اذا سيارتك اتبهدلت و اتنصب عليك يبقى انت اكيد اكيد فى غبور

[starpro]

السادة اعضاء المنتدى المحترمين اضع بين يديكم هذا الموضوع حرصا منى على توعيه كل من يذهب الى توكيل غبور حتى لا يقع فيما وقعت انا فيه لان ما حدث لى فى صيانة الالف كيلو الاولى بمركز غبور ابو رواش كان شىء غير متوقع و جعلنى العن اليوم اللى اشتريت فيه هيونداى و سوف احكى لكم ماحدث لى بالتفصيل لنقف جميعا على مساوىء هذا التوكيل لاتخاذ اجراء رادع له و البحث عن افضل اسلوب للرد عليه.

لقد اشتريت سيارة هيونداى ماتريكس 2008منذ شهر و كان اختيارى للماتريكس بالذات تجنبا للتجميع المصرى لانى عانيت منه فى سيارتى السابقة و ما قبلها و بحكم عملى فى مجال الالكترونيات الرقمية فأننى دقيق بعض الشىء فيما اراه امامى و قد ضايقنى فى بادىء الامر الفنيش التركى فى تجميع الماتريكس و لكنى تقبلت هذه الاشياء بالسيارة لانها ليست جوهرية .

و الحقيقة ان السيارة ممتازة و ليس بها اى مشاكل غير تهنيج فى جهاز الانذر الحقير اللى مركبه غبور و هو يعتبر البصمة المصرية الوحيدة فى السيارة و كالعادة كان هو اكثر شىء سيىء بها و مع ذلك تأقلمت معه و عرفت كيف اعالج تهنيج جهاز الانذار .
و عند وصولى الى 1000 كيلو الاولى توجهت الى توكيل ابورواش لعمل صيانة الالف كيلو التى يتم فيها تغير الزيت و الفلتر و من هنا بدأ اول تعامل لى مع غبور و بداية وقوعى فى المشاكل نتيجة حسن النية الزائد عندى و اعتقادى فى بادىء الامر انه توكيل محترم مما ادى لأستلامى السيارة دون ان افحصها جيدا او بمعنى اصح انام تحتها للتأكد مما تم فيها .

و قد استلم المهندس المسؤول السيارة منى الساعة 3 و للاسف انسحبت من لسانى و قلت له على تهنيج جهاز الانذار و قال لى 3 ساعات و تستلم السيارة و جلست حتى الساعة التاسة مساء اى 6 ساعات كاملة و كل ما اسأل المهندس عن سبب تأخير السيارة يقولى بيصلحوا جهاز الانذار و اخيرا استلمت السيارة و لاحظت ان مكان الاستلام كان مظلم ليلا و بدون اضائة جيدة و لم استطيع معاينة السيارة جيدا بسبب عدم وضوح الرؤية عكس مكان الاستقبال به اضائة جيدة .

و اثناء رجوعى فى الطريق وقع على قدمى اسلاك و شبكت فى دواسة الدبرياج و اكتشفت انها متدلية من جهاز الانذار و كان من الممكن تنقطع بسبب ضغطى عليها فقمت برفعا و ربطها و من هنا بدأ الشك يدخل قلبى و انا عائد بالسيارة و تسائلت فى نفسى كيف تركوا السلك يتدلى على الدواسات بهذا الشكل و يصبح معرض للقطع و ادركت ان اللى يعمل كدة اكيد ليس فنى دقيق و منعدم الضمير و هذا جعلنى اشك ايضا انهم استطاعوا ان يصلحوا جهاز الانذار و قلت لابد انهم قاموا بتغيره و لكن كيف حدث ذلك دون تغير الريموت لانى معلمه جيدا .

و بعد رجوعى المنزل جربت الريموت الاحتياطى لاتأكد مما فعلوه و فوجئت ان الريموت الاحتياطى لا يقوم بتشغيل جهاز الانذار و تأكدت مما توقعته بأنهم قاموا فعلا بتغير جهاز الانذار و لكن كيف حدث هذا و الريموت الاصلى لم يتغير شكله فقررت ان افتح الريموت الاصلى و الاحتياطى لمقارنة دائرته الداخلية و اكتشفت ان النصابين قاموا بأستبدال دائرة الريموت الاصلى بدائرة جهاز انذار اخر مصدية و معفنة و مختلفة التردد تماما عن جهاز الريموت الاحتياطى و ركبوها داخل الريموت الاصلى اللى انا معلمه حتى لا اكتشف التغير او اطلب منهم ريموت جديد و هذا يعنى انهم قاموا بتغير جهاز الانذار السابق بأخر قديم و ليس له الا ريموت واحد مستهلك و بالتالى اصبح الريموت الاحتياطى عندى ليس له قيمة .

طيب و اية الحل احترت هل اقوم بتعديل تردد الريموت الاحتياطى حتى يصبح مثل الذى اخذته منهم ام ارجع لهم مرة اخرى ليتصرفوا فى هذه المشكلة و لم تدوم حيرتى طويلا لان جهاز الانذار المعفن اللى ركبوه تعطل فى اليوم التالى مباشرة و ليس هذا فحسب بل اكتشفت بقعة زيت مخيفة تحت السيارة فقررت العودة مرة اخرى لهذا التوكيل الزبالة لحل هذه المشكلة الجديدة و تصليح جهاز الانذار المعفن مرة اخرى .

و طبعا كل هذه العطلة و المشاوير على اعتبار انى فاضى و ليس لدى عمل غير الجرى وراء حل مشاكل سيارة جديدة بدأت بمجرد تعاملى مع توكيل غبور و جلست اربع ساعات اخرى و استلمت السيارة بعدها و حاولت معرفة سبب تسرب الزيت فقالى لى المهندس احتمال يكون فلتر الزيت او الطبة كانوا محتاجين ربط بمنتهى البرود و اللامبالة .

طبعا مهزلة لقد كان عندى سيارات سابقة لمدة 20 سنة و بغير زيت فى البنزينة و عمر ما حصل تسريب بسبب عدم ربط الطبة او الفلتر جيدا و اعتقد لو ميكانيكى معفن لا يفعل ذلك فكيف يحدث هذا فى توكيل هيونداى و ماذا كان سيحدث اذا لم اكتشف تسرب الزيت ؟؟؟؟ انها كارثة و دمار اكيد لمحرك السيارة بسبب استهتار الفنى و المهندس الذى لم يتمم جيدا على السيارة قبل تسلمى لها .

و للعلم موضوع تسرب الزيت ليس حالة فردية بل منتشر و يوجد فى المنتدى هنا ناس حصلهم نفس المشكلة و قد قابلت فى اول يوم لى بالتوكيل شخص فى الاستراحة و دخل بسيارة ماتريكس بعد ان سمع صوت محرك سيارته بيخبط بعد صيانة الالف بأسبوع و عند استلام سيارته هذه المرة طلبوا منه مبلغ تزويد زيت بسبب نقصه الشديد فى المحرك و تسائل كيف نقص الزيت بهذا الشكل و السيارة جديدة و قد قام بتغيره عندهم من اسبوع فقط و الاغرب كيف لم تعمل لمبة حساس الزيت لتنبهه بهذا النقص الشديد و قال لهم ان هذا يدل على ان حساس الزيت تالف و لابد من تغيره فهل قمتم بتغيره قال له المهندس ملوش لازمة يتغير الان و لم يكن امام صاحب السيارة الا سياسة الصوت العالى للكشف على حساس الزيت و تغيره .

هل تعلمون ماذا يعنى انك تسمع صوت محرك سيارتك عالى و بيخبط بسبب نقص الزيت انها كارثة و لا شك ان هذا المحرك قد فقد كثير من صلاحيته بسبب ذلك و كل هذا بسبب اهمال توكل غبور فى صيانة الالف الذى قام بها هذا الشخص قبلى فهو لم يتنبه لتسرب الزيت مثلى فى الوقت المناسب و من هنا يتضح الاتى ان السيارة تدخل التوكيل سليمة و تخرج منه غير سليمة بسبب الاهمال .

نعود مرة اخرى لسيارتى اثناء الاستلام للمرة الثانية طبعا قبل ان امشى بها فحصتها فحص دقيق بعد اللى حصلى فى المرة السابقة و نمت تحتها لأتأكد ان كل شىء سليم و لا يوجد تسريب زيت و اكتشف الاتى ان اسلاك جهاز الانذر مازلت متدلية على الدواسات و الفانوس الامامى خارج من مكانه و قمت بفتح غطاء المحرك و اكتشفت ان اوطاش البطارية غير مربوط جيدا و مخلوع الجراب طبعا اللى خلعوا اوطاش البطارية هم من قاموا بتغير جهاز الانذار للمرة الثانية و لانهم زبالة كما هو واضح فقد تركوا الاوطاش بدون ربط جيد و بدون غطاء و احضرت المهندس لاصلاح الفانوس و قام بتثبيته بنفسه و لا ادرى ما الذى يجعل الفانوس يخرج من مكانه بهذا الشكل و ما علاقة تسرب الزيت و تلف الانذار بخروج الفانوس من مكانه ام ان هناك سياسة لاتلاف السيارات داخل التوكيل شىء غريب حقا و غادرت التوكيل و انا معتقد انى فحصت السيارة جيدا .

و الشىء الوحيد الذى لم افحصه هو شنطة السيارة و هذا الامر جعلنى اتوقف سريعا فى الطريق و افتح الشنطة لاتمم عليها و بالفعل وجدت انها ايضا لم تسلم من عبث من يعملون فى غبور حيث وجدت الغطاء السفلى الذى يغطى الاستبن ملىء بالهباب و الشحم مما يدل على انهم خلعوه و استخدموه فى الجلوس عليه فى الارض مما ادى الى اتساخة بهذا الشكل الشديد و هذا جعلنى ايضا اعود و اتفحص كراسى السيارة جيد و المصيبة اننى وجدت اتساخ بالهباب فى الكرسى المجاور لكرسى السائق مع كرمشة شديد فى الفرش الجلد اللى ركبته قبل ما اذهب لهم بيومين .

و بعد يومين فقط اتحرق جهاز الانذار الثانى اللى ركبوه و طبعا قررت الا اذهب لهم مرة ثالثة و قررت انى ارمى جهاز الانذار الزبالة بتاعهم و اشتريت جهاز انضف منه 1000مرة .

و امس قابلت صديق لى معه سيارة فيرنا و حكيت له ماحدث معى و قال لى انه ايضا اتنصب عليه فى طلمبة بنزين و ضيعوا مفتاح سيارته فى توكيل ابورواش فى صيانة الالف الاولى و اضطر ان يرجع البيت فى مواصلات ليحضر المفتاح الاحتياطى و طلب منهم مفتاح بدل اللى ضاع فطلبوه منه مبلغ 350جنية ثمن المفتاح الجديد بالريموت .

يعنى البهوات ضيعوا مفتاح السيارة و بينصبوا عليه و عايزين يدفعوه ثمن اهمالهم هل هناك قذارة و مهزلة اكثر من ذلك صحيح اللى يشوف بلوة غيره تهون عليه بلوته و على فكرة صديقى هذا ورانى كوارث فى السيارة فيرنا محتاجة موضوع منفصل لها و نصيحة اخوية اوعى حد يشترى هذه السيارة لان تجميع غبور لها زى الزفت و يكفى ان اقول ان تنك البنزين عنده بيطلع ريحة بنزين دخل الصالون و طلبوا منه الف جنية علشان يمنعوا هذه الريحة مع ان سيارته مازلت فى الضمان .

طبعا بعد كل هذا كان لابد ان اعرض عليكم ما حدث لعل احد منكم يستفيد و يأخذ باله عند ذهابه الى توكيل غبور .
و ارجو من الاستاذ عاطف بتاع هيوندى الى فى المنتدى بدل ما يضيع وقته على النت هنا ان ينزل بنفسه فى مراكز الصيانة و يضيع وقته هناك فى مراقبة اهمال المهندسين و العمال فى التوكيل و حل مشاكل الناس على ارض الواقع و بشكل اكثر فاعليه و لا يقتصر حل المشاكل على النت فقط و تسجيد الناس هنا و امتصاص غضبهم حفاظا على سمعة غبور التى اصبحت فى الحضيض .

و قبل ان اختم كلامى لقد اكتشفت لماذا جهاز الانذار المعفن فى الماتريكس عندما يعمل يضىء فقط النور الصغير و ليس لمبات الفلاشر مع انه المفروض ان لمبات الفلاشر هى التى تضىء مع الانذار و سأترك لكم التخمين لعلكم تعرفون السبب و ما اكتشفته عن هذا الموضوع على العموم مبدأيا سببه نص جنية توفير فى جهاز الانذار اه والله نص جنية توفير فى جهاز الانذار هل رأيتم نتانة بهذه الشكل من قبل !!!!!

[cazanova555]

يالهووووووووووووووووووووو وووووووي

انا كنت ناوي اجيب فيرنا 2008 مع اني عارف ان التوكيل وحش بس مكنتش اعرف ان العربيه وحشه كمان

لا انا كدا بجد كرهت غبور والله هبعد عن هيونداي خالص ومش هشتريها

طيب اعمل ايه انا كنت بنام احلم بالفيرنا وعلي قد فلوسي

كويس انك نبهتني والله كتر خيرك وربنا يباركلك في الماتريكس

الحمد لله انها اتعملت معلش محدش بيتعلم ببلاش
بس ايه حكايه العيب الي في جهاز الانذار ده انا بصراحه مش افهم فيهم اوي :(

[محمد عز]

اهلا بك فى غبور كلوب
انا قرات فى منتدى هيوانداى مأسى حياتيه لأصحاب السيارات الهيوانداى تخلينا افكر الف مرة قبل ما اشترى هيوانداى

[mahamedaraby]

طيب معلش هو انت ينفع تروح اى فرع تانى من فروع هيونداى يعنى على الاقل ممكن تلاقى حد بيفهم شويه عنهم ولا انت لازم تروح الفرع ده

والصراحه بجد انا حزين جدا وانا بقراءه كلامك والله ده انت ولا اكنك فى الحرفين بالظبط يعنى ايه يعنى المفروض الواحد يقف ادام العربيه وهى بتصلح مثلا ولا ايه بجد منتهى السلبيه ولا مبلاه معرفش يعنى مثلا هل هيونداى استكفت كده وخلاص مش عايزه تبيع تانى يعنى غبور بيسؤء سمعته باديه

[ecybrarian]

انا بقى ماحبش اسيب عربيتي تتصلح من غير ما اقف على ايد إللي بيصلح واراقبه كويس...ربنا يكون في عونك

[tutankhamoun]

السلام عليكم جميعا

هذه الحكاية ليست الأولى ............ كان الله في عون أصحاب السيارات هيونداي ..........
و منك لله يا غبور .......... بيشغل عمالة زي الزفت و مش فاهمين حاجة و كمان ذوق مفيش

يا جماعة الموضوع ميتسكتش عليه أبدا
دي عربية فوق 80 ألف جنيه ........... و يحصل فيها كدا
ليه ؟؟؟ هي الناس بتلاقي فلوسها في الأرض و لا بتزرعها ؟؟؟
حرام و الله
و ربنا يكون في عونكم

[Hossam.Hamdy]

ربنا ينتقم من الحراميه

[mhalawa]

بجد كرهت غبور ....... المشكلة أن دى حقوق ناس .... هى الناس دى متخاف الله ؟!؟!؟!؟!؟!؟!؟!؟!؟!؟!؟!؟!!!!!!!!!!!!!!! !!!!!!!!!111

[Sharky]

هو دا غبور
سياسته الاولى عدم الإهتمام بالعميل و سيارته نهائيا
و قد اصبح أسوء توكيل فى مصر بلا منافس

رأى الشخصى يجب ان تكون هناك حملة على مقاطعة غبــور حتى يعرف كيف يجب الإهتمام بالعميل و السيارة و إللى حيشترى عربية من عنده مايلومش غير نفسه بعد كده

ربنا يكون فى عونك يا Strapro

[حماده عزو]

كانو بيوفرو نص جنيه تمن السليكونات
عالم معفنين
أنا كونت بفكر فى الألنترا يس كدا مظونش