سقوط علامة بروتون الجزء الرابع (سلسلة مواقف كوميدية)

[sayed911]

بـــــــــــــــــــــــــــــــــــــــــــــــــ ــــــــــسم الله الرحمن الرحيم

ها هو يعود ليطل علينا بمحياه !!!

بطلنا الهمام !!

المغوار الشجاع !!

الذي لا يهاب انسانا ولا جماد !! المتوكل على الله !!

الأسطى سيد زلمكة !!!

بعد التحية العالمية من المايسترو قريني !!! حاولت اعمل حوار ها اقولكم عليه بعد شوية ها تفهموا انا ليه كنت مختفي في الفترة اللي فاتت عن الحلقات !!!

بصراحة !!!!

انا مش فاكر مين من الخلفاء الل يكان باني لنفسه قبره وفاتحه وكل ما يحس انه ذنوبالدنيا احاطت بيه !! يروح يقعد في القبر ده !!! لحد ما يفتكر آخرته !!!

انا حصل معايا موقف مشابه لهذا !!

حصل التالي انا كنت مروح اول امبارح !! الساعة حوالي 1 بليل كده بعد سهرة منيلة بستميت نيلة من بتوع الجيل اللي ما يعلم بيه الا ربنا ده !!!

وسبحان الله عدين من صلاح سالم من امام مسجد الشرطة !!! وده مكان المقابر بتاعتنا ( مين قدنا مقابرنا على صلاح سالم بقى ترد الروح :d )

المهم !!! مش عارف ايه اللي خلاني ادخل واقرر بما اني جنب المقبرة ادخل فيها !!!

متخيلين انا داخل مقبرة في عز الظلام الساعة 1 بالليل !!! هس هس !!!

ولله انا عمري في حياتي ما دخلت الترب بتاعتنا دي ابدا !! ولكن حسيت اني عايز ادخل دلوقتي حالا !!

ركنت العربية ونزلت !!

فتحت الباب القفل !!!

(والتراب كان مغطيه من كل حتة واضح اننا بندعي انه امواتنا مش بننساهم مع اننا عمرنا ما رحنا حتى شفناهم !!) مع اني ضد من يشد الرحال للمقابر ده !! الا من كان يذهب اليها للعظة !!

المهم !! قولت يا ترى انا فتحتها المرادي !! مين اللي ها يجي المرة الجية يفتها بعدي !! مين اللي ها يكون محمولا على الأعناق المرة اللي جية !! انا !! اخويا !! والدي !! الموت حق على كل رقبة !! يبقى مزعلش لما اتخيل مين اللي ها يكون عليه الدور !!

فتحت الباب !! ودخلت !!

لقيتها مظلمة ظلمة الليل الحالك !!

لا ترى فيه كف يدك ! ولا حتى باطن راحة قدمك !!

المهم !! انا منور بالهيد لايت اللي في ايدي !!

وداخل بأتحسس طريقي بين الزروع !!

لحد ما لقيت الدكة الحجرية اللي معمولة جنب مدخل المقبرة !!

سبحان الله !! جلست !!

ورفعت عيني لفوق وشفت القمر !!! لأول مرة ها اكون معاكم بالصراحة دي !!!

انا حسيت اني ....... جدا بقى !!!

مش ممكن !! ايه اللي انا بعمله في نفسي ده !! رايح على فين بعد كده

ايه اللي انا فيه ده !!

الشيطان مش متمكن مني وبس !! ده من كتر اللي الغلط اللي انا بعمله في حياتي !! شبه بقيت ماسك التوكيل بتاع الشيطان في القاهرة الجديدة كلها !!!

يا نهار اسود !!

لو آتاني الموت دلوقتي !! رد فعلي ها يبقى ايه !! = صفر كبير !! اكيد مش راضي عن نفسي !! ولا عن الماضي بتاعي !! ولا عن اي حاجة عملتها في حياتي السابقة !!

ناس كتير جدا جدا جدا !! شافت طرف واحد مني !! مشافتش الطرف التاني !! مش عايز اتكلم عنه من مبدأ المجاهرة بالمعصية ذنب ولكن انا عارف انه قريني ده ها يوديني في داهية !! مصيبة !! كارثة !! الطرف الآخر مني الشيطان بيلعب بيه كما يلعب الطفل بالنرد !! مش لاقي تشبيه اغرب من كده عشان اقوله !! فحاولت اشوف قريني ده وضعه ايه في الحياة !!

انا : انتا عايز توصل لحد فين ؟

هو : انا مش عايز حاجة انتا اللي عايز !! على طول متطلب على طول مش عاجبك حالك على طول باصص لفوق !!

انا : وهوة البص لي فوق معناه عدم رضا ؟ البص لفوق معناه طموح يا بهيمة !!

هو : وحياتك عندي منتا فاهم حاجة !! سيبها على الله !! هوة احنا مستفيدين ايه من ورا اللي انتا بتجري عليه !!

انا : نفسي ابقى حاجة يا اخي انتا مالك !! ليه مصمم تدفني معاك !!

هو : يا اخي دور على آخرتك قبل دنياك !! ادي عمك اللي انتا كنت بتعشقه !! مدفون تحت التراب على بعد 60 سم منك !! عارف تساعده بحاجة ؟ حد من اللي كانوا وراه في الدنيا قاعد معاه دلوقتي حد نافعه بحاجة !!

يا ترى بيتعذب ولا منعم ؟ مبسوط ولا حزين ؟

انتا طبعا عارف مين اللي بينداي اقم القيامة يا رب !! صح ولا اكمل ؟

انا : قولي حاجة بعملها في حياتي غلط تخليك شايل مني كده !!

هو : ولا متصيعش عليا !! انتا كل حاجة في حياتك غلط x غلط !! كلك على بعضك غلطة وعمالة بتكبر !! جرب كده وقولي فيه ايه في حياتك صح تستاهل انك تتجازى عليه ؟

راضي ادائك لفرائضك ؟ دراستك ؟ عملك ؟ مستقبلك ؟ اي حاجة في حياتك ماشية صح ؟

انا : مش ذنبي اني مش مفهوم !!

هو : ها تفضل لحد امتى تدعي كده انك مضطهد وهمة اللي مش عايزينك تبقى حاجة !!

انا : مش ذنبي اني طلعت لقيت نفسي لوحدي !! يا اخي حط نفسك مكاني ولو مرة واحدة !!

هو : انتا عبيط يبني محنى في فلوكة واحدة !!

انا : يا اخي جرب يعني ايه تصحى في يوم تلاقي نفسك في بلد كاملة غير بلدك !! كائنات حولك مش عارفهم !! مجتمع بأكمله اختلف عنك !! شخصيات طباعها !! تصرفاتها !! صداقات مع ناس مطلوب منك تصاحبهم انتا مش متقبلهم اصلا !! التشكل اللي انتا بقيت فيه !! ارحمني بقى ده انا شايل منك ومعبي على آخري !!

هو : قول كل اللي نفسك فيه !! قول اشجيني قسم وسمعني !! شايل من ايه يا روح ..

انا : انتا تقدر ترسم بسمة على وشك وانتا من جواك فيه الف سكينةبتقولك قول لأ مرة واحدة !!

انتا ممكن تبقى مرسوم عليك البهجة وانا من جواك بقولك مرة واحدة مضعفش وتبقى زيه كده !!!

انتا ممكن تبقى قاعد باين عليك متهني وراضي عن عيشتك وانتا ابن .. مريض عايز تتعالج لأنك عديت مرحلة المريض النفسي انتا اصبحت في ليلة وضحاها مريض عقلي !! وشتان بين هذا وذاك !!

يا اخي حط نفسك لو ملاك الموت حضرك الآن !! تفتكر الـ 500 اسم اللي على موبايلك مين اللي ها يبكيك منهم ؟ مين ها يحضر عزاك !!

انا : كتك القرف فالك شبهك !!

هو : اهو ده اللي انتا فالح فيه !! تبين انك مش فارقة معاك وانتا عارف انك من جواك بتموت من الرعب كل ما سيرة الموت بتقرب منك !!

انا : فهمني اكتر !!

هو : انتا عارف انك مش راضي عن نفسك !! متحورش !!! وعارف انكلو حصل اللي في بالك وفي بالي !! انك لبست في حيط وخيشت يا معلم !! انتا عارف وانا عارف اللي فيها بلاش نصيع على بعض !! انسى دور المحترم اللي انتا متقمصه ده شوية بقى !! فوق بقى !! سعيد قوي انه الناس كلها بتقولك يا استاذ ويا محترم وانتا عارف انك من جواك عمرك ما كنت كده !!

انا : انا مسمحلكش على فكرة !!

هو : تسمح ولا متسمحش كتك القرف بكرة ترجع تقول يا ريت اللي جرى ما كان !!

انتا فاكر صحابك اللي اتا ماشي بتتباها بيهم دول !! انتا لو مت دلوقتي !!

اقولك اقصى واحد بيحبك فيهم كلها 15 يوم يا معلم وبخ !! ديليت فروم زي ميموري !! مين سيد ده !! ياااه ده كان صاحبي ياالله الله يرحموا بقى كان شاب مسخرة !!

لكن انتا مين !!؟

مين ها يمشي في جنازتك وها يبكيك بحرقة !!

متدحكش على نفسك محدش :d

انتا زي ما كنت وها تفضل !!

عايش متمتع بتاجرب اجتماعية متعددة مع اوساط شبهك كلها باعت آخرتها واشترت دنيتها !!

كلها اشكال شبهك ضالة !!

تفتكر ها تفرق مع حد فيهم !!

انا : يا عم انتا عايز من اهلي ايه !!

اضربلك نفسي طلقتين عشان ترتاح !!

هو : انا نفسي لما تسمع سيرة الموت قلبك يشتاق اليه كالولد الذي حن لحضن امه !!

انا : مش فاهمك !!

هو : انتا فاهم وبتستعبط على فكرة

انا : فهمني طيب !!

هو : انتا عامل زي الطالب اللي مفتحش حاجة طول السنة !! وكل ما تيجي سيرة الإمتحان !! يقولك ربنا يبقى يعدلها ساعتها !! وليلة الإمتحان عمال بيهر على نفسه !! بس الفرق بينك وبينه !! انه هوة عارف معاد امتحانه !! تقدر تقولي امتحاناك يا معالي الباشا ها يبقى امتى ؟

المصيبة انك عارف هوة منين لفين !! ولكن منتش عارف امتى !! هيهات !! هيهات والله فعلا !!

وعجبي عليك يا زمن !! ها تنبسط لما تبقى حاجة والناس بتقولك يا شخص !! يا كائن !! يا شئ !!

كفاية عليكم كده !! لأنه المحادثة بعد كده مع قريني طلعت انيل من كده !! انا والله طلعت من المقبرة !! على الساعة 3 ساعتين !! ساعتين كاملين انا مقضيهم سرحان !! مش عامل حاجة اكثر من اني سرحان !! عمال اغمض عيني واتخيل اللي فيها !! اتخيل ده كان ايه في عزو وده كان مين في مجدو !!! ولا الهوا !! يا نهار اسود !! ده انا لو كده يبقى ها اد تيكت فيرست كلاس !! ساعتين خرجت حاسس اني حاسبت نفسي وانا عارف انا ليا ايه وعليا ايه !! ايه اللي الهاني كده عن اللي انا فيه !! ايه اللي وصلني للدرجة دي !!

انا شاطر للدرجة دي في اخفاء اللي انا حاسس فيه !! يا نهار اسود انا وصلت لمرحلة اني مخبي مشاعري عن نفسي وبنكرها كمان !! عايش في نكران كامل !!

دي مصيبة !!

المهم خرجت والحمد لله ربنا كرمني وصليت الفجر في جماعة !! وقررت من ساعتها انه فيه حاجات كتير جدا ها تتغير !! ايه هيا مش عارف !! ولكن ها تتغير يعني ها تغغير بمزاجها غصب عنها اهي ها تتغير يعني ها تتغير !! مش تهريج ولعب عيال هوا اصلي !!

المهم !! سيبوها على الله !!

معلش انا عارف انه فيكم ناس كتير جدا شايلة الهم اكتر مني وجيت انا بقى اتحفتحكم بالكام صفحة دول نكدت عليكم اكثر واكثر !! وزمانكم لحد دلوقتي مفيش على لسانكم غير روح يا شيخ الاهي ينكد عليك زي ما نكدت عليا !! انا ناقص !! انا مالي ياكش تولع هيا ناقصة مشاكلك جي بترميها هنا كمان !! مريض قوي وعندك انفصام في الشخصية !! الأطباء النفسيين مفيش اكثر منهم !! بلاش يا عم !! هات شريط فاضي وسجل اللي انتا بتقوله واقعد اسمعه !! عالج نفسك مدام انك فطن وسابق سنك قوي كده !!

ما علينا !!!

انا ها اكمل الحلقة اللي الحقيقة مكتوبة العناصر بتاعتها وحطيت انا عليها التاتش بتاعي :d

هوة احنا كنا وقفنا فين ؟

كنا وقفنا آه

مأمور الجمرك فتح الشنطة !!

دكتور خطاب ممكن تعددلي 5 حاجات على الأقل بمواصفات دقيقة تكون عارف انها في الحقيبة دي ؟

والدي !!

1- قميصين بيض كيلفن كلاين وعليهم الكرفتة مربوطة بسكت جنبها !!

2- شوية لبس لزوم الكحرتة في المصيف :d

ههههههههههههههههه ( بابا كان بيقولها بعفوية جدا والله ههه )

وساعتين وجزمة !!

ده اللي يحضرني حاليا يا فندم !!

والراجل قاله تمام !! شال اول قميص من على الوش من فوق !!

احمد : حاسب بالراااااااااااااااااااااااااااااااااااااااااااااا اااااااااااااااااااااااااااااااااااااحة !!

الراجل اتخض ووقف في موضع الثبات التام من الشكل !!

وعمال بيقول فيه ايه !!

احمد : بالراحة يا عم القميص مكوي :d

والدي راح لاطشه على دماغه كالعادة !!

احمد : الحق عليا خايف على هدومك !!

والراجل الحقيقة فتش الشنطة وملقاش فيها حاجة فعلا !!

احمد : على فكرة بقى بابا معاه لاب توب في جيب الشنطة دي !!

والدي بص لأحمد هنا نظرة اللي هوا يعني انتا مالك يا عم انتا !!

والدي : فعلا يا فندم بس ده بأستعمله استعمال شخصي ومعليهوش اي جمارك وعندي استعداد اثبته على جواز سفري لما اجي خارج !!

مأمور الجمرك : مفيش داعي يا دكتور واحنا آسفين على العطلة اللس سببنها لحضرتك !!

احمد : ده تهريج !! 6 دقايق كاملة !! انتم ايه قيمة الوقت عندكم !! ها ؟

مأمور الجمرك : انتا عارف احنا هنا بنعمل ايه في الولاد اللي زيك :d ?

احمد ايه ؟

والدي : هههههههههههه بننفخهم نفخ :d

مأمور الجمرك يضحك مقهقها كساحر شرير نجح في بناء تعويذة تحويل العنكبوت لسحلية !!

والدي : يالله خلينا نلحق ناخد عربية !!

انا : انتا مش قولت ها تروح تأجر عربية !؟

هو : رخصتي طلعت منتهية من 3 سنوات ورفضوا يطلعهالي على رخصتي الأجنبية !!

انا : ليه ؟

هو : مادام حامل لجنسية مصرية يبقى همة ملزمين برخصتي المصرية !!

انا : يادي الحظ !!!

اول ما طلعنا !!

تاكسي يا بيه !!

والدي : ايوا لو سمحت !!

السواق تعالا ياباشاا !!

بعد ما حملنا الشنط !! على عربية انا متذكرها كويس جدا لحد دلوقتي كانت بيجو 504 7 راكب !! وكنا انا واحمد مستحقرينها جدا جدا جدا !!

بعد ما حلمنا علشنط !!

السواق : على فين العزم يا بيه !!

والدي: شبرا يا اسطى

السواق ماشي يا باشا بس انا طلعتي من المطار بـ 100 جنيه !!

والدي : مش هيا تسعيرة ثابتة ؟

السواق : اه يا بيه !!

والدي !! وانتا شايف في ايدي حل تاني و انا قولت لأ رباطية رباطية يعني توكل علىالله يا اسطة يالله بينا !!

اتحركنا !!

احمد : ممكن التكيف يا اسطة لو سمحت !!

السواق : ويلكم تو ايجبت يا باشا !! دي بيجو !! يعني تكيفها رباني !!

احمد : طيب ممكن تفتحلي الإزاز !! ( فاكره كهرباء لأنه مش لاقي ولا دراع ولا زرار ) !!

السواق : ادي لأكرة ياباشا امسك !!

السواق شايل اكر الشبابيك عنده هههههه ( عبقري جدا )

ماشيين بالعربية لحد ما خرجنا من المطار!! ومش عارف انا فاكر كويس ولا لأ ولكن الصورة دي محفورة في دماغي من اكثر من 7 سنين لحد دلوقتي اللي بيروح المطار من زمان ها يفتكرها !! انا فاكر كويس جدا اني قاعد في الكرسي الشمال من العربية !! وبعدين السواق نازل من على كبري او بنلف من على كبري مش متذكر وكان فيه طيارة كبيرة في وسط جنينة وكانت عبارة عن كافيه مجسم على شكل طيارة !! الصورة دي في دماغي من 7 سنين لحد دلوقتي مش راضية تتمسح !! ولكن الطيارة دي مش موجودة دلوقتي الحقيقة او بمعنى اصح مشوفتهاش تاني ابدا !! اللي راح المطار زمان فعلا ها يعرف انا بتكلم عن ايه !! وكان شكلها مبهر جدا !! طيارة بسكيل 1=1 في جنينة كبيرة !!

المهم دار الحوار التالي !!

السواق : عفر ياباشا !! ( بيعزم بسيجارة !! )

والدي : معلش مش بغير عن اللي بشربه عشان بيتعبلي صدري !!

احمد : بس مش بيتعبني انا هات يا اسطى هات !!

هههههههههه

السواق : وعلى كده بقى ياباشا انتا جي سياحة ولا زيارة ولا ايه انتا والبهوات اسم النبي حارسهم وصاينهم !!

والدي : ( بقرف بيرد ) زيارة ان شاء الله !!

السواق : بقالك كتير برة ولا ايه ياباشا !!

والدي : اه الحقيقة لدرجة انه البهيمة اللي وراك دي ( العبد لله ) مولود برة مصر اصلا ويمكن مجاش البلد دي 4 – 5 مرات على بعض بالكتير جدا !!

اختصارا بقى للمواضيع روحنا عادي جدا والحمد لله جبنا اكل ودخلنا البيت من غير ما حد يحس بينا !! لأنها كانت وقت فجرية تقريبا او في نص الليل تفاصيل زي دي مش حضراني حقيقة !!

المهم

انا فاكر اننا نمنا في وسط ريحة المبيدات الحشرية والتكيفات اللي مش شغالة وي وي وي !!

احمد : وليه الغلب ده يا بابا !! مكنا حجزنا الليلة دي في فندق على ما نجيب حد ينضف !!

والدي : على جثتي حد يدخل بيتي !! طيب انا برة بجيب حد عشان احنا معندناش وقت !! لكن انا هنا متفرغ لبيتي !! وليكم !!

احنا من بكرة ها نثبت اننا قدها وقدود !!

احمد : انا عارف اني مش قدها إثبت براحتك انتا بقى يابابا !!

انا : وانا الحساسية ممكن تموتني من التراب اعفيني انا يا والدي معلش بقى :d

والدي : وهوة جديد عليكم منا عارف اني مخلف اتنين ....

يالله هوة انا لقيت لختي في حد لما ها الاقيه فيكم !!

والحقيقة كان عندنا كم انبهاار ساعتها بالهدوم القديمة بتاعتنا واحنا اطفال والصور فضلنا طول الليلة نتفرج على صور لعائلاتنا زمان واحنا صغيريين !! ( وفضايح لينا واحنا صغريين مش فاهم ايه حبهم في تصوير الأطفال وهمة .... ) يالله كل واحد وليه يوم يتصور فيه !!

المهم دخلنا نمنا !!

وبعدين !!

تن تن !!

تن تن !!

جرس الباب بيرن !!

انا واحمد مقلوبين نايمين زي الخرفان !!

احمد قالي قوم افتح الباب بدال ما اقوم انا وها اصبح اللي ها اشوفه بمصيبة في وشه !!

انا : وعلى ايه !! بس هوة بابا فين مفتحش ليه !!

وكل ده والباب بيرن بشكل اسرع كمان !!

خرجت بصيت وانا معدي على الطرقة ببص على غرفة والدي ملقتوش فيها قولت يمكن غالبا نازل يجيب فطار ولا حاجة !! يادي النيلة وسابنا لوحدني من غير ما يقول بم حتى ولا يسيب رسالة !!

فتحت الباب لقيت التالي ..

بكرة بقى نكمل لأنه اللي لاقيته موضوع ها يطول شرحه قوي قوي :d :d

[OmaR_FekrY]

يا عم سيد يعنى هى ناقصه اكتئاب فى النص اللى فوق ده !!!

و طبعا الصور الى بتتكلم عنها دى و بتقول ...... تقصد و انت كأنك لسه مولود حالا !!!!

اظن مفيش حد فى مصر متصورش الصور اللى من النوعيه دى :)

و مش عارف ليه يحبوا يفضحوك بيها بالذات لما يبقى عندك ضيوووووف .. افف

[sayed911]

لا والحج مصمم كمان في فرحي ها تكون عيني عينك ههههههههههه قالي انا ها افرجك ازاي تعملي فيها ..... هههههههه والله يعملها ويفضحني :d :d :d

[osama.m]

على فكرة يا ابو السيد كتير مننا بنفس نظامك دا
حكاية الصور دي الحمد لله انا براءة منها متصورتش الصورة اياها دي .. الحق والدك بقى لا يعملها و يحطهالك في الفوتو كليب يوم فرحك زي ما حصل مع واحد صاحبي و اللي ما يشتري يتفرج

[sayed911]

يعني ها تبقى فضيحتي على الداتا شو وعلى الملأ بقى واللي ما يشتري يتفرج !!! اطلبلي الحج دلوقتي خالا يا اسامة باشا ههههه يا نهار اسود انتا نبهتني لمصيبة ممكن تحصل :d

[windofchange]

جميل اووي يا سيد بجد مستمتع جدااااا فعلا كل واحد مننا محتاج وقفة مع نفسه يحاسبها ويذكرها بالله وآياته زي خسوف النهارده كده ناس كتير مكنتش واخده بالها منه انه آيه من آيات الله وعن أبي مسعود الأنصاري قال { انكسفت الشمس يوم مات إبراهيم بن رسول الله فقال الناس انكسفت الشمس لموت إبراهيم فقال النبي إن الشمس والقمر آيتان من آيات الله لا ينكسفان لموت أحد ولا لحياته فإذا رأيتم ذلك فافزعوا إلى ذكر الله وإلى الصلاة } وشوقتني لمجسم الطيارة ده بالحجم الحقيقي؟ وهي البوينج الجامبو747 ولا ايه؟ بس فعلا مشفتش حاجة كده قريب ده كان فالمطار القديم هسأل واحد صاحبي شغال فالتحميل عليها ويقوللي عملوا فيه ايه.........هقولك حاجة استمررررررر بجد بتدخل البهجة في قلوبنا )

[wael ahmed]

قطعت قلبى يا سيد

بس انا لازم ليا قعده مع اخوك .... شكلنا هناكل مع بعض عيش

[Eng_Moh.Dewair]

انت قلبت عليا المواجع يا سيد فعلا الواحد بيقصر فى حق نفسه جدا و الدنيا بتخدع الانسان و بتلهيه عن اخرته ........ فعلا الواحد محتاج شويه تغيير فى اسلوب حياته

[saadelden]

بالنسبه للجزء الاول كل واحد بيبقى ليه اوقات بيراجع نفسه فيها
بس انت اوقاتك يا سيد صعبه اوي :d الساعه 1 و في المقابر !!

امبارح كانت منطقه السيده عائشه واقفه تماما الساعه 7 و كانت موقفه صلاح سالم لحد مسجد الشرطه!! ليله مايعلم بيها الا ربنا
و دخلنا ورا مكروباص من المقابر و عدانا الحته دي
بس تابعنا خسوف القمر من اوله لحد اخره
يعني يوم كوكتيل :d

[K.LOTFY]

يا مستر سيد
ادينى الحلقه بسرعه ارجوك محتاج الجرعه :) :) :)

[sayed911]

والله انا بفكر اعمل الحلقات دي على جروب على الفيس بوك يكون بريمينيم كمان عشان اعمل سبق صحفي ايه رأيكم :d :d

[AirForces]

والله انا بفكر اعمل الحلقات دي على جروب على الفيس بوك يكون بريمينيم كمان عشان اعمل سبق صحفي ايه رأيكم :d :d

ناقص تقول هتعمل خصم للى معاهم استيكر نايل موتورز

لأ بجد لو عملتها على الفيس هتبقا جامدة وهيجيلك فريندز وفريندزات زى الرز

[sayed911]

اذا فليكن ولكن عايز اشوف رأي الأغلبية من الناس معايا ولا مش معايا وان شاء الله ان وجدت الناس موافقة ها اعمل الفكرة كلها بدءا من 15\7 ها تنزل اول حلقة حصريا على الفيس على طول بعد كده ..

[Eng.Geo]

خلاص
موافقة بالأجماع :)

[sayed911]

كده معانا 3 موافقات :d