اثنين حينفصلوا او بمعني اوضح حيطلقوا بسبب.......

[Medicalist]

بص يا باشا انا رايى ينفض على الاخر و يسيبها براحتها وما يكلمهاش خالص هتلاقيها جايه تجرى عليه هم الستات كده لكن الحنيه و اللين فى المواقف دى ومع شخصيه بالطريقه دى مش هتجيب اى حل

[azmeralda]

ممكن اسأل حضرتك تقربى ايه للزوج ده؟؟

لا مؤاخذة فى السؤال بيتهيألى اخته يمكن لأنى حساكى متعاطفة معاه قوى

وانا شايفة الحكاية دايما اللى بتتسمع من طرف واحد بيبقى فيها حلقة مفقودة

ودايما محدش بيطلع نفسه غلطان انا مبقولش ان هو غلطان بس بقول ان مفيش انسانة شريرة على الأطلاق كده وبنابين والدم نازل على بقها وضحكات شريرة متقطعة

وحكاية انه ميعبرهاش دى متنفعش تبقى نصيحة عامة لأن اللى ينفع مع انسان مينفعش مع التانى وحصلت قدامى ولأبن صاحبة ماما وبرضه منختش لا هى ولا اهلها وداخلين على سنة دلوقتى ومعاها بنت وقالهم طب نصلح او نطلق قالوا له طلق براحتك بس غيابى عشان العند يورث الكفر ويقتل المشاعر

واذا كان هيربيها ده الهدف ممكن ده بعد ما المشكلة دى تعدى ويبقوا فى بيتهم ويحصل كلام وتفاهم مش والنفوس عاملة كده واذا تناقشوا المرة دى بعد الصلح وخد عليها العهود والمواثيق وفهمها ان المرة الجاية مهما حصل مش هيروح يجيبها ولو بعد 100 سنة عشان كرامته وانه هيتجوز وكل الكلام اللى بتقولوه ده ساعتها لو كررت الحركة دى تانى يبقى تستاهل اكتر من كده

لكن رد فعلها ده فى اكتر من 50 % منه نتيجة لتعامله هو شخصيا معاها بدليل ان اهله نفسهم بيقولوا له انت السبب فمش شايفين ان حرام الموقف يتاخد بعنف عليها هى لوحدها مع انهم مشتركين فى الفعل اللى ادى للنتيجة النهائية دى


وبرضه انا مش بدافع عنها انا بقول فرصة اخيرة خاصة ان فى طفل والطلاق مش زى ما انتو بتقولوا بتطلع منه المرأة بس محطمة لأن الرجل هو انسان فى النهاية ووالله عنده دم ومشاعر حتى لو بين العكس وبتتكسر جواه حاجات برضه الا لو متبلد تماما
ومتفتكروش انه مش هيعانى من بعده عن ابنه ولا بنته برضه الا لو متبلد تماما خصوصا لو العند دخل فى موضوع الرؤية بعد كده ومش بقول ان ده لوى دراع بقول ان ده ابغض الحلال

والطفل ده هيتعذب نفسيا فوق ما تتصوروا مش زى ما الناس بتقول هيتربى وعادى وياسلام لو هى جابتله جوز ام

واحنا لسه بنتكلم فى سنة جواز يعنى فترة عز المشاكل وتضبيط طباع الناس على بعض واللى عنده نصيحة خير والصلاح بين الناس يقولها واللى عنده كلمة شر يلمها ويتقى الله ميعرفش بنته تتحط فى موقف ايه فى يوم من الأيام والحكم عالسماع ده مش سهل قوى كده


ده حتى بيعيبوا على شيوخ الفضائيات فى فتاويهم ده حتى السلف كان بيجى لهم نفس السؤال كانوا يفتوا لكل واحد بفتوى مختلفة حسب طبعه وحالته يعنى مرة شيخ من السلف دخل له سائل (الزانى هل له من توبة قال له لأ وبعد شوية سألأه واحد تانى نفس السؤال قال طبعا يستغفر ولا يعود فتعجب جلسائه قال الأول كان واضح من طريقته انه لسه هيزنى فخوفته لكن التانى كان واضح انه وقع فيه وندمان فرغبته فى رحمة ربنا ))

فبشويش شوية
خصوصا انها بتقولكوا هتخليه يقرا ردودكوا وهو فى حالة نفسية الله اعلم بيها دلوقتى

بدل ما تشيلوا ذنب واحدة وبنتها ويمكن هو كمان سنين قدام وانتو مش واخدين بالكو

[أحمد كمال]

يا أخت أزميرالدا ...... و هو خروج الزوجة من بيتها بدون اذن و بياتها في غير بيتها مش مخالف للشرع ؟؟؟؟؟؟؟؟؟


و بالنسبة لابن صاحبة والدتك فده معناها ان زوجته دي دماغها ناشفة بزيادة و hopeless case و هتتعبه بقية عمره ...... الموضوع مش مسالة عند يورث الكفر بس هو لو نخ مرة هينخ مليون و ساعتها برضه هتبقى النهاية خراب البيت

[azmeralda]

انا قلت انها غلطانة
لكن احيانا اسلوب الزوج معاها هو اللى بيخليها كده تفرد قلوعها لو كان اتعامل معاها بأسلوب مختلف من الأول مكناش وصلنا للمرحلة دى
ولو هنتكلم عن الشرع يبقى هنرجع له من اول اسس اختيارهم لبعض كان صح شرعا ولا ايه وفترة خطوبتهم كانت صح شرعا ولا ايه ومهر واسلوب فرح كان صح شرعا ولا ايه فده مش مثار مناقشة دلوقتى احنا خلاص وقعنا فى مشكلة هنفترض انها جاهلة دينيا تماما ودى برضه غلطته فى اختيارها انا اسفة بدليل انها بتقول على دار الأفتا اغراب فى حين بتدخل اهلها فيما لا يصح وبتفترى عليه بالباطل زى ما بيقول وهو واجب على الزوج برضه انه يعلم مراته دينها ده لو هو راح اتعلمه : )

ومقلتش انه هيسمح لها تعمل كده تانى اطلاقا انا بقول المرة دى فرصة اخيرة

يعنى لو واحدة جوزها عودها سنة كاملة انهم كل ما يتخاصموا لازم بالليل هو يروح يتحايل عليها ويصالحها ويمكن يشترى لها هدية كمان تفتكر فى الآخر لو اتخاصموا مرة ومصالحهاش وهى متدلعة زى ما بيقولوا هتقوم راحة جرى مصالحاه ولا هتستنى نفس المعاملة اللى عودها عليها لو عايز يسحبها منها بقى يسيبها زى البوبى زى ما العضو المحترم بيتكلم على مراته ام ولاده ( اللى اشك ان حد بيتكلم على زوجته كده ممكن يكون بيعاملها باحترام وبيطيع الرسول عليه الصلاة والسلام فيها ويكرمها ) وهى الصدمة من تغير المعاملة هتخليها فى حالة تخبط مش عرفة تتصرف ازاى وممكن بمخ شابة لسه صغيرة مخبرتش الحياة ولا لاقية حد عاقل ينصحها كمان تفكر لأ لو صالحته المرة دى معدش هيعبرنى ولا يدلعنى بعد كده


مش كل الناس ناضجة زى مانتو فاكرين وبرضه اختياره من الأول


ولا يصالحها النهاردة ويقعدوا بقى قعدة صفا كده ويحط لها قواعد جديدة بود وتفاهم وبطريقة يفهمها فيها انه بيحبها برضه مش بيتحداها وان ده حفاظا على حبهم وبيتهم بدل ما رد فعله وفعلها يبوظ العلاقة بينهم
ويشوف المرة الجاية هى هتعمل ايه فى من التفاهم معاها امل ولا لأ يسمع محمد العريفى شوية : )
هو يعنى لما يثبت انها ناشز ده مش فيه خراب البيت وهى كده مش ممكن تاخد التصرف ده على كرامتها زى ماهو زعلان على كرامته وتنتهى الجوازة برضه !!


وبالنسبة لأبن صاحبة ماما هم فعلا هيتطلقوا بس هو كل امله ميكونش غيابى عشان حاجات قانونية كده انا مش مستوعباها قوى

[Car's Sniper]

مع انى مابحبش احكم على موضوع سمعته من طرف واحد بس على حسب كلامك فقط ومع احترامى للجميع...النوع ده من الزوجات هو النوع المادى اللى مابيملاش عينه غير التراب
ودى هتتعبه فى المستقبل جامد جدا جدا جدا لكتر من دلوقتى كمان
لو الحكاية زى ما فى الموضوع بالظبط بدون اى غلط من الزوج يبقى يتكل على الله وينفصلوا على الاقل الجنين اللى لسة ماتولدش دا يرتاح ويبقى بين الاب والام احسن مايبقى شخصية غير سوية عايش وسط خناقات يومية
اذا كان عملوا كدة فى بداية الجواز يبقى بعد كام سنة هيعملوا ايه فى بعض

[أحمد كمال]

هو يعنى لما يثبت انها ناشز ده مش فيه خراب البيت وهى كده مش ممكن تاخد التصرف ده على كرامتها زى ماهو زعلان على كرامته وتنتهى الجوازة برضه !!


وبالنسبة لأبن صاحبة ماما هم فعلا هيتطلقوا بس هو كل امله ميكونش غيابى عشان حاجات قانونية كده انا مش مستوعباها قوى

هي كده كده ناوية على خراب يبقى ينقذ ما يمكن انقاذه

و الطلاق الغيابي الراجل بيتعمل عليه حفلة في المحكمة عشان كده هو مش عايز يطلق غيابي و ممكن يطلبها للطاعة لاثبات النشوز و يبقى كده هي لبست في الحيط

[أحمد كمال]

هو حضرتك يعني عايزاه يروح يبوس الجدم و يبدي الندم ...... هو ده شرع ربنا؟؟؟؟؟ هو ده الصح ؟؟؟؟؟

[A.Saad]

اللى ما يحافظش على بيته
راجل او ست
ويتسبب فى خرابه بعدم تحمل جاد للمسئولية او دلع او عدم ادراك
لا يلوم الاخرين

[أحمد كمال]

اللى ما يحافظش على بيته
راجل او ست
ويتسبب فى خرابه بعدم تحمل جاد للمسئولية او دلع او عدم ادراك
لا يلوم الاخرين

بالظبط و لو هي صغيرة (23 و لا 25 سنة مش عيلة يعني برضه) طيب اهلها فين؟


فين الاهل بتوع زمان اللي كان كل همهم الحفاظ عالبيوت


أمي حتى يومنا هذا تفخر بابوها الله يرحمه

مرة أمي زعلت من أبويا ..... كلمت أبوها قال لها تعالوا ... لمت هدومها و هدوم اختي الكبيرة (ماكنتش انا شرفت) و راحوا ...... اول ما وصلوا جدي الله يرحمه قال لابويا خلاص يا كمال خد بنتك و اتفضل من غير مطرود ..... امي اتجننت قالت لابوها ياخد بنت مين ؟؟؟؟؟؟؟؟؟ قال لها انا ما باربيش عيال حد عايزة تقعدي هنا تقعدي لوحدك عايزة بنتك قومي روحي مع جوزك ....

بتقول لي بمنتهى الهدوء قمت أنججت أبوك و روحت معاه من غير ولا كلمة


و بتفخر ان ابوها عمل كده ..... لو بنت من بنات اليومين دول كانت قالت انت رخصتني قدام جوزي و الكلام الحمصي ده .....

[mido51eg]

اللي بتعمله ده اسمه بطر. وفيه مثل بيقول "أخرة البطران قطران"
يبعت لها انذار شديد اللهجة مع وسيط ... لو لم تمتثل يبقى خليها في بيت اهلها احسن وبالنسبة للطفل اللي في الطريق فمش هيبقى اول ولا اخر طفل ييجي الدنيا وابوه وامه سايبين بعض.

[Ghamrawy]

خلاصة الكلام
اسمع كلام اخونا احمد كمال و اثبت انها ناشز و هجرت بيت الزوجية
و سيبها مع حالها
لو طلبت الطلاق يبقى بشروطك انت
لو مش عاجبها قولها اخلعى
فى الحالتين انت كسبان نفسك
و فكر كده بينك و بين نفسك
بعد كل اللى حصل ده ،انت حاتقدر تعيش معاها تانى ؟؟ حاتديها الامان تانى ؟؟ حاترجع يوم من شغلك و مش حاتلاقيها تانى ؟؟اسرار بيتك حاتطلع بره تانى ؟
فكر فى كل ده
و ماتلمش نفسك على حاجة ،هى سكة الانفصال كده بتبقى ماشية زى الصاروخ و مهما حاولت تصلح مش بتلاقى نتيجة

[أحمد كمال]

و الله يا غمراوي مش عارف ليه الناس فاكراني شراني !!!!! محدش فاهمني !!!


انا باقول يثبت النشوز بس ...... عشان هي ما تطلبش الطلاق للضرر بعد كده و تقول انا سبت البيت مثلا لعجزه او عدم انفاقه الخ الخ الخ .....

و الله رجعت ..... اهلا و سهلا ..... ما رجعتش يبقى هي hopeless case أساسا


انا ضد مدرسة اتنازل عشان المركب تمشي ...... اتنازل في غلطة هايفة ..... اتنازل ان الاكل مش جاهز .... اتنازل في خناقة عبيطة ..... بس سيبان بيت ....... و كل شوية ...... و تدخل الاهل بالباطل ......... و كل ده في محاولة لتركيع الزوج ........ لا شكرا ما يلزمش ......

[Ghamrawy]

و الله يا غمراوي مش عارف ليه الناس فاكراني شراني !!!!! محدش فاهمني !!!


انا باقول يثبت النشوز بس ...... عشان هي ما تطلبش الطلاق للضرر بعد كده و تقول انا سبت البيت مثلا لعجزه او عدم انفاقه الخ الخ الخ .....

و الله رجعت ..... اهلا و سهلا ..... ما رجعتش يبقى هي hopeless case أساسا


انا ضد مدرسة اتنازل عشان المركب تمشي ...... اتنازل في غلطة هايفة ..... اتنازل ان الاكل مش جاهز .... اتنازل في خناقة عبيطة ..... بس سيبان بيت ....... و كل شوية ...... و تدخل الاهل بالباطل ......... و كل ده في محاولة لتركيع الزوج ........ لا شكرا ما يلزمش ......

انا فاهمك و عارف فكرك رايح لفين
انا اعتقد ان العملية كلها عملية طمع
الستات بيفكروا فى حاجة غريبة
واحد بيصرف من غير حساب و مش بيعترض على اى فسحة و باى ميزانية و فى نفس الوقت مش عايز يقول او يبين حساباته فى البنك
يبقى كده ممكن يروح يتجوز واحدة تانية فى اى وقت لانه حتى سنه مش كبير
يبقى الحل هو محاولة كسر مناخيره و قصقصة ريشه علشان يبقى مش قادر يبص حواليه من كتر النكد و المشاكل
اساليب غريبة
بس مش بتختلف من واحدة للتانية سواء بقى متعلمة او جاهلة الست ست

[shaddadfalcon1]

يخرب بيت الأهل اللي بالشكل ده
عندنا البنت بتبقي جايه لاهلها بتجيب دم من الضرب وبتقعد اسبوع وجوزها او حماها بيجي يتعشي وياخدها معاه وهو مروح من غير نص كلمه ولو حد قالها ازاي كده ده بهدلك تقوله عشان عيالي وتلاقيهم تاني يوم سمن علي عسل

البطر وحش قوي ياجدعام

[marimmarum]

السلام عليكم اشكر كل من شارك بوقتة وجهدة لنصيحتيي جزيل الشكر
انا ليا بعض التعليقات علي اراء اخوتي الاعزاء
اولا ردا علي كلام المهندس حاتم ولة جزيل شكري واحترامي ان اروح واخد حد وناخدها من بيتها يبقي انا كدة معملتش حاجة طيب ما كنت اروح من الاول بقي وكنت جبتها والقصة خلصت وكل مرة حيتكرر الموضوع دة لان انا برضو رضخت ورحت اكلم اهلها في شئون اسرتي وحياتي وخاصة وانا حاولت كتير معاها وقلت لاهلها ترجع بيتها ذي ما مشيت منة ووسط ناس بينا ومفيش فايدة عيزيني اروح البيت بشكل او باخر وبعد كدة هددوني ان لو مش حتيجي حنروح ناخد هدومها وقد كان ,اذن انا استحالة اروح اصالحها باي حال لان انا باقي علي البيت وهي بايعة ومش حقدر اعمل حاجة تانية في النقطة دي.

اما موضوع اني اثبت انها ناشز انا مش حابب اعمل كدة مش ضعف مني والله لكن لاني باقي علي البيت وانها ممكن ترجع عن طريق الشيطان دة والله الهادي وفي الاخر كان في بينا ايام حلوة وفي بينا ابن جي في الطريق ولكن ان كان علي سكة الشر ففي سكك كتير لا داعي من ذكرها وبيعملوها محامين اللي بيسموهم محامين تحت السلم لكن انا محبش ارجع حق ليا اني اتبلي علي حد لان في الاخر لينا يوم لا ينفع مال ولا بنون الا من اتي الله بقلب سليم
انا مش بكرها هيا لكن انا بكرة افعالها.
وربما فعلا يكون ابتلاء عن ذنوب اقترفتها في حياتي وربنا يغفر لي يارب ذنوبي.
في نفس الوقت برضو انا مبعرفش اعيش مش راجل ومعرفش مراتي ولا اهلها يمشوا كلامهم عليا بالعافية , الرجال لهم القوامة وانا شفت رجالة كتير مراتتهم سايقهم بمعني الكلمة ومش معني دة اني مش بحترم راي مراتي بالعكس فوق راسي كمان ولها كل الحق في ابداء ارائها بكل حرية وكلامها اخذ بية واعمل بية وممكن يكون رائيها اصوب مني واعترف بدة بس كلة دة تحت مظلة ان الراجل راجل وهو لة الكلمة الاخيرة لان طبعا مركب فيها ريسين تغرق وقال رسولنا الكريم لعن الله قوما ولوا شئونهم امراة.

ولو كرهتها مش حظلمها لاني بتقي الله فيها.