تجربة خطوبة فاشلة

[Ghost2]

هي طلعت بنت محترمه جدا جدا .... البنت مسابتش فرصة ان وقت يعدي و تيجي تلاقي نفسها مش قادرة تكمل فا من الاول ..قالت لا .. وانت محترم جدا انك تقبلت الموضوع ونهيت الوضع بشياكة .... والدنيا مش بتقف عن واحده ... وربنا هيراضيك بأحسن منها وهي كذلك .. وتقبل فائق تحياتي

[Migo123]

وعسى ان تكرهوا شيئا وهو خير لكم
متشغلش بالك بالاساب كتير ولا تحس بالاحباط .... مش معنى ان مفيش توافق ان انت وحش او هي وحشه ... و دلوقتي لما يتقال الكلام ده احسن ترليون مره من انه يتقال كمان سنه ... اشغل نفسك باي حاجه تانيه واعلم ان ما كان لك لم يكن ليخطئك

[elrasy]

تفسيرى لموضوع الانقلاب
البنات موضوع الحب مهم ليهم جدااااااااااا فممكن تكون كانت واخدة الموضوع عقلانى وكانت بتشوف هل هتقدر تحبك ؟ هل هتقدر تكمل بعقلانية فقط؟
ولكن واضح انة محصلش
ودة مش عيب فيك الحب دة كميا خاصة جدا - الحب فيرس متعرفش جالك ازاى وامتى

احمد ربنا وان شاء الله ربنا هيوفقك للخير

[م.محمد علاء]

على فكره أنا كنت إتحطيت في موقفك ده بس العكس منه..
يعني كنت أنا اللي مش حاسس بأي عواطف و مشاعر تجاه الطرف التاني.
حاجه عادي جدا إنها تحصل..هو مجرد عدم توافق..فجأه بعد أول أسبوع أو إتنين..
خجل و فرحة البدايات بيزول..و تلاقي عدم قبول تجاه الشخص الآخر.
إحمد ربنا إنك متعلقتش أو المده طولت..

[م.محمد علاء]

متضايق ليه بس؟
و ليه حاسس بخديعه؟؟

هيه صريحه معاك و قالتلك اللى عندها بكل ادب و كمان انقذتك و انقذت نفسها

ديه تتاقل بالدهب

و الكلام ده كلام جميل و مضبوط جدا جدا جدا...
إنسانه تحترم..لأن ده الي حست بيه..فقالته على طول...

[mahgary]

ليه مفكرتش ان ربنا بيحبك ومليكش نصيب فيه وربنا شايل لك حاجه احسن من كده كل شى قسمه ونصيب

[casperinoo]

هذه سنة الحياه ...وده شيء طبيعي ..لازم تخطب من 5 لي6 مرات وبعد كده تتجوز :)
ياباشا روق دماغك ياما حسينا بالاهانه :) والامور بتعدي ..
ومع الوقت الواحد بيحس انه كان مزودها قوي وبيحمد ربنا ان الموضوع وصل لكده ...
لو علمت الغيب لأخترتم الواقع

[eslam_wega]

غلطانة طبعا لان المفروض تعتبك لو فى حاجة حصلت منك تفولك مثلا انت مش حنين علبا مش بقتولى كلام حب مش بتاكل شبيسى بالجمبرى وانا باكله يعنى لازم كانت تعتبك انتم بينكم خطوبة مش لعب عيال وغير كدا انت غلطان بردوا كانت لازم تعرف السبب عشان تصلح من نفسك لان فى يوم من الايام هتخطب تانى فا عالافل هتطلع مستفيد حاجة
نصحيتى ليك اوعا تحول معها والله الكلام ده عن تجارب ناس كتير لو حولت معها تانى واتحيلت عليها هتقل من نظرها جدا وهترخص جدا عندها
حول لو شوفتها فى الشغل متعملش اى اهتمام ولو سلمت عليك متردش السلام وشهر ولا حاجة واخطب تانى وان شاء الله هتلقى الى تستهلك
وتعرف قيمتك

[waelfarid]

الحمد لله انك مغلطتش في دخلة ولا طلعة الكوبري دي فحياتك والا كنت حتفضل تدور عالسكة الصح بقية عمرك


استعدل قبل ما تستعجل

[yascro]

الف مبروك يا باشا
انت الكسبان

[No Comment]

قول اللهم اجرني في مصيبتي و اخلفني خيرا منها
و حابه اقولك ان الزواج دا رزق زي ما اي شئ في الدنيا رزق من الله
و كون ان الموضوع دا انتهي يبقي ماكنش رزقك ابدا و احمد ربنا ان الموضوع خلص قبل ما تتعلق اكتر او تتجوزوا و يكون نهايتها طلاق مش مجرد خطوبة مانجحتش
و لو انت شايف ان دا جرح او اهانه ففيه غيرك كتير بعد ما اتجوزوا اكتشفو ان فعلا جوازهم مش هينجح و تمنوا ان الطرف التاني كان جرحهم و لا اهانهم في الخطوبه لو انت شايفها كده
و صدقني هتنسي و هتعيش حياتك عادي و هتقابل ان شاء الله الانسانه اللي تحس انها توأم روحك , يمكن انت شايفها صعبه دلوئتي لكن هي دي الحقيقه و بعد ما تقابل الانسانه دي هتحمد ربنا ان موضوعك دا ماتمش
ربنا مش بيقدر اي شئ الا لسبب ما يعلمه الا هو سبحانه , و بعد فتره هتعرف سبب ان ربنا ماتمش موضوعك
وربنا يوفقك

و الاستاذ اللى بيقول النساء دماغهم صراصير احب افكره ان النساء دول فيهم امى و امك و اختى و اختك فبرجاء مراعاه الالفاظ خصوصا و المرأه اللى فى الموضوع محترمه

وعسى ان تكرهوا شيئا وهو خير لكم
اشغل نفسك باي حاجه تانيه واعلم ان ما كان لك لم يكن ليخطئك

ليه مفكرتش ان ربنا بيحبك ومليكش نصيب فيه وربنا شايل لك حاجه احسن من كده كل شى قسمه ونصيب

ومع الوقت الواحد بيحس انه كان مزودها قوي وبيحمد ربنا ان الموضوع وصل لكده ...
لو علمت الغيب لأخترتم الواقع

... مش هينقال أكتر من اللى اتقال .

[jisso82]

بدل ما تقول خديعة و خيانة و إهانة ليه ما تقولش إنها إنسانة صادقة و صريحة و بس اتسرعت فى الحكم على مشاعرها أو كانت مندفعة شوية و الموضوع ما تعداش الإعجاب و التقدير اللى انت ذكرته و حبت تعالج الموضوع بدرى قبل ما يكبر و يبقى أعقد من كده يعنى كده أحسن من طلاق و أكيد أحسن من انفصال مع وجود طفل ما لوش أى ذنب. قول الحمد لله و إن شاء الله ربنا هيرزقك خير بإذن الله.

[memoo305]

لو عرفت تحاول معاها تانى حاول - ماتعرفش الخير فين و ماتعرفش ربنا عايزك تحاول كام مره عشان توصل لحاجه كويسه

تفتكر أن كده ممكن تستقيم الحياة حد بيقلك أنا بايعك وانت تتحايل عليه. مهما كنت بتحبة أو أتعلقت بية.على العموم أنا شخصيا أخلاقي ماتسمحليش بكدة أو حتى تسمحلى أنا أضغط على حد علشان أعيش معاه بالعافية.
ياجماعة الرفض بالطريقة ي مش عملى صدمة عملى شرخ كبير قوييييييي

أنا بس عاوز أعرف حاجة أو أسئل البنات سؤال واحد . لو أنت دلوقتي حاستي بقبول ناحية أحد الأشخاص وبعد فترة بسيطة حسيتي أن كمياء الحب ماشتغلتش . بس أنتي عارفة ومتأكدة أن الشخص ده بيحبك ونأكده من أخلاقة وطباعة وشخصيته هل ده هيكون مبرر للرفض القاطع هل مش هتشكي حتى ان صعب أنك تلاقي الحب ده تاني . مش هيقي فيه حتى فترة من التردد أو حتى طلب فرصة تانية للدراسة إلي قدامك

معلش في شعوري ياجماعة بالمرارة دية بس إلي ألمني فعلاً أن الفترة إلي فاتت كلها ماحستش بأدنى شعور بالتردد من ناحيتها أو التفكير أو حتي عدم وجود رد فعل من المشاعر ناحيتي بالعكس أن إلي خلاني أخد خطوات الفعلية هو إحساسي بحب متبادل من الطرف التاني.
ولما وجهتها بالكلام ده أن هل ده كان تمثيل قاتلي لا بس كنت بحاول.
ياجماعة الرفض القاطع بالطريقة دي مايجيش إلا لو أكتشفتي نصيبة حاجة تانية ظهرت مش عارف ومش قادر أظلم.
معلش أن بكأبكم معايا بس أنا مش فاهم أي حاجة خالص

[Ahmed_Ramadan]

لسة خارج من تجربة خطوبة فاشلة وجويا شعور كبيــــــــــــــر قوي بالأحباط. الموضوع كان الموصفات التالية:
زميلة في العمل -أتعرفنا على بعض -إعجاب وقبول متبادل- تعارف الأهل والإتفاق- قرأة فاتحة- وبعدها بـ 3 أسابيع حفلة خطوبة - 3 أسابيع أخرى أنفصال.
الغريب وإلي فعلا حاسس أن مش فاهم منه : طوال هذه الفترة وفي إعجاب وإحترام وحب وتفاهم.ورسايل وموبايلات وخروجات. لدرجة إننا أخترنا ألوان الشقة وبدأنا التنفيذ وبدأنا في شراء التجهيزات . وإختيار قاعة كتب الكتاب . بإختصار الموضوع كان ماشي بشكل أكثر من رائع.

وفجأة في صباح أحد الأيام (بالليل كنت عندهم في البيت ومافيش أي حاجة مش طبيعية نفس الترحاب والحب.. ) ألوو معلش عاوزاك في موضوع بعد الشغل ضروري جداً بخصوصنا. (أنا قولت أسوء سناريو ممكن نأجل كتب الكتاب شوية...).
المهم إتقابلنا في الكافية إلى إحنا بنقعد علية .
أنا :( بعد الترحاب) خير فيه أيه؟
هي: أنا مش حاسة ناحيتك بأى حاجة وشايفة أن فيه إختلاف طباع كبير قوي بينا مش متخيلة أن إحنا هنعرف نعمل حياة مع ببعضنا . علشان كدة أنا شايفة أن إحنا ننفصل دلوقتي أحسن من بعد كدة.
أنا:(نفس الشعور واحد وقف قدام القطار وداسة مبقاش فيه حاجة) الكلام ده أنتي متأكدة منه . طيب قالتيه لحد (زي بابا وماما & صحبتك المقرية&...).
هي: (بحزن والدموع في عبنها) لا

بعد حوار إستمر أكثر من ساعة تم الإتفاق على أخذ يومين لإعادة التفكير.
بإختصار شديد.بعدها برده مافيش جديد وأنا طبعا مجروح قررت أني مش هتحايل على حد ولا هاعيط زي العيال الصغيرة على حد باعني بالمنظر ده.

روحت نهيت الموضوع مع الأهل بشكل متحضر جدا وذوق إلى أبعد الحدود (وللآمانة في ضغط على أعصابي بشكل كبير)
دلوقتي أنا عندي شعور كبير بالإهانة والخديعة وزي ماتقولو وحاسس أني رجعت مش لنقطة الصفر لا لتحت الصفر بمراحل.
ونفسي أعرف الإنقلاب 180 درجة سببة إيه؟؟؟؟وهي ممكن يكون فية كدب في المشاعر بالشكل ده؟ أنا مش فاهم أي حاجة ولو في حد فاهم أو مر بالتجربة دية يقولي ياجماعة

* على فكرة أنا بشهادة جميع الزملاء والأصدقاء شخص مهذب وطيب ومتزن (والحمد لله هذا من فضل ونعمة ربي عليا)

بص أنا كنت مريت بحاجة زى كده بالظبط فى الشغل القديم بس الفرق إن الموضوع حصل و رايح البيت أخطب و لقيتها بتكلمنى قبلها بيوم بعد أما كلمت أهلى و عملوا حسابهم و السعادة عند أمى كانت كبيرة بتقولى عاوزين نأجل الموضوع...أنا فضلت مذبهل شوية و محاولتش أرد قولتلها يويمن يعنى قالتليى أسبوع ......فى نفس اليوم بالليل كنت قايل لأهلى الموضوع فركش خلاص و بعت رسالة (كل شئ قسمة و نصيب) و مردتش على تليفونات و لا وساطة و شكرا كده ......اللى فهمته بعد كده إن العبد لله كان عامل سمعة حلوة من أخلاق و شغل فا قالت ده عريس لقطة إحنا نسبته و بعدين نشوف هنكمل و لا لأه

الحمد لله بعد كده طلعت كل الكبت و الحزن اللى كان فيا فى الشغل و الحمد لله وكرم من عند ربنا فى خلال شهرين بقيت زى التنين فى الشغل و حرفيا باكل الشغل يعنى المشروع يبقى مفروض يخلص فى شهر أخلصه فى أسبوعين و زيادة فى المرتب

نصيحتى ليك متقفش عند حد مهما كان و ركز فى شغلك و ربك دايما شايلك الخير دايما

[AmatoALLAH]

تفتكر أن كده ممكن تستقيم الحياة حد بيقلك أنا بايعك وانت تتحايل عليه. مهما كنت بتحبة أو أتعلقت بية.على العموم أنا شخصيا أخلاقي ماتسمحليش بكدة أو حتى تسمحلى أنا أضغط على حد علشان أعيش معاه بالعافية.

ياجماعة الرفض بالطريقة ي مش عملى صدمة عملى شرخ كبير قوييييييي

لا صدمة و لا شرخ

انت بس مكبر الموضوع و حاسه اهانه لك ليه ؟ مش معني ان طباعها مش متوافقه معاك انك انت انسان وحش او سئ

بالعكس هي زي الفل و انتي زي الفل بس مالكوش نصيب مع بعض , كميتكم ماركبتش مع بعض

و علي فكرة انت لو عرفت راي الشرع في الموضوع هتستريح , من حق الخاطب او المخطوبه ترك الاخر بدون ابداء السبب , يعني هي ماعملتش جريمه

و علي فكرة صدقني زي ما الاخ هيومن قالك دي واحده محترمه , واحدها غيرها كانت ممكن سوري في الكلمه تعملك ستبن لحد ما تلاقي واحد مناسب اكتر , يعني تضرب عصفورين بحجر
لكن دي فعلا واحده صادقه مع نفسها قبل ما تكون صادقه معاك


أنا بس عاوز أعرف حاجة أو أسئل البنات سؤال واحد . لو أنت دلوقتي حاستي بقبول ناحية أحد الأشخاص وبعد فترة بسيطة حسيتي أن كمياء الحب ماشتغلتش . بس أنتي عارفة ومتأكدة أن الشخص ده بيحبك ونأكده من أخلاقة وطباعة وشخصيته هل ده هيكون مبرر للرفض القاطع هل مش هتشكي حتى ان صعب أنك تلاقي الحب ده تاني . مش هيقي فيه حتى فترة من التردد أو حتى طلب فرصة تانية للدراسة إلي قدامك

دي بتفرق من شخصيه لاخري فيه شخصية رومانسيه الحب عندها الاهم و فيه شخصية عمليه بتحسبها بعقلها و تقولك اخد اللي شاريني لانه اللي هيعرف قيمتي

و هرجع تاني و اقولك من كلامك انها حست ان طباعكم مختلفه يعني اعتقد المساله مش عاطفيه , هي انجذبت لك فعلا و كان فيه قبول متبادل بس لما احتكت بالتعامل معاك حسيت ان الطباع مختلفه و دا لا يقلل منك ابدا


معلش في شعوري ياجماعة بالمرارة دية بس إلي ألمني فعلاً أن الفترة إلي فاتت كلها ماحستش بأدنى شعور بالتردد من ناحيتها أو التفكير أو حتي عدم وجود رد فعل من المشاعر ناحيتي بالعكس أن إلي خلاني أخد خطوات الفعلية هو إحساسي بحب متبادل من الطرف التاني.
ولما وجهتها بالكلام ده أن هل ده كان تمثيل قاتلي لا بس كنت بحاول.
ياجماعة الرفض القاطع بالطريقة دي مايجيش إلا لو أكتشفتي نصيبة حاجة تانية ظهرت مش عارف ومش قادر أظلم.
معلش أن بكأبكم معايا بس أنا مش فاهم أي حاجة خالص