أول سنة حياة وظيفية - سيرة ذاتية

[OlaOsman]

اسلوبك حلو اوى انا قرات لك موضع الدرج وده تانى موضوع على فكرة انتى بتشدنى اوى ولازم تفكرى فى محاولة الكتابة حتى لو قصص وراى ان سر التشويق فى اختيارك وقت انتهاء كل حلقة على العموم ربنا يكرمك خصوصا انك شخصية محترمة وعندى سؤال ؟ شركتك فى الزمالك

شكرا جزيلا

لأ الشركة في المهندسين مش في الزمالك.

[Chicco]

إيه ده سيزون تو ابتدى و أنا مش واخد بالي ......أنا متابع أهو .......المنتدى في الأنتظار يا علا باشا

[OlaOsman]

الشغل مع الأجانب..

بعد حوالي 9 سنين شغل مع ناس أجانب أقدر ألخص ميزات العمل معاهم بإنه علمني الوضوح و الصراحة.. الإتقان في العمل و التفاني فيه.. الشغل بنظام حقي و حقك.. احترام في التعامل.. المباشرة في الأمور و عدم خلطها ببعضها.. و على رأي الخواجات.. بزنس إذ بزنس خبيبي

الأجانب فيهم حيوية دائمة لا تنطفئ.. المصريين أيام بييجوا مرهقين.. مش نايمين.. مخستكين.. مختسعين.. و بنبقى خلاااااااااااص.. بننام ع المكاتب و مالناش اي نفس للشغل.. انما عمري ما شفت واحدة من الأجنبيات اللي عندنا فاقدة حيويتها او رغبتها في الشغل.. زي النحل بيلفوا في الشركة بلا كلل او ملل.. طبعا ده مش حسد.. د قر و نق دكررررررررررررر

مش بيتنرفزوا بسرعة الأوروبيين عموما و لا عواطفهم غالبة على عقلهم.. عمري ما لاحظت ان واحدة من اللي اشتغلوا معانا سريعة الغضب.. و لا غضيبة السرع :p
لما بيغلطوا بيعتذروا على طول.. و مافيش فرق بين مديرة و غفيرة (ساعي يعني او موظف).. لو عندهم اي ملحوظة على شغل حد او سلوك حد.. عمرهم ما يوجهوا حد قدام حد.. او يحرجوا حد قدام حد.. الكلام يبقى في مكان منفصل و من غير ما حد ياخد باله.. مش باقول لكوا محترمين.

معاملة المصريين مع الأجانب غير خااااااااااالص المصريين مع المصريين.. بيتعاملوا مع الأجانب كإنهم آلهة.. لا ترد لهم كلمة و ما بيغلطوش.. و ده للأسف ادى الأجانب ثقة زايدة عن اللزوم.. يعني مثلا اول ما اشتغلت سكرتيرة في الأول خالص كان الكانديديت من دول (اللي مقدم السي في عندنا و عنده انترفيو مع واحدة من الأجانب) يفضل مستني بالنص ساعة و كل شوية يسألني هي فين اللي هاتقابلني؟ و هو لسه فاضل كتير؟ و دي مش طريقة دي
انا أقول بس.. ربنا يستر على اللي هاتقابله.. دي أول ما تدخله اكيد هايديها كلمتين في اجنابها عن احترام المواعيد و يمشي صافعا الباب وراءه

أقوم بأه أراقب الموقف.. الاقيها أول ما تدخل و تقول له سوري على التأخير ابص الاقي الابتسامة الواسعة ملت وشه و بيقول لها نو بروبلم
نو بروبلم للأجنبية يا أفندي و انا لية البرطمة و التجرمة؟

بس همه الصراحة مش بيتأخروا على الكانديدتس كتير.. يعني مش بتحصل كتير.. بس مرة حصلت و واحدة منهم اتأخرت على كانديديت تلت ساعة فقام مشي و قال للسكرتيرة قوليلها ان انتوا المفروض شعب بيحترم المواعيد.. و احنا كمان.. عشان كده انا مش هاقدر استنى اكتر من كده
ساعتها قلت في نفسي.. هو ده المصري.. ما يقبلش الذل و لا الهوان.. واد شارب من نيل مصر بجد
يعني.. كنت صغيرة بأه و كده :p

فاصل ونعود حالا عشان نكمل كلام

[OlaOsman]

اتعلمت ايه تاني من الأجانب؟ اتعلمت لما اوعد ما اخلفش.. و إلا ما اوعدش.. و دي للأسف عندنا في دينا اصلا.. بس همه بيعملوها صح اوي و مش بيتهاونوا فيها.. لما أدي معاد لعميل هابعت له فيها سي فيهات، يبقى لازم التزم بيه.. أقطع نفسي حتت.. اعمل شقلابظات.. عجين الفلاحة.. أسهر في الشغل.. انما طالما قلت له يوم الحد الحاجة هاتكون عندك يعني يوم الحد لازم تكون عنده.. مافيش هزار

و لو الدنيا اتقلبت و خلاص هاموت و مش هاينفع ابعت له الحاجة يوم الحد يبقى ابعت له ايميل او اتصل بيه اعتذر له اني مش هاقدر و ادي له معاد تاني و التزم بيه.. همه مش بيحبوا الحاجات العايمة و الكلام اللي يحتمل اكتر من معنى و الغير محدد.. مش هاتقدر تعمل الحاجة الفلانية قول لي مش هاقدر.. هاحترمك و اتعامل معاك تاني لما احتاجك.. انما تقول لي آه و حاضر و من عينية و انت تؤمر يا باشا و 5 دقايق و كلام من ده و انت عارف انك مش هاتعمله و لا هاتمد ايدك في الشغل يبقى تاخد فوق دماغك و عمرهم ما يتعاملوا معاك تاني

بالرغم من كده عندهم مرونة في التعامل.. بيدوا فرصة و اتنين و تلاتة و يلتمسوا الأعذار و يقيموا الأمور بطريقة عقلانية و ما ياخدوش العاطل بالباطل و لا عندهم مبدأ المساواة في الظلم عدل.. المخطئ ياخد عقابه و المحسن ياخد ثوابه.. مافيش محاباة و لا محسوبية و لا واسطة في الشغل.. و بصراحة مش بيضيعوا وقت الشغل زينا.. يعني وقت الشغل للشغل.. اما الحاجات الشخصية فبتكون في حدود ضيقة.
طبعا اتعلمت منهم العنجليزي

الحمد لله عوضت النقص اللي كان عندي من تخرجي من مدرسة عربي و معاملتي معاملة السود في أمريكا ايام العبودية
في أول الشغل كنت باعمل أخطاء عبيطة طبعا، مرة في اول ايام شغلي خالص كتبت فاكس على الكمبيوتر و مودياه للمديرة عشان تمضيه.. طبعا هي بتقراه لقتني كاتبة رقم اتنين كده tow طبعا دي فضيحة بجلاجل.. بص شوف خريجة مدارس الحكومة اهيه
طبعا هي لفتت نظري برفق و خلتني صلحتها.. بس انا ساعتها كنت في نص هدومي اصلا

خلال سنين شغلي معاهم حرصت على اني اتعلم منهم اللغة مظبوط.. مع ان كان فيه 3 من انجلترا في وقت واحد، إلا ان اللكنات مختلفة تماما.. يعني اللندنيين غير بتوع الريف.. زي عندنا كده، قاهريين و صعايدة و دلتا و سواحلية، طبعا حاجة تلخبط لإني كنت حريصة اني اتعلم النطق الصحيح، فركزت في التلقي مع صاحبة الشغل لإنها من لندن و الباقي ركزت معاهم على التواصل الصحيح و حاليا معانا واحدة من اسكتلندا و واحدة من هولندا و لسه السنة اللي فاتت كانت معانا واحدة من بلجيكا، يعني ناقص نحط علم الاتحاد الأوروبي جنب يافطة الشركة

طبعا مش معنى كلامي ده عن الأجانب انهم ملايكة و ما بيغلطوش و مافيش احسن منهم و برقية المصريين و الكلام اللي مالوش معنى ده. طبعا همه ليهم أخطاؤهم و تجاوزاتهم و هناتهم.. بس يمكن العقلانية و الاحترام اللي غالب على تصرفاتهم بيغطوا على الحاجات التانية.

اما عن الأجانب و الإسلام فده موضوع طويل الخلاصة فيه ان الأجانب مش مشكلتهم المسيحية و الإسلام.. مشكلتهم هي اقتناعهم بعدم احتياجهم لدين اساسا يقول لهم الصح و الغلط و شايفين ان ده نابع من جواهم.. يعني هي مدركة تماما انها غلط انها تسرق فمابتسرقش.. غلط انها تكدب فمابتكدبش.. غلط انها تخون.. فما بتخونش.. و هكذا. واحدة منهم من كام سنة كانت بتقول لي انها مش محتاجة كتاب يقول لها اعملي و ما تعمليش.. الحاجات دي بتبقى نابعة من جواها هي (طبعا و ده ينطبق على الإنجيل و القرآن و التوراة و اي دين عموما) أضف الى ذلك ما يسمعوه من وسائل الإعلام من الإرهاب المرتبط بالإسلام.. طبعا دع غير سلوك المسلمين اللي سواء في مصر او غيرها العنيف الهمجي في التعامل مع الأمور. و كله كوم و موضوع المرأة و معاملة الإسلام للمرأة ده كوم تاني.. حاجة عاملة لهم هسهس بجد. طبعا بنحاول على مر السنين نصحح الصورة دي و نقنعهم ان مش هو ده الاسلام بسلوكنا احنا كمسلمات معاهم مرة و بالكلام المحسوس مرة أخرى و هكذا.. انما المردود ضعيف و الاستجابة بطيئة و الموضوع معقد بالفعل.

[Ramy_Tantawi]

أسجل اعجابي مره تانيه يا علا باشا في الموضوع اللي بجد مفيد لي جداً على الجانب الشخصي الانساني واسمحيلي احقاقاً لحقك اقول لحضرتك بعض من الدروس المستفاده حتى الان.


1- كلامك كله لغاية دلوقتي الحمد لله مافيش فيه كوارث ومصائب الحمد لله يعني مفيش من يتآمر على زميله الموظف ولا على زميله اللي لسه متخرج ويعمل ما في وسعه ان يضلله عشان ماياخدش فرصته والكلام ده اللي كتير باسمعه ........دائما ما تجدي العون في يد ناس ربنا سبحانه وتعالى باعتهم ليكي عينة مدير المدرسه جزاه الله خير واكثر من امثاله.عاوز اقول ان سبحان الله الواحد فعلاً لو اخلص نيته لله سبحانه وتعالى وتوكل على الله حق توكل ربنا سبحانه وتعالى هايزلل ليه كل ما هو صعب على يد بشر وعلى يد اي مخلوق في الارض مسير مخصوص لمساعدة العبد المتوكل على الله سبحانه وتعالى.

2-الفرص كتير وعاوزه تتحسب بهدوء واستخارة المولى سبحانه وتعالى مره واتنين وتلاته وعشره كتير باقعد افكر هو فين الشغل اللي قدامي ده ؟ فين الوظايف ؟ فين الشركات ؟ لكن اتعلمت ان الواحد طول ماهو قاعد يقول فين ومش لاقي عمره ماهيلاقي ! وكتير فرص بتضيع من الواحد بسبب تدخل شوشو على رأيك في دماغ الواحد واكاد اجزم والله العظيم ان تخلليكي لا سمح الله عن مبدأ من مبادئك الساميه والمحترمه وليكن موضوع الاستايل في اللبس كان ممكن يكون سبب أساسي في ضياع فرصة العمل اللي حضرتك لا تزالي فيها وربنا يديمها عليكي نعمه يارب .....الدرس المستفاد عندي شخصياً انا مش عارف ليه حاسس ان مفروض اشتغل هنا جوه البلد مش بره البلد مش موضوع جميل بلدي عليا والكلام الكبير ده لئني اساسا عشت اكتر من نص عمري خارج البلاد لكن اشعر ان امي ليها حق عليا وزوجتي ان شاء الله ليها حق واختي وعيلتي وناس كتير مفروض اكون انا هنا بجانبهم مش في بلد تاني ........ أدعي ان ده مبدأ عند العبد لله أو نسميها أولويه .........سبحان الله لاعتقادي وايماني بالموضوع ده فرص العمل المتاحه لي خارج مصر مش داخل مصر وغالباً برضه هو نوع من الابتلاء انت لازم تختار وتتحمل اختيارك وكل ما تتعب في التفكير وانتقاء خيار مما هو متاح كل ما يطلع اختيارك سليم بإذن الله وسرعان ما تكتشف ذلك بنفسك .

3-مايصحش الواحد يكون عنده عقده نقص مش قصدي حضرتك لكن اصل انا كمان خريج مدارس عربي وجامعه عربيه حكوميه وكتير من الهزار الموجه لي يقولك خريج التعليم المجاني وكانت اول صدمه لي في تقديم ورقي في جامعة عين شمس من سنوات كان مجموعي وقتها 93 % على ما أذكر او اكتر والله كان نفسي ادخل تجاره عنجليزي عين شمس مش عارف ليه المهم التجاره اقسامها عربي او انجليزي او فرنسي ده تنسيق جوه تنسيق المهم دخلت التجاره والتنسيق الداخلي استثنى العبد الفقير الى الله من ان ينال شرف الانضمام لي قسم الانجليزي وكانت العله وبكل بجاحه اصل انت خريج مدارس عربي وعلى فكره الكشف كان نازل ومقبول فيه ناس اقل مني مجموعاً بس خريجي مدرسة @$@$########$ مش عارف ايه..... المدارس اللي كلها بتنتهي بحرف سييي مش عارف لييه :p المهم قدر الله وماشاء فعل وبقيت دلوقتي خريج تجاره عربي والحمد لله على كل شيء.الدرس المستفاد هو ان من يحتسب ده عند ربنا سبحانه وتعالى ربنا هايكافؤه خير مكافأه وجزاء ان شاء الله والدليل ان سبحان الله مع حضرتك لقيتي معارضه كتيره من ناس انك مدارس عربي ويشاء ربنا سبحانه وتعالى انك تعللمي الناس الانجليزي بعد شهر او اتنين !! وبعد ده ببعض شهور تشتغلي في مكان رئيسته انجليزيه !! هو درس خلاني اتفاءل الحمد لله واعزز ثقتي في نفسي بعد ثقتي في ربنا سبحانه وتعالى بالطبع.


كفايه دروس مستفاده لغاية كده عشان ماصدعكوش لكن انا لقيت التجارب الحيه من شخص محترم زي حضرتك يا استاذه علا طالما قررتي مشاركتنا اياها فمن واجبنا او واجبي انا ان اوضح ما استفدت منه وجزاكي الله كل خير وجعله في ميزان حسناتك ان شاء الله يا رب العالمين.

حاجه أخيره .....................انا حامل هم الموضوع ده ينتهي لذا رجاء لو حسيتي انك هاتخمينا في الاحداث الباقيه وتقولي بح خلاص كده ياجماعه قوموا روحوا خدي اجازه او استني شويه لغاية ما تفتكري حاجات تاني وتحكيها :p

آه كمان حلوه اوي موضوع شلوت سعادتك دفعه للأمام دي :p

آسف على الاطاله .

[OlaOsman]

إيه ده سيزون تو ابتدى و أنا مش واخد بالي ......أنا متابع أهو .......المنتدى في الأنتظار يا علا باشا

آه على فكرة يا شيكو الحلقات الجديدة دي مش موجودة في المدونة.. قول بأه لكريم منير و نهى ييجوا يتابعوها هنا :)

[tamohsen]

هييييييييييييييييييييييييييييييييييييييييه
شدي حيلك
السيزون الجديد هيبدأ

علي فكره المدرسه دي كانت مدرستي وانا صغير
وفعلا احسن مدرسات فيها كانو بيدرسوا لكي جي
علشان صغيرين وعندهم حماس
لكن بتوع ابتدائي اجارك الله
نصهم خريجي دبلومات ولا يصلحو حتي يكونو موظفين

[mas_shine]

ما شاء الله حلو جدااااااااااااااااااااااااااااااااا
بجد الموضوع شدنى لدرجة انى قريتة كلة مرة واحده
أسلوبك هايلة
اما بقى النقطة المحورية فى موضوعك (على رأيك ) هى
ان موضوعك بجد بيدعوا للتفائل والسعى وعدم الاستسلام....وبجد ده ناس كتير محتاجه
وربنا يجازيكى خير
وانا شخصياً أستفدت
ومتابعة معاكم

[ehabradwan]

احييك يا علا على الموضوع الجميل ده
بس انا ليا اعتراض واحد بس على كفائة الاجانب في الشغل
انا شغال في شركة multinational وبتعامل مع اجانب طول الوقت
ومش هتصدقي ان اللي مبوز الشغل الاجانب و اللي بيلحق الدنيا قبل ما توقع دايما المصريين
بجد والله الناس دي احنا مدينهم اكتر من حجمهم بكتيير
الكلاد ده هتحسي بيه اكتر لو روحتي training مثلا او جالك mission بره مصر وكان معاكي جنسيات مختلفة في مكان واحد لفترة طويلة
انا كنت في training وكان معايا روسي وبرازيلي وهندي وباكستاني وسوداني و عراقي و جنوب افريقي و سريلانكي يعني جنسيات من كل حتة
والحمدلله العبدلله اقطعهم كلهم في كل الامتحانات

[hamedo0]

احييك يا استاذه علا على الموضوع الجميل ده
فين باقي الحلقات

[TIMODAX]

آه على فكرة يا شيكو الحلقات الجديدة دي مش موجودة في المدونة.. قول بأه لكريم منير و نهى ييجوا يتابعوها هنا :)

ايه ده هوا فيه مدونه كومممان
طب ممكن لينك

[OlaOsman]

أسجل اعجابي مره تانيه يا علا باشا في الموضوع اللي بجد مفيد لي جداً على الجانب الشخصي الانساني واسمحيلي احقاقاً لحقك اقول لحضرتك بعض من الدروس المستفاده حتى الان.

و الله انا بانبسط جدا لما الاقي حاجة باكتبها بتكون مفيدة لحد :)
بس ممكن بلاش حضرتك دي؟

1- كلامك كله لغاية دلوقتي الحمد لله مافيش فيه كوارث ومصائب الحمد لله يعني مفيش من يتآمر على زميله الموظف ولا على زميله اللي لسه متخرج ويعمل ما في وسعه ان يضلله عشان ماياخدش فرصته والكلام ده اللي كتير باسمعه ........دائما ما تجدي العون في يد ناس ربنا سبحانه وتعالى باعتهم ليكي عينة مدير المدرسه جزاه الله خير واكثر من امثاله.عاوز اقول ان سبحان الله الواحد فعلاً لو اخلص نيته لله سبحانه وتعالى وتوكل على الله حق توكل ربنا سبحانه وتعالى هايزلل ليه كل ما هو صعب على يد بشر وعلى يد اي مخلوق في الارض مسير مخصوص لمساعدة العبد المتوكل على الله سبحانه وتعالى.

الحمد لله الجو عندنا في الشغل نقي جدا من أي مشاحنات أو غيرة زي ما هاوضح كمان شوية.. رغم اننا كنا 3 في نفس السن و طبيعة الوظيفة، انما كان و لا زال بينا كل حب و إيثار
و فعلا سبحان الله.. لما الواحد بيتوكل عليه وحده ربنا بييسر له أموره ويوقف له ولاد الحلال.

2-الفرص كتير وعاوزه تتحسب بهدوء واستخارة المولى سبحانه وتعالى مره واتنين وتلاته وعشره كتير باقعد افكر هو فين الشغل اللي قدامي ده ؟ فين الوظايف ؟ فين الشركات ؟ لكن اتعلمت ان الواحد طول ماهو قاعد يقول فين ومش لاقي عمره ماهيلاقي ! وكتير فرص بتضيع من الواحد بسبب تدخل شوشو على رأيك في دماغ الواحد واكاد اجزم والله العظيم ان تخلليكي لا سمح الله عن مبدأ من مبادئك الساميه والمحترمه وليكن موضوع الاستايل في اللبس كان ممكن يكون سبب أساسي في ضياع فرصة العمل اللي حضرتك لا تزالي فيها وربنا يديمها عليكي نعمه يارب .....الدرس المستفاد عندي شخصياً انا مش عارف ليه حاسس ان مفروض اشتغل هنا جوه البلد مش بره البلد مش موضوع جميل بلدي عليا والكلام الكبير ده لئني اساسا عشت اكتر من نص عمري خارج البلاد لكن اشعر ان امي ليها حق عليا وزوجتي ان شاء الله ليها حق واختي وعيلتي وناس كتير مفروض اكون انا هنا بجانبهم مش في بلد تاني ........ أدعي ان ده مبدأ عند العبد لله أو نسميها أولويه .........سبحان الله لاعتقادي وايماني بالموضوع ده فرص العمل المتاحه لي خارج مصر مش داخل مصر وغالباً برضه هو نوع من الابتلاء انت لازم تختار وتتحمل اختيارك وكل ما تتعب في التفكير وانتقاء خيار مما هو متاح كل ما يطلع اختيارك سليم بإذن الله وسرعان ما تكتشف ذلك بنفسك .

الشغل كتير و الله يا رامي.. البلد مليانة شغل، بس المهم الواحد ما يدورش على شماعة يعلق عليها تكاسله و ألاطته من انه يشتغل في وظايف ممكن ما تكونش لها صلة بدراسته و في مصر بأه الشماعات كتير.

3-مايصحش الواحد يكون عنده عقده نقص مش قصدي حضرتك لكن اصل انا كمان خريج مدارس عربي وجامعه عربيه حكوميه وكتير من الهزار الموجه لي يقولك خريج التعليم المجاني وكانت اول صدمه لي في تقديم ورقي في جامعة عين شمس من سنوات كان مجموعي وقتها 93 % على ما أذكر او اكتر والله كان نفسي ادخل تجاره عنجليزي عين شمس مش عارف ليه المهم التجاره اقسامها عربي او انجليزي او فرنسي ده تنسيق جوه تنسيق المهم دخلت التجاره والتنسيق الداخلي استثنى العبد الفقير الى الله من ان ينال شرف الانضمام لي قسم الانجليزي وكانت العله وبكل بجاحه اصل انت خريج مدارس عربي وعلى فكره الكشف كان نازل ومقبول فيه ناس اقل مني مجموعاً بس خريجي مدرسة @$@$########$ مش عارف ايه..... المدارس اللي كلها بتنتهي بحرف سييي مش عارف لييه :p المهم قدر الله وماشاء فعل وبقيت دلوقتي خريج تجاره عربي والحمد لله على كل شيء.الدرس المستفاد هو ان من يحتسب ده عند ربنا سبحانه وتعالى ربنا هايكافؤه خير مكافأه وجزاء ان شاء الله والدليل ان سبحان الله مع حضرتك لقيتي معارضه كتيره من ناس انك مدارس عربي ويشاء ربنا سبحانه وتعالى انك تعللمي الناس الانجليزي بعد شهر او اتنين !! وبعد ده ببعض شهور تشتغلي في مكان رئيسته انجليزيه !! هو درس خلاني اتفاءل الحمد لله واعزز ثقتي في نفسي بعد ثقتي في ربنا سبحانه وتعالى بالطبع.

أنا أول مرة أعرف حتة تجارة انجليزي ما تاخدش غير من خريجي مدارس اللغات.. ايه الطبقية دي؟
بس برضه ربنا ما بينساش عباده.

كفايه دروس مستفاده لغاية كده عشان ماصدعكوش لكن انا لقيت التجارب الحيه من شخص محترم زي حضرتك يا استاذه علا طالما قررتي مشاركتنا اياها فمن واجبنا او واجبي انا ان اوضح ما استفدت منه وجزاكي الله كل خير وجعله في ميزان حسناتك ان شاء الله يا رب العالمين.

جزاك الله خيرا عشان شاركتنا في الخواطر دي و ربنا يكرم الجميع يارب :)

[OlaOsman]

ايه ده هوا فيه مدونه كومممان
طب ممكن لينك

همه مدونتين، بس انا بطلت تدوين بقالي فترة مش عارفة ليه.. يعني ممكن تلاقي البوستس اللي هناك قديمة شوية.

http://olaosman.egyblogs.com/

http://washwashatola.blogspot.com/

[OlaOsman]

طيب.. نسيبنا بأه شوية من الأجانب و تعالوا نتكلم عن الأحوال داخل الشركة.. المكان لطيف و جميل و لذيذ و الأتموسفير هناك أسري جدا.. و ده اللي خلاني افضل مدة طويلة مش بافكر مجرد تفكير في اني اسيب المكان.. الناس هناك سواء مصريين او أجانب في منتهى الذوق و التلقائية و الطيبة، ابتداء من صاحبة المكان و انتهاء بالأوفيس بوي اللي بنعتبره أخ لينا اصلا مش اوفيس بوي.

بعد ما عرفنا وسام و ازاي سابتنا من سنتين و اشتغلت في مكان اكبر.. احب بس أذكر اننا بنشوفها بشكل يومي و بنشرب مع بعض الشاي بلبن بتاع كل يوم الصبح :)

الشغل في الشركة اللي بتشتغل فيها وسام بيبدأ الساعة 9 و احنا بنبدأ الساعة 8، و وسام ساكنة جنب زميلتنا اللي هي تالتة تلاتة (انا و وسام و زميلتنا) و شغل وسام جنبنا برضه فبتيجي معاها كل يوم بالعربية و تشرب معانا الشاي و نفضل نحكي و نشكي و نضحك و نهرج ييجي نص ساعة (الحمد لله بنعوضها آخر النهار شغل) و تنزل وسام شغلها و انا و زميلتنا التانية (عبير) نبدأ يومنا.. يعني كإن وسام ما سابتناش

لو في يوم صادفت و المديرة جت بدري شوية الصبح و قابلت وسام في الشركة بتفرح اوي و تفضل تتكلم معاها و معانا ييجي نص ساعة كمان و كل اللي ييجي بعد كده يشترك معانا في الحوار لحد ما نبقى لمة حريم عمالين نرغي و الأصوات تدخل في بعضها :p

ميزة الجو في الشركة ان في مصطلحات باسمع عنها من الناس برة بس عمري ما اتعرضت لها و الحمد لله في الشركة اللي شغالة فيها لمدة 10 سنين زي أسفنة.. نفسنة.. تسلق.. نفاق.. واسطة.. محسوبية.. غيرة.. حقد.. كل الحاجات دي الحمد لله ربنا عافى المكان ده منها و ده برضه اللي خلاني قاعدة في نفس المكان 10 سنين

ثواني و راجعة اتكلم عن الزملاء السابقين و الحاليين و ما زال في جعبتنا الكثير.. و الكثير

[OlaOsman]

من الأشخاص اللي عايزة اتكلم عنهم فعلا هو زميلنا السابق محمد.. محمد انضم للشركة سنة 2000 و قعد معانا سنة واحدة بس.. كان لسه متخرج جديد من جامعة في امريكا عشان هو طول عمره عايش هناك مع اسرته و لما رجعوا مصر رجع معاهم و بدأ يدور على شغل.. محمد شخصية مركبة جدددددددددا.. تحتار تحبها و لا تضحك منها.. بس المديرة كانت معجبة بشخصيته و ذكائه.. هو مهارته في البيع.. يتكلم معاك يبيع لك فكرته في ثواني.. انما لما جه يشتغل معانا اشتغل في ال recruitment فما حققش نجاح اوي عشان مش دي نقطة قوته.. سنة بالظبط و سابنا محمد و مشي.. لما سابنا كان عنده 25 سنة.. و بعد سنة كمان وصلنا الخبر.. مـــحـــمـــد مــــات

مات؟ بس هو ما كانش عيان.. هو جاله مرض؟ ابدا.. امال ايه اللي حصل له؟ أزمة قلبية.. هو كان عنده القلب؟ لأ.. امال ايه؟ أمـــر الله. طبعا اتصدمنا من الخبر.. و بكينا عليه.. و دعينا له بالرحمة و المغفرة.. الأجانب برضه زعلوا.. بس مش نفس نوع زعلنا عليه.. همه شايفين انه كان طيب و مش بيإذي حد و لا بيعمل حاجة وحشة في حد.. فأكيد ربنا مش هايعذبه يعني.. انما احنا اللي زعلنا اوي عليه و خلى الدموع تجري في عينينا مش الفراق لإنه كان سايبنا بقاله سنة.. احنا زعلنا عليه هو كمحمد و دعينا ربنا انه يتجاوز عن سيئاته و يرحمه بعدله و عفوه.. الله يرحمك يا محمد و يغفر لك و يرحمنا إذا صرنا الى ما صرت إليه

لسه فاكراه و هو ماشي في الشركة بالموبيل على ودنه.. و فنجان القهوة في ايده و السيجارة في نفس الإيد و بيشاور لي بالإيد اللي فيها الفنجان بصباح الخير