنس العمل

واخيرا اللهم استرها معانا ومع الجميع ولاترينا فى انفسنا او احبابنا مايحزننا

[citadeldeath]

يا جماعة أنا عندي تساؤل مهم جداً خطر ببالي وأنا بقرأ مشاركات الموضوع ده، خصوصاً الناس إللي بتقول إنها بتروح في الرجلين من جراء الوقوف لرجل خبطته عربية أخرى وجريت..

السؤال هو، إزاي الشرطة بتثبت إنك إنت إللي خبطت الراجل ده بالرغم من إن عربيتك مفيهاش والا خدش واحد؟! يعني هما مبيعملوش معاينة للعربية بتاعتك علشان يتأكدوا إن هيّ ده العربية إللي خبطت الراجل ده من عدمه؟! وألا همّا فاكرين إن العربيات الجديدة كلها من فولاذ لا يُقهر وإن العربية لما خبطت الراجل متخدشتش حتى؟!

يا جماعة، يا ريت حد يجاوبني من الناس إللي راحت في الرجلين دول، وده طبعاً بعيداً عن الجدل الدائر إني لازم أقف أو مقفشي إذا لقيت راجل مخبوط في الطريق..
فمن نحيتي أنا أعتقد إني كنت هقف، وأنا بالفعل وقفت من كام يوم لما لقيت حادثة في شارع التسعين بالتجمع الخامس بجانب بيتي، عربية خبطت راجل بموتوسيكل وصاحب العربية كان واقف وجت تاني عربية وقفت، يعني كنا تقريبا تلاتة.. وعادي وقفت ولما لقيت الراجل بيتحرك واتصلوا بالإسعاف مشيت..

وشكراً