درج ذكرياتي

[OlaOsman]

بادور على سي دي نوكيا اللي مش فاكرة خالص شايلاه فين و قلت أدور في درج من الأدراج الخاصة بية.. باقلب فيه لقيت ان فيه حاجات من سنييييييييين باروق الدرج كل فترة و ارجع الحاجات دي زي ما هي.. النهاردة قررت اني أشوف ايه اللي مخزناه بقالي سنين ده، بس ع الهوا المرة دي.. يعني هافرز محتوياته معاكوا و نشوف ايه اللي فيه.. يعني من الآخر كده هافتح لكوا درج ذكرياتي

ياللا بينا؟ :)

[OlaOsman]

أول حاجة لقيتها في وشي هي سي دي نوكيا.. بس مش اللي انا عايزاها.. دي سي دي النوكيا القديم اللي ضاع / اتسرق مني من سنة و كان 6680.. كنت باحبه اوي :(

طيب تعالو نشوف ايه ده؟
دي دعوة فرح.. يا ترى دي بتاعة مين؟ باشبه عليها فعلا..
طيب ياللا نفتحها سوا..
أييييييييييوه.. ياااااااااااه..
المهندس فلان و الأستاذ فلان
يتشرفان بدعوة سيادتكم لحضور حفل خطوبة كريمة الأول
الآنسة عبير على نجل الثاني الأستاذ محمد
و ذلك بمشيئة الله تعالى في تمام الساعة الثامنة مساء يوم الثلاثاء الموافق 27/7/1999
و العاقبلة عندكم في المسرات.
نتمنى للأطفال نوما هادئا.

دي دعوة خطوبة عبير صحبتي و زميلتي في المكتب.. الزواج كان بعدها بسنة باليوم و دلوقتي معاهم كريم و عمر.. ربنا يخليهم لهم يا رب :)

انا على فكرة ما رحتش الخطوبة دي.. يوم تلات و في آخر الدنيا، هاروح ازاي و امتى و ارجع ازاي و امتى و هاروح تاني يوم الشغل ازاي؟ دي حتى بعدها قالت لي ان البوفيه اتفتح الساعة 1، يعني كنت هاروح و ارجع من غير ما احضر البوفيه.. و ده اسمه كلام برضه؟

طيب.. نكمل دعبسة في الدرج؟

تابعونا :)

[Hassan Khalil]

للمرة التانية بقولهالك ...........
بتجيبي المواضيع دي منيييييييييييييييييييييييين ؟؟؟؟؟

---------------
عموما . ياللا ..افتحي درج ذكرياتك ..
و احكيلنا ..
كلنا اذان مطرطقة .. و اعين مفنجلة ..

[OlaOsman]

و انا بابص في الدرج لمحت لوجو اتصالات، باسحب الشئ ده لقيته دليل لخط اتصالات أهلا.. افتكرت ساعتها اني فعلا اشتريت خط اتصالات من سنة تقريبا و كان جولدن، فيه أول رقمين زي بعض و آخر تلات أرقام.. بس لما لقيتني مش باستعمله ربنا استخدمني اني أديه لناس هاتستعمله افضل مني :)

يااااااااااااه.. ايه ده؟ ده نيم تاج name tag معلش مش عارفة اترجمه للعربي لفريق أحلامنا للتنمية البشرية، الفريق ده كان نزل في شبرا بيدي محاضرات تنمية بشرية سنة 2005 و كان هايكمل بخطة تنمية شاملة لشبرا و شبابها، بس ما كملش.. الناس انشغلت بحاجات تانية.. انما انا لسه محتفظة بالنيم تاج :)

لأ لأ لأ.. ايه ده؟ اوتوجراف؟ مش عايزة أقول لكوا أول كلمة في الأوتوجراف ماما كاتبهالي بتاريخ سنة كام احسن تقولوا علية عجوزة :)
عموما انا كنت في ابتدائي و كنت باقلد اختي الكبيرة اللي كان عندها اوتوجراف، عشان كده لو قريت لكوا مكتوب فيه ايه من صحباتي هاتضحكوا للصبح.. شوية عيال ماسكين اوتوجراف يعني حاجة تهلك من الضحك

[Chicco]

بجد يا علا مالكيش حل ....ما شاء الله علي اسلوبك الجميل و على مواضيعك المتميزة
كمل يا باشا و احنا معاكي :)

[OlaOsman]

من أتوجرافي العجيب بانقل لكوا الكلام المكتوب بالحرف.. بالحرف بالحرف يعني :)

إلى أختي العزيزة علا أتمنى لك كل سعادة و نجاح في المستقبل
وردة + وردة = علا و فلة + فلة = علا
مع أغالي تمياتي علا حببتي
أختك عزة
21/11/1986

طبعا ماحدش يسألني مين عزة.. باقول لكوا سنة ستة و تمانيييييييييين

اللي جاية دي بأه بنت خالي:

علا حبيبتي، أرجو ان تكوني في "سعيدة" يا علا بعد 5 شهور عيد ميلادك
كل سنة و انتي طيبة،
اختك نورا جلال

صحبتي اللي جاية دي كانت على طول حزييييييييينة و مكتئبة و شايلة هموم الدنيا فوق دماغها.. هنا بأه كنا في أولى إعدادي :)

إلى صديقتي العزيزة علا،
بكتب بدقات قلبي و بدموع عيني كل الإخلاص و الحب و السعادة و ان يوفك الله حياتك العملية و الشخصية،
صديقتك فاطمة.

نيجي بأه لبواخة ثانوي و الثيمة اللي كانت معظم البنات بتكتبها أيامها في افتتاحية أي حاجة مكتوبة:

بسم الحب.. و إذا كان الحب من القلب فباسم القلب.. و أذا كان القلب من الروح فباسم الروح.. و أذا كانت الروح من عند الله فباسم الله الرحمن الرحيم،
أختي العزيزة علا،
أكتب إليكي هذه الكلمات لكي تتذكريني عند الفراق فإن الذكرى ناقوس يدق في عالم النسيان و أرجو لكي التوفيق في حياتك العملية و العملية في ظل والديكي الكرام.

نجوان - N - A

(ده على أساس ان أول حرف من اسمي A)
مش باقول لكوا بواخة ثانوي و سهوكته؟ :)

[OlaOsman]

حسن و شيكو.. متابعتكما لموضوعي التافه ده تسعدني تشرفني بجد :)

[Hassan Khalil]

حسن و شيكو.. متابعتكما لموضوعي التافه ده تسعدني تشرفني بجد :)

اولا ..الموضوع جميل ...و جديد
ثانيا .. يا تري ده مدح لحسن و شيكو ..و اللا شتيمة

[OlaOsman]

اولا ..الموضوع جميل ...و جديد
ثانيا .. يا تري ده مدح لحسن و شيكو ..و اللا شتيمة

همه عارفين و فاهمني صح

[OlaOsman]

طبعا لو كملنا في الأوتوجراف هانشوف العجب.. بس مش هانخلص.. كان نفسي أعمل للصفحات سكان و احطها هنا بس شكله كده مش هايكون في الإمكان.

دي بأة نوتة تليفونات قدييييييييييمة جددددددددا.. باقلب فيها دلوقتي و باشوف الأسامي.. مين دول؟
حتى اللي فاكراهم من الأسامي اللي سافرت و اللي اتجوزت و بعدت و اللي انقطعت أخبارها من سنين و اللي نمرته اتغيرت 50 مرة.. أهي دي بأه توريك حال الدنيا.

ايه ديييييييييييييي؟ علبة فيها مناديل مخصوص لمسح إزاز النضارات.. كنت جبتها مع نضارة نظر جبتها من حوالي 12 سنة.. تصوروا.. لسه فيها مناديل لحد دلوقتي. ايه الحفريات اللي انا محتفظة بيها لحد دلوقتي دي؟
انا بافكر ارميها.. حتى البلل اللي فيها راح.. يعني المادة اللي كانت بتنضف إزاز النضارة نشف.. ده غير اني دلوقتي بالبس عدسات لاصقة بقالي كام سنة
.
.
.
.
.
.
.
.
.

رميتها

[Chicco]

شيكو لسه متابع ......معاكي لحد ما تفضي الدرج كله و إن شا الله حتفضي المكتب كله كمان ....(الساعة ٧ بتوقيت تورونتو :))
علي فكرة ..أوعي ترمي حاجة ......هاتي علبة المناديل ديه تاني :D

[WalidAdel]

مش عارف اسلوبك في سرد الاحداث بيشد ان الواحد يكملي قراءه
صراحه طريقه جميله جداً و بتعجبني كمان

[Ramy_Tantawi]

السلام عليكم.

الأول احيي حضرتك على مواضيعك اللي بجد مبهجه جداً ومريحه نفسياً وده يرجع لطريقة سرد الموضوع وصلب الموضوع نفسه كمان من الحاجات اللي بتشدني هي انك ماشاء الله مابتسيبيش حاجه تعدي من غير كلمه كده بين السطور تخلي الواحد يفكر ويسرح زي مثلاً

حتى اللي فاكراهم من الأسامي اللي سافرت و اللي اتجوزت و بعدت و اللي انقطعت أخبارها من سنين و اللي نمرته اتغيرت 50 مرة.. أهي دي بأه توريك حال الدنيا.

عموماً انا متابع مع الجماعه هنا اخبار الدرج واسراره ولو اني هاسهر كده انهارده واحتمال اتأخر الصبح لكن مش مشكله.:)

[OlaOsman]

ظرف مكتوب عليه إسمي بالانجليزي و بخد اليد.. طبعا افتكرته على طول.. الظرف ده عمره 10 سنين.. كانت أول مكافأة آخدها في شغل.. و كان مفاجأة.. مش عايزة أقول الأرقام عشان بس ما تضحكوش.. لما بافتكرها دلوقتي بالاقيها أرقام عبيطة بمقاييس دلوقتي، انما ساعتها كانت تسوى كتير.. المهم بأه مناسبة المكافأة دي هي الشغل الجامد اللي عملناه أيام ما كنا بنعين الستاف بتاع مصر فون.. اللي هي بعد كده بأت كليك جي اس ام و دلوقتي معروفة بفودافون :)

لو احكي لكم عن مدى سعادتي بالمكافأة دي هاستغربوا.. و لما تعرفوا انها كانت عبارة عن 250 جنيه هاتضحكوا.. بس فعلا كنت طايرة بيها طيران.

أيامها كانت الفرحة الواحد بيحس بيها بتشيله من ع الأرض شيل.. دلوقتي باخد مكافآت بمبالغ محترمة انما مافيش سعادة زمان

طيب ما تيجوا نرجع للدرج احسن؟ :)

[Noha.M]

يلهويييي يا علاااا!!!

انا لو سيبت مامتى على الدرج بتاعك دة بس هترميه هو شخصيااااااا !!!!!!!!!

بالنسبة لماما اى حاجة توقف استعمالها لمدة لا تزيد عن يومين يبقي تترمي على طوووووووول



طيب انا اقولك موقف .. مرة واحدة صاحبتي كانت بايتة عندي و كانت جايبة لبس تنام فيه المهم وحنا النادى تانى يوم و روحت بعد كدة .. البنت كلمتنى بعدها بكام يوم بتقولي هعدي عليكي اخد هدومى و الشاحن و حاجات كدة .. تخيلي ايه باة !! ماما رمت الهدوم !!

ليه يا ست الحبايب رميتي الهدوووم !! قالتلى شكلها قديم و وحش !!

طبعا منظرى كان زي الزفت!

والله يا علا ببقي جايبة لبس و لسه جديد و بلاقي بنت البواب لابساه !

يلاا الحمد لله انها مرمتنيش انا شخصيا