كده كتير - البلد بقت لعبة

[M.almaghraby]

علي فكرة فيه كتير من الموجودين في التحرير رجال أعمال وفنانين ومستريحين أووووي واللي كنا بنقول عليهم بياخدوا الملايين علي إيه .. فيهم اللي معاه عربية كلنا بنحلم بيها وساكن في أرقي الكومباوندات أو المناطق .. ولكنهم مثقفين واعيين يدافعون عن حريتنا .. اللي هي حريتي وحريتك اللي بتحاول تقولهم "معلش إرجعوا أنا راضي!".

دماء الشهداء في رقاب المتخاذلون.

القلة النخبة الي بدأوا الثورة قادرين انهم يكملوها ان شاء الله ...

و دماء الشهداء مش حتروح هدر ابدا

[MoToRiZeR]

خبر مضروب من فوكس نيوز وسي إن إن نفته

[gemy1]

انا كل اللى هاقوله حاجة واحدة احنا عملنا الانتفاضة دى علشان حال البلد يتصلح مش علشان الحاجة تغلى زى ماهو حاصل ولا علشان نقطع زق حد ونوقف حال الناس ونجوع الناس زى ماهو حاصل احنا غيرنا الحكومة وهنحاكم الفاسدين وهنعدل الدستور بس مفيش حاجة بتحصل بين يوم وليلة لازم ندى الحكومة فرصة علشان ينفذوا اللى وعدوا به وافتكروا للرئيس الحاجات الحلوة انه خلى البلد بدون حرب واذا كان غلط اظن كل حاجة هتتصلح بس نصبر شوية وبلاش نشمت الاعداء فينا

[M.almaghraby]

بصراحة مبارك معلمش اي حاجة حلوة لمصر ...

[amado ibrahim]

اتفق مع اغلب الشباب اللى قالو ان استمرار المظاهرات بهذا الشكل قد اصاب البلد بالشلل

و اتفق ايضا ان هناك فئات كتيرة لها مصالح قد تعطلت ووظائف على كف عفريت (وف وظائف العفريت نفسه زهق ور اح يدور على عقد عمل فى دبى <خاصة العاملين فى قطاع السياحة ننظرا للهروب الكبير اللى بيقوم بيه السياح معقول مليون سائح يغادرو البلد فى 11 يوم زى مقال النائب عمر سليمان >

بالمناسبة ايه حكاية الملايين اللى شغالة فى البلد واحتاجوا كم طيارة و كم يوم عشان يسافرو (باسلوب الحساب اللى ماشى فى مصر اليومين دول احنا ممكن نفضى البلد تماما ( جوا) فى خلال 800 يوم

او يمكن العفريت يركب جمل او حصان ويهاجم ميدان التحرير دفاعا عن مركزه

ما علينا

المهم فى وجهة نظر سمعتها من مجموعات من الشباب المختلف التوجهات

1- شباب 25 يناير ( الجماعة بتوع كلنا خالد سعيد- 6 ابريل -وفيس بوك و تويتر و الكلام العنكبوتى ده)
دول رايهم انهم هم المحرك الرئيسى للمظاهرات
وهم يريدون ان يطبقو السيناريو التونسى بحذافيره(للامانة هم قد نجحوا فى تطبيقه فى مواجهتهم الامنية على مدار 11 يوم لدرجة انهم خلو الشرطة يقلعو هدومهم الميرى و يلبسو ملكى و ينسحبو من الميدان فى صورة مخذية تماما ادت لاقالة حبيب العادلى افندى( اه تخيل افندى بعد مكان باشا ) واصبح ظابط الشرطة بيخاف حد يعرف انه ظابط شرطة او ياخد باله من العربية المتفيمة تماما او من اى ستيكر يشير من قريب او بعيد لوزارة الداخلية(مش عارف حاسس ليه كانى بتكلم عن الحزب النازى فى المانية بعد سقوط الرايخ الثالث وهزيمته فى الحرب العالمية الثانية<حلو شوية الحركات الامريكانى وهولوكوست وستيفن سيللبيرج و قائمة شلندر>

المجموعة السابقة تريد اسقاط النظام (الشعار اللى بقيت بسمعو وانا صاحى و كمان وانا نايم كأننى ندهتنى النداهه)
هذه المجموعات تتميز بالتنظيم - الاصرار العجيب على الاستمرار على السيناريو التونسى (لدرجة ان الموضوع بقى عامل ذى نكتة اختبار للعمد <العمدة الأول دخل قاللو ايه الحاجة اللى بنلبسها فى رجلينا و سودة و برباط العمدة قال الجزمة قاللوه ناجح
خرج للعمد بره يقلهم الامتحان فى جزم
دخل العمدة الثانى سالوه ايه الحاجة اللى من بره ابيض و من جوه اصفر و بتتاكل
قالهم برباط و الا من غير رباط
(هما دول المصريين على موضوع الرباط قصدى التنحى)
صباح الخير يا عمد (باين موضوع الرباط بدأ ينتشر بين باقى العمد (اليمن - الاردن - الجزائر -سوريا) والفضل فى ذلك يرجع للعمدة الاولانى بتاع الجزمة و الرباط (قصدى التنحى)


2- الاخوان المسلمون (دول انتم عارفينهم كويس امال كنتم بتتفرجو على مسلسل الجماعة على ايه)

3-التيارات السياسية المختلفة بما فيهم المعارضة و الاحزاب السياسية الاليفة اللى بيربيهيم النظام فى الجنينة(على حد تعبير الصحفى ابراهيم عيسى <بالمناسبة محدش يعرف راح فين عشان انا مشفتوش بقالى فترة(يمكن العفريت شافله فرصة عمل فى دبى او سلفه جمل او حصان مع كرباج محترم>

4- ودول الاكثرية ودول جميع طوائف الشعب المختلفة اللى حاسة انها مش واخدة حقها فى البلد
ودول ناس كانت مطالبهم بسيطة (حرية-عدالة اجتماعية- فرصة عمل زيادة مرتب - كرامة فى المعاملة)
ونتيجة العنف البشع اللى مورس ضدهم انقلبت شعاراتهم هما كمان الى (الشعب يريد اسقاط النظام) لكن بصورة اكثر حدة لان الموضوع اصبح فيه دماء 300 شهيد و الالاف الجرحى (التى لم يعتذر عنها النظام حتى الان <باستثناء الراجل المحترم اللى اسمه احمد شفيق الذى اشار الى الموضوع باستحياء وكان اللى ماتو و اللى استشهدو شوية كلاب او قطط او خيل او جمال او اى كائن ممكن يذبح عادى فى ميدان التحرير
بدون اى اعتذار مسئول او صرف معاشات لاسرهم ا و حتى تعويضات عما لحق بهم
و كأن مسلسل العنجهية فى لغة الحوار الحكومى ما زال مستمر (على الرغم من اللى الاخ احمد شفيق عمال يعيد ويزيد فيه ويلف بيه على كل الفضائيات بموتوسكل كأنه جاى يعمل لقاءت و حورات مش يحل ازمة(الفريق شفيق يكرر
ويزيد
و يعيد
و ينتشر
ويستمر
ويستمر
ويستمر( كفاية يستمر كدة و لااكمل لا كفاية احسن تنامو منى )
قال ايه الراجل يجماعة
قال ايه الاب الرئيس اللواء الركن الحكيم(اه والنبى لحسن احنا بقالنا 30 سنة مشيين جنب الحيط عشان حكمة السيد الرئيس < طب والنبى يا ريس متشوفلنا 3000 جنيه سلف بحكمتك دى (الله يرحم ال 3 جنيه بتوع على الكسار)
الرئيس الحكيم المؤتمن حقق90 % من مطالب الشعب
(بالمناسب فكرتونى فى قصيدة حلوة جدا خاصة بالرئيس المؤتمن كان كتبها الشاعر العراقى الكبير احمد مطر عن وعود الروساء (المؤتمن منهم ) فما بالك بالحكيم اللى عمال يخبط وعود و تصريحات من 30 سنة(خاصة التصريحات من عينة محدوددى الدخل فى عينى- مشاكل الشباب فى ودنى - و مشاكل الشعب بسلك بيها سنانى)

5- ودول بقى اشكال غريبة اجانب على عرب على خواجات و دول باين اللى ساكنيين فى الفنادق المطلة على ميدان التحرير (ذى الاخ اللى مبسوط اقوى اللى طلع فى اغلب الفضائيات انه اتضرب بالقنابل المسيلة للدموع فى المظاهرات وشايف ان دى خبرات لا تنسى(بقى انت جاى من بلدكو عشان تنضرب بالقنابل المسيلة للدموع المنتهية الصلاحية عندنا لا يا عم خليك فى بلدك احن متفرسناش وا حنا نبعتلك اللى انت عيزة ديلفرى لحد بلدكو

واخيرا تنصهر مطالب التيارات المختلفة التوجهات فى بوتقة واحدة (حلو الكلام الشيوعى الحنجورى ده) تحمل شعار
الشعب يريد اسقاط النظام
ليتجمع عليها الشباب و الشيوخ و الاطفال
المسلمين و الاقباط (لاول مرة يجتمعو بجد مش زى فيلم حسن و مرقص) <كأن الواحد عايش ايام ثورة 1919
المجدودين و المحدودين (الاغنياء و الفقراء ما انالازم اتنطط انا كما بالكلمتين بتوع المنفلوطى فى النظرات و العبرات)

اتكلم جد شوية
اول مرة فى حياتى اشوف الشعب المصرى متجمع على حاجة و احدة ( غير الساحر المستديرة اللى كلو دماغنا وخدرونا بيها لفترة طويلة من عدالة السماء ال اليوم)
واحس ان الملايين (مش القاهرة بس لا كل محافظات مصر ليها نفس الطلب (بس مش عارف ايه سر الكره العجيب لمبارك الى هذه الدرجة (على الرغم انه مش وحش للدرجة دى)

واخيرا
حدوتة الصباح

قابلت راجل عجوز على المعاش امام مكتب البريد المغلق عمال يبص للمكتب بحيرة
اكتشفت انه قاعد امام البوسطة من الفجر مستنى البوسطة تفتح عشان يقبض المعاش ليلبى احتياجات اسرته البسيطة
اتكلمت معاه و قلتلو ربنا يجازى العيال اللى تعبت البلد كلها معاها
بصلى باستغراب و قاللى ايه الكلام اللى بتقوله ده
دحنا اتحصرنا فى كبريت اكتر من شهر
وكنا عشان نقدر نواصل الصمود امام حصار الصهاينة كنا بنفكر بعض دايما
ان النبى صلى الله عليه و سلم و الصحابة اتحاصروا فى شعب ابى طالب 3 سنين
حتى اضطروا ان يأكلو ورق الشجر

ومع ذلك لم يغيروا دينهم و لم يستجيبو لاغراءاتت الكفار من (الملك - المال )

استمعت الى الرجل باستغراب وا ندهشت
دحنا بقى على كدة عيال .....................................
كملو انتو بقى

[M.almaghraby]

مشاركتك جميلة اوي يا amado

فعلا رائعة

[MoToRiZeR]

مشاركة رائـــــــــعـــــــــة يا ريت حضرتك تنشرها علي فيس بوك في صورة مقال

[Moh.Abdelbaset]

بصراحة مبارك معلمش اي حاجة حلوة لمصر ...

لكننا شعب ناكر للجميل فعلا

[Ahmed Anwer]

حراااااااااااااااااااااااااااااااااام

حرااااااااااااااام عليك يا مبارك

عشان إنسان واحد بلد بحالها يقف حالها

ده المفروض يكون ندائكم دلقوتي

عشان تعرفوا إنه إنسان عنيد مبيفكرشي غير في نفسه

أو بلطجي بيقايض رزقكم و أمنكم المزعوم ببقائه علي الكرسي

[wael17]

1.


و اكرر للمرة العشرين , الي موجودين فالتحرير دول ناس راقية جدا و مثقفة و هم اعلي من هذه الاتهامات بكتير

متاكد ان كل اللي في الميدان...الي بيقولوا عليهم وصلوا 2 مليون ناس راقية جدا و مثقفة

طب و الصورة دي


الحكاية بقت سخيفة و تحس انها بقت موضة بين الشباب...يلا يا جماعة ننزل ميدان التحرير شوية...مين ها يبات النهاردة في الميدان؟...كله دايس في المظاهرات..طب يلا بينا...طبعا في ناس (و هي قله) مقتنعة انها بتعمل حاجة لمصلحة الشعب...بس للاسف الشعب مش عارف مصلحته و بيقلهم كفاية ارجعوا بس هما هايفضلوا هناك غصب عين الشعب ابن التيييت اللي مش عارف مصلحته...بيفكروني بأحمد نظيف لما كان بيقول الشعب غير ناضج و مش عارف مصلحته
اللي موجودين في ميدان التحرير دلوقتي 3 فئات
-بقايا اللي خرجوا يوم 25 و 28 و دي قلة لا تتعدي المئات
-اخوان و دول الاف مؤلفة
- شباب فاضي في اجازة نص السنة و التحرير بقي خروجه لذيذة يروح يقف شوية او يبات يوم ولا اتنين و يتصور كم صورة و يرجع يحطهم علي الفيسبوك عشان الناس تشوف بطولاته و طبعا صحابه لما بيشوفوا الصور هما كمان يقولوا يلا بينا ننزل علي الميدان احنا ورانا حاجة...و دول كتيييييير قوي و مالهمش في السياسة و لا فاهمين حاجة بس بيزيطوا في الزيطة و كل واحد بقي عامل فيها زعيم و ليه مطالب و مش هايمشي غير لما تتنفذ

[wael17]

و دماء الشهداء مش حتروح هدر ابدا

لا ممكن تروح هدر لو الثورة دي فقدت تأييد الشعب
ممكن تروح هدر لو ادت في النهاية لتحقيق مكاسب للاخوان و تسهيل وصولهم للحكم
ممكن تروح هدر لو أدت لانتشار الفوضي في البلاد و انهيار الاقتصاد
ممكن تروح هدر لو بلدنا بقت زي العراق

و مش كل اللي ماتوا اليوميين اللي فاتوا هم الشهداء بتوع الثورة

في ناس كتير بتموت كل يوم من غير دية علي ايد البلطجية و ما يسمي اللجان الشعبية و دول ناس غلابة و لاحد عارف عنهم حاجة ولا حد هايجيب حقهم دول بقي دمهم راح هدر بالفعل

[M.almaghraby]

الي فالصورة دا انت متكلمتش معاه ولا عرفت ايه اتجاهاته و لا ايه تفكيره عشان تحكم عليه

ممكن يطلع احسن و اعقل من ناس كتير اوي ......

مبارك استقال من الحزب الوطني

مش حنسكت غير لما تسيب الحكم يا مبارك

[heshamzaky]

الى عاوز يتفرج مباشرة على ما يحدث من مهازل فى التحرير يشوف قناة الرأى . بالذمة دول ناس ليها أهداف و لا ناس نازلة تروش شوية و موقفين حال الناس كلها

[dodino2006]

العملية اصبحت واضحة و مستفزة, التحالف الانتهازي الغير برئ ما بين الاخوان و الاحزاب عديمة الوزن راهنة البلد لحد لما توقع النظام كله علشان تلاقي مكان ليها في عهد النظام الجديد.....





.

[dodino2006]

الي فالصورة دا انت متكلمتش معاه ولا عرفت ايه اتجاهاته و لا ايه تفكيره عشان تحكم عليه

ممكن يطلع احسن و اعقل من ناس كتير اوي ......

مبارك استقال من الحزب الوطني

مش حنسكت غير لما تسيب الحكم يا مبارك

بصراحة لو مبارك ساب الحكم في الوقت ده, يبقي يستاهل محاكمة عسكرية بتهمة خيانة الوطن, زيه زي ظباط الشرطة اللي تركوا مواقعهم (باستثناء من تعرض منهم لاعتداء)



.