الموضوع: موضوع جديد ( ماذا تطلب من التوكيل ) ...رايك ايه ؟؟؟

مفيش إحترافيه , مفيش محاوله للوصول للأحسن , مفيش لباقه , مفيش كياسه , مفيش خدمة عملاء , المعامله هيليهلى , مفيش نظام

من أول أمن البوابه لحد أكبر رأس فى مركز الصيانه

عارفين ليه

حقولكم ليه


أنا حسيت انه كل الناس اللى شغاله فى توكيل بى واى دى حطين فى دماغهم و فى عقلهم الباطن و فى ضمائرهم و فى نفوسهم الاتى:

1- العربيه ديه رخيصه

2- إحنا كنا وكيل لادا أسوأ عربيه فى مصر , الناس كانت بتشتريها منا عشان سعرها رخيص مش أكتر من كده.

3- العربيه ديه صينى , و كل واحد كان عنده تجارب سيئه مع منتجات صينيه مفستكه و عمرها قصير.

4- عملاءنا ناس غلابه و معظمهم سواقين تاكسى (مع إحترامى و تقديرى الكامل لكل السائقين)

5- الناس ديه جايه مستنيه ايه , هو راكب ايه أصلا , يعنى يبقى راكب صينى أرخص عربيات السوق و جى عايز يتعامل معامله بشواتى , فاكر نفسه راكب ألمانى

6- عمرك ما حترضى الناس ابدا , الناس مايعجبهاش العجب و لا الصيام فى رجب , مهما عملت , و بعدين الناس جايه التوكيل عشان تتخانق.

7- هو انا أصلا باخد مرتب كام (بالمقارنه بالتوكيلات التانيه) , و المرتب ده معيشنى كويس و لا ماشيه بالستر , و فين مكافأة نهايه الخدمه , و فين التأمين الطبى و العلاجى لو لا قدر الله جرالى حاجه , و فين النسبه من الأرباح السنويه أو اللى بيسموها التوزيعات التشجيعيه , و فين تنظيم أوقات العمل بحيث انه يبقى فيه ساعه فى نصف اليوم راحه للغداء و الصلاه و خلافه , و فين العقود الممضيه لضمان حقى و ماحسش انى ممكن اترمى فل شارع فى أى وقت , و فين التأمينات الإجتماعيه , و فين الزى الموحد , المفروض يصرفولنا زى موحد , و فين الترقيات و الزيادات السنويه و فين النظام المظبوط اللى نمشى عليه , مفيش نظام طبعا و بعد كل ده عايزينى أدى أحسن ما عندى إزاى

8- لو حد فينا اتكلم و حاول انه يقول أفكار لتطوير نظام العمل فى شركة الأمل حياخد فوق دماغه , إزاى انا ابقى بفهم أحسن من الناس اللى فوق , اللى ماسكين مناصب قياديه , لو احنا قدمنا أى إقتراح حيقابل بإستهزاء و سخريه و ممكن بتوبيخ و يحطونى فى دماغهم

9 - أقصى أمانينا ان كل واحد فينا ياخد خبره كويسه و يطلع يشتغل فى توكيل تانى بيقدر الناس اللى شغاله فيه و بيكافئهم و بيديهم إمتيازات أعلى من هنا و نظام أحسن من هنا و بيئه أنضف من هنا أو ان الواحد يفتح ورشه خاصه تخصص بى واى دى و ما يستناش راتب أو أجر من حد

خلاصه القول , هم يشعرون بالدونيه و عدم الثقه بالنفس و لا بالمنتج

فيه ناس فى القيادات اللى فوق كل همها انها توفر لأصحاب التوكيل , توفر يعنى تبخل على التوكيل ما دام الدنيا ماشيه , خلاص , ليه أصرف كتير لما ممكن أصرف أقل

ناهيك عن انه إسلوب إدارة ضباط الجيش المتقاعدين عل معاش و بيمسكوا مناصب إداريه فى شركات , مختلف تماما عن إسلوب إدارة الناس اللى أصلا مجال دراستهم و خبراتهم طوال حياتهم هو إدارة الأعمال.