الموضوع: أفكار ذكية تخلى صيانة اللوجان إقتصادية

المشاركة الأصلية كتبت بواسطة gelgel2004

السلام عليكم
تصفحت الموضوع المعد بمعرفتكم و المشاركات و الردود و اسمحو لى ان اشيد بمستوى الموضوع والمشاركين
الحقيقه تفاعل و ذوق فى الردود و استجابه سريعه فى المشاركات - حاجه تفرح و الله -
النموذج ده نموذج محترم جدا وواجهه مشرفه لنايل موتورز .
متابع معاكم علشان المعلومات الوفيره و القيمه و ارجو ان كان حد عنده معلومات عن كفاءه و عيوب الموديل الجديد stepway يفيدنى
اشكركم جدا.....

شكراً لحضرتك ألف شكر على المتابعة والمشاركة والاشادة ، أنا بأعتز برأى حضرتك وفعلا بأشكرك على كلماتك المشجعه ومداخلتك الايجابية وأسلوبك المتميز الراقى ، وأتمنى حضرتك تفضل متابع معانا بنفس الحماس و تفيدنا دايماً بآرائك البناءة ، أنا بأحضر لموضوع جديد ياريت ما تبخلش علينا برأيك بعد ما أنشره بس محتاج وقت شويه علشان يكمل ، جزاك الله كل خير.

المشكله رقم (10) : إصلاح مشاكل مسامير الاتزان بدون استبدالها

مسامير الاتزان جزء مهم من عفشة العربية بتكون موجوده خلف طوق الفرامل للعجل الأمامى وبتكون مربوطة بشكل رأسى داخل محور مطاط كثيف محاطه بيه مهمته منع احتكاكها مع حديد العفشة علشان يمنع التآكل والصوت ( الدربكه ) نتيجة حركة عجلات السياره فوق المطبات و مستويات الطريق مابين ارتفاع وانخفاض ، إللى حصل معايا إنى كنت بدأت أسمع أصوات دربكه مرتفعة مع المطبات وأحس كأن الحديد بيخبط فى بعضه ، لما رحت أعمل صيانة ال 65000 كيلو عرضت المشكلة على التوكيل ، وبعد الفحص كان تشخيص العيب إن فيه تآكل حصل فى جلد مسامير الاتزان والحل إن المسامير تتغير ( مسمارين حديد يمين وشمال طول الواحد حوالى 20 سم ) ودول سعرهم حوالى 450 جنيه غير التركيب والضريبة ، الحقيقه أنا فكرت إنى أستشير صنايعى العفشه وما كدبتش خبر وخرجت من التوكيل وتانى يوم كنت عند العفشجى ، وكانت المفجأه إن المشكلة إتحلت وعالج التآكل بتكلفة لاتذكر ، مش هتصدقوا إن الموضوع إتكلف عشره جنيه بس ، كل الحكايه إنه فك الكاوتش من مكانه ورفع العربية على الكوريك وفك المسمار وركب له جلده تفصيل وبعدين رجعه مكانه وربط عليه وركب الكاوتش وبعدين الناحية التانية ، الموضوع ما كملش نص ساعه وجربت العربية لقيت كل أصوات الهبد والخبط إختفت ورجعت مرونة العفشة زى ما كانت .

- ملحوظة : مسامير الاتزان من الاجزاء المعمرة لأنها مصنوعه من الحديد بسمك كبير وصعب تآكلها ، لكن نقطة ضعفها هى الجلد المحورية المحيطة بيها ودى إللى ممكن مع الاستعمال الشاق تتآكل ، وطبعاً الواضح إنه ما بيكونش فيه مبرر لتغيير المسامير نفسها.

أنا حاولت أصور مكان المسامير للتوضيح بس كان صعب أنزل تحت العربية ، شوفوا الصور :

http://mail.aol.com/35138-111/aol-6/...Inbox&partId=3

http://mail.aol.com/35138-111/aol-6/...Inbox&partId=3

حاولت أرفع الصور لكن فيه مشكله فى الموقع ، إن شاء الله أرفعها فى وقت تانى .

حاولت أرفع الصور لكن فيه مشكله فى الموقع ، إن شاء الله أرفعها فى وقت تانى .

بارك الله فيك

فعلا تستحق الشكر والاحترام ودايما مستنيين الجديد منك ومن كل الأعضاء