أول سنة حياة وظيفية - سيرة ذاتية

[AHMEDCAR]

بجد مجهود رائع بس المفروض تشوفى واسطه و تريحى دماغك

[hazem_khidr]

جزاكم الله خيرا على المشاركات و يا رب كل اللي مش لاقي شغل يلاقي :)

هاستأذنكوا بس الردود هاتبقى كل كام حلقة عشان التسلسل ما يضيعش :)

هو انا هنا كنت أقصد ان ردودي انا ع الناس هي اللي هاتبقى كل كام حلقة.. يعني انتوا شاركوا و علقوا زي ما انتوا عايزين و انا هجمع الردود كل كام حلقة :)

لا ماهو واضح فعلا من غير ما تفسري يا علا:biggrinjester:

[Ayman_Abdullah]

أنا حصلى عكسك تماما الأيام دى .....بالرغم من انى مدارس عربى برضه "التوفيقية "أكيد تعرفيها ... بس ماشاء الله عيكى و نعم الكفاح

[OlaOsman]

انا قريتها فعلا يا علا كلها لما حطيطي اللينكات بس معنديش مانع طبعا انى اقراها تانى معاكى يا قمر :)

تسلمي لي يا نهى.. دايما كده رافعة من روحي المعدنية

انا امبارح بظبط عدى عليا شهرين شغل :).

مبرووووووووووك.. منتظرينك كمان 10 سنين تحكي لنا عت تجربتك مع الحياة الوظيفية :)

انا امبارح يبقي عدا عليا 21 سنة الا 4 شهور عاطل

و هي المذاكرة و الدراسة دي مش شغل يا محمود؟ ده جهاد يابني في الأيام دي.

الموضوع ده جه علي الجرح:)

حاليا لسه متخرج من 26 يوم و بدور علي شغل برده:)

ربنا يوفقك يا رب للشغل الكويس و عموما تابع الحلقات يمكن تستفاد حاجة في فترة البحث عن وظيفة اللي انت بتمر بيها دلوقتي دي.. و عموما بعيدا عن حلقات أوشين اللي انا مصدعاكوا بيها دي لواحتاجت مني أي حاجة انا موجودة :)

انا حاسس اني قريت الموضوع ده قبل ذالوكا ....
اعتقد في كتاب كفاحي .... بتاع عثمان احمد عثمان ... هو انتي اسمك علا عثمان إيييه ...؟؟؟
اوعي تكوني علا عثمان احمد عثمان
بجد بقى ..
الكفاح بعد التخرج متشابه لحد كبير .... لكن كله في الآخر كفاح
لكن لما يبقى الكفاح ده من بنت .... في مجتمع ذكوري زي مجتمعنا ...... بصراحة يبقى يستحق التحية

أيوه.. انا فعلا قريبة عثمان أحمد عثمان.. بدليل اني رجلية حفيت في التدويرعلى شغل

هو الموضوع ما وصلش لقصة كفاح يعني.. دول همه شهرين اللي دورت فيهم على شغل، بس فعلا كانوا تقال علية اوي و الحمد لله على نعمه التي لا تعد و لا تحصى :)

[OlaOsman]

متابع باهتمام

جزاك الله خيرا على المتابعة :)

يا علا بصراحة إنتى مالكيش حل فى أسلوبك , بيشد اللى يقرا موضوعك ويقعد مستنى "الكمالة" قصدى البقية.
تقريبا اللى حكتيه ده نفس اللى حصل مع كتير مننا
فكرتينا بالذى مضى , أصل أنا خريج هندسة دفعة 98 ......يااااااااااه تاريخ

ربنا يكرمك يا رب و يجزيك خير :)
حلوة موضوع الكمالة ده.. آديك أثرت شهية احمد ابراهيم و خليته يتخيل الموضوع طبق كشري

فى إنتظار بقية الحلقات

في الطريق ان شاء الله :)

بجد مجهود رائع بس المفروض تشوفى واسطه و تريحى دماغك

مش فاهمة

لا ماهو واضح فعلا من غير ما تفسري يا علا:biggrinjester:

انا قلت برضه أوضح احسن لا يكون كلامي مش واضح :)

أنا حصلى عكسك تماما الأيام دى .....بالرغم من انى مدارس عربى برضه "التوفيقية "أكيد تعرفيها ... بس ماشاء الله عيكى و نعم الكفاح

طبعا أعرفها.. بس حصل لك عكسي تماما ازاي؟
جزاك الله خيرا على التشجيع :)

[Chicco]

طب إيه رأيك بقى في اللي ما أقدرش يقعد في وظيفة غير ١٠ سنين بالظبط بعديها ساب القارة كلها و سافر (أنا خريج ٩٥ و جيت كندا ٢٠٠٥ )

مع اني قريت الموضوع ده قبل كده انما بجد عايز اقراه تاني و تالت .....مليان أحداث و مفاجات و دروس (بعمل تشويق للي ما قرهوش:)) و أحلى حاجة فيه اسلوبك في الكتابة بجد ربنا يبارك لك :)

[OlaOsman]

مع اني قريت الموضوع ده قبل كده انما بجد عايز اقراه تاني و تالت .....مليان أحداث و مفاجات و دروس (بعمل تشويق للي ما قرهوش:)) و أحلى حاجة فيه اسلوبك في الكتابة بجد ربنا يبارك لك :)

شهادة أعتز بيها من أخ عزيز.. جدا :)

[OlaOsman]

و اشتغلللللللللللللللت

و اشتغلللللللت


رحت يوم 15 أكتوبر عشان أستلم الشغل في كي جي مدرسة لغات بوسط البلد.. المدرسة صغيرة طبعا عشان مكانها بس كانت في شارع من أروق شوارع وسط البلد عشان كان قدامها ضريح سعد.. يعني تعتبر حتة فاضية نسبيا بالمقارنة ببقية وسط البلد. معظم الطلبة كانوا من المنيرة.. السيدة زينب.. وسط البلد.. شبرا و قليلين اوي من غير المناطق دي. أصحاب المدرسة عبارة عن ناس شيك و ولاد ناس اوي.. الأب و زوجته الحاجة الأمورة اوي.. و ولادهم 3 الكبير هو اللي بيدير المدرسة فعليا و والده كان بيديرها في الواجهة بس.. و بالمناسبة الكبير ده دلوقتي عضو مجلس إدارة في النادي الأهلي.
الأصغر منه د. فلان و هو اللي ماسك دار النشر اللي صاحبها نفس الصخص اللي فوق ده و الصغير مش فاكرة عنه حاجة اوي.


مبنى الكي جي مستقل عن باقي مباني المدرسة و مصمم بحيث يناسب الأطفال الصغار.. أيامها كان كي جي1 من سن 3 و نص يعني صغننين خالص


مدير الحضانة كان لسه متعين قبلي بيوم واحد.. انما كان انسان بصراحة.. ما يتكررش كتير ان واحد يقابل حد زيه في حياته العملية.. اما الزميلات فدول حكايتهم حكاية.. بس ندخل الأول في تفاصيل أول يوم شغل عشان ده كان يوووووووووووووم

رحت أول يوم.. أخدتني المشرفة على اللغة الانجليزية بالمدرسة و عرفتني بمدير الكي جي اللي رحب بية و أخدني للفصل و سابني مع الأطفال .. حوالي 30 طفل في الفصل.. قاعدين مع المشرفة عشان مافيش مدرسة ليهم.. المدرسة اللي بدأت معاهم السنة جالها شغل في شركة و سابت المدرسة من غير نوتيس و عشان كده استنجدوا بية ألحقهم (ده اللي عرفته بعد كده). دخلت الفصل كلهم في سن 3 سنين و نص و 4 سنين.. كلهم تقريبا بيعيطوا و عايزين ماماااااااااااااااااا :(

أختكوا بأه أول مرة تدخل فصل.. أول مرة اتعامل مع أطفال.. آخري كان ابن اختي اللي ايامها كان عنده سنتين و اول ما يعيط أخلي مسئوليتي منه تماما
انما طبعا الواحد لما يتحط في التجربة بيبقى واحد تاني خالص اللي هو عارفه. الصراحة انا مش فاكرة عملت ايه في اليوم ده و لا سكتت العيال ازاي و لا شغلتهم في ايه و لا اليوم ده عدى ازاي.. انا كل اللي فاكراه اني روحت اليوم ده ما نطقتش في البيت بولا كلمة.. اتغديت في صمت و دخلت انام شوية.. فاكرة كويس اني كنت بحاول انام انما دماغي فيها دوشة و عيال و عياط و ماماااااااااااااااا و هانروح امتى يا ميس؟

طبعا ما عرفتش انام خالص و قمت و دماغي فيها فكرة واحدة بس أو جملة واحدة بس بتتردد فيها بزن مش طبيعي: انا مش رايحة المكان ده تاني.. انا مش هاروح الشغل بكرة.. انا مش رايحة تاني.. مش هاروح تاني.. مش هاروح تاني..

[Mohamed-Saoud]

ايه معنى التوقيع بتاعك ده؟؟ انت فتحتي جامعة خاصة و لا ايه؟ :)

[OlaOsman]

ايه معنى التوقيع بتاعك ده؟؟ انت فتحتي جامعة خاصة و لا ايه؟ :)

كليك على التوقيع و انت تعرف معناه ايه :)

[ehab08]

لأ لأ لأ
ما ينفعش كده
من فضل حضرتك كفايه تشويق
أنا عاوز أعرف الموضوع كله مره واحده
نظام الحلقات ده متعب
أنتى الأحسن تاخدى أجازه يوم من الشغل وتكتبى الموضوع كله مره واحده

بس بصراحه كالعاده متفرده فى مواضيعك

[OlaOsman]

لأ لأ لأ
ما ينفعش كده
من فضل حضرتك كفايه تشويق
أنا عاوز أعرف الموضوع كله مره واحده
نظام الحلقات ده متعب
أنتى الأحسن تاخدى أجازه يوم من الشغل وتكتبى الموضوع كله مره واحده

بس بصراحه كالعاده متفرده فى مواضيعك

جزاك الله خيرا على التشجيع :)

ان شاء الله مش هاطول في الحلقات.. بس هي برضه دي ليها طعم تاني أحلى من رزع القصة كلها مرة واحدة ممكن الناس تمل :)

[OlaOsman]

طبعا طبعا طبعا.. رحت الشغل تاني يوم.. رحت و كلي امل ان النهاردة يكون احسن من امبارح.. بس نفس السيناريو حصل.. الولاد معظمهم بيعيط و عايز ماما.. و كل واحد ليه طقوس معينة في العياط و الزن.. يوسف مثلا مش بيدخل الفصل كده على طول الصبح زي الناس.. لازم والده يطلعه بنفسه.. و يقعد معاه شوية في الجاردن (مكان كبير كده بيودي ع الفصول و مفروش موكيت اخضر و فيه مراجيح و آخره الحمامات) و بعد ما يقعد معاه و يحاول يقنعه انه يدخل المعتقل (اللي هو الفصل يعني) يكون عدى نص ساعة تقريبا من الحصة الأولى.. و طبعا على ما بيدخل بيكون فضح الدنيا.. ابي ابي ابي (أصل والده كان ملتحي و والدته منتقبة و ما شاء الله في غاية الذوق و الاحترام و الرقي)
ما علينا.. شكلي هافرد للملحوظة دي بوست لوحده.. انما دلوقتي خلينا في يوسف.. لا حظت كمان ان والده كاتب اسمه في الكراسة بالانجليزي Yousuf يعني الإسم كما أٌنزل :)


آه بالمناسبة.. افتكروا اسم يوسف ده كويس عشان هايبقى لية معاه شأن آخر فيما بعد ان شاء الله
اللي كان بيحصل مع يوسف ده كان طقوس يومية.. لحد ما انا بأه بدأت آخد ع المكان و افتكر اني مدرسة و مهمتي هي اني أعود الطفل ده كمان على المكان و على زمايله و بدأت أخده من والده و أحببه في الفصل و الناس و العيشة و اللي عايشينها :D


ده كان يوسف.. اما سارة بأه فهي من 8 صباحا و حتى 2 بعد الظهر و هي في بكاء بلا انقطاع.. بتريح بس وقت البريك و وقت الأكل.. غير كده هي بتزن.. بتزن.. بتزن بلا رغبة في التوقف و بلا سبب محدد في أحيان كثيرة.. حبا في الزن و استمتاعا به مش اكتر


طبعا مش هاحكي لكوا على العيال واحد واحد.. انما دي بس عينة من الولاد اللي كانوا عندي.. طبعا كان فيه أطفال تانية كانوا بيروحوا حضانة من سن سنتين و أصغر فكانوا متعودين على جو الحضانات و البعد عن الأم فترة طويلة.. دول بأه اللي بدأت اتواصل معاهم و من خلالهم بدأت اتواصل مع البكائين الزنانين الآخرين.

الفصل اللي انا أخدته كان كي جي وان لغات، حيث الانجليزي هو اللغة الأولى للتعامل.. و مدرسة الفصل هي مدرسة الانجليش و الماث (اللي هي انا) بعكس فصول العربي اللي كانت مدرسة الفصل هي مدرسة العربي و الحساب.. انا كنت مدرسة فصل لكي جي وان و مدرسة انجليزي لفصل تاني كي جي تو و دول طبعا الحمد لله أكبر سنا و عقلا من كي جي وان و زيرو زن و عياط و شغل العيال بتوع الولاد الصغيرين دول


طبعا حاولت أعود الولاد على الحضانة.. دراسة حبة صغيرين و حواديت كتير و أناشيد كتير و هزار لحد ما الحمد لله اتضحت الملامح الرئيسية للحياة المدرسية.. بمرور الشهور بدأ الولاد ياخدوا ع الوضع.. لأ و ايه كمان؟ يحبوا المدرسة :)


يوسف اللي كان بيدخل الفصل بعد محايلة بأه يطلع الفصل لوحده و يدخل الفصل و هو بيشاور بإيده دود مورنيد ميس (دي اللي هي جود مورنينج طبعا)
اما سارة فبقت تضحك.. تصوروا.. سارة بتضحك.. هي طبعا لحد ما سبت المدرسة كانت برضه ام لمس.. انما ما بقتش تعيط اول ما تدخل الفصل
قضيت في المدرسة دي 9 أشهر بالتمام و الكمال.. اتعلمت فيهم حاجات كتير.. اتعلمت الصبر.. و النظر إلى الجانب المشرق من الأمور دوما. طبعا حصلت مني أخطاء أول مرة شغل.. بس المشكلة ان الخطأ و انا باشتغل في مدرسة.. يختلف تماما عن الخطأ و انا باشتغل في شركة.. في الشركة آخري ايه في نتيجة خطأي؟ ضياع ورقة؟ لخبطة في معلومة ما.. انما في المدرسة الخطأ بأذى طفل مافيش كلام

[Karim_Monir]

ياااا يا علا انا قريتها كلها من كام شهر فاكرة
بس نقراها تاني
منورة الاجتماعي يا علا
انا شهر 6 2008 تميت 8 سنين في المطحنة اللي اسمها ABB
شركة واحدة من بعد التخرج حتى الان بس لفيت جواها في كذا شركة وكذا قطاع
اصلي شخصية ملولة محبة للتغير بشدة وده اثر بالسلب زمايلي بقو احسن من ي بس مش مهم المهم اني بتعلم كل يوم حاجة جديدة
لاني بكرة الروتين جداااااااااااااااااااااااااااا
كملي يا علا متابعين وكولونا (شوفتي كولونا دي) اذان صاغية منصتة

[OlaOsman]

مواقف منيلة

من المواقف الصعبة اللي قابلتني اني في مرة من المرات ببساطة جدا نسيت طفل في الحضانة و مشيت


لما قرب ميعاد المرواح يوسف قال لي انا رايح التويلت يا ميس.. قلت له روح بس خد الدادة معاك.. و نسيت تماما أمر هذا الطفل و في ميعاد المرواح نزلت و أخدت الباقيين معايا من اللي لسه أولياء امورهم ما جوش خدوهم و نزلتهم تحت عند الدادة اللي بتقعد بيهم و مشيت

تاني يوم لما جيت الصبح لقيت مدير الحضانة عايزني.. خير يا مستر فلان.. حكى لي بأه القصة.. والدة الطفل يوسف جت عشان تاخده ما لقيهوش مع الدادة اللي معاها الولاد.. طيب فين يوسف؟ قالت ما شفتوش.. بيدوروا عليه هنا.. هناك.. عند الأمن قال لهم مافيش طفل كي جي خرج لوحده أبدا و إلا ما كنتش هاسيبه يخرج أصلا.. المهم قلبوا الدنيا و في الآخر لقوه في الحمام


أموت و اعرف الواد ده كان بيعمل ايه الوقت ده كله في الحمام؟


الحياة بعد كده بدأت تمشي بريتم هادئ نوعا ما.. و لا تخلو طبعا من نقد هنا او هناك من زميلة.. مديرة.. او ولي / ولية امر.. انما كله بيعدي و كله بيدي خبرة للواحد الصراحة لا أنكرها.

في أول شغلي خالص كنت مش ملاحقة ادي الواجبات لكل العيال و اصححها لهم عشان الكي جي شغلهم غير الدراسة كتير.. من هدهدة اللي بيعيطوا.. مصالحة المأموصين.. شغلهم بحدوتة او غنوة.. عايز اشرب يا ميس.. عايز اروح الحمام يا ميس.. طبعا مش بيعرفوا يستعملوا المناديل لما يكون عندهم برد.. فطبعا الميس هي اللي بتساعدهم في الامور دي كلها


كان اللي بيديني الكراسة أصحح له الهوم ورك كان بها.. و اللي بينسى او يطنش انا اصلا مش باركز مين اللي عمل الواجب و مين لأ.. فكان في ولد اسمه مهند.. الظاهر ان اهله بيسهروا و لا ايه و يسهروه معاهم.. المهم كان بييجي المدرسة ينام
و انا طبعا مرتاحة من دوشته و سايباه نايم
طبعا المحصلة العلمية في الآخر كانت صفر.. و فوجئت في يوم من الأيام بوالدته عند المدير بتطالب برأسي
و انا بأه اللي هو فيه ايه؟
طبعا المدير الله يكرمه قعد معاها و هداها و وعدها بإن الأوضاع هاتتغير و هتلاحظ تحسن في مستواه.. الخ الخ الخ.. و قعد معايا قعدة فهمني ازاي يبقى التعامل مع الأطفال و التوازن بين السيطرة عليهم و تلبية رغباتهم و في نفس الوقت متابعتهم كل واحد على حدة.. و من ساعتها و انا لما مهند يجيلي نايم أقوم مصحياه و مدية له الواجب هو اول واحد.. و بصراحة الولد كان ذكي جدا و شغال و بيلقط بسرعة.. و سبحان الله.. والدة مهند بعد كده بأت من اكتر أولياء الأمور قربا مني