اكتر حاجه ممكن تضايقك من الاشخاص اللى بيركبوا معاك عربيتك

[أبو إياد]

السلام عليكم

فى حاجه انا بعانى منها قولت طبعا لازم اشارك اخواتى فى المنتدى علشان اشوف انا ببالغ فى الموضوع ده ولا هو ده الطبيعى

المهم الموضوع مش لاقى عنوان مناسب له
بس ببساطه (هو ايه اكتر حاجه ممكن تضايقك من الاشخاص اللى بيركبوا معاك عربيتك)

سيبك من الزوجه ومن الاولاد كلنا عارفين هما بيعملوا ايه
بس انا اقصد اصحابك او حد غريب




انا مثلا الحاجات اللى بتنرفزنى

1* حد يلعب فى الكاسيت
2* اكون مشغل المكيف والاقى واحد فاتحلى الشباك او بيشرب سيجاره
3* طافية السجاير على الدواسات
4* دى بقا بتغيظنى مووووووووووووووووووووت من اللى قاعد جانبى انه يشيل تليفونه وسجايره وحاجاته فى الكونسول او ساند ايده على الكونسول
5* رزعة الباب اللى زى الشاكوش فوق الدماغ
6* اللى قاعد جانبى وعامل شيخ السواقين دوس حاسب فرمل اكبس يمين شويه ,,,,,وهكذا

انتوا بقا ايه اللى بيضايقوا ؟




,

[Samah AbdAllah]

معاك حق كل ده يضايق ويغيظ
وخصوصا
6* اللى قاعد جانبى وعامل شيخ السواقين دوس حاسب فرمل اكبس يمين شويه ,,,,,وهكذا

[karaktar]

بصراحة كل ده بيضايقنى وبيحصلى

[blazer]

مش بحب اى حد يوسخ العربيه اجمالا
رزعة الباب اللى زى الشاكوش فوق الدماغ
اللى قاعد جانبى وعامل شيخ السواقين دوس حاسب فرمل اكبس يمين شويه ,,,,,وهكذا
دول عادى بلنسبه لى
* حد يلعب فى الكاسيت

[Samir Elshahawy]

كل ده و حياتك بس أنا بقي لساني طويل لو لاقيت حاجة مش عاجباني بأتكلم علي طول و مافيش مانع أني أركن و أقوله أنزل خدلك تاكس أعمل فيه اللي أنت عايزه , كلهم في الاول كانوا بيزعلوا بس دلوقتي خلاص فهموا أن ده نظامي و أن عربيتي نظيفة و بأحافظ عليها و بيحترموا ده

و بالنسبة للزوجة و الاولاد نفس الكلام و التعليمات بتسري عليهم , عندي عربيتي دي مكان مقدس واجب أحترامه من الجميع

[tutankhamoun]

طبعا كل الحاجات دي تغيظ ...... و لكن أنا حاطط قواعد في العربية :
ممنوع التدخين في السيارة ....... و كمان الجين 2 مفيهاش أصلا طفاية سجاير .
ممنوع الأكل في السيارة .
ممنوع الشرب في السيارة إلا من العلب المعدنية ( الكانز ) .
ممنوع القاء اي زبالة من السيارة مهما كانت صغيرة و عندي كيس زبالة في السيارة لهذا الغرض .
أول حاجة بأطلب من اللي يركب معايا أنه يربط الحزام . ( نص الناس بتقولي ملوش لزمة !! )

موضوع الموسيقى أو الكاسيت ........ مش بيداقني قوي لأني نادرا لما بأشغل موسيقى أساسا أو أي شئ آخر أثناء القيادة و بحب أكون مركز مع الطريق .
بأقفل القفل المركزي بتاع التحكم في الزجاج علشان مش كل شوية واحد يقعد ينزل و يطلع الزجاج .

و بكدا بعمل تحكم في العربية و في الناس اللي رااكبه معايا من غير ما أحرج حد علشان أنتوا عارفين الشعب المصري ........ بيموت في العشم .

[أبو إياد]

كل ده و حياتك بس أنا بقي لساني طويل لو لاقيت حاجة مش عاجباني بأتكلم علي طول و مافيش مانع أني أركن و أقوله أنزل خدلك تاكس أعمل فيه اللي أنت عايزه , كلهم في الاول كانوا بيزعلوا بس دلوقتي خلاص فهموا أن ده نظامي و أن عربيتي نظيفة و بأحافظ عليها و بيحترموا ده

و بالنسبة للزوجة و الاولاد نفس الكلام و التعليمات بتسري عليهم , عندي عربيتي دي مكان مقدس واجب أحترامه من الجميع

والله انت جامد طالما وصلت انك تنزلهم من العربيه
انت ضحكتنى جدا على فكره بس المشكله بس فى الاحراج

[أبو إياد]

طبعا كل الحاجات دي تغيظ ...... و لكن أنا حاطط قواعد في العربية :
ممنوع التدخين في السيارة ....... و كمان الجين 2 مفيهاش أصلا طفاية سجاير .
ممنوع الأكل في السيارة .
ممنوع الشرب في السيارة إلا من العلب المعدنية ( الكانز ) .
ممنوع القاء اي زبالة من السيارة مهما كانت صغيرة و عندي كيس زبالة في السيارة لهذا الغرض .
أول حاجة بأطلب من اللي يركب معايا أنه يربط الحزام . ( نص الناس بتقولي ملوش لزمة !! )

موضوع الموسيقى أو الكاسيت ........ مش بيداقني قوي لأني نادرا لما بأشغل موسيقى أساسا أو أي شئ آخر أثناء القيادة و بحب أكون مركز مع الطريق .
بأقفل القفل المركزي بتاع التحكم في الزجاج علشان مش كل شوية واحد يقعد ينزل و يطلع الزجاج .

و بكدا بعمل تحكم في العربية و في الناس اللي رااكبه معايا من غير ما أحرج حد علشان أنتوا عارفين الشعب المصري ........ بيموت في العشم .

تصدق انا فعلا استفدت من الحاجات اللى انت قولتها
موضوع حزام الامان والسنتر بتاع الزجاج
مشكور ياباشا

[Imhotep]

رزعة الباب اللى بتحسسنى انه هيتخلع فى ايد اللى بيقفله..... احيانا بسكت و احيانا من الغيظ بضطر انبه اللى بيقفله انه مش محتاج القوة دى كلها عشان يتقفل......

[YaSSerwIN]

رقم 1 ودة الطبيعى الى بيركب معاك عايز يسمع الى على مزاجه وانت مش مهم وطبعا دة بتخلى الواحد ينفجر

رقم 3 وانا اساسا مش بحب أشم ريحة السجاير وكمان بتلزق فى العربية وأزعل اوى لو لسا غاسل العربية وحاطط معطر والاقى الى حد من أصحابى جاى يشربلى سجاير فيها



أما رقم 6 بقا الى بيعمل معايا كدة من أصحابى بقولو وعلى اية وجع القلب دة بقا تعالا سوق انت ينخرس على طول

[MMamdouh]

1* حد يلعب فى الكاسيت
,

انا بتدايق لما واحد يقولى "شغل اغانى عربيى"... انا عايز اسمع بمزاجى مش مزاج اللى جنبى


,

2* اكون مشغل المكيف والاقى واحد فاتحلى الشباك او بيشرب سيجاره
,

محصلتش معايا


,

3* طافية السجاير على الدواسات
,

بخللية ينضفها


,

4* دى بقا بتغيظنى مووووووووووووووووووووت من اللى قاعد جانبى انه يشيل تليفونه وسجايره وحاجاته فى الكونسول او ساند ايده على الكونسول
,

انا معنديش كونسولة بس لو حد حط حاجة على التابلوة بقولة يشيلها و لو مشلهاش بوقعها لة على الارض


,

5* رزعة الباب اللى زى الشاكوش فوق الدماغ
,

اكتر حاجة بكرها فى الدنيا


,

6* اللى قاعد جانبى وعامل شيخ السواقين دوس حاسب فرمل اكبس يمين شويه ,,,,,وهكذا
,

انا مبتكلمش كتير فى الموضوع دة
... بقوم راكن على جنب و اقولة ينزل يركب تاكسى ياما يقعد ساكت خالص... و نفسى اجيب الستيكر دة و الزقة للناس اللى من العينة دى






اضافة للكلام دة الناس اللى بتقعد ورايا و تغرز ركبها فى الكرسى.. او تمون مش قاعدة على بعضها و تتشعبط فى الكرسى بتعى عشان يعدلوا نفسهم و يقوم ساحب ضهر الكرسى بتاعى لورا

MMamdouh

[zanativich]

أنا أكتر حاجة
إن يكون حد راكب و يوسخ الدواسة تراب

[shock]

أنا أكتر حاجة
إن يكون حد راكب و يوسخ الدواسة تراب

+1111111111111111

[aYaBooY]

انا مبحبش اولا ان حد يرزع الباب و هوا نازل او لما يركب و كائنة راكب عربية موديل 60 و طبعا بحس الرزعة ديه في قلبي
و عادتا بشتمة و لو راجل كبير ممكن اكتفي بزجرة و جملة - مترزعش الباب تاني او قولي و انا انزل اقفلة- و ده بيزعل ناس مني
بس طبعا لو الباب جرالة حاجة انا الي هاترزع مبلغ محترم
ثانيا الي يعد ورايا و يحسسني انه اعد في صالون بيتهم و يعد ينغز في دهري كل دقيقة مع ان العربية عندي مش ضيقة من ورا و الكرسي مش مرجعة اوي
و برده بزعق فيه او اقولة مش عاوزك تلمس الكرسي بتاعي تاني
موضوع السجاير بقف و انزلة حتى لو رماها علشان ميفكرش فيها تاني و خصوصا لو معايا ابني الصغير بحس اني عاوز افتح كرش الي بيولع السجارة في العربية
موضوع الكاسيت انا بحب الكاسيت ميعلاش عن مستوى معين علشان انا بسوق بالسمع و احب اكون سامع حتى صوت الكاوتش مع الاسفلت و بتغاظ جدا من الي يعد يلعب في الكاسيت
او يعليه و فاكر نفسة اعد في ديسكو
بس و ربنا يهدي المقروض الصغير و يبطل لعب في كل زرار طايلاه ايدة

[seaman]

طبعا كل اللى فات ينرفز المشكله ان مهما تنبه الناس اللى معاك يرجعوا يعملوا العامله تانى اه اه اه خصوصا رزعه الباب ....انا والله ساعات بقول للواحد عندك..والله ما انت قافل تفضل وانا اقفل وراك
والكاسيت انا عندى ام بى 3 فموش فارقه كل الاغانى اللى جواه على كيفى انا