الموضوع: الي مدخلش كيونت .. مدخلش دنيا

الي مدخلش كيونت .. مدخلش دنيا




كلنا طبعاً سمعنا عن التسويق الشبكي والشركات القائمة عليه أمثال GMI و شركة QNET العظيمة
وأنا أفتخر إني أحد المنتمين لكيان QNET العملاق ، وأحب أحكيلكوا ازاي انضميت لهذا الكيان الرائع




في يوم كنت في الكلية ولقيت مجموعة من أصدقائي متجمعين ، وواحد فيهم لابس سلسلة فيها قلادة ، وكان بيشرحلهم وظيفتها وبيخليهم يجربوها ، طبعاً رحت أشوف فيه إيه من باب الفضول !
سألته إيه يا عم البتاع دي ؟؟ انت لابس سلسلة .. اخص



قالي يا عم دي منتج طاقة اسمها Chi Pendant
قلتله ربنا يسامحك .. بتشتمني بالصيني


المهم خلاني أجربها وعمل لي الاختبار بتاع التوازن وقالي شيل بس موبايلك من جيبك دلوقتي ، وبالفعل جربتها وكنت مذهول من النتيجة :
إزاي ده حصل ؟؟
دي قلادة مصنوعة من سبيكة من البلوتونيوم وزجاج معالج بالنانو تكنولوجي ودي بتمنع الإشعاعات الضارة وبتحسن وظائف الإيض ، وكلام من الي بنسمعه في ناشيونال جيوجرافي ^__^

بكام البتاع دي يا عم ؟؟
بـ 4500 جنيه تقريباً :S

إحم .. هيا حلوة وكل حاجة ، بس مش لدرجة 4500 جنيه ، أبويا مش شغال في البنك المركزي يا عم
قالي فاضي بس ساعة إلا ربع ؟؟
قلتله أكيد لأ إحنا في آخر التيرم وشغالين في مشروع التخرج ومفيش وقت للعب العيال ده يا عم ، قالي اسمع كلامي بس الموضوع يستاهل ، قلتله لا يا عم شكراً

بعدها بكام يوم قابلت واحد صاحبي تاني في كافيه ، ولقيته بيتكلم عن التسويق الشبكي بردوا مع كذا واحد ، فسمعت شوية كلام ولما لقيت الموضوع فيه حسابات وكده تملكني الفضول كمهندس ، لكن بردوا مقعدتش أسمع الموضوع منه

بعدها بأسبوع قابلت صاحبي الي شتمني بالصيني في الكلية ، وكنت في آخر اليوم ومروح ، قاللي طب تعالى بس نقعد نص ساعة أرسيك على الحوار ، قلتله ماشي يا عم مجتش على النص ساعة دي.

أول حاجة قالي فيه قواعد قبل ما نبدأ ، موبايلك سيلنت .. الأسئلة للآخر .. متتنحش عشان هنتكلم في أرقام كبيرة

شكل الموضوع كبير يا جدعان ، ماشي يا عم اتفضل.

في الأول سؤال بسيط .. ليه الناس بتستثمر ؟؟ ورصّلي 9 أسباب زي ( الدخل الإضافي – الحرية المالية – مساعدة الآخرين – التعرف على ناس جديدة - ... ) وقالي اختار الي يناسبك منهم ، اخترتهم كلهم تقريباً.


وبعدين عرفني إن الاستثمار في العالم ينقسم إلى : 97 % موظفين وأصحاب مشروعات صغيرة
و 3 % مستثمرين وأصحاب مشاريع كبيرة
وإنك عشان تتنقل من إنك موظف إلى مستثمر أو صاحب مشروع كبير محتاج 30- 50 سنة زي ساويرس مثلاً
قفلتها في وشنا يا عم .. منك لله


قالي أنا بقى عندي حل ينقلك النقلة دي في 3 - 5 سنين

قول يا عم بسرعة .. وحياة أبوك .. والنبي يا حنفي والنبي

قالي إحنا شغالين في شركة اسمها QNET
قائمة على التسويق الشبكي ، وهيا إنك في البداية تشتري منتج وفي نفس الوقت تسوق منتجات الشركة للناس ، والناس الي هتجيبها تسوق هيا كمان .. وهكذا ، يعني باختصار بتعمل زي شبكة للتسويق انت الريس بتاعها ، ودي بتضمنلك إن الشغل مش بيقف أبداً.

أول حاجة جت في بالي ، هكسب كام يعني في الموضوع ده ؟؟
قال كل 6 بتجيبهم بتاخد عليهم 250 دولار ، وبتتحاسب كل أسبوع ، وكل ما تجيب أكتر .. فرصتك في الفوز تكبر
والشمعدان زي ما بتحبه .. بيحبك كمان وكمان



وقعد يحسبلي شوية حسابات رياضية توضح إنك ممكن تكسب مليون دولار في السنة لو اشتغلت ساعتين بس في اليوم في الموضوع ده ، وأنا ابتديت أفتح بقي .. وابتديت أريّل

دولارات يامّه .. دولاراااااااااات !


عايز أبقى معاكوا .. والنبي عايز أبقى معاكوا


خدوا فلوسي .. خدوا مجوهراتي ، بس دخلوني معاكوا


وفجأة .. جالي هاجس في بالي .. أنا إيه الي يضمنّي إن الشركة دي مش نصابين ؟؟ -_^


قعد حكالي تاريخ الشركة المشرف ، وإنها كانت راعي رسمي في كاس العالم ، وفي الدوري البرازيلي ، وإن بيل جيتس اشترى شركتين تسويق شبكي ، والي يتكسف من بنت عمه ميشتريش منها خضار ، وحاجات كتير ملهاش أي مصدر
بس الواحد كانت عنيه منورة دولارات $_$ وعنده استعداد يصدق أي حاجة !



طيب يا عم ازاي أكون معاكوا ؟؟
قالي أول حاجة تشتري منتج ، بكام يا عم المنتج ده ؟؟
قالي أرخص حاجة الـ Chi Pendant
بتشتم تاني :@ :@
هستحملك بس عشان الدولارات $_$

امممم .. طيب مفيش حاجة أرخص شوية ، كتير أوي 4500 جنيه دول
قالي لأ دي أرخص حاجة ، واعتبر نفسك داخل مشروع جديد وده رأس المال ، قلت نظرية بردوا

طيب اديني فرصة على ما أتصرف في المبلغ وكده ، قالي لأ مينفعش يا عم ، الشوية الي هتتأخرهم دول هيكون دخل حد قبلك.
طب وإيه المشكلة يا عم .. هيا الشركة هتقفل يعني ؟؟
قالي لأ فيه حاجة اسمها Cost of Delay
يعني لو حد دخل قبلي ، أنا هبقى تحته في الشبكة ، وبالتالي كل الشغل الي أنا هعمله هو هيكسب منهده كده الواحد لازم ياخد قرار بسرعة ويسجل على طول

امممم .. طيب يا عم اديني فرصة بس أقول لأبويا وأشوف رأيه كده

روّحت البيت وأنا بحلم بالـ BMW
الي هجيبها السنة الجاية ، والفيلا الي هشتريها في كفر الشيخ ، والله ولعبت معاك يا عبدوووو



روحت كلمت والدي في الموضوع ، وطبعاً هو عنده ثقة عمياء فيا ، قالي اسأل بس الموضوع حلال ولا حرام ، قلتله ماشي هشوف على النت ، أكيد حلال يعني ، الموضوع مفهوش أي حاجة غلط ، ولا خمرا ولا قمار.

دخلت على النت ودورت على فتاوي في الموضوع ، لقيت كل الفتاوي بتقول حرام .. حرام .. حرام
إيه الفصلان ده

إيه الي حرام يا جدعان ؟؟ أنا راجل عارف كويس في الدين ومش شايف فيه حاجة حرام ، وعملت فيها ابن تيمية

بعت لصاحبي الي كلمني في الموضوع ، بعتلي فتوي يتيمة لدار الإفتاء المصرية ، وفيديو من على اليوتيوب 30 ثانية ملوش أي علاقة بالموضوع.

بس اتعلقت بالفتوى بتاعة دار الإفتاء المصرية ، الي عمري أصلاً ما خدت منهم فتوى

وصليت استخارة ، وارتحت للموضوع ، ورحت خدت الـ 4500 بلبل من أبويا ، وقلتله دول سَلف ، وهرجعهملك على أول الشهر الجاي بالكتير وفوقهم بوسة كمان.

كلمت الراجل وقلتله أنا جاهز بالفلوس ، قالي خلاص نتقابل بكرة في الكلية ونخلص العملية.
اتقابلنا تاني يوم وخلصنا العملية ، وقالي قبل أي حاجة لازم تاخد تدريب عن التسويق عشان تبقى محترف ، قلتله قشطة ، نبدأ امتى ؟؟
قال زي ما تحب ، قلتله خلاص الجمعة الجاية عندي في البيت ، نخلص التدريب كله على مرة واحدة.
وأخدت التدريب بالكامل في يوم واحدة ، وكنت مركز جداً وواخد الموضوع جدّ أوي ، والصراحة ، تدريب احترافي جداً جداً جداً جداً

تدريب احترافي على الخداع !

أيوة تدريب احترافي على الخداع وإقناع الآخرين مهما كانت معتقداتهم أو آرائهم.

من أول لحظة في التدريب شعرت بعدم الارتياح

حسيت إن الموضوع زي تدريب على مؤامرة ، وازاي تلبس الزبون العمّة ، وتجاوب على كل الهواجس الي عنده بإجابات نموذجية

وكل الإجابات دي بتلعب على نوازع الخير عند البشر

زي حقق أحلامك .. ساعد الآخرين .. ساعد اقتصاد بلدك .. عبر مين قدّك

ولما شفت الفيديوهات بتاعة الشركة ، حسيت إن الي عاملينها دول تجار مخدرات أو تجار سلاح ، زي الي بيطلعوا في أفلام جاكي شان ، وشكلهم مريب ومش مريح خالص



بس بردوا كملت التدريب ، دول 4500 جنيه اتدفعوا خلاص

بعدها بكام يوم عملت أول Presentation
جماعي ليا ، وحضره حوالي 15 واحد ، والناس طبعاً اقتنعت وفتحت بقها كالعادة ، لكن في
نص الشرح ، لقيت حد من الي كانوا حاضرين استأذن يمشي واداني ورقة في إيدي
لقيت مكتوب فيها إن التسويق الشبكي حرام وكده ، فطلعت اتكلمت مع الشخص ده ، وقال إنه سأل من فترة كويس في الموضوع
ده وعرف إنه حرام ، قلتله ليه ، قالي مش فاكر دلوقتي بس ممكن يجيبلي الدلائل.

طبعاً الكلام مكنش مقنع لأنه بدون أدلة ، لكن أنا من جوايا خلاص مبقتش مستريح خالص

روحت البيت ودورت في الموضوع تاني وتالت ، ومش عارف أوصل لقرار ، صليت استخارة مرة تانية ، مفيش فايدة

صليت مرة تالتة ، لقيت نفسي اتقفلت من الموضوع تماماً

حسيت إن ده اختبار من ربنا في فتنة المال ، هل هنجح فيه ولا لأ ؟

وعشان الاختبار يبقى أصعب ، كنت مستريح ومقتنع بالموضوع في الأول على الرغم من إني صليت استخارة

قلت لأ يا رب .. أنا هسيب أي حاجة في الدنيا فيها شبهة عشانك يا رب !

وحتى لو الموضوع ممكن يكون حلال

افتكرت إن الصحابة كانوا بيسيبوا تسع أعشار الحلال مخافة الوقوع في الحرام

والرزق ده بإيد ربنا .. قادر يرزقني ملايين الدنيا والآخرة وبالحلال 100 %

والفلوس لو جت بالطريقة السهلة دي مش هيبقى ليها طعم ولا قيمة

أنا كنت وصلت لمرحلة إني بقيت حاسس إن الهندسة الي أنا فيها دي ملهاش لازمةمانا هجيب كل الفلوس الي أنا عايزها وأنا حاطط رجل على رجل وابتديت أنسى كل أحلامي العلمية الي نفسي أحققها وأسيبها للبشريةوياما ناس كتير سابت شغلها الأساسي عشان تشتغل في QNET لما تيجي بعد عمر طويل تموت هل هتبقى حاسس إنك حققت حاجة في حياتك ؟؟

أنا حبيت أحكي قصتي يمكن حد يستفيد منها ، وأتمنى كل واحد فينا قبل أي حاجة يفكر كويس ، ويسأل كويس أوي ، عشان ميتدبسش زيي
ولو خدتوا بالكوا إن الشركة بتلعب على نقطة Cost of Delay
عشان لو خدت وقتك وفكرت بالراحة ، مستحيل تدخل في حاجة كلها شبهات زي الموضوع ده
، وخلي الحلال والحرام هو مقياس أي حاجة بتعلها في حياتك ، تغور الدنيا بالي فيها لو ربك مش راضي عنك.

واللنك ده للي حابب يعرف عن الخداع الي في الموضوع أكتر

http://dros-hayah.blogspot.com/2010/09/qnet.html

ودلوقتي أنا مديون بـ 4500 جنيه لأبويا ومش بعيد يرفع عليا قضية في محكمة الأسرة :D

تَبـــَــــرّعُـــــــــو ا !

المشاركة الأصلية كتبت بواسطة محمد الجرجاوي

ربنا يكملك بعقلك وان شاء الله ربنا هيعوضك خير

آمين يا رب ، أنا متأكد إن ربنا هيعوضني إن شاء الله
" من ترك شيئاً لله ، عوضه الله خيراً منه "
متشكر جداً يا باشا

المشاركة الأصلية كتبت بواسطة mfarag

حضرتك فكرتنى بفيلم فريد شوقى و زكى رستم

مش فاكر اسم الفيلم

فريد شوقى لابس جلابية و داخل السوق

جة واحد ضربة على قفاة - وقالة دا ختم السوق

بالظبط .. أنا خدت على قفايا .. بس قفا جامد شوية

المشاركة الأصلية كتبت بواسطة m7amd_7amdy

أنا كنت تقريبا هبقى زيك كده من سنة

لكن الحمدلله مكملتش فيه ولا عملت حاجة

والواحد مبيتعلمش ببلاش ياباشا وربنا يعوضك

الحمد لله إنه نجاك
أنا كتبت الموضوع ده عشان محدش يقع في الفخ ده تاني

المشاركة الأصلية كتبت بواسطة dr_mido

نفس حوارك بس فى شنل اللى كانت فى حلوان اصحابى فضلو يزنو عليا لحد مرحت معاهم و نفضتلهم ومشيت الاجهزة كانت معروضه عليا الجهاز ب 50 جنيه من حوالى 5 شهور ربنا يعوض عليك ياباشا فى اللى اتدفع

الحمد لله ، ويا رب مع الحكومة الجديدة يبقى فيه ملاحقة للنصب ده

المشاركة الأصلية كتبت بواسطة saberman

ربنا يعوض عليك

الشركه معمولها قضايا نصب فى اكتر من بلد

نصابيييييييييين و الحدايه مبترميش دولارات خدو بالكو من فلوسكم

طول ما الطيب موجود النصاب فى امان

ولاد النصابه كانوا بادين الموضوع ده ب 600 دولار بس

الله ينتقم منهم

أيوة بالظبط هما 600 دولار ـ وزيادة عليهم الشحن والجمارك
ربنا ينتقم منهم بقى