الخلافات الزوجية الى اى مدى ....

[Ahmed Selim]

اشتري مني

سيب البيت و قول لها انا مخنوق و عايز اسيب البيت شوية

كام يوم و هتلاقيها بتكلمك تقول لك الولد او البنت سخن أو شئ من هذا القبيل

قول لها معاكي فلوس وديه للدكتور

المهم كمان كام يوم هتلاقيها بتقول لك طلقني

قول لها حاضر عينيا كمان يومين تلاتة هابعت لك الورقة

و اتفرج عاللي هيحصل و ادعي لي .... بجد و الله

يا كمال مش كل الحلول تنفع مع كل الستات

صوابعك مش زى بعضها يا معلم

صاحب الموضوع هو أدرى واحد بزوجته و هو اللى يقدر يشوف الحل المناسب معاها من ضمن الحلول اللى بتتقاله

و فى الأخر لا نملك إلا أن أحنا ندعليه أن ربنا يهديها له و يهدى سرهم.

[أحمد كمال]

تصدق والله انا بدخل مواضيع المشاكيل دي و بفضل متابعها عشان بستني ردك
دايما بتعلم من ردك الصراحه بالذات في المشاكل الزوجيه بلاقي ردك رد حد خبيررررر
اسمحلي لو ربنا اداني طولة العمر و اتجوزت ابقي استشيرك في المشاكل اللي هتحصل

يا باشا ربنا يخليك

و انا تحت امرك ....... بس استشارتي بتقول ما تتجوزش احسن هههههههههههههههههههه :)

والله انت استاذ وللمرة التانية انت الوحيد اللي قاريني في المنتدي كولو وبجد كنت مستني ردك


واقول لصاحب الموضوع اسمع كلام ا / احمد كمال

ربنا يخليك .... فعلا يا باشا انا و انت على نفس التردد :)

يا كمال مش كل الحلول تنفع مع كل الستات

صوابعك مش زى بعضها يا معلم

صاحب الموضوع هو أدرى واحد بزوجته و هو اللى يقدر يشوف الحل المناسب معاها من ضمن الحلول اللى بتتقاله

و فى الأخر لا نملك إلا أن أحنا ندعليه أن ربنا يهديها له و يهدى سرهم.

مقصو ..... اي أنثى مصرية ...... من اول بنت الغفير لحد بنت الوزير لو حست انها يمكن الاستغناء عنها و تبطل تاخد جوزها for granted بتتعدل .... انا كل اللي اقصده من النصيحة انه يحسسها انه اتخنق و الطلاق بقى ممكن و لو هي طلبته هيحصل ..... ده هيخليها ترجع للخلف در معتدل مارش ......مش باقول له يطلقها و لا حاجة

[Ahmed Selim]

مقصو ..... اي أنثى مصرية ...... من اول بنت الغفير لحد بنت الوزير لو حست انها يمكن الاستغناء عنها و تبطل تاخد جوزها for granted بتتعدل .... انا كل اللي اقصده من النصيحة انه يحسسها انه اتخنق و الطلاق بقى ممكن و لو هي طلبته هيحصل ..... ده هيخليها ترجع للخلف در معتدل مارش ......مش باقول له يطلقها و لا حاجة

يا كامولليو أنا عارف أنت قصدك أيه

بس برضه مش كل الستات زى بعض.......حتى و أن كانوا قلة قليلة مختلفين عن الباقى.

أنت متعرفش ممكن زوجته تكون من القلة دى......و مينفعش معاها الكلام ده.....يعنى ده مجرد فرض.

أنا بس حبيت أوضحله أن مش أى حل بينفع مع كل الستات.....لازم يكون عارف زوجته كويس و يقدر يختار الحل اللى يتناسب مع شخصيتها.

[midomizo]

اشتري مني

سيب البيت و قول لها انا مخنوق و عايز اسيب البيت شوية

كام يوم و هتلاقيها بتكلمك تقول لك الولد او البنت سخن أو شئ من هذا القبيل

قول لها معاكي فلوس وديه للدكتور

المهم كمان كام يوم هتلاقيها بتقول لك طلقني

قول لها حاضر عينيا كمان يومين تلاتة هابعت لك الورقة

و اتفرج عاللي هيحصل و ادعي لي .... بجد و الله

هتخلعة صح واهى تبقا جات منها

[shadygalal669]

يا باشا ربنا يخليك

و انا تحت امرك ....... بس استشارتي بتقول ما تتجوزش احسن هههههههههههههههههههه :)

هههههههه انا برضو بقول كده والله لان انا شايف اصحابي المرتبطين و اللي خاطبين المشاكل للركب يبقي تخيل بقي لو اتجوز مفيش احلي من العيشه اللى انا عايشها دي والله بروح و قت ما انا عايز و اخرج وقت منا عايز و فلوسي في جيبي و مريح دماغي ع الاخر

[hany121]

حاول تعمل بنصائح الزملاء للاصلاح. لو لا قدر الله ما نجحتش يبقي تشوف مصلحة الاطفال في ايه واعمله.. يعني لو المشاكل والخناقات ده بتبقي قدام الاطفال وبتأثر علي نفسيتهم وهتطلعهم معقدين او مرضي نفسيين ومفيش طريقه ان الاطفال ما يحسوش باللي بيحصل بينكم وحسيت ان الاحسن ليهم يعيشوا مع طرف واحد في هدوء وسلام يبقي تسيبها وتنسحب في هدوء انما لو الاطفال ممكن ما يحسوش بالمشاكل ده يبقي استحمل علشان خاطرهم .. انا طبعا مقصدش يالاستحمال انك تستحمل تجاوزها او غلطها فيك او شتيمتها اذا كان ده بيحصل لان ده مش مقبول باي حال من الاحوال لكن انا بقصد انك تعيش في نفس البيت وكانك مش متجوز يعني لا تطلب منها حاجه ولا تتكلم معاها ولا حتي تاكل من الاكل اللي هي بتعمله.. انا عارف ان ده هتبقي عيشه ما يعلم بيها الا ربنا سبحانه وتعالي لكن لو ده في مصلحه الاطفال فانت مطالب انك تيجي علي نفسك وتعمله لانهم مش المفروض يتحملوا عواقب سوء اختيارك..

[TaoTao]

احنا متزوجون وأغلبنا معرض وقريب لهذه الهاوية فأرجو تقبل رأيي من واقع خبرتي البسيطة في الحياة (تقريباً في نفس ظروفك أب لطفلين).. أنا في رأيي أن أسرتك أسرة صالحة والزوجة بإذن الله بنت ناس وتفهم في الأصول وده من كلامك واهتمامك باستشارة أصدقائك وكمان وصفك لزوجتك، انصياع الزوجة لأحكام عائلتها والجلسات العرفية دليل على حسن التربية والأصل الطيب، احترام الكبير دي فضيلة كويسة وتخليك مطمئن إن عندكم مرجعية ممكن ترجعوا لها وهاترضوا بحكمها بس ياريت تخليها آخر خيار .. طب ليه بترجع لطباعها المرفوضة بعد انفضاض مجلس الصلح؟ في تحليلي إن الإنسان (وخصوصاً الناس المتربيين كويس) بيكون تحت ضغط العرف واحترام الكبار في الجلسات العرفية .. وده مؤشر طيب في مصلحة الزوجة، فإذا ما زال هذا الضغط قد يحس المرء أنه لم يستطع توضيح موقفه (ربما للخجل أو احتراماً للمجلس أو للعشرة) وأنه رضي بشروط تعتبر مجحفة بالنسبة له فببساطة بيرجع في كلامه ويرجع لعاداته لا إرادياً .. وفي رأيي تقويم الطباع بين الزوجين لا يجب أن تتم علناً وفي جلسات صلح .. التلطف في الحديث مع الزوجة ومحاولة استشعار ما يضايقها وتجنبه وابتكار مفاجئات لطيفة كهدية غير متوقعة أو القيام بعمل منزلي بدلاً عنها .. حاجات بسيطة جداً ومفعولها سحري لأنها تشعر المرأة أنها في بال زوجها ومازالت في دائرة اهتماماته ورعايته.
المؤشر الثاني من كلامك كلمة "فجأة ومن غير مقدمات" .. في رأيي مافيش حاجة في الدنيا من غير مقدمات .. إنما تكون تراكمات من حوادث صغيرة جداً وقد تكون غير ملفتة.. واحتمال أن خجل الزوجة من التصريح بهذه المضايقات الغير مقصودة (ممكن تكون من النوع اللي بيشيل في نفسه وييجي على نفسه) هو ما سبب تراكمها إلى أن بلغت حد من الضغط العصبي وصلت معه للانفجار لأسباب أتفه مما تحملته في السابق.. ووجود طفلين ورعايتهما في حد ذاته مجهود عصبي وبدني رهيب ، لو زودنا عليهم شوية غلاسة من الزوج (غلاسة غير مقصودة طبعاً :) ) لازم الست تطرشأ من جنابها ..
واسمحولي اشارك معاكم شوية حاجات باعملها لتجنب الانفجارات الغير معلومة التوقيت:
- بارجع من الشغل واحاول ارمي كل حاجة متعلقة بيه ع الباب .. مضايقات الزملا والمديرين، حمل الشغل أي موقف عصيب عدى أثناء العمل .. مش دايماً بانجح في كدة بس لو في يوم رجعت متضايق ومقدرتش التزم بالقاعدة دي بالاقي تجاوب من المودام وتفهم للنرفزة (يعني باختصار مش دايماً بانقل هموم العمل للمنزل).
- ارسم ابتسامة -ولو منهكة- واستقبل العيال بفرحة ولو تيسر كلمتين إطراء للزوجة .. هاتلاقي اليوم بقى كله خير (وعلى فكرة كل دي سنن عن الرسول عليه الصلاة والسلام ومأجور عليها بإذن الله)
- يا سلام لو وضبت ترابيزة الأكل بنفسك أو ساعدت في تجهز الأطباق !! المشاركة المنزلية البسيطة جداً دي الستات بيقدروها تقدير عالي جداً جداً
- الأطراء والمديح على عمل جيد قامت به .. وكلمات التخفيف وتطييب الخاطر لو قامت بتقصير غير مقصود أو خارج عن إرادتها "معلش انتي تعبتي النهاردة في تنفيض البيت ممكن ناكل تونة" أو "سلامتك من دور البرد استريحي انتي ونطلب دليفري"
لازم يكون فيه هامش تسامح .. الدنيا مش هاتمشي ع المسطرة (فيه خناقات بتعملها الزوجة كتكتيك دفاعي عشان تغطي على حاجة قصرت فيها كعدم تحضير الغداء أو أكلة باظت منها أو حاجة انكسرت منها غصب عنها .. كلمتين جبر خواطر من الراجل بتخللي الدنيا بييييييييييس )
- اشتري حاجات بسيطة في مناسبات غير متوقعة .. مثلاً زوجتي معيدة في كلية، جبت لها أول السنة الدراسية طقم اقلام للسبورة وكام قلم جاف وكريكتور وقدمتهم لها مع كام نكتة، مش عاوز اقولك كأنها فرحة هدوم العيد .. وأخدتهم معاها لوالدتها تفرجها عليهم كأنه طقم سوليتير مش كام قلم بعشرين جنيه .. أنا اتفاجئت برد الفعل .. بس الدرس اللي اتعلمته إن أهم حاجة إن الست تحس إنها في بال زوجها وإنه فاكرها ومهتم بيها وبمناسباتها الخاصة ..

ملحوظة: الحاجات دي اتعلمتها من كورسات soft skills أخدناها بخصوص مهارات التواصل والتعامل مع العملاء .. بس لقيت إن أولى الناس بتطبيق هذه المبادئ أهل بيتي، والحمد لله فرقت كتير بقى فيه تفاهم أكتر وتجاوز عن الحاجات البسيطة اللي ممكن تعدي من ناحيتها ومن ناحيتي.

بعد كل ده لما بتحصل خناقة (ماهو لازم تحصل خناقات) دايماً بيكون في طرف أهدا من التاني واللي غلطان بيعتذر من نفسه من غير أي ضغط. لأن أهم حاجة في علاقة الزواج الاحترام والاهتمام والمشاعر تكون متبادلة .. دي مش حرب ولا معركة لازم انتصر فيها .. احنا بناخد بنات الناس من بيت أهاليهم معززات مكرمات ولازم نحافظ عليهم ونصونهم.
وأهم حاجة إن الإجراءات دي تتم في صورة طبيعية .. يعني مش في صورة صفقة "خدي الهدايا دي عشان تبقي كويسة" أو "أنا اتغيرت اهه اتغيري بقة" .. شوية صبر كام يوم والتغيير الإيجابي هايحصل لوحده من غير ماتطلبه ولا تعمل له مجالس عرفية بإذن الله.
ولو حصل أي زعل وانفلات أعصاب افتكر لحظة حلوة أو موقف صعب وقفت فيه جنبك .. وبعد الخناق العتاب اللطيف "لنفرض إن انا غلطان .. هل ده مبرر إنك تقولي عني كذا وكذا؟" أو "حقك عليا يا ستي انت معاكي حق في كذا وكذا بس أنا كنت متضايق لأنك عملتي كذا وكذا" الاعتراف بالخطأ إذا حدث منك ليس عيباً وسيشجعها للاعتراف بخطئها والاعتذار وسيهدئ الجو تماماً.
وافتكر عِشرة تجاوزت الخمس سنوات أكيد فيها ذكريات حلوة كتير .. وربنا يسعدك ويوفقك لما فيه الخير وتفرحوا بأولادكم إن شاء الله.

[hossam_elwani]

جزاكم الله كل الخير ولكم كل الشكر والاحترام والامتنان

[أحمد كمال]

هتخلعة صح واهى تبقا جات منها

مش ده القصد

القصد انها تحس بانها ممكن تخسره و ده يحسسها بقيمته فحالها ينصلح

[aif]

من كلامك ..... الحلول المطروحة انت عملتها تقريبا ومفيش فايده
لو السبل اتقفلت امامك
ربنا شرع الطلاق على مراحل ....... دي حكمة من الخالق
علشان كل طرف يراجع نفسه بعيدا عن الآخر .... ويشعر بمزايا الآخر بعد ان يجرب البعد عنه
في بعض الاحيان قد يكون الطلاق الرجعي حل قد يجعلها تعيد النظر في طريفة تعاملها معك
.... وانت كمان تراجع نفسك في طريقة تعاملك معها ..... لأن الكلام اللي انت كتبته ده من وجهة نظرك انت فقط ..... ممكن لو هي اللي حكت أو اشتكت تلاقي الموضوع وصل بالعكس
من العدل الا يكون الحكم مطلقا مع عرضه من طرف واحد
انا بس حبيت انبه ...... احيانا كثيرة بتلاقي كل طرف بيحكي الامور بالشكل اللي هو فاهمه .... او من وجهة نظره هو
....
عموما الابتعاد قد يأتي بنتائج ايجابية ...... سواء بوجود طلاق رجعي او بدونه .... انت اللي تقدر تحكم ..... واحب انبه الى ان الطلاق من أبغض الحلال عند الله ..... لكنه حلال
آسف لو كلامي قاسي شوية ....... لكن العلاج قد يكون مر ومؤلم في كثير من الاحيان
وربنا يوفقكما الى الخير

[أحمد كمال]

واحب انبه الى ان الطلاق من أبغض الحلال عند الله ..... لكنه حلال

الحديث ده موضوع و ضعيف و بعض الفقهاء قالوا عليه مكذوب كمان يعني متشرك خالص :)

[نور القمر]

TaoTao مقدرش اقرأ مشاركتك وافوتها من غير ما احييك عليها
واقولك ربنا يوفقك ويسعدكم كمان وكمان

احمد كمال على فكرة مش كل الستات بتيجي بالتهديد بالطلاق في ستات كتير كرامتهم اغلى عندهم ولو هددها بالطلاق او حسسها انه ممكن يطلق بسهولة لو طلبت هاتفهم انه مستغني عنها وفي الحالة دي هاتستغني هي كمان ولا هتقول في بينا عيال ولا عشرة ولا اي حاجة

[أحمد كمال]

taotao مقدرش اقرأ مشاركتك وافوتها من غير ما احييك عليها
واقولك ربنا يوفقك ويسعدكم كمان وكمان

احمد كمال على فكرة مش كل الستات بتيجي بالتهديد بالطلاق في ستات كتير كرامتهم اغلى عندهم ولو هددها بالطلاق او حسسها انه ممكن يطلق بسهولة لو طلبت هاتفهم انه مستغني عنها وفي الحالة دي هاتستغني هي كمان ولا هتقول في بينا عيال ولا عشرة ولا اي حاجة

انا ما قلتش يهددها بالطلاق ..... راجعي مشاركاتي تاني بالراحة هتلاقي اني ما قلتش كده

انا قلت يبعد عن البيت يومين تلاتة .... و لو هي قالت له طلقني يقول لها حاضر يومين و هابعت لك الورقة .... كلام في الهوا يعني ما هو لو عايز يطلق هيطلق مش محتاج افلام عشان يطلق...... بس هي تحس انه ممكن فعلا يطلق و ده هيخليها تفكر في العيشة من غيره هتبقى عاملة ازاي

[hossam_elwani]

من كلامك ..... الحلول المطروحة انت عملتها تقريبا ومفيش فايده
لو السبل اتقفلت امامك
ربنا شرع الطلاق على مراحل ....... دي حكمة من الخالق
علشان كل طرف يراجع نفسه بعيدا عن الآخر .... ويشعر بمزايا الآخر بعد ان يجرب البعد عنه
في بعض الاحيان قد يكون الطلاق الرجعي حل قد يجعلها تعيد النظر في طريفة تعاملها معك
.... وانت كمان تراجع نفسك في طريقة تعاملك معها ..... لأن الكلام اللي انت كتبته ده من وجهة نظرك انت فقط ..... ممكن لو هي اللي حكت أو اشتكت تلاقي الموضوع وصل بالعكس
من العدل الا يكون الحكم مطلقا مع عرضه من طرف واحد
انا بس حبيت انبه ...... احيانا كثيرة بتلاقي كل طرف بيحكي الامور بالشكل اللي هو فاهمه .... او من وجهة نظره هو
....
عموما الابتعاد قد يأتي بنتائج ايجابية ...... سواء بوجود طلاق رجعي او بدونه .... انت اللي تقدر تحكم ..... واحب انبه الى ان الطلاق من أبغض الحلال عند الله ..... لكنه حلال
آسف لو كلامي قاسي شوية ....... لكن العلاج قد يكون مر ومؤلم في كثير من الاحيان
وربنا يوفقكما الى الخير

شكرا على ردك انا مقدر الحيادية فى تفكيرك ولكن فيه فرق بين اخطاء الزوجين فى الحياة الزوجية وبين الشقاق بالغلط باللسان او الافعال بمعنى ان احنا اكيد كلنا بنغلط وانا معترف بكده اكيد بغلط بس عمرى فى حياتى لا طولت لسانى او جرحت او لمحت او اهنت او ضربت ممكن اتخنق اخاصم اعامل بجفاء دون اهانه يعنى المشكلة مش فى المشكلة نفسها ولكن فى طريقة حلها لان من الطبيعى الاختلاف ولابد من مراعاة ادب الاختلاف هو ده الى بيقطعنى من جوه انها بتغلط وتعلى صوتها وترفع السكينه وتسمع الجيران وبعدين زى ما انا عليه انى اقدرها وارحمها وافوت لها زى ما بيقولو ماهى كمان عليها الواجب ده واكتر كمان كلنا عايشين ولمسين ضغوط الحياة والمعيشة الى بتفرق يوم عن يوم

وكمان عايز اقول حاجه انا راجل البيت يعنى المفروض عماد البيت لو انكسرت نفسيا مش حقدرر ادى البيت اى حاجه والادى حيعشوا فى نكد ويجيلهم عقد نفسيا من الى بيشوفوه وكمان انا طبعى رومانسى بمعنى انى بحب الراحه النفسية والاستقرار ودفا البيت ومن غير كده مقدرش اعيش

[hany121]

الى بيقطعنى من جوه انها بتغلط وتعلى صوتها وترفع السكينه وتسمع الجيران

لا حول ولا قوة الا بالله.. انا اسف للي هقوله لكن مقدرش اقول غيره بعد بعد ما قريت مشاركة حضرتك الاخيره وبالذات السطر اللي في الاقتباس..

طلقها

طلقها

طلقها