إعـــــــلان

Collapse

.

,
See more
See less

أول سنة حياة وظيفية - سيرة ذاتية

Collapse
X
Collapse
 
  • Page of 9
  • Filter
  • الوقت
  • Show
Clear All
new posts
السابق 1 2 3 4 5 6 7 9 template التالي
  • #1

    أول سنة حياة وظيفية - سيرة ذاتية

    من يومين بالظبط تميت 10 سنين باشتغل في الشركة اللي انا شغالة فيها حاليا و ماحدش يسألني عن شعوري ايه و انا بقالي 10 سنين بحالهم شغالة في شركة واحدة عشان مش قادرة أحدد شعوري بالظبط.. يمكن عشان الشغل عندنا في الشركة حالة خاصة.. دخلت المكان و انا صغيرة أول ما اتخرجت يا دوب اشتغلت كام شهر مدرسة إنجليزي في مدرسة لغات و بعدين دورت على شغل تاني و انا هناك و ربنا رزقني بوظيفة في المكان اللي انا فيه دلوقتي. طبعا انا اترقيت كذا مرة و دلوقتي و لله الحمد ماسكة شغل مهم و وضعي مستقر.. انما اللي يسألني هل صح ان الواحد يفضل الفترة دي كلها في مكان واحد؟ أقول له لأ مش صح.. كل سنتين تلاتة بالكتير اسأل نفسك انا دلوقتي فين و باعمل ايه و اللي باعمله ده ليه سوق برة المكان ده و لا لأ و اللي زيي كده بياخدوا كام في أماكن تانية و يا ترى ناقصني ايه عشان أبقى زي الناس دي. انما زي ما قلت انا و الشركة اللي باشتغل فيها بمديرتها بناسها حالة خاصة هاحكي لكوا عليها بس بعد إذنكوا هاحكي لكوا كمان على مشواري في البحث عن وظيفة و أول سنة شغل لية.. أيوه طبعا الكلام ده عدى عليه أكتر من 10 سنين بس بافتكر الأيام دي من وقت للتاني و أقول الحمد لله الذي أنعم علي كل النعم دي و حابة انكوا تشاركوني تذكري للأيام دي :)

    معلش الحكاية طويلة و انا هاحكيها بالتفصيل و هاتبقى على حلقات.. يا رب ما حد يمل من القصة.. بس اللي يلاقي نفسها هايبدأ يمل ممكن يقوم يجيب له قرطاس لب يأزأزه عشان ما يزهقش.. انما ينسى انه ما يكملش القصة للآخر.. يعني هاتقروهاااااااااااا هاتقروهاااااا

    متهيألي في عدد قليل منكوا قرأوها على المدونة بتاعتي لما حطيت لنك الحلقات في موضوع طفل في الخامسة و العشرين، بس انا حابة استرجعها معاكوا تاني و نتابع حلقاتها مع بعض.. و شكرا مقدما على اللي هاتدهوني من وقتكوا في قراية قصة أول سنة من حياتي الوظيفية
    الكلمات الدلالية (Tags): 20, 2008, 316, 40, 50, 504, font, good, nile, tv, أول, إنجليزي, استلمت, الأولى, الاسكندرية, الجديدة, الجيل الجديد, السعودية, الشنطة, اللي, الي, بدون, برافو, بكرة, تغيير, حياة, خاص, خدمة, دى, ذاتية, رائع, زيرو, سير, شار, شارك, شجرة, شرح, صوت, طريقة, عن, فرق, في, قطاع, قطع, قلب, كل, لينك, مراكز, مركز, مشاكل, مصر, مصمم, مع, من, مواضيع, مين, هل, هنا, هي, وظيفية
  • #2
    انا قريتها فعلا يا علا كلها لما حطيطي اللينكات بس معنديش مانع طبعا انى اقراها تانى معاكى يا قمر :)
    [SIZE="2"]i'll miss everyone[/SIZE]

    Comment

    • #3
      انا امبارح بظبط عدى عليا شهرين شغل :).
      [SIZE=5][COLOR=Red]VTEC[/COLOR]: All of the lag...none of the BOOST :biggrin:[COLOR=White]l[/COLOR][/SIZE]

      Comment

      • #4
        انا امبارح يبقي عدا عليا 21 سنة الا 4 شهور عاطل
        [COLOR="gray"]
        [CENTER]Leadership is based on inspiration, not domination[/CENTER][/COLOR]

        Comment

        • #5
          جزاكم الله خيرا على المشاركات و يا رب كل اللي مش لاقي شغل يلاقي :)

          هاستأذنكوا بس الردود هاتبقى كل كام حلقة عشان التسلسل ما يضيعش :)

          Comment

          • #6
            إتخرجت سنة 1997.. و اشتغلت شهر اكتوبر من نفس السنة.. يعني بقالي أكتر من 10 سنوات في الحياة الوظيفية.. على مداهم اشتغلت في مكانين فقط لا غير.. و مكان تالت كان شغل بارت تايم في السريع لمدة شهرين فقط.. ازاي بدأت و بقيت ايه؟ قابلني في السنين دي ايه؟ تحديات؟ عثرات؟ لحظات من السعادة و البكاء.. كله موجود..


            تعالوا نبدأ الحلقة الأولىعلى بركة الله.

            اتخرجت شهر 8 سنة 97.. اتخرجت و راحت ايام اللا مسئولية بلا رجعة.. و بدأت رحلة البحث عن عمل حتى قبل ما تطلع النتيجة.. بتوع آداب انجليزي مش بيغلبوا على ما يلاقوا شغل.. خصوصا البنات.. حتى في حفلة التخرج شهر 11 كان اكتر سؤال بيتردد في قاعة خفرع بمركز القاهرة الدولي للمؤتمرات حيث الحفلة: اشتغلتي فين؟ و في جميع الأحوال الإجابات كانت إيجابية.. و لله الحمد.
            بدأت طرق أبواب العمل.. من مدارس.. لمكاتب ترجمة.. لشركات.. حتى لمدرسة خصوصي انجليزي بالحصة.. المهم اشتغل و خلاص
            الأيام بتمر.. و باعمل مقابلات في منتهى الفشل.. هاتشتغلي مدرسة لكي جي و مرتبك هايكون 100 جنيه.. ليه يا ست الستاااااااااات؟ 100 جنيه بس لييييييييييييه؟ ده انا آداب عنجليزي عين شمس يا ولية
            الإجابة اللي سمعتها اكتر من مرة و جابت لي إحباط ما بعده إحباط: أصلك خريجة مدارس عربي مش لغات
            بس انا الانجليزي بتاعي كويس و الله و يمكن كمان اكتر بكتير من بتوع اللغات.. انما تقولوا لميييييييين؟ هو كده
            طلعت عين اللي جابوني طبعا عشان أثبت للناس اني كويسة في العنجليزي.. طيب اختبروني.. طيب اتكلموا معايا انجليش و هتلاقوني لبلب.. و لا حياة لمن تنادي
            طييييييب.. انا تكالي على الله مش عليكوا و لن يخذلني ابدا.. بس هه
            و قد كان :)
            كلمة على جنب كده بيني و بينكوا.. همه كان عندهم حق.. أصل على أيامنا كان مدارس العربي بيبدأوا يدرسوا انجليزي في أولى إعدادي.. يعني شحطة كده ما شاء الله طول بعرض و لسه بياخدوا A, B طبعا دول عمرهم ما هايتساووا باللي بياخدوا انجليزي من كي جي.انا شايفة ان عندهم حق كمدارس لغات انهم ما يشغلوش حد مش خريج مدارس لغات.. عشان فاقد الشئ لا يعطيه.. انما يبخسوا الناس حقهم بالطريقة دي و يميزوا بين خريجي مدارس اللغات و الحكومة في المرتب بالطريقة دي فهذا ما لا أقبله.. طيب ماذا يكون الوضع لو واحدة زميلتي خريجة نفس دفعتي اشتغلت في نفس المدرسة و كانت هي خريجة مدارس لغات و انا عربي؟ يبقى مرتبها ضعف مرتبي؟ ده عند أُنه يا أدهم

            و نكمل الرحلة :)

            Comment

            • #7
              و لا يزال البحث مستمرا!

              أهرام الجمعة بالنسبة لي كان طوق النجاة.. أخرج يوم الخميس الساعة 10 بالليل أروح الميدان الاقي الأهرام نزل.. ما كنتش باقدر استنى ليوم الجمعة الصبح.. أفر اعلاناته كلمة كلمة بحثا عن كلمات مفتاحية زي: خريج حديث.. آداب او السن انجليزي.. سكرتيرة.. مدرسة مش عارفة ايه تطلب ايه.. و ابدأ ألف على الأماكن دي يوم السبت الصبح و اسيب السي في و اعمل انترفيوز ان امكن. من شهر 8 لحد نص 9 و انا على هذا المنوال.. لحد ما شركة في وسط البلد كانت محتاجة مترجمين كلموني.. و رحت تاني يوم على طول اشتغلت.. انما أجارك الله.. دي مطحنة يا عم مش وظيفة.. الوظيفة كانت ببساطة ترجمة فاكسات و مراسلات الشركة مع الدول الأجنبية.. أصل الباش مهندس ابن صاحب الشركة اللي ماسك الفرع ده مش بيعرف يفك الخط بالعنجليزي


              اليوم كان عبارة عن اني انا و زميلي ننكفي طول اليوم نترجم في الفاكسات اللي جاية من الشركات اللي برة (ايامها الايميل كان رفاهية ما بعدها رفاهية و مش متوفر في معظم الشركات) و نفضل كده طول اليوم.. و طول ما فيه شغل انت بتشتغل يا حلو.. ممكن تقوم تصلي لك الفرض خطف و تقطم لك كام قطمة من ساندويتش ع السريع.. مواعيد العمل كانت ايه؟ من 9 صباحا و حتى 8 مساء
              الأجازة امتى؟ يوم الأحد فقط.. يعني كان فيه شغل يوم الجمعة و اييييييييه؟ طحنة يابا


              المهم أختكوا قعدت في الوظيفة دي اد ايه؟ 4 أيام.. اما 4 ايام في 11 ساعة شغل يعني 44 ساعة شغل قطع نفس.. انما قلت حقي برقبتي.. مالها قعدة البيت؟
              و قعدت في البيت و لا همني

              في هاذوها الأثناء كنت عملت انترفيو في مدارس كتير.. منها مدرسة كانت في الدقي.. لغات طبعا و محتاجين مدرسين في الابتدائي.. و طبعا التناكة المعهودة بتاعة انتي خريجة مدارس عربي.. و كان الاتفاق على 150 جنيه كمرتب و الدراسة هاتبدأ كمان يومين. مديرة المدرسة قاعدة بتكلمني في التفاصيل و انا قاعدة احسب هاصرف اد ايه مواصلات.. أصل ايامها ما كانش لسه مترو الأنفاق وصل لحد الدقي
              يعني بنتكلم في اتوبيسات.. و طبعا المكيف او ال CTA ايامها ماكانش لسه عملوه اصلا.. ياااااااااه ده الواحد حاسس انه عجوز اوي

              قلت لها طيب هافكر و ارد عليكي بكرة.. قالت لي اوك.. انما تاني يوم حاولت أوصل لها عشان اقول لها موافقة.. آآآآآآآآآآآبدا.. ماحدش راضي يوصلني بيها و لا يوصل لها رسالتي.. و طبعا كان واضح انها اتفقت مع حد تاني و مش عايزة تقول لي الخبر الوحش ده. على فكرة المصريين فيهم العادة المنيلة دي.. الهروب الهروب الهروب لآخر الدنيا لو مضطرين يبلغوا خبر سلبي زي مش هاناخدك في الوظيفة.. او لو معروض عليه وظيفة و مش عاجباه مش بيقول.. يفضل يعوم الأمور لحد ما تفهم لوحدك يا حدق


              طبعا انا رجعت تاني في حيص بيص و هالف و أدور على شغل من تاني.. تااااااااااني يا ربي تااااااااااااني؟

              Comment

              • #8
                المشاركة الأصلية كتبت بواسطة OlaOsman مشاهدة المشاركة

                هاستأذنكوا بس الردود هاتبقى كل كام حلقة عشان التسلسل ما يضيعش :)
                هو انا هنا كنت أقصد ان ردودي انا ع الناس هي اللي هاتبقى كل كام حلقة.. يعني انتوا شاركوا و علقوا زي ما انتوا عايزين و انا هجمع الردود كل كام حلقة :)

                Comment

                • #9
                  الموضوع ده جه علي الجرح:)

                  حاليا لسه متخرج من 26 يوم و بدور علي شغل برده:)
                  [CENTER][SIGPIC][/SIGPIC][/CENTER]

                  Comment

                  • #10
                    انا حاسس اني قريت الموضوع ده قبل ذالوكا ....
                    اعتقد في كتاب كفاحي .... بتاع عثمان احمد عثمان ... هو انتي اسمك علا عثمان إيييه ...؟؟؟
                    اوعي تكوني علا عثمان احمد عثمان
                    بجد بقى ..
                    الكفاح بعد التخرج متشابه لحد كبير .... لكن كله في الآخر كفاح
                    لكن لما يبقى الكفاح ده من بنت .... في مجتمع ذكوري زي مجتمعنا ...... بصراحة يبقى يستحق التحية
                    [SIZE=5][COLOR=blue]يظن الناس بي خيرا وإني ... لأشقى الناس إن لم ترض عني[/COLOR][/SIZE]
                    [SIZE=5][COLOR=blue]ومالي حيــلة إلا رجــائي ... وعفوك إن عفوت وحسن ظني [/COLOR][/SIZE]
                    [SIZE=5][SIZE=3][COLOR=black]محاسب / احمد ابراهيم [/COLOR][/SIZE][/SIZE]

                    Comment

                    • #11
                      متابع باهتمام
                      [RIGHT][COLOR=darkgreen]أحمد محمد صبرى[/COLOR][/RIGHT]
                      [CENTER][COLOR=darkgreen][SIGPIC][/SIGPIC][/COLOR][/CENTER]
                      [CENTER][COLOR=darkgreen][B]يا رب تفهم يا تتح[/B][/COLOR][/CENTER]
                      [CENTER][SIZE=3][COLOR=#000000][B]ماشى فى نور الله بدعى و اقول .... يا رب[/B][/COLOR][/SIZE][/CENTER]

                      Comment

                      • #12
                        في زحمة الانترفيوهات اللي كنت باعملها كل يوم و التاني كنت عملت انترفيو في مدرسة في وسط البلد.. لغات برضه.. هو ما كانش انترفيو اوي.. هو كان امتحان في التدريس باللغة الانجليزي و شرح لقواعد اللغة. أختكوا عمرها اصلا ما مسكت طباشيرة و لا وقفت شرحت حاجة قدام حد آآآآآآآآبدا.. آخري كام عيل من عيال الجيران أشرح لهم حاجة ع الخفيف كده.. و اقلب

                        الامتحان بأه كان عبارة عن اننا كل المتقدمين محطوطين في فصل من الفصول و الكل قاعدة على الديسكات بما فيهم مشرفة اللغة الانجليزية في المدرسة و كله قاعد مبحلق للي واقف او واقفة بيشرح قاعدة من قواعد اللغة الانجليزية.. و طبعا المشرفة بتقيم.

                        طبعا مش محتاجة احكي ع اللي حصل.. المهم بس اني يومها أيقنت اني عمري ما هابقى مدرسة و لو بقيت هابقى مدرسة فاااااااااااااااااااشلة


                        اللي حصل اني جه الدور علية عشان اقوم اقول البقين.. و الكارثة انه قد سبقني ناس ذوو خبرة في التدريس و قاموا زي القرود شرحوا و كتبوا ع السبورة و آخر حلاوة
                        انا بأه قمت و بابص ع الناس و اواجه الجمهور حصلت لي لخبطة و دربكة و جيت أشرح قمت دخلت الباست بارتيسيبول في البريزينت كونتينيوس في قاعدة إف و كل حاجة دخلت في كل حاجة و لقيت نفسي باقول كلام انا نفسي مش فاهماه
                        طبعا النتيجة… صفررررررررررررررررر بالثلث.. و ده كان أسوأ امتحان ادخله في حياتي و قعدت بعدها شوية منبعجة.. مشرئبة الفلنكات :(

                        انما.. سبحان الله… ربنا مش بيعمل حاجة وحشة للبني آدم.. المدرسة دي كان لي معها فيما بعد شأن آخر :)




                        بعد الخيبة التقيلة السابق ذكرها رجعت تاني ألف في دايرة البحث عن المتاعب.. أقصد يعني عن الشغل و تناسيت الموقعة اياها خالص عشان اعرف ادور على شغل من غير إحباط.. بالرغم من ان معظم أصحابي في الوقت ده كانوا اشتغلوا و سبحان الله.. في الوقت اللي كنت مستعدة أقبل وظيفة ب 150 جنيه.. صحبتي الأنتيم كانت اشتغلت بمرتب 600 جنيه.. ليه؟ عشان هي خريجة مدارس لغات.. لأ و أيامها 600 جنيه بالنسبة لحد خريج جديد كانوا مبلغ.. سبحان الله.. ايامها كانت فتنة بجد و لكن الحمد لله ربنا نجاني منها.. و أكرمني آخر كرم. ساعتها استرجعت الآية رقم 53 من سورة الأنعام “و كذلك فتنا بعضهم ببعض ليقولوا أهؤلاء منً الله عليهم من بيننا أليس الله بأعلم بالشاكرين”فضلت كده لحد يوم 14 اكتوبر 1997 لما جالي اتصال من المدرسة اياها اللي امتحنت فيها الامتحان الفاشل ده و قالوا لي تعالي بكرة قابلي مس فلانة مشرفة اللغة الانجليزية في المدرسة.. رحت و قابلتها قالت لي انهم محتاجين حد في الكي جي و لو عايزة ابدأ من دلوقتي اهلا بية.. و المرتب 200 جنيه.. طبعا انا كنت خرمانة ع الآآآآآآآآآخر و هاموت على شغلة.. فقلت لها ابدأ طبعا.. انما كان لية مع المدرسة دي شأن آخر اسمحوا لي أدوشكوا بيها في الحلقة القادمة بإذن الله:)

                        Comment

                        • #13
                          يا علا بصراحة إنتى مالكيش حل فى أسلوبك , بيشد اللى يقرا موضوعك ويقعد مستنى "الكمالة" قصدى البقية.
                          تقريبا اللى حكتيه ده نفس اللى حصل مع كتير مننا
                          فكرتينا بالذى مضى , أصل أنا خريج هندسة دفعة 98 ......يااااااااااه تاريخ
                          [size=3][color=blue][b]م/ محمد عبدالمعز
                          اللهم إني أتخذ عندك عهدا لا تخلفنيه , فإنما أنا بشر .... فأي المؤمنين آذيته أو سببته أو قال لعنته أو جلدته..فاجعلها له زكاة وصلاة وقربة تقربه بها إليك يوم القيامة
                          .[/b][/color][/size]

                          Comment

                          • #14
                            المشاركة الأصلية كتبت بواسطة m_aash مشاهدة المشاركة
                            يا علا بصراحة إنتى مالكيش حل فى أسلوبك , بيشد اللى يقرا موضوعك ويقعد مستنى "الكمالة" قصدى البقية.
                            هههههههههههههههههههههههههه
                            ايوووووووه ... انت جبت التايهه .... اسلوبها بالظبط زي اسلوب ابو طارق بتاع الكشري اللي في معروف .... تبقى قاعد مستني الكمالة بفارغ الصبر ...
                            ..................
                            معلش يا علا القافية تحكم ... والواحد جعان ... ودي ساعة غدا ...
                            [SIZE=5][COLOR=blue]يظن الناس بي خيرا وإني ... لأشقى الناس إن لم ترض عني[/COLOR][/SIZE]
                            [SIZE=5][COLOR=blue]ومالي حيــلة إلا رجــائي ... وعفوك إن عفوت وحسن ظني [/COLOR][/SIZE]
                            [SIZE=5][SIZE=3][COLOR=black]محاسب / احمد ابراهيم [/COLOR][/SIZE][/SIZE]

                            Comment

                            • #15
                              فى إنتظار بقية الحلقات

                              Comment

                              السابق 1 2 3 4 5 6 7 9 template التالي
                              Working...
                              X