هاني أدم "AlmAhAtmA"قائد سيارة نايل موتورز للأعضاء

[PAYOO]

أنا عاوز تسقيفه جامده جدا جدا جدا يا رجاله
ليه بيقى يا بايوو عاوز تسقيفه جامده ؟ هو انت إللي راكب وللا هاني الماهتما ؟
عاوز تسقيفه ليا عشان جبتلكم نجم يركب "سيارة Nile Motors للأعضاء" ومش أي نجم دا نجم أسكندراني يعني مصطفى قمر يعني يوسف شاهين يعني كل فنانين مصر

يبقى انا بقى إللي أستاهل تسقيفه وللا لاه ؟

هاني انا معرفوش نهائي وماقبلتوش غير مرتين لمدة دقايق بس الراجل ده من دقيقة واحده تعارف تحس أنك تعرفه من 10سنين واكتر تحس أنه اخوك تحس انه أبنك تحس أنه أبوك أهو تحس من جواك أي أحساس أسري ناحيته لانه بشوش طيب بيحب الحب
أيوه بيحب الحب
يعني يحب انه يحب الناس ويكره انه يكره الناس ومايعرفش يكره إللي يكره الناس لكن تلاقيه مايحبش إللي مابيحبش الناس

أنا بقى عرفت أنه فنان من هنا

http://hanysadam.blogspot.com/

ولما رشحته أن يركب معانا العربيه قولت هو أحسن واحد هايخدنا في رحله جميله زيه كده


==========================================

نخش بقى على الأسئلة يا عم هاني يامطنشنا وأنا مش هاسيبك هاترد يعني هاترد

أول سؤال وده مهم بالنسبه لي يا H
أنا عاوز اعرف ليه مش كل الأسكندرانيه بيتكلموا باللهجة الاسكندرانيه ؟ليه؟
يعين عندك مثلا دمياط ماقبلتش حد في حياتي دمياطي مابتكلمش باللهجة المميزه بتاعتهم وعندك البور سعيديه برضه لهجتهم جميله جدا وتحس أنهم ناس طيبه وطبعا الصعايده أجدع ناس

أنا عاوز اعرف بجد هل اللهجه مرتبطه بالبيئة الشعبيه في أسكندريه ؟ وللا لها تعليل تاني؟

وهل انت بتحب تتكلم باللهجة دي ؟ وللا بتحب تتكلم بالعاميه القاهريه ؟

شوف بقى أنت لو مارديتش على الأسئله دي هانزلك في أول كمين وقول لهم أنك مامعكش رخص وهاخليهم يفتشوا العربيه كمان ويتعبوك أخر تعب

أنا بقولك اهو رد أحسن لك

[AlmAhAtmA]

قطر الحبايب مشي و فاتوني وحدايه
و غلبت يا اهل الهوي و ليه خلوا بيه
قابلت سواق الهنا كان عنده حنيه
جبر بخطري و خدني علي السكه لحبيبي
و كان نصيبي اشوف الحلو بعينيه

ايه يا سيد الكل اتاخرت عليه :?:
انا مستنيك من بدري
يالا بينا
يا سيدي الفاضل اربط الحزام

تسمع منير
الحزن شاطر و الفرح شاطر
و انا لسه قادر في الحزن افرح هيه :lol:

ايه اللي متقل العربيه :!:
تعالي نركن و اوريك
دي البراويز اللي في الشنطه :arrow:
لا مش علشان الفرح ولا حاجه
دي براويز بستخدمها في حياتي و مكانها قلبي
لما اقابل حد في الدنيا بحط صورته في برواز و بحطها جوه قلبي و علي راسي من فوق
حد اي حد

لا يهمني اسمك لا يهمني عنوانك
لا يهمني صوتك ولا ميلادك مكانك
يهمني الانسان ولو ملوش عنوان
مش قولت لك قبل كده بلاش تفتحني في منير

و هوه و شطارته يا يفضل البرواز في القلب و علي الراس يا ينزل تحت و اخليه مداس
فيه ناس بتعترض معايا و فيه ناس بتتفق معايا
بس ببساطه كده ليه اظن الشر ما دام ربنا عطيني قلب اقدر اظن بيه الخير :roll:

و كل سنه بدق علي الغربال اللي يستاهل يفضل بشيلوا في عيني و اللي لا الله يسهله

يالا يا سيدي حنتاخر
ايوه انا عازمك علي الفطار النهارده
حنتمشي و نروح نفطر و بعدين حخدك رحله في البوم الصور بتاعي

اكيد بحزن و اكيد بكون زعلان
بس انت زنبك ايه
تبسمك في وجه اخيك صدقه
يبقي اديها ضحكه و بمرور الوقت حتبقي ضحوك زيي كده

الفرحه :shock:
ده اللغز الكبير
تخيل اني كان بييجي عليه ايام اسال نفسي هيه الفرحه دي طعمها ايه
انا كل نجاح الله اكرمني بيه كنت بقابله داخليا بالشكر و خارجيا بالبكاء
بيني و بينك انا دمعتي قريبه قوي قوي
بس سبحان الله
كان الله كان بيخليني اعطش علشان شايلي في يوم شربه هنيه
الحمد لله يارب علي نعمك الكثيره اللي اختصتني بيها دون العباد

ما تزوقيني يا ماما اوام يا ماما :lol:
ان شاء الله الفرح في شهر واحد
فين دي اكيد حاخد رايك فيها
شوف كنا بنكلم علي الفرحه
كرم ربنا في موضوع جوازي اني بستمتع بيه من 100 اتجاه
لان الانسانه اللي انا مرتبط بيها فعلا بنتي و اختي و صديقتي و حبيبتي
و انا بمارس معاها المشاعر الانسانيه دي في كل اتجاه
ربنا يكرمها و يكرم والدتها
دي امي بجد مش كلام

ايه الزحمه دي :?:
اه دي صيدليه مروه المهدي اللي جنب البيت
بتوزع مهدئات علي الزملكاويه :lol:
انا
لاااااا
انا والدي الله يرحمه سماني هاني علي اسم هاني مصطفي
يا سيدي مش بتاع كوره قوي
بس مثلا في كاس الامم الافريقيه طبعا كنت واخد مكاني في فرق التشجيع
الاهلي عنده ماتش ما فيش مشاكل اتفرج علي شوط اهو امشي الدوره الدمويه
لكن تعصب مش مستاهله

السنه اللي فاتت زي الايام دي
كنت نزيل طول الشهر في فندق البارون
قدام المقر الاداري للشركه اللي بشتغل فيها
و الاهلي كان هناك علي طول
الولاد دول ملتزمين قوي و محترمين قوي قوي
و اعتقد ان ده سر نجاحهم

ايوه يا ابن بطن امي
يا عم انا ولا بقول جنيه ولا امه ولا حاجه
بس انا من كتر ما اختلطت بالناس الناس طبعت عليه
زي التيل و الطنابير كده
بس انت لو تلاحظ احنا فخفخينه
و الناس بتروح و بتيجي و اللهجه بتروح في النص

يعني هوه فيه حد قاهري دي القاهره واخده من كل الدنيا
و هوه فيه حد اسكندراني دول الاسكندرانيين طاحوا و بيشتغلوا في كل الدنيا
يعني رضا ان الواحد بيتعرف انه سكندري
بس تعرف دي حاجه بتفرحني قوي

يالا يا عم الحج وصلنا :shock:
ندخل نسلم علي المعلم فرج و نشوف حناكل ايه و بعدين نطلع نعد شويه علي البحر لحد الفطار
انا حاخد واحد رز معمر و ربع بطه و مشتملاتها
انت اطلب اللي تحبه
انا اكيل قوي قوي قوي
اهي دي احلي نكته :lol:
انا اكلتي في الفسافيسي خالص
انا بحب اشرب و مش بحب اكل قوي

اه متنساش بعد الفطار حجيب البوم الصور بتاعي و افرجك علي كام صوره و احكي لك حكايتهم

المهم انك تكون مبسوط معايا و علي فكره لو فيه حاجه مزعلاك او مضايقاك مني قولي علي طول

خيركم من اهدي الي عيوبي :arrow:

مش كده ولا ايه :D

يالا يا سيد الكل اطلب اكلك و نطلع علي مكانا اللي في ظهر القلعه ايوه الشباك 8)

[Heshaam]

خيركم من اهدي الي عيوبي

المفروض أن الواحد هو اللي يشكرك لأن كلامك الجميل نبه الواحد لحاجات ممكن يكون غفل عنها في الزحمة وإن كان نبهه برضه لقيمة حاجات بيعملها وهو مش حاسس بيها.

مقدرش أقولك غير شكرا على صراحتك وكلامك الراقي وجزاك الله خيرا

وتوصل بالسلامة.

[3mr Farrag]

بجد اسلوبك و كلامك جميل اوي يا هاني......
و ادي كام سوءال عالماشي....

لما تتجوز ان شاء الله حياتك الاسريه ممكن تاثر جامد علي حياتك مع الناس و اصدقائك؟؟؟

ناوي تعمل ايه لي ولادك ان شاء الله لما تخلف....يعني تعلمهم ايه ....او عايزهم يطلعوا ايه؟؟

لما بتكون مضايق اوي بتحب تعمل ايه بالضبط....غير انك تفضفض لربنا

ايه الحاجات اللي بضايقك من الدنيا....او من الناس؟؟؟

[اسلام المصرى]

بجد يا هانى أنت أنسان رائع و جميل و ده أقل وصف لشخصك الكريم , ربنا يخليك لينا و دايما تمتعنا بأسلوب كلامك المتميز اللى بيصحى فينا مشاعر جميلة سعيدة و حزينة :D انت تستاهل كل خير و أنا ماعنديش أسئلة ليك اجاباتك واضحة و صريحة :D و انا فهمك من زمان و بحبك لله فى لله. سلام يا صاحبى :D

[AlmAhAtmA]

شكلك الاكل كابس عليك :D
تعالي نروح نتمشي بالعربيه شويه
حوديك مكان بحبه قوي
وهناك
نفتح البوم الصور
:shock:
ايوه تركن في اخر سعد زغلول
يا باشا يا جامد
انت تعرف كوم الدكه منين
مكان جميل
ايوه بحب اروح قهوه سيد درويش
بالضبط اللي قدام المنجد

انت عارف انه غير مسموح بالجلوس علي الكنبه دي الا لاصحاب القهوه بس
ما تقلقشي حنعد عليها

حسن حجر معسل دوبل ليمون و حتتين تلج و عود نعناع و شاي بالقرنفل
و الباشا هات له زبادي خلاط يهضم

تعالي جنبي و نفتح الالبوم و نتفرج
تفتكر احنا اللي بنتفرج علي الصور ولا الصور هيه اللي بتتفرج علينا

تعالي نشوف

__
:shock:
ام هانييييييييييييي
دي ست الحبايب
ما تفهمشي الكيميا اللي بينا
بس صداقتنا بتضغي علي شكل العلاقه بينا
امي اللي علمتني ازاي اغطس وسط الناس
__
:shock:
ده جدي ادم و جدي فرغلي
جدي ادم اكبر فكهاني فيكي يا اسكندريه ايام الملك فاروق كان بيمون المراكب بالاكل و الشرب
جدي فرغلي احلي صاحب فرن فيكي يا اسكندريه ده اللي علمني الصبر و رضعني مصر و زقزقني منها حبه حبه لحد ما ارتويت و شبعت و نمت و حلمت
__
:shock:
من غير ضحك
دي صورتي و انا في اعدادي
كنت كلبوظ قوي
تخيل الفتره دي كنت لو اكلمت كلمتين اتهته و وداني تحمر
كنت خجول قوي و وحيد قوي
الصوره دي كانت في حفله لمنير في مسرح عبد الوهاب
كانت فتره كلها نغمات و حروف
كنت بدات اسمع مزيكا و اقرا كتير في الفتره دي
__
:shock:
شرم الشيخ اول مره
في الكليه
كنت عامل جمعيه و رحت شرم الشيخ
مش مش بحبها بس بلاستيك و انا بحب الدفا بتاع الناس
علشان كده اسوان و الواحات في دمي
__
:shock:
ايوه هوه ده الكلام يا رجاله
دي صورتي و انا باليونيفورم في اول شركه اشتغلت فيها
مؤسسه تويو الهندسيه اليابانيه
موقع البوليثيلين بشركه البتروكيماويات المصريه بالاسكندريه
ده ياماتو مديري في الشركه
انت عارف اني قبل ما ادخل الشركه دي
كنت بشتغل في البنك الاهلي تحت التدريب و علي امل التثبيت
بكام هيهيهيهه ب 150 جنيه في الشهر
ياماتو سان كان داخل يصرف شيك ساعدته و دخلت افطر فول في البوفيه
لا مش ساندوتشات انجر فول بالخلطه
المهم لقيته داخل عليه و بيقولي تعالي بكره قابلني
رحت له كلمني ضحك لي ضحكت له
ال 150 جنيه اصبحوا 2500 جنيه و الكلام ده من 9 سنين
كنت لسه متخرج من الكليه بقالي 3 شهور
ايه رايك
شوفت رحمه ربنا
طب اضحكك
تخيل كنت رايح اعمل المقابله بايه
واحد صاحب اخويا كان موصلني بعربيه نصف نقل حمرا و كان معانا عم علي
عم علي كان طول السكه بيدعيلي
عم علي بعد ما جوز العيال راح يحج مات علي عرفات و ادفن يوم وقفه عرفات
بص الجمال و النبي فيه كده كان بينوا و بين ربنا ايه علشان يكرمه كده
اوعدنا يارب
__
:shock:
دي صوره ياماتو و انا وهوه في المقر الرئيسي للشركه في اليابان
كانوا بيدوني جائره احسن موظف للعام
تخيل الراجل ده كان بيعلمني كل حاجه و اي حاجه
ساب الفيلا بتاعتوا في العجمي و اخد شقه جنبي علشان يكون جنبي
ربك بيسبب الاسباب
__
:shock:
دي صورتي و انا مسافر امريكا
لا ما انا في السفر مش بحب ولا التوديع ولا الاستقبال
مش محتاج اسلم علي الناس ما همه معايا
و مسير الحي يتلاقي
__
:shock:
اه ده الديلي اللي كنت شغال فيه
بتاع واحد اسمو سام و مراتو اسمها نادين سوريين بس امريكان
شوفت كنت خاسس شويه صح
اصل كنت بشتغل بليل من 8 ل 8 الصبح وانام طول النهار
تخيل اتعلمت الاسباني من الديلي داه
__
:shock:
صورتي في يوم اجازه تحت ناسداك في قلب مانهاتن
تخيل كنت بشتغل طباخ في الديلي و بسيق المحل و الرصيف
و كنت بتفسح في مانهاتن و ادخل مسرح و احلم و اتمني
مين كان سامع
ايوه
عفارم عليك
الله
تمر الايام و تعدي 9 شهور و اشتغل في مانهاتن
و تتخيل فين
في المبني اللي جنب ام تي في
شوفت رحمه ربنا
__
:shock:
دي مدام بلو
الست اللي كنت ساكن عندها
دي ربنا خلاها سبب
كانت بتراعني قوي و انا بذاكر
ابنها كان شغال في ناسا
ايوه شبه اللي في توم و جيري بس قلبها ابيض قوي
__
:shock:
انا و الحاجه في العمره بعد رجوعي من امريكا
امي دي جبل
جدي اتوفي
و بعد اقل من اسبوعين
جدتي اتوفت
سبت كل حاجه و تاني يوم كنت نازل
رحنا العمره
دعت لي هناك
و بعد ما رجعنا لقيت شركه بكتل الانجليزيه بتكلمني
يا فرج الله
شوف انا سايب ايه ورايا
اجي الاقي ربنا حاطط ايه قدامي
و رحمته وسعت كل شيئ
__
:shock:
دي صورت خزانات الغاز المسال
لا دي بكتل الامريكيه
انا واحد من 15 شخص اشتغلوا في الشركتين مع بعض
__
:shock:
صبحي صبحي هو هوهو
ده الدكتور صبحي احسن صانع شاي في العاشر من رمضان
انا بحب الولد ده
لانه احسن واحد شفته ماسك ميزان الدنيا و الدين
__
:shock: :shock: :shock: :shock: :shock:
و ده مييييييييييييييييين
ايوه هوه
ايوه يا سيدي هوه انت
ده اخويا
اللي عرفته في المنتدي
و اللي يوم بعد يوم بتزيد محبتنا في الله و اخوتنا
ربنا يديمك عليه و يبارك في اخوتنا

كفايه كده شكلك زهقت
يا خبر الشاي برد
و ما شديناشي الشيشه
يالا بينا نروح العربيه اسمعك حاجه

ما ينفعشي اديك صوره
الصور دي مرسومه بادين اللي فيها في قلبي
مش حته ورق
الورق بيضيع
لكن اللي في القلب باقي :roll:

يا طير يا محني الجناح و الريش
يا طير مين علمك تبكي ولا تغنيش

يا راجل دندن معايا :P

دا انا لو اغني الدنيا ما تسعنيش
بس الغنا يا خساره يا خساره ما طوعنيش
الغنوه في قلبي
و القلب متعبي
اصل الزمان مال بي
و الريح بتلعب بي
ده زماني لما رماني رماني رماني ما نصفنيش
و اااااااااااااااه امتي اغني و اعيش

انت حتموت و تعرف قصتي مع منير :twisted:
بعدين اصل دي حدوته كبيره

ما قولتليش عجبتك كوم الدكه ولا ايه
اه صحيح انت مش بتتكلم ليه :?: :!: :!:
اه انا رغاي الصراحه :lol:
بس انت شكلك مبسوط اوعي ما تكونش مبسوط :?: :!: :!:

[hussein]

يا حاج هانى متفكرنيش باءه بالذى مضى لحسن انا كنت مدمن منير و مكنتش بفوت حفله
بس الظاهر ان كل الحاجات بتفكرنى بعيون حيرتها تحيرنى والذكرى مش بتصبرنى
تمر صورتك اتبسم الابتسامه تعذبنى
عموما احنا مش فى منير دلوقتى لان الكلام مش عليه
الكلام كان كان كان عليك واللى كان خايف عليك انتهى من بين ايديك

حبيت كام مره ياهانى؟

احنا فين دلوقتى!!! اسوان ؟؟؟ طب يالا
فرجنا على المدينه لما جينا و التقينا
كل شئ فيها ناسينا

وعايز ان شاء الله اول طفل ليك يكون ولد ولا بنت (كلو بمشيئة الله طبعا)

يالا بينا
شد القلوع يا مراكبى
دي مركبي فضَّه
وفرحي لو قضَّى
حبيبتي تبقى معاي
من غيرها مش حارضى

بس سؤال
بسألك
إيه آخرة الترحال
وسهر الليالي
وكل يوم بحال
لانك بجد بتسافر شبه يوميا (حتى شغلك سفر)

[PAYOO]

لعلمك بقى يا هاني "سيارة Nile Motors للأعضاء" أتشرفت بيك بجد والرحله شكلها هاتتمد اكثر معاك ومع اسلوبك الجميل ده
وبما انك مصمم انك ماتجاوبش بالطريقه التقليديه أنا هاسيبك براحتك ومش هاضغط عليك بس بشرط تفرجنا على ألبوم صورك أكثر من كده وتجيب المستخبي كله لأننا بنتعلم منك المحبه وحفظ الجميل (المعروف) في القلب كلامك عن مديرك الياباني يدل على أنك حافظ للجميل مع اني شايف أنك لو ماتستاهلش ماكنش عمل معاك كده ولا اعتمد عليك اصلا لان الناس دي ماتعرفش المجاملات يعني أنت إللي تستاهل كل خير من الأخر وتلاقيه هو كمان بيحسد نفسه على موظف مثالي زيك

المهم

أركن بقى على جنب من فضلك عشان عاوز انزل أشتريلك مجموعه شرايط لـ "أحمد منيب" وده بقى عمي وحبيبي وعم الجيل إللي شرب منه من اول محمد منير لغاية حميد الشاعري وبما أنك بتحب منير يبقى أكيد بتموت في منيب

اهو ياعم شريط مشتاقين مش خساره فيك شغلهولنا بقى ياريس

على فكره أنا مش هاسألك في الركوبه دي بس مستني تفرجنا على الالبوم كمان وكمان وياريت الصور إللي في الخارج أكثر وأكثر

سلام يا صاحبي

[modux]

what a surprise topic !!!!!

[Dr Ahmed]

هانى بجد هتخلى المهمة على أى واحد يسوق العربية بعدك صعــــــــــــــبة أو مستحيـــــــــلة

[Karim_Monir]

هاني يا شق عمري
ياللي يعلم الله قد ايه بحبك
مش هاقولك غير كلمتك ليا
انت ليك فيا - انت ليك فيا

وبفكرك باحلى ما قال منير

------------------------

بحلم يا صحبى كلنا حقيقة صافية فى عمرنا
بحلم بعالم فية قلوب بريئة دافية تضمنا
عالم جديد يمكن بعيد لكن اكيد هيكون لنا
---------------------------
ياعينى يا عينى ياعينى ع الولد
الواد كما اى عيل فى عيال ناس البلد
جسمة بردك قليل زى عيال البلد
يغوى صوت السواقى لما تملى البلد
زى ولاد البلد زى ولاد البلد
والقلب اخضر مزهزة لا مكر ولا حسد
زى ولاد البلد زى ولاد البلد
---------------------------
بعد الطوفان نلقى الصديق الزين
نتسندو على بعض بلكتفين
ونقول دة والله حرام
ما نبتديش العلام غير بلطوفان يعنى
لازم طوفان لازم طوفان...طوفان
---------------------------
أمانة يا بحــــــــر تستلم الأمانة
أحبابنا يا بحــــــــــر فى عيونك أمانة
أمانة ياموج بوس خشب المراكب
أمانة ياموج طبطب على اللى راكب
أمانة ياهوا تكتب على الشراع اللقا أكيد من بعد الوداع
امانة يا سما حسبى على الاحباب احميهم يا سما دول فى البحور اغراب
أمانة ياهوا تكتب على الشراع اللقا أكيد من بعد الوداع
أمانة ياطير وصلهم بالسلامة
أمانة يابحر رجعهم بالسلامة
أمانة ياهوا تكتب على الشراع اللقا أكيد من بعد الوداع
----------------------------------
سيلي يا نسمة سيلي يا نسمة في ليلي
ع الحبيبة وسلميلي وارجعيلي
سيلي يا نسمة و قولي لىام قلب دهب و لولي
عمري ليكي روحي فيكي ليكي شوقي وليكي ميلي
ياابتسامة سمرة نيلي تسلميلي
يا حبيبتي الحب داري وانتي نوري وانتي ناري
دا انتي انتي لما بنتي في الهوا نورتي ليلي
يا ابتسامة سمرا نيلي تسلميلي
-----------------------------------
يامركبى

هيلاهيلا ان شاء المولاهيلاهيلا
راح نرسى فى مينا هيلاهيلا
ايامنا ع اللة هيلاهيلا
وقمر ليالينا هيلا هيلا
يامركبى شد القلوع يامراكبى مافيش رجوع يامركبى
ياليل من غير حبيب هيلاهيلا
ياليل امرك عجيب هيلاهيلا
الورد كان فى كل مكان طارح مطارح لحبى
والكون دة كان زمان مايسعش حتة من قلبى
اة يامركبى شد القلوع يامركبى
مافيش رجوع يامركبى اة يامركبى
------------------------------
كأنى فلاح من جيش عرابى
مات ع الطوابى وراح فى بحرك
كأنى نسمة فوق الروابى
من البحر جاية تغرق فى سحرك
كأنى كلمة من عقل بيرم
كأنى غنوة من قلب سيد
كأنى جوة المظاهرة طالب
هتف بأسمك وراح معيد
يااسكندرية يامصروية
على سن باسم
على ضحكة هلة
البحر شباك ومشربية
وانتى الاميرة ع الدنيا طالة
***
يااسكندرية عاشق وبدى ارتاح فى حضنك الود ودى
يكون كلامى عربون غرامى وبلمحبة ناخد وندى
يااسكندرية فيكى الغلابة ع الرزق يسعو ولا ينموش
نزل شبكهم فى بحر طامى طلع شبكهم على فشوش
وفيكى بين البشر ديابة وفيكى فوق البشر وحوش
وفيكى ناس مغرمين صبابة لو خان زمانهم ما بيخنوش
وفيكى خمرى يااسكندرية
سلمت امرى يااسكندرية
مقدر اشوفة وماغنلوش
---------------------
اخر حاجة احب اقولهالك من قلبي
:::::::::::::::::::::::::::::
لو بطلنا نحلم نموت لو عاندنا نقدر نفوت
لو عدينا مرة خلاص لو ردينا ضاع الخلاص
حبة صبر حبة حماس يبقى الحلم صورة وصوت
لو بطلنا نحلم نموت
::::::::::::::::::::::::::::::::::

حب كأنك حلم معدى عيش عيش ما تخليش ولا ثانية تعدى عيش عيش
خد من حضنك اروى حنينك واقسم حزنك بينى وبينك
وارضى بكل الى بيتقسم دة المكتوب مكتوب

[goodwave]

هانى بجد هتخلى المهمة على أى واحد يسوق العربية بعدك صعــــــــــــــبة أو مستحيـــــــــلة

+1000000000000

الله عليك يا دكتور أحمد....... والله ومن غير زعل كنت بفكر نقفل الموضوع بعد ما هاني يخلص الرحلة ..... بردة من غير زعل معتقدش حد حيمتعنا كدة زي هاني :D

ربنا يبارك فيك يا هاني

[إسلام شاهين]

بقولك إيه يا هاني هي العربية مش رايحه ناحية شارع جمال عبد الناصر خالص ؟؟؟؟؟؟؟؟؟؟؟

[معاذ الشرباصى]

الصراحة من اول اما الموضوع اتفتح و انا مش لاقى كلام اوصف به شعورى تجاهك يا هانى

فعلا ربنا يبارك فيك و يخليك لينا يا رب

فعلا الواحد يوم عن يوم بيكتشف انه عثر على كنوز ثميتة لا تقدر بثمن

يا ريات بقى تكلمنا شوية عن طفولتك و اخواتك

[الريس]

من اجمل ما قرات في المنتدى