سقوط علامة بروتون الجزء الرابع (سلسلة مواقف كوميدية)

[زينة الله]

مممم كلب البحر ؟؟؟؟؟؟؟؟؟؟؟؟؟؟؟؟؟؟؟

NO

سرب من البوم (جمع بومة )




بيدخل من المداخن بتاعة الدفايات و يعشش فى الخشب اللى فى السقف



تحت القرميد الهرمى اللى مبنى منه السقف بالشكل دا

وطبعا البومة بتنشط بالليل ويطير على الشجر العالى وفوق الأسطح و يشغل السمفونية بتاعته ههههههه

[sayed911]

من عنيا حاضر والله يا جماعة بكرة ان شاء الله الحلقة ها تنزل والله القحف اللي الواحد اصابه من قلة المواقف اللي بتحصل مقلقلني مش لاقي سبل للمواضيع ههههه ولكن انا فيه تكملة الحلقة اللي فاتت ها اكملها وها انزلها ان شاء الله بكرة على اخر النهار عشان ها اكتبها النهاردة وانقحها غدا ان شاء الله تعالا ..

[amr.mostafa]

ما حكتلناش اخر اخبار الارتباط ايه يا ابو السيد ؟


وعملت ايه في اول مقابله مع حماك؟

[sayed911]

عدنـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــا

صحينا الصبح ..

ونازل من بيتنا ..

وحسام جنبي بيقولي متشوفلنا حد يطلع معانا اكيد مش ها نطلع لوحدنا كده !!

وكان ساعتها الأوتوكروس في السخنة يوم الجمعة !!

قالي شوف حد يطلع معانا خميس ونتفرج على الاوتو كروس الجمعة ونرجع !!

قولتله طيب انا ها اكلملك سعد ..

انا : الو

سعد : ايوا

انا : بقولك ايه يا كبير انتا فاضي ؟

هو : ورايا الديوان ياباابا معلش ..

انا : طيب خلاص قشطة خلصوا ونعدي عليك انتا بتستهبل ديوان ايه الل وراك يا صايع انتا انضف مكان دخلتوا كان محطة مترو الدمرداش !!

هو : متتعدل يا ابن الـ .......................

انا : بقولك ايه متيجي تطلع معانا السخنة

هو : امتى ؟

انا : دلوقتي !!

هو : انتا يبني كييف الحاجة اللي تطلع في دماغك تعملها في ساعتها ايه الهبل ده !!

انا : هات من الآخر يا آه يا لأ انا مش باخد رأيك في شخصيتي دلوقتي !!

هو : طبعا يا معلم وطلعة زي دي ها تبقى واقفة علينا بكام !!

انا : كلك نظر يا كبير !!

هو : لا يا روح ........ اتعدل من الأول اللي اوله شرط آخره نور !!

انا : خلاص خلاص طيب !!

يطلع نصيب الفرد حوالي 70 – 80 جنيه من غير بنزين !!

هو : آمين !! بس سؤال !! هيا الطلعة فيها رطوبة ولا الجو حر ؟

( سين بينا )

انا : لأ يا كائن مفيش فيها احنا لوحدنا انا وانتا وحسام بس !! شوف لو ها تجيب حد كمان معاك قشطة !!

هو : بقولك ايه الواد احمد ابو اسماعيل اترفد من 3 ايام من الكلية كلموا وعدي عليه هاتو ..

انا : الواد بتاع الكلية الحربية ده ؟

هو : آه يا عم !!

انا : لا يا عم الواد ده ربنا مديله صحة بيموتنا بيها !!

هو : هاته يا عم الواد برنس وجدع وابن بلد !!

انا : طيب كلمه على ما اعدي عليه !!

هو : طيب متتأخروش بقى وعدوا عليا في البيت !!

حسام : مين ابو اسماعيل ده ؟

انا : بقولك ايه انتا عارف ولاد ابو اسماعيل ؟

هو : بتوع محمد سعد ؟

انا : آه

هو : يعني سمعت روايات عنهم !!

انا : اهو ده كبيرهم !!! الواد ده ليلة ما اتخرج من ثانوية عمة بيت 3 في المستشفى في عنبر الكسور !!

انا : الو

الطرف الآخر : ابو السيد حبيبي انتا فين يا راجل !!

انا : موجود في المحروسة يا كبير انتا اللي فين !!

هو : تعالا سعد لسة مكلمني انا واقف مستنيكوا عند بابا عبده في باب النصر بفطر !!

انا : يبني انتا ايه اللي وداك باب النصر يا حبيبي !!!!

هو : انتا مال .... اتنيل يالله تعالا انا واقف مستنيك !!

اخدت حسام وسيبنا عربياتنا ورحنا على باب النصر ونزلنا قدام بابا عبده !! ( على فكرة اللي بيروح عند بحة ها يعرف بابا عبده )

المشهد التالي !!!

احمد ابو اسماعيل قاعد على الطربيزة قدامه حوالي 5 كبده

3 سجق

2 حلاوة بالقشطة

و 2 بيبسي !!!

لسة لنقعد !!

ففي فتفوتة كبده وقعت من سندوتش احمد على الأرض !!

ويا عيني في قطة واقفة شافتها وقعت جريت عشان تاخدها وهية بتاكلها راح احمد نازل بإيدو من سابع سما على دماغها طااااااااااااااااااااااااااااااااااااااااااااااااا اااااااااااااااااااااااااااااااااااااااااااااااخ

القطة لفت حوالين نفسها والله بتاع 3 -4 مرات وراحت جارية !!

حسام راح باصصلي قالي ايه ده يا عم ده ها يموت القطة على الفتفوتة دي !!!

بعد ما اكل كل ده بسم الله ما شاء الله !!

والله العظيم !!

والله العظيم !!!

والله العظيم كمان مرة !!

فتح الكنزاية !! وراح قالبها في الهوا على ارتفاع حوالي 20 سم في الهوا والبيبسي بينزل منها وهوة فاتح مغارة علي بابا في بقه !!! انتا فاهمين اكيد الفكرة !!

هوا قالب راسوا !!

وفاتح بقوا !!

ورافع الكنزاية في الهوا وقالبها !!

لما خلصت راع فاعصها بإيدو وحدفها !!!!!!!!!!!!!!!!!!!!!!!!!

وراح عامل حركة كده بسم الله ما شاء الله بتدل على انه هضم !!!

والله لقيت حسام في اللحظة دي بيقولي !!!

جومي بينا نروح !!!!!!!!!!!!!!!!!!!!!!!!!!!!!

ده بيفطر 50 سندوتش وكانزيتين امال ها يتغدى ايه بالصلى على النبي كده !!!!!!!!!!!!!!

انا : وحياتك ده كده هفتان كمان !!! تعالا اتفرج عليه وهوة كان في الكلية !!!

احمد : ها يا رجالة البروجرام بتاعكم ايه ؟

انا : ابدا يا كبير احنا قولنا نطلع ونخطط هناك !!

حسام : مش عارف انا افتركت دلوقتي حالا انه عندي معاد مهم ولازم الحقوا مش ها ينفع اسافر معاكم !!

انا : وحياة ..... انتا موركش حاجة واتنيل واقعد ده اليف مش بيعض بس انتا متهزرش معاه عشان هوة غبي !!

احمد : خلاص قشطة معاكم اكل ولا اخليهم يلفولنا 3 كيلو بمبار على عكاوي على موز معانا في الطريق !!

انا : مش باكل العكاوي والموز ( مش الفاكه الموز لأ اللحمة )

هو : وانتا من امتى صحيح ها تاكل الحاجات دي يبقى حسام بيه هوة اللي ها يكون ضيفي وها يفتح نفسي وياكل معايا !!

حسام : والله يا احمد بيه انا لابس تقويم وممنوع من اللحوم دي عشان بتتعبني !!

احمد : تقويم مين يا حج التقويم ده انا كنت بفرتكوا زي اللبانة في بقي صلي صلي على لنبي في قلبك !!

وطلب الأكل ومشينا !!

اتحركنا رحنا على بيت سعد !!!

اول ما نزلنا من العربية بتاعت احمد

طبعا بعد معزوفة من 45 دقيقة سواقة خناق مع مخاليق ربنا كلهم خناق مع العربية !!!

والله العظيم وهوة بيجيب من التاني للثالث خلع الفتيس في ايدو في صلاح سالم !!!

حسام ورا قرب ينط من العربية اصلا !!!

ويجري يجري يجري !! ويروح مفرمل قبل العربية فرملة غريبة !!!

والطريق يبقى فاضي يقوم معلي الموتور ورافع رجله من على الدبرياج تطلع بتفويتة يقولك قشطة سحبها عال عال عال !!

العربية ها تفك منه في مرة والله انا شايف كده !!

الوحيد اللي كبري المطار شايف انه من حقه يمشي قافل حارتين واللي بيكلمه بيبقى يوم اهله مش فايت من الشتيمة اللي ها يسمعها انا بقيت اصلا ركب جنبوا عمال بقالي 45 دقيقة اراضي في الناس !!!

يا ابني اتهد !! يا ابني اعقل !!

ده دخل محطة البنزين يمون بتاعت التعاون اللي في صلاح سالم وهوة مقتنع انه طالما السيجارة في ايدو مفيش اي خوف منها !!!

الراجل طبعا رفض يدخلوا المحطة من اساسوا ولكم ان تتخيلوا اللي حصله !!

والله يا جدعان انا شفت موقف لأحمد في مرة ابوه برضه بسم الله ما شاء الله الحاج اسماعيل ذات نفسه بقى !!!

هوة حاجة كبيرة في الجيش في القوات مش عارف بتاعت ايه كده !!

والله في خناقة ما بين الأب وابنه الأب ضرب ابنه في منطقة حساسة جدا جدا جدا جدا !!

وراح شايلوا حدفه من البلكونة ( همة ساكنين في الأرضي )

الواد نزل على كبوت العربية !!

راح طالع !!

وقف قدام الباب وراح رافس الباب برجلوا !!

وبصوت عالي بيقول !!!

بقولك ايــــــــــــــــــــــــــــــــــــــــــــــــ ــــــــــه انتا لولا انك ابويا وبتهرج معايا انا كنت قلبتها معاك جد !!!

يا نهار اسود الراجل لسة حادفك من البلكونة وضارب ضربة بتهتز لها جبال !!! وتقولي بتهزروا !!!

ربنا يشفي يا رب !!!

ده ليهم حوادث مش طبيعية !!!

قيل وحكي لي من سعد انه ابوه في مرة كان متنرفز منه قوي وكان سايق وخبط مش عارف ايه في العربية فتح الإيرباج بتاع السواق !!! ( دي مش عارف مدا صحتها اشتغالة ولا لأ بس اللي حكيتهولكم انا متأكد منه لأنه حصل قدامي )

المهم وصلنا على الحرفيين !!

وعند جمال عبد الناصر ورحنا راكنين ونازلين !!!

هب وفيه خناقة كبيرة جدا عند التوحيد والنور !!!

والناس ملمومة وامة لا اله الا الله موجودة !!

صلوا على النبي يا جماعة مش كده امال !!

كله بيجري على هناك عايز يتفرج !!

حتى احنا جرينا ومش فاهمين فيه ايه اصلا !!

لقينا اتنين بيتخانقوا !!!

قشطة سيبكم من موضوع الخناقة اللي ها اقولهولكم التاالي ده حصل قدام عيني !!!

اتنين ماسكين في بعض وكل واحد بيقولوا انا ممكن اموتك !!

وعشان ابسطهالكم نقول انه

فرد الأول = س

والفرد التاني ص !!

الإتنين كل واحد ماسك التاني من القميص !!

الفرد س ماسك اليكتريك ومخبيه وراه ظهره !! ولافف ايدو حوالين رقبة ص !!

وعمال بيهدهه ها اموتك !!!!!!!!!!!!!!!!

وملكش دية عندي ولا عند الحكومة !!

المهم الموضوع اتطور جامد جدا !!

ركزوا بقى في التالي واللي حصل التالي !!

الفرد س اتهور !!

والإتنين حاضنين بعض جدا وكل واحد ماسك التاني من رقبته !!

راح الشخصية س متهور وقاله انا ها افرج اهلك !!

وراح لافف الإلكتريك وهوة دايس عليه وحاطه في دراع ص !!!

لقيتك الإتنين اتسمروا في مكانهم وبيترعضوا جامد !!!

الناس كلها مش فاهمة حاجة !!

انا هرشت الفيلم الإتنين ملمسين بعض وبينروا مع بعض !!

ولكن هل ممكن قوة اليكتريك توصل الى انها تخلي الإتنين دول واقفين كده هو !!!

فوقت على احمد ابو اسماعيل وهوة جي جري وشايل في ايدو جزع شجرة خلعه وبيقول وسعوا ده بقى الأرضي انا ها افصله اهه !!

وراح نازل بجزع الشجرة على دماغ س ههههههههههههههههههه

متفصلوش راح رافع الجزع لفوق ونازل بيه مرة تانية لحد ما وقعهم على الأرض !!!!!

انا لقيت الإتين ناقصلهم اتنين فولت كمان وينوروا محطة مولدات شبرا كلها ! هههههههههههههههههههه

واحمد عمال بيقول انقذت حياتك من الموت !!

هههههههههههه انتا كنت ها تمتوا يا ابني انتا كان ممكن تزقوا بس مفيش داعي لضربوا وعلى دماغوا كمان :d :d

المهم لمينا الفلم وروحنا على بيت سعد واستانيناه تحت !!

نزل جايب عدة البحر معاه بقى المايوه والراكيت والكريم ولابس لبس البحر كمان هههههههههههههههه

فاهم الموضوع غلط !!

احمد بيقولوا ايه ده هوة احنا رايحين مكان فيه مياه ؟؟؟؟؟؟؟؟

انا : اه

هو : قشطة عشان نفسي انزل معاكم !!!

احنا : بس انتا مش معاك مايوه !!!

هو : الجيش قالك اتصرف هههههههههههههههه

بكرة بقى ها اقولكم حصل ايه واحنا مسافرين وده ها يبقى اخر موقف بقى عشان انا حاسس انكم زهقتوا من الحلقة دي :d :d

[AhMeD EzZ]

سيد فضيلي مكان معاك في البيت عشان ابويا هيطرودني من البيت من كتر الضحك :d

و بالنسبة للكائن الي كنت بتتكلم عليه دة بيفكرني بواحد صاحبي و هو بياكل بس التاني مش حيطة كدة :d

بس غبييييييييييييييييييييييييييييييييييييييييي اكل

في رمضان قلنا نطلع نفطر مع بعض يوم في شقة واحد صاحبنا لوحدنا

جبنا الاكل و روحنا

بسم الله ما شاء الله المغرب بياذن لسة و كلة بيبقي بطنة مقفولة هو طبقة كان عبارة عن
8 خرطات مكرونة بشاميل و فرخة مشوية " الا ورك للامانة :) " و كيلو الا ربع بانية و صنية جلاش و الطبق دة في تلت ساعة بالظبط كان خلصان و البيه قايم يدور علي حلو :d

[sayed911]

ههههههههه يعملها بس يا احمد بيه وبيتي ينور بقدوم معاليك :d :d :d :d

[mhmdalsaadany]

ههههههههههههههه انا متهيألي انك لازم تبعد عن صحبك وهو جعان عشان الجيش قاله اتصرف وانت هتكون قدامه يبقى رحمة الله عليك هههههههههه

[sayed911]

هههههههه احمد ابو اسماعيل ده والله العظيم له معانا جنايات وافلام هندي كتير انا والله العظيم شفته في مرة بيتخانق مع عيل عنده 8 سنين في سيبر عشان غلبه في كونتر سترايك وعلقوا في المروحة بتاعت السقف عشان قاله عمه انتا في الجيش ومش بتعرف تضرب نار العيل يا عيني كان ها يموت من الرعب :d

[AhMeD EzZ]

هههههههههههههههههههه دة شكلة مشكلة :d

بس دول بيبقووا اطيب قلب فعلاً

[sayed911]

هوة غلبان جدا جدا جدا جدا جدا جدا جدا جدا اصلا !!
ولكن صحته بسم الله ما شاء الله !!
لسة لما تسمع حلقة بكرة بقى ها تعرف حصله ايه خلاني اتأكد انه الواد ده فيه حاجة مش طبيعية :d

[2faster]

متخيل انا موضوع الجيش بيقول اتصرف

ههههههههههههه

[sayed911]

والله انا قولتلك ها ادخل انام ولكن قولت مش ها انام الا لما اشوف تعليقك على الموضوع :d :d :d
ههههههه ها نمضي العقود امتى يا كبير :d :d
انا شايف انه الإقبال الجماهيري باين وجنيه على كل 10 اعضاء يبقى معقول قوي :d :d

[OmaR_FekrY]

[QUOTE=sayed911;3873485476]

والله يا جدعان انا شفت موقف لأحمد في مرة ابوه برضه بسم الله ما شاء الله الحاج اسماعيل ذات نفسه بقى !!!

هوة حاجة كبيرة في الجيش في القوات مش عارف بتاعت ايه كده !!

والله في خناقة ما بين الأب وابنه الأب ضرب ابنه في منطقة حساسة جدا جدا جدا جدا !!

وراح شايلوا حدفه من البلكونة ( همة ساكنين في الأرضي )

الواد نزل على كبوت العربية !!

راح طالع !!

وقف قدام الباب وراح رافس الباب برجلوا !!

وبصوت عالي بيقول !!!

بقولك ايــــــــــــــــــــــــــــــــــــــــــــــــ ــــــــــه انتا لولا انك ابويا وبتهرج معايا انا كنت قلبتها معاك جد !!!

يا نهار اسود الراجل لسة حادفك من البلكونة وضارب ضربة بتهتز لها جبال !!! وتقولي بتهزروا !!!

ربنا يشفي يا رب


ههههههههههههههههههه و المصحف كنت بتشالب فى الارض لما قريتهاا

[sayed911]

هههههههه ايوا كده يا رجالة احنا داخلين على صيف وعايز كلو طرد طرد طرد اذا كان من الحج او من المدام :d :d

[gebreel]

اكيد لما الجيش قالو اتصف حاجة من ال2 حصلت يالقرية كلها فضيت عليكم انتو الثلاثة ياما القرية كلها وقفت تتفرج

يانهار اسود انا مش متخيل المنظر