سقوط علامة بروتون الجزء الرابع (سلسلة مواقف كوميدية)

[sayed911]

تم بعون الله وتقديره بعد ما نصحت الأستاذ كريم منير يوم الجمعة بشراء غطاء نضيف هههههه الحقيقة انا اللي نزلت النهاردة اجيب غطا :D :D :D
سيبوها على الله الحمد لله على كل شئ ..
جبت غطاء ووتر بروف من النوع الثقيل جدا بـ 125 جنيه !! مش عارف كده كويس ولا لا !!
ولكن فيه فكرة عجبتني فيه قمط بأستيك بشنكل زي الصنارة بتتشبك في الجنوط ولا بقى ادفس ورا العجل ولا يحزنون الحقيقة ...
قولت بقى المرادي انا ها اطلع انصح من الحرامي !! وبكرة لما انزل ها اصور اللي عملته بالتفصيل جريت جبت ازازتين سبراي دوكو ..
ورحت كاتب الآتي على العربية !!
اسمي الرباعي !!
نمرتين موبايلاتي !!
نمرة البيت !!
عنوان البيت !!!
نمر العربية !!
واسمي بالإنجليزي كمان !!
وكتبت كل ده كل مرة فين بقة !!
مرة على الشنطة
ومرة على الإكصدام الخلفي
ومرة على البربريز
ومرة على كل باب من الأربع ابوب !!
ومرة على البرابريز الأمامي
ومرة على الكبوت
ومرة على صدر العربية
والإزازة خلصت الحقيقة كنت عايز ادي السقف التاتش بتاعي برضوا ولكن مكفتش الإزازة خلصت !!!
البواب وقف اتريق عليا تريقة !!!
يا باشاا انتا جايب غطاء عشان تملاء دوكو !!!!
وروحت ضايف جملة مصرية اصيلة !!
Stay away from me or iam calling the cops !!
وبالعربي تحتها !!
ابعد عني يا مـ.......
الترجمة في معامل انيس عبيد على فكرة يا جماعة :D :D
وجبت الغطاء صحيح من ميدان الجامع لحسن اكون نسيت اقول !! وربنا ما يرميلكم حرامي في سكتم قادر يا كريم !!

[foxmanayman]

ماله الغطا الي جنب العربية
ده مستحيل يتسرق

[Eng.Geo]

مبروك يا سيد :)
هو زي بتاعي بالظبط .. النوع مش الكتابة اللي انت كاتبها :)
هو رخامته لما يعبي تراب بقي وخصوصا عربيتك سودا
هتشيله تلاقي تراب علي العربية وصعب جدا تنفضه وغسيله رخم :(
حلها .. واكس وفوطة زفرة أو شرشوبة والتراب هينزل في ثواني

أخساسك أيه لو نزلت مالقيتوش :))))))

[saadelden]

الغطا دا لو اتسرق اقفش ف البواب و اظبطه
امال هو بواب علي ايه :d ؟؟

انا بصراحه ماتفرقش معايا ووتار بروف ولا من غير بروف المهم يكون غطا بيستر العربيه :d
علي فكره انا ماجبتش غطا للعربيه لغايه دلوقتي


حاجه كمان (ماهي الكتابه ببلاش :p )
قصه تثبيت الفاميه علي الرخصه عايزين نعرف ايه الامراض الي بتخليهم يسمحو بيه ؟

[sayed911]

ها هو يعود علينا بطلته البهية !! ذو الوجه المبتسم والأسعد على الإطلاق مولانا الشيخ سيد !!

بعد اليوم المثير جدا الحقيقة امبارح طلعت طلعت ونزلت على مفيش الحقيقة !!! ولا عرفت اعمل اي حاجة !! في الآخر فقدت الأمل وطلعت انام !!

اتسرقت وانا نايم زي الخروف !!

شرفي !!

كرامتي !!

اواجه خط الصعيد ازاي !! ( ابويا اسموا خطاب وبناديه يا خط !! )

ده يطير فيها رقاب !!

ده انا عيلتي سواحلية ممكن يقيموا عليا الحد ازاي واحد من العيلة يتسرق !!

شرف الهلايلة يا ناس !!

المهم نفكنا من القصة دي عشان انا عامل زي الطفل اللي ضاعت البزازة بتاعتوا ولكن انا بقولها واعلنها على الملأ اذا الغطاء مظهرش من هنا لحد الجمعة انا بأعلن اني ها اقوم بعمل غارة على قسم الوايلي يوم الجمعة عشان انا مش فاضي الخميس !!

والغارة ها تكون من اجل قش الغالي والنفيس !!!

ما علينا نكمل قصتنا ..

الطيار : السيدات والسادة هنا لكابتن الطيار ... فلان الفلاني !! نعتذر عما بدر منا قبل الإقلاع بدقائق ويؤسفني ان اعملكم بتكرار حدوث نفس الإيرير مما سيطنا للهبوط في اقرب مطار وفي اقرب فرصة وسيقوم ملاحونا بإعطائكم التعليمات عن الهبوط الإضراري حالا .. وشكرا !!!

دبت حالة الرعب في النفوس كلها !!

والدي : باصص لأحمد اخويا ( بركاتك يا فقري يا ابن الفقري ) !!!

في تلك اللحظة الركاب كلهم بقى على لاسانهم كلمة واحدة !! لما البهيم اللي سايق الفلوكة دي شايف انه فيها مصيبة طلع بينا من الموقف ليه !!!

ده عدم تحمل للمسؤولية !!!

وهكذا بقى !!!

الناس فعلا ركبها بقت تخبط في بعض !!!

احمد اخويا !!! مفيش تحتنا حتى جزيرة الواحد يعوم لحد ما يوصلها !! يا ساتر يا رب !!!

الواحد مش جايب معاه مايوه !!

لا بقى وسمك البحر الأبيض غير البحر الأحمر !!!

يعني ها نتقزقز على مزاجك يابا !!

الا تفتكر يا سيد !! هيا لو الطيارة وقعت !! احنا ها نموت من الإصطدام !!

ولا ها نغرق !!

ولا ها نموت من العطش مع اننا ها نكون في وسط بحر بأكمله !! ام انه السمك ها يفترسنا !!

انا : فرص كل حاجة من دول ايه ؟

فرص نجاتنا من اصطدام مباشر بسطح المياه بطائرة كانت طايرة بسرعة 300 عقدة !!! يعني حوالي 600 كيلو السقوط الحر !!! اقدر اقول التحطم ها يهشم جسمنا !! ودي فرصته 75% !!!

اذا ربنا كتبلك النجاة فاضلك 25% !!! اذا عرفت تتحرر من الكرسي بتاعك والضغط داخل الكبينة ميحسبكش مع الطيارة للعمق ساعتها ها تنجوا منها ليه بقى لأنك راكب في في النص !! فليك فرصة عن اللي راكب قدام في الإصطدام لكن هوا التاني ليه فرصة اكبر ف يالخروج اسرع ولكن انتا لابس لابس يا معلم !! فرص نجاتك من داخل الطيارة لو انتا سباح ماهر جدا جدا وها تعرف تاخد ريكاشن بجد في اقل من جزء من الثانية اللي هوا اول ما الإصطادام يحصل تكون انتا بدأت تتحرك نجاتك من 25% ها اديك فيها 10% وانا كده كارمك قوي !!!

فرص بقى انك تلاقي حد ينجيك من الموت بعد ما حطام الطائرة البحر ها يبلعه مش ها يغوص على وش المية غير شوية العفش اللي ها يعوموا على وش المية ودول فرصهم انك يشوفوك في عرض البحر !! موعدكش يا سيد بيه ولكن انتا كده كده ميت !!!

انا : روح يا شيخ !!! حسبي الله ونعمل وكيل فيك !!!

والدي !! مش عارف ليه راح حاطط ايده على مناخيرو وكأنه ها ينط خلاص !!!

وسبحان الله !!!

الطيارة فضلت طايرة عادي جدا !!!

ونزلنا في مطار القاهرة كمان !!

يعني فضلنا طايرين ساعتين كاملين والعملية في الخير !!

نزلنا مطار القاهرة !! الطيارة اصلا لسة منزلتش على الران واي اصلا !!

لقيت المصريين قاموا جري ووقفوا ولا كأنه ميكروباص داخل الموقف !!! وقاموا يجيبوا الشنط !!! الملاح يقوله يا فندم اقعد لمحصلتك انا مش بقولك على حاجة عشان اثبتك في مكانك انا بقولك من فضلك اقعد خوفا على مصلحتك :d

الطيارة هبطت على الران واي ودخلنا في وشايفين هناجر الطيارات موجودة !!

دي اول مرة في حياتي تقريبا كنت انزل مصر وكنت في وعي كامل لإدراك اللي بيحصل حواليا !!

احمد : بابا هوا مين مستنينا في المطار !!

بابا : مفيش حد احنا نازلين نعتمد على نفسنا !! احنا ها نروح نعملهم مفاجأة في البيت !!

انا : بابا !! مفاجأة ايه !! ها نروح على بيت مقفول بقاله 3 سنين !! وعمامي اللي احمد اخويا مش بيعرفهم من بعض لحد دلوقتي !! وولاد عمامي اللي معرفش انا شكلهم لحد دلوقتي وتقولي مفاجأة !! بشرك الله بالخير يا حج !!

قشطة !! طالعين من الجوازات!!!

بندور على الرو اللي ها نلاقي مكتوب عليه للمصريين فقط زي ما اي دولة في العالم بتعمل !!

طبعا كل سنة وانتم طيبين مفيش الكلام ده !!

وقفنا في الطابور زينا زي اي كائن حي تاني :d

ملينا الورق الغريب اللي بيتوزع جوا الطيارة اللي انا كنت فاكره استبيان عن مدى جودة الرحلة !!! اتاريه طلع ورق دخول مصر اللي هوا الكارت الصغير ده !!

والله انا كنت مستصعب الأسئلة اللي فيه جدا !!

كات اصعب من امتحان الفيزيا ذات نفسه

ملينا الورق !!

ووقنا في الطابور بأدب واخلاق !!

فواقفين في الرو بتاع الجوازات ومستنين دورنا فواحدة جت من ورا

وكانت الترتيب كالآتي

فيه واحد واقف عند الزابط بيتختملوا الباسبور

وبعدين راجل تاني

وبعدين والدي

وبعدين احمد

وبعدين انا

وكمان ايه والدي اصر انهكل واحد فينا يقف كمواطن مستقل مش يقف احنا التلاتة مع والدي واصر على كده !!

وجت السيدة دي وراحت متمشية لأول الرو !!

وفجأة الراجل اللي قدام والدي قالها تفضلي !!

استنيت اي ريكشان من والدي محصلش !!

قولت يمكن هوة ده الذوق والآخلاق بقى !!

احمد اخويا راح رامي كلام !!

منى واقف وراك يا والدي بقالي 3 ايام مقولتليش اتفضل ليه

ولا هوا انا لازم اربي شعري و...... عشان تقولي اتفضلي

راح بابا باصص لأحمد وقاله عيب !!

احمد : بقولك ايه مهو لما يبقى واقف وراه 3 رجلة بشنبات ويدخل حد يبقى عيب يعني !!

راحت الست باصة لأحمد بصة كده اللي هوا يعني لم نفسك !!

احمد راح باصصلها !!!

فيه ايه هوا الحق بيزعل !! ولا لما ابقى واقف في الرو بقالي 3 ايام ويجي حد متطفل بغض النظر عن جنسيته ايه يروح داخلي يبقى ده عدم احترام ليا في بلدي وخصوصا كمان انه واحد من ولاد بلدي هوا اللي قالها اتفضلي !!!

راحت بصاله !!! يعني شهامت العرب وصلت للحد ده يوقفوا الستات في الطوابير ويمشوا همة !!

احمد : والله العظيم !! والله العظيم وحياة الراجل الكبارة اللي واقف لا بيه ولا عليه ده !! لو والدتي اللي واقفة ورايا في الطابور لها اوقفها من هنا لحد يوم الدين !! مدام فيها صحة تقف يبقى اللي يمشي عليا يمشي عليها وشايفك بسم الله ما شاء الله غزال بيجري ولا دلوقتي بقيتي ست ويا عيني الدوالي مش مخلياكي قادرة تقفي على رجليكي !!

لو شايفك فعلا مجهدة من السفر او سنك مش سامحلك كنت والله انا وقفت وشلتك زي ابنك بالزبط ولكن برضه اهلا بيكي في بلدك التاني مصر !! وانجزي عشان كده عطلة !!!

بابا : انتا يبني اجنبي وعايش برة ازاي !! انتا ولا الرداحة اللي اتسرق محفظتها في ميكروباص في شارع جسر البحر !!

ايه الأخلاق الـ...... دي !!

فين مادة الإيتيكيت اللي بتتنيل تتعلمها دي !!

فين الذوق !!

انا مربيك على كده !!

احمد : يعني لما وقفت ودخلت قدامك في الدور ها تقف سيادتك تتفرج مش ها نخلص !!

كل ده وانا عامل من تايوان ولا كأني اعرفهم !! لأنه الإتنين صوتهم عالي وكمان بيتناقشوا بإقتناع تام

لحد ما جه دورهم ...

والدي : مساء الخير يا فندم .. هيا الساعة كام بالتوقيت المصري

الزابط : الساعة فوق اهي ..

والدي : امممم الرحلة كانت موترة الحقيقة للأعصاب ولكن الحمد لله على الوصول لأرض الوطن سالما !!

الزابط : دكتور خطاب !! بعد اذن حضرتك اتفضل مع الزابط ده عايزين حضرتك في حاجة مهمة !!!

انا شفت اتنين زباط بيرافقوا والدي من قدام شباك الجوازات !! قلت بس احمد اللي عمله ها يطلع على والدي !!

احمد دخل على الشباك !!

احمد كان ساعتها ايه يعني يا دوبك !! مش فاكر بالزبط ولكن الفرق بيني في السن وبين احمد حوالي سنة بالزبط !! ومحدش يسأل ليه انا في 3 كلية وهوة في 3 ثانوي ده حوار طويل جدا ..

احمد : والله ده تهريج يا حضرة الزابط البلد بقت في حالة فوضى يرثى لها !!

الزابط : انتا الوظيفة بتاعتك طالب ولسة مبلغتش سن الرشد انتا هنا بصحبة مين ؟

احمد : الحج اللي انتوا قبضتوا عليه من شوية ده !!

الزابط : هل ليك اي مرافقين تانيين !!

شاور عليا !!

الزابط : طبيعة زيارتك ايه ؟

احمد : واحد عنده 16 سنة وجنسيته مصري وجي مصر ها تبقى اسمها زيارة ولا يبقى اسمها عودة لبيته يا حضرة الزابط !!

الزابط : حقك عليا ايه طبيعة عودتك لبلدك !!

احمد : سياحة يا فندم !!

الزابط : اتمنى تستمتع بمصر وتقضي وقت لطيف !! وياريت تخلي لسانك في بقك السيدة دي كانت فعلا في عجالة من امرها !!

احمد : يا فندم احنا كلنا بنبقى في عجالة من امرنا ده ميدلناش الحق في اننا ندوس على حقوق الآخرين في الدور !!

انا : يا عم الله يهدك امشي بقى كفاية بقى !!

انا : مساء الخير يا فندم !!

الزابط : اهلا !!

انا قولت ها يقولي حصل والدك على قوضة النفخ!!

الزابط : هوة مش انتو مع الدكتور خطاب

انا : اه !!

هو : طيب متقلقوش هوا بالزبط دقيقتين وها يخرج هوا بس عشان الباسبور فيه حاجة مش واضحة فها يتم توضيحها وها يخرج فورا يعني متقلقوش

احمد وهوا على بعد 2 متر !!

ها نقلق على ايه هوا مش ممسوك بحاجة ولو عايز اطلعه دلوقتي ونمشي محدش ها يعرف يقولنا انتوا رايحين فين !!

انا : متخدش عليه يا حضرتك الزابط احمد بس بيحب يهرج شوية !!

الزابط : لون عيونك ايه عشان مش متوضح في الصورة !!

انا : مهو مكتوب في الباسبور انظر الصورة !!

الزابط : الصورة قديمة جدا !!

انا : طيب وانا مالي هوا فيه اب ديت بينزل على الباسبور وانا منزلتوش ؟

هو : حضرتك بتهرج ؟

انا : لا والله بس انا اعمل ايه اذا كانت مدة تجديد بسبورنا الموقر 7 سنين !!

هو : سمعنا عن تواجد ازمة سكر في ايطاليا ما مدى صحة الكلام ده ؟

انا : والله مشربتش شاي عند حد يا فندم عشان اعرف !!

هو : هوا انتو علية مقطعة بطايقها !!!؟؟(بيقولها وهوة بيهرج )

انا : هههههههههههههههههههه لا ولله يا فندم بس حضرتم ملاحظتك غريبة وانا ردي اغرب صدقني لو عارف ها اساعد حضرتك ..

وكان والدي ساعتها طلع !!

جه جنبي

والدي : متشكرين قوي يا حضرة الزابط والله فعلا كرم المصريين بان فعلا ..

انا كل ده معرفش هوا اتعمل معاه ايه جوة !!

الزابط : ولا يهمك يا فندم تحت امر حضرتك وربنا يخليلك الأولاد وخصوصا الكابتن اللي واقف هناك مش طايق نفسه ده هههه

والدي : بعيد عنك الله لا يوريك ده كده وهوة فرحان كمان

انا : ممكن نمشي ونبقى نعزم حضرتك الزابط على فنجان قهوة يا بابا مدام الحديث شيق قوي كده !!

والدي : بس يا ..... ايش فهمك انتا في الزوق !!

احمد من على بعد : ماشي يا والدي

على طول بعت القضية !!

ابيع نفسي يعني !!

ولا هوا عشان ابنك اعترض على خرق الدور قامو دخلوك فهموك غلطك طلعت تعتذر للبيه !!

والدي : بس يا ..... اجري يالا هات الشنط من على السير !!

الزابط : الف حمد لله على السلامة يا دكتور خطاب واهلا بيك في مصر

وبكرة بقى مكمل ايه اللي حصل على السير والحج ابو سريع عمل معايا ايه :d :d

[AhMeD EzZ]

احمد اخوك دة شكلة مشكلة

[sayed911]

احمد اخويا ده في مرة ها يحبسنا ده لسة لما تعرف عمل ايه في الآهرام وفي القناطر ولا ولا ولا ده كان صيف من احمل المصايف في عمري كله .. :d
اتقل انتا بس :d

[AirForces]

هههههههههههههه والله الموضوع دا المفروض يتعمل فيلم واحمد اخوك دا بيثبت انه المصرى معروف بجبروته وبقوته :d :d

[Moh.Abdelbaset]

كلام أحمد أخوك معاك على الطائرة
فكرني بمشهد المطار في فيلم فول الصين العظيم :)

[youtube]http://www.youtube.com/watch?v=r9Yw6RfZ6C8[/youtube]

[K.LOTFY]

ايه يا بشمهندس سيد انت نسيتما ولا ايه مفيش حلقات جديده؟ انا شايف ليك على تويتر فى كلام على امناء الشرطه ما تحكلنا ايه اللى حصل معاك

[sayed911]

والله يا فندم انا امبارح كنت في المقابلة بتاعت نايل موتورز ومش ها قولك اكتر من اني دخلت قهوة تانية انا والأستاذ سعد الدين !! دخلنا ونسينا اهم حاجة و:] :]
احنا منعرفش شكل اي حد من نايل موتورز عامل ازاي هههههههههه دخلنا على شلة شباب قاعدين بعد ما كلنا شنوري وقالي خش وانده على الحج احمد !!
دخلت على شلة شباب بقولهم سلامو عليكم !!! الرجالة تبع نايل موتورز :d :d :d
النظرة اللي كانت في عيونهم مش عايز اقولك كان شكلها عامل ازاي وفي الآخر لقينا نفسنا في قهوة غلط اصلا هههههههه
رحنا القهوة الصح بقى بتاعت ليالي الحلمية !!
دخلنا احنا افتنين !!
وقلنا ندور على اكبر عدد وندخل نسأل !!!
دخلت انا على الناس بقولهم !!
السلام عليكم
مدش يفتكرني مجنون
ومن غير ضرب ولا حاجة حد هنا تبع الحج احمد ؟
او نايل موتورز ههههههههههه :d :d :d
وان شاء الله يا فندم ها اقعد اكتب الحلقة الجديدة النهاردة يا فندم تحت امر حضرتك :d

[K.LOTFY]

ههههههههه لازم اى حته تروحها تعمل مشاكل كده :d

انا مستني اهو وبلاش يافندم دى ان اكبر منك بسنتين :)

[saadelden]

والله امبارح كان يوم مش طبيعي :d
لسه هتسمع بلاوي

[sayed911]

طلعنا على السير !!

واذا بك تفاجأ بكم العمال الغير طبيعي اللي كل واحد ماسك عربية وبيقولك هات البورنج ياباشا !! ش عارفين انه البوردينج ده اللي احنا بنطلع بيه الطيارة !!

والدي: يبقى معايا جحشين زيكوا واجيب عامل يشيلي الشنط على جثتي !! يالله ياد منك له ادي الكعوب تاعت الشنط اجري روح هاتها من على السير منك له عقبال ما احول عملة وأأجر عربية !!

نأجر عربية عشان احنا عندنا عربية في مصر مفيش فيها تكييف والعربية دي والدي كان معتز بيها جدا جدا وكانت بيجو 504 موديل كام مش فاكر ولكن هيا كانت مرفوعة من يوم ما وعيت انا على الدنيا

انا افتكرت صحيح انا المقابلة اللي حضرتها امبارح كان فيها ناس كتير متعرفنيش شخصا ولا تعرف انا مين حتى على المنتدى ولكن كان سبب لمعرفتهم بي كان عن طريق الموسوعة دي اولهم الأستاذ محمد ابو الوفا والأستاذ سعد الدين وناس كتير جدا كان ليا الشرف في اني عرفتهم بجد !!

المهم نكمل قصتنا ..

المهم

وقفت على السير انا واحمد وبقالنا 20 دقيقة الناس عمالة تطلع في شنط ليهم واحنا مفيش !!

الراجل جالي

هو: الكعب يا بيه و انا ادخل اجيبلك الشنط من بطن الطيارة !!!

انا : بطن طيارة مين يا حج الطيارة اصلا واقفة بعيد جدا الكونتينر بيجي ورا الحيطة دي بيتفضى عايز تقولي انك ها تجبهولي من الكونتينر ده وبتقنعني انه من بطن الطيارة متشكر يا سيدي انا واخويا واقفين قدها وقدود بعون الله ..

وقفنا بتاع 40 دقيقة لحد ما ظهرت اول شنطة وكانت بتاعت احمد !!

وبعدها شنطة والدي وفاضل شنطتي انا ..

وقفنا لحد ما قفلنا الساعة ووالدي جه يدور علينا !! انتوا فين يا جدعان انا جبت الفلوس والعربية معانا رقمها اهو مش يالله !!

انا : وبالنسبة لهدومي انا هيا اللي وقعت من قعر الأفة !!

والدي: هيا لسة مجتش !!

انا : لأ جت وانا مخبيها :d ايه يا بابا صباح الخير يا والدي !!

وقفنا لحد ما معادش فيه حد على السير غيري انا !!! ومعدش فيه غير 3 – 4 شنط لمتخلفين !! (يعني نسيوهم دي اسم مش صفة :d )

المهم وانا واقف لقيتها مجتش !!

بابا : تعالا اما نعمل محضر شكلها راحت على حتة تانية او مطلعتش معانا الطيارة اصلا !!

مع انه يا اخي 3 شنط محطوطين مع بعض !!!

انا : عادي حصلت قبل كده وشنطنا راحت على حتت تانية !!

وانا معدي بدور على مكتب السفريات لقيت العامل اياه واقف ساند على حيطة ..

انا : بقولك لو سمحت

هو : نعم ؟

انا : اعمل محضر منين ؟

هو : ليه كفا الله الشر !!

انا : شنطتي مجتش والطيارة اصلا الرحلة مكملة وكانت ترانزيت في القاهرة فغالبا ها تكون كملت مع الناس !!

هو : طيب ممكن التاج نمبر بتاعها يمكن الاقيها في المفقودات !!

انا : بس هيا اصلا منزلتش على السير !!

هو:ها تفهم شغلي اكتر مني !!؟

انا : لا يا سيدي حقك عليا وادي الرقم اهو

وهنا قام والدي بعمل مصري اصيل طبعا كلنا عارفينه كويس جدا لما بتطلب من حد في مصر يعملك حاجة هيا اصلا ضمن وظيته !!!! تروح مكرمشله خمساية في ايدو كده ومع اني كنت واقف انا واحمد مش فاهمين بس فهمنا بعدين !!

الراجل مشي بتاع 15 خطوة كده !!

وراح ورا عامود وراح جايبلي الشنطة وقالي هيا دي ياباشا !!؟

من غير ما حتى يبص في التاج نمبر !!

هوة عارف انه دي شنطتي !!!

ازاي معرفش !!

وانا متأكد انه هوة اللي شايلها من على السير من قبل ما توصلي عشان يخلينا ندفع !!!

انا لن ارضخ !!

احمد : نيااااااااااااااااهع !!! يا كورك شالو شنطتك واستقفوك ههههههههه

انا : اعمل محضر اهمال فين لو سمحت !!؟

هو : اخر الطرقة على ايدك اليمين :d

وبيقولها وهوة مبتسم وكأنه بيقولي اعلى ما في خيلك اركبوا

لأنه فعلا الشنطة دي كان كبيرها الراجل لو سابها ورا العمود مصيرها حاجة من اتنين يا اما حد ها ياخدها من العمال

يا اما ها تتحول امانات

ولكن في كلا الحالتين مش ها الاقيها تاني ابدا

لسبب بسيط الا وهو اونها اترفعت من على السير بمعنى انها بقت مش مسؤولية شركة الطيران !!!

والدي اقعنعني ان عمل كده عشان انا مشوفتوش !!!!!!!!!!!!

مشوفتوش ازاي يقولي ها تفهم بكرا لما تكبر

طلع انه مشوفتوش ده مصطلح مصري بمعنى اني مروقتهوش !!

ولكن انا لو حسبت حسبة صغيرة بس الراجل ده بيطلع بكام جنيه في اليوم بس !!!

مش بعيد مصلحة الضرايب تاخد منه في الشهر مش اقل من 10 الاف جنيه وانا اسمي كمان معرفش حاجة !!

مطار القاهرة بيستقبل رحلة كل 4 دقائق بالزبط في الصيف ولكن ان تتخيلوا الكلام ده كان من كام سنة بقى وكام عدد الران ويز عليه وكل رحلة فيها 500 راكب او نثول 250 راكب على اساس اننا ممكن يبقى فيها رحلات فاضية وكل رحلة نقول فيها 100 ها يدولوا 5 جنيه وده مستحيل اصلا الـ 5 جنيه دي انا اقل ورقة شفته بياخدها كانت 20 جنيه والله !! وكانت فيه بالأخضر كمان عمي وعمك وعم الكل كمان هههه

المهم حملنا الشنط على عربيتين والدي على عربية وانا واحمد على عربية تانية

والدي دخل قبلنا على مأمور الجمرك

(والله الراجل ده بيصعب عليا جدا من اللي انا واحمد عملناه فيه !!!! يالله اللي مش قد انه يتحمل مسؤولية العيال ميخلفش ن الأول ) :d

المهم دخل على مأمور الجمرك !!

مساء الخير يا فندم !!

والدي : صباح الخير حسب التوقيت المحلي في ساعة التجلي !! ( مش عارف جاب الجملة دي منين ولكن الجملة دي في بالي بقالها اكثر من 8 سنين والله يا جدعان مش قادر انساها !!) حب يعمي يعني الواد الصايع ابن البلد المدردح هههه

مأمور الجمرك افتكره بقى تاجر شنطة !!

معلش يا استاذ تجيلي على جنب وتنزلي الشنطة وتفتحها بقى !!

واحنا وراه !!

الراجل بيسألني !! معاك حاجة تستاهل الجمرك يا فندم !!

انا !! حدد مصطلح تستاهل دي؟

هههههههههههه احمد اخويا بيقولوا اصل الفي سي ار ده دخل مصر امبارح بالليل مثلا واحنا جايبينه معانا ها يفرق كتير في الجمرك :d ?

المهم والدي شاور انه بطلوا تهريج شوية انتو ايه !!

وقال للراجل دول اولادي !! واحنا في زيارة لمصر بقالنا اكثر من سنتين برة مصر وزيارتنا مش ها تاخد اكثر من 3 اشهر على بعض ولو فيه اي حاجة من وجهة نظره تستاهل الجمرك ببساطة ها يكون مصيرها انها تضاف على باسبورتاتنا انها للإستعمال الشخصي وكفى الله المؤمنين شر القتال !!

الراجل اصر هنا على والدي انه يفتح الشنط للتفتيش !!!

رفعنا الشنطة من على العربية !!

ولسة ها افتحها لقيت عليها قفل بالأرقام !!

انا : بابا هوة القفل كام ؟

هو : قفل ايه يابني ؟

انا : القفل اللي على الشنطة !!

هو : اقفال ايه اصلا انا مش حاطط اقفال على الشنطة !!

احمد : اه صحيح انا نسيت اقولكم دي الحاجة خطت اقفال النهاردة الصبح وانتوا نايمين وقالتلي انه الرقم السري 199 وانا نسيت اقولكم !!!

سبحان الله ماما دي عملت كده ازاي يعني المسطول اللي ماشي معانا ده لو كان نسي كان زمانا اعتبرنا تجار مصيبة سودا بقى !!

نحاول نفتح اللوك مفيش فايدة !!

يمين شمال واعصابنا توترت مفيش فايدة !!

الراجل هنا شك !!

مأمور الجمرك : دكتور خطاب هل مع حضرتك اي مستند تثبت بيه ملكيتك للشنطة دي ؟

والدي : بالطبع يا فندم التاج نمبر اللي عليها مطابق للتاج نمبر اللي على البوردينج باس بتاعي وكمان هوة هوة ممكن تطابقه ببيان الأمتعة اللي في التذكرة بتاعتي !!

فين التاج نمبر يا سيد ؟

انا : مين ؟

هو : اخلص التاج نمبر اللي جبت بيه الشنط من على السير

انا : هأو او او او او

هو : ايه تاني ؟

انا : مش اديتوا للعامل عشان يجيبلي بيه الشنطة بتاعتي !!

هو : عليا النعمة انا ماشي مع .......... والتاني .........

في اللحظة دي فيه بنت معدية ولبسها عليه علامات استفهام ( علامات استفهام من قبلي انا يعني اللبس مش مناسب للمكان ) احمد راح قايل: انا شكلي كده ها احب مصر يا بابا !!

راح بابا بظهر ايدو وخبطوا على دماغوا هههههههههههههههه

والله احمد من قوة الكشاف رن :d :d

عمالين مع مأمور الجمرك يهديك يرضيك دية شنطتي مفيش !!!

بابا قالوا طيب ما نكسر القفل ده كده كده ضعيف جدا وعندي استعداد اعددلك الحاجات اللي حوة كلها

الراجل لو اي حد يا دكتور ها يجيب اي شنطة وها يعدد كام تي شيرت على كام بنطلون مكنش حد عجز في حاجة اعذرني الشنطة كده بقت طرد وعشان يفض لازم يفض امام لجنة مختصة !!

لحد ما والدي راح جاب موظف من بتوع شركة الطيران وطالبه بأنه يمعمله بيان امتعة برقم التذكرة والمشكلة اتحلت بعد ساعتين جنب مأمور الجمرك لحد ما اثبتناله انه دي شنطتنا !!

مع انه مصر كلها عمالة بتعدي من غير ما بيبص على حد بس هوة تقريبا احنا مبصوصلنا في السفرية دي :d

وهنا مأمور الجمرك امر بكسر القفل وسأل والدي هل الشنطة فيها حاجة تستاهل تتجمرك ووالدي اجابه بالنفي كلها اجهزة للإستعمال الشخصي ..

وفتحنا الشنطة وحصل الآتي

بكرة بقى نكمل عشان ها اقوم بتفرج على فلم زا سوبر هيرو بتاع يوم الجمعة ( عيل عيل يعني :d )

[OmaR_FekrY]

هههههههههه بقولك ايه يا سيد ... احمدشكله متعب متعب يعنى مبيهزرش و مبيفوتش لحد حاجه