مهو هو ده اللى بيضعف أى وكيل " لسان حال الناس اللى شغاله فيه "
الحاله الماديه و النفسيه و المعنويه و العلميه مسؤلية التوكيل
حديلك مثل على نفسى:
فى أول حياتى المهنيه , إشتغلت فى شركة تأمين فتره "بدون ذكر أسامى" فى الأول قبل الشغل إدونا كورس محتواه كله يتركز على قيمة الشركه و وضعها فى السوق و قيمه المنتج أو الخدمه اللى بيقدموها و كان الهدف من هذا الكورس رفع الروح المعنويه و إشعارك بالفخر انك تعمل بها و شعورك بأهميه الخدمه التى تقدمها و ان الشركه ديه رقم واحد فل السوق بلا منازع بل رقم واحد فل عالم
اهو هما بتوع بى واى دى عايزين كده , لازم يحسوا بقوة الشركة الصينيه الأم و انها شركه واعده جدا و طموحه و الدلائل كثيرة , و معلومات عن موديلاتها المستقبليه و مدى قدرتها على المنافسه , ده ينعكس على شعور العاملين فى التوكيل انهم بيصونوا عربيه محترمه تسعى حثيثا لتثبيت أقدامها فى الأسواق العالميه و لا تقل عن أى شركه أخى ناجحه و لها باع فى عالم السيارات
و فى حياتى المهنيه أيضا , إشتغلت فى شركة إتصالات كبرى فى مصر ""بدون ذكر أسامى" , علمونا إذاى نتعامل مع العملاء , و حاجات ممكن تفتكرها بسيطه بس هى عند العميل كبيره أوى و بتأثر عن إنطباعه عن الشركه , و إذاى تتعامل مع العميل الغضبان و إذاى تمتص غضبه و فل اخر يخلص معاك و هو مبسوط و بيمدح فيك و فل شركه
اهو ده بالظبط اللى لازم يكون فى كوادر شركة الأمل و يكون فيه رقابه عليهم , إزاى بيعاملو العميل , دا أنا يا راجل كنت واقف و جالى واحد قالى العربيه ديه حد إشتغل فيها و لا لسه , قلتله لسه , فراح قال للتانى هو انت معملتلوش أمر شغل , قالوا ايوه عملتلوا , فقلتلوا هو حضرتك لو تقصد أمر الشغل الكتابى , اه عملى , فقام بصلى و برقلى بعينه , اللى هو عايز يقولى لا حول و لا قوة إلا بالله , بقه ده كلام
الراجل اللى بياخد أمر الشغل , لما بشتكيله من حاجه فل العربيه , كذا مره فى كلامه يقولى , هى العربيه دى كده , هى كده , بإبتسامه صفرا تعنى هى عيوبها كده , ماحاولش حتى يكتب الكلام ده فى أمر الشغل , أو حتى يهتم , ده إحساسه بأنه مش مقتنع بالمنتج اللى بيصونو , و الله العظيم تلاته حسيت فى طريقته إستخفاف بالعربيه.
كلامى عن شركة الأمل و عن لسان حال اللى شغالين هناك , عشان انا لفيت كتير فى شركات و إشتغلت فى أكتر من مكان و عارف ايه هى مقومات النجاح و الفشل
حتى إسلوب إدارة ظباط الجيش المتقاعدين جربته و ذوقته , و عارف نقاط ضعفه و قوته.
و إقتراحى انهم لو غيروا ده , التوكيل حيبقى كويس
المفضلات