الموضوع: باركولى .. أشتريت مقطورة حمولة 3 طن .. قصدى 307 sw :)

المشاركة الأصلية كتبت بواسطة Dr.Refaat

ثانيا: ا/LeitoSR، مبدئيا أحب اتشرف باسم سعادتك لو ممكن.
مش عاوز أقولك انت اد ايه طمنتى و ريحت قلبى من القلق ، بجد ردك فى منتهى الحرفيه ، متشكر أوى أوى يافندم.
بخصوص استفساراتى أرجو الرد عليها لما يكون عند سعادتك وقت وكمان حسب خبرتك أنا عارف ان حضرتك برضه بترد على أد تجربة سعادتك ، بجد كتر ألف خيرك :

أولاً الشكر لله, ومعاك أحمد أمين,,
وربنا يخليك علي زوقك وكفاية عليا أني أفدتك وطمنتك,
وبلاش سعادتك والكلام الكبير دا أحنا كلنا هنا أخوات.

المشاركة الأصلية كتبت بواسطة Dr.Refaat

كان ليا عند سعادتك بس كام استفسار بعد الرد على سؤال حضرتك بخصوص ان كان فيه عندى خبطه وللا لأ ، فالفتيس مالوش اى صوت عندى غير فعلا النتشه اللى بين الأول و التانى وخبطه كده خفيفه اوى بس انا خلاص عودت رجلى عليها وبقيت أعرف أخليها ماتنتش كده خالص.

طالما إن الفتيس مفهوش أي صوت عندك زي خبط وترزيع في أخد الغيارات, يبقي كدا أنت في الغالب معندكش أي مشكلة ميكانيكية الخاصة بالكلتشات أو الشنابر,
والنتشة اللي ما بين الأول والتاني دي عادية وطبيعية, وبرضه صوت الخبطة اللي بتكون مع ال R دي طبيعية ومفهاش أي مشكلة,, وأبقي أكشف علي قاعدة الفتيس اللي تحت البطارية لو متاكلة تبقي تغيرها لأنها هتريح الفتيس في النقلات جداً.

واللي أقصدة بالمشاكل الوحشة من خبط ورزع هيا اللي بتحصل لما العربية بتكون طالعة من أول لتاني طول الوقت برزعة مش نتشة خفيفة وبتروح مع دوسة رجلك,,
أو لما تقف مرة واحدة وتيجي تطلع تلاقي العربية أخدت الأول بخبطة ورزعة كدا.

المشاركة الأصلية كتبت بواسطة Dr.Refaat

1- دلوقتى أنا بعمل حوالى 2000 كم فى الشهر وهنزل القاهره على شهر ديسمبر كده، انا بجد خايف حد يلعب فى العربيه هنا يبوظ فيها حاجه ، تفتكر خطر أمشى بيها كده لحد شهر ديسمبر وللا أيه رأى حضرتك ؟؟؟

هوا طبعاً من دلوقتي لديسمبر كتير,, خصوصاً إن الرسالة بدأت تظهر دا معناه فيه خلل بدأ يحصل وكل ما تبدأ تعالجة بدري كل ما يبقي أفضل بدل ما تمشي بزيت ناقص أو محروق ويبدأ يعمل رأيش ويسد الكولر أو يهلك البلوف,,
وبرضه زي مانت خايف أن حد يلعب لك في العربية عندك وأنا بأييد رأيك دا,
فا أنت ممكن تخلي حد يبعت لك الزيت من القاهرة وتغيرة بنفسك,, هوا الموضوع سهل مش صعب, وهبعت لك صورة المانيوال بتاع الفتيس ومقاس اللقمة اللي هتحتاجها عشان تفك بيها طبة الزيت السفلية, والطريقة الصح اللي تملا بيها الزيت.

وتمشي بيها براحتك بالزيت الجديد إن شالله لشهر مارس حتي مش ديسمبر بس,, لأنك هتكون نزلت زيت أسود ومحروق كتير وبدلته بزيت جديد.

المشاركة الأصلية كتبت بواسطة Dr.Refaat

2- أنا بينى و بين شرم الشيخ 220 كم وبروح كل اسبوع مرتين، لو رأى حضرتك انى ماينفعش استنى لحد اما انزل القاهره يبقى ماعنديش فى شرم غير توكيل Renault ، تفتكر حضرتك يفهموا فيها وللا ايه رأيك ؟؟؟

توكيل رينو معندهمش زيت الفتيس بتاع البيجو والستروين,,
فتيس بيجو 307 وستروين C4 الكود بتاعهم AL4, أما في الرينو الميجان الكود بتاعها DP0
المفروض أنهم نفس الفتيس,, لأنو بيتغير لهم ناس البلف أو الفالف بتاع الضغوط, لو حد جابة Aftermarket بيركب علي الأتنين هوا هوا,, يعني البلفين واحد نفس الحجم ونفس الضغط وبيركبو علي بعض, وأعرف إن الفالف بادي والكولر بتاعهم واحد برضه.
بس في توكيل رينو بيبعو لتر الزيت الأوتو ب 33 جنيه, واللتر الأصلي بتاع بيجو وستروين ب 116 جنيه في التوكيل.!!
فمتهيألي إن الفتيس فيه أختلاف من جوا من ناحية الميكانيكا, عشان كدا نوع الزيت مختلف, ممكن يكونو الأتنين نفس البلوك بس فيه أختلافات تانية,,
علي عكس ما بيحصل في بيجو وستروين الأتنين واحد, بياخدو نفس الزيت بنفس الكمية, بنفس كل القطع بنفس البارت نمبر بتاع كل القطع,, حتي هتلاقي كل قطع بيجو وستروين الأصلية عليهم علامة بيجو وستروين لأنهم بيتعملو في نفس المصنع PSA
لكن رينو خارجة عنهم وملهاش علاقية بيهم,,

ودا مثال لشكل بلوف الضغط بتاع فتيس البيجو وستروين AL4, ونفس الكلام في علب الزيت هتلاقي عليها علامة بيجو وستروين, ومتحطش أي زيت غير الأصلي بتاعها اللي حطيت لك صورة من شوية.

المشاركة الأصلية كتبت بواسطة Dr.Refaat

3- بالنسبه للزيت الاقيه فين واشتريه وانا مطمن انه هو الأصلى مش اجه تانيه ؟

الزيت ممكن تشتريه من التوكيل هوا عامل عندهم 116 جنيه من غير الضريبة, يعني حوالي 130 جنية ل اللتر الواحد بالضريبة.
دا السعر بتاعه عندهم دلوقتي, وبرة كان بنفس السعر لحد من 5 شهور, بس دلوقتي بقي ب 100 ل 110,, وأضمن مكان ممكن تشتريه وأنت مطمن محل غزال بتاع قطع غيار بيجو في 55 شارع دمشق - مصر الجديدة. والرقم بتاعهم 0222595655
غزال, مصر الجديدة, القاهرة, مصر | سيارات - قطع غيار وكماليات | Yellow.com.eg | 13 ش سيدى جابر

المشاركة الأصلية كتبت بواسطة Dr.Refaat

4- على أد فهمى ،لو هزود الزيت بس مش هغير الكولر ، صح ؟ طيب لو الزيت كله هينزل و هغيره يبقى أغير الكولر بس معاه وللا فيه حاجه تانى ؟

لو المشكلة في لزوجة الزيت بس هتغيرة علي فترات قريبة, يعني مرتين لتلات مرات ورا بعض, كل 10 ل 20 ألف كيلو متر مثلاً عشان تنضف وتحافظ علي الفتيس, وتعتبرة زي غيار زيت موتور العربية,, دا في حالة إن مفيش سدد جوا كولر الفتيس اللي هوا وظيفتة تبرد زيت الفتيس,,

لو كان فيه سدد الزيت هيسخن وهتلاقي العربية بتأخر معاك في النقلات مع غيار الزيت الأولاني اللي هتعمله,,
وكدا كدا لازم تعمله دلوقتي طالما العربية عاملة كيلو متر عالي كدا ومغيرتش زيت فتيس أوتو لسه لازم يتغير, واللي عندك دي أعراض سوء لزوجة الزيت أو أنه أتحرق وبقي خفيف مية.

دلوقتي بقي الملحوظة المهمة أنك لما تفك طبة زيت الفتيس من تحت, هينزل لك من 2 ل 3 لتر بالكتير,,
وهيفضل جوا الفتيس حوالي 3 ل 4 لتر من الزيت القديم المحروق,, ودول صعب ينزلو لأنهم بيكونو في القربة إلا لو نزلت الفتيس,, وعشان كدا بنغير علي فترات قريبة عشان ننضف الزيت جوا الفتيس.
فأحنا لما نغير الزيت أول مرة هنبقي خلطنا الزيت الجديد ال 3 ل 4 لتر, ب 3 تانين جوا من الزيت القديم,,
العربية هتتحسن معاك, وأنت هتحكم بالفرق ساعتها,, لأنك بدل ما بقيت شغال ب 5 أو 6 لتر زيت أسود ومحروق, بقيت شغال بزيت نص نص,,
وبعد 10 أو 20 ألف هتعمل غيار زيت كمان,, وهيكون الزيت الجديد أتخلط علي القديم كويس, وهينزلك لك جزء أكبر من الزيت اللي كان محبوس جوا في الغيار الأول,,

المشاركة الأصلية كتبت بواسطة Dr.Refaat

5- وأخيرا ، لو كل ده مانفعش و هغير الكلاتشات او البادى فالف أوى حتى تغيير الكولر بس ، مين أأمن واحد و أكتر واحد عنده ضمير يعمل كده ، مع العلم انى بجد استريحت نفسيا اوى لأوتو سيرفيس بس برضه أحب أعرف رأى سعادتك ...

لو غيار الزيت منفعش,, وهوا في الغالب اللي عندك مشكلة لزوجة زيت طالما الفتيس مش بيرزع معاك, ومطلعش رسالة Gearbox Fault إلا من قريب, وكمان أنت بتقول أن الضغوط مظبوطة, يعني معندكش مشكلة في الفالفات أو البلوف حتي الأن ودي حاجة كويسة.
لو غيار الزيت منفعش ساعتها هنكشف علي الكولر ونغيرة لو مسدود طالما الضغوط مظبوطة, وطالما مفيش رزعة في الفتيس يبقي الفتيس مش محتاج يتفك.
وأوتو سيرفيس بصراحة مجربتهمش, بس مودرن سيرفس أعرف تلاتة راحو عملو شغل فتيس هناك واحد نصبو عليه في 10 الأف جنية وعملو له عمرة كاملة والفتيس طلع فيه مشكلة برضه,, وواحد بعزة أوي راح يزود زيت بس حطو له زيت بالبركة وأكتر من اللي مفروض الفتيس ياخدة من غير ما يقيسو الزيت وهوا المفروض يتقاس صح عشان الزيت الزيادة بيعمل overheating والمفروض في أي مركز خدمة محترم وبيدفع فيه مبلغ وقدرة تكون المعاملة محترمة وأحترافية عن كدا شوية أو شويتين تلاتة كمان.!

فاحنا خلينا منسبقش الأحداث, ولما تغير الزيت وتشوف الفرق لو مكنش فيه فرق هبقي أقولك علي الناس اللي أعرفها, وإن شاء الله مشكتلك هتكون زيت بس لأنك معندكش مشكلة في الضغوط, ولا فيه رزعة.
وسبب الغربلة اللي عندك هوا الزيت اللي أتمشي عليه كل الكيلومترات دي ولسه متغيرش وبتقف بيه في أشارات وزحمة وحر, و أي زيت في الدنيا بيفقد خواصة في ظروف التشغيل الصعبة دي,, وكمثال لدا صورة الزيت اللي حطيتهولك في المشاركة اللي فاتت, شوف بعد 40 ألف كيلو بس بيعمل أزاي.



http://www.nilemotors.net/Nile/37605...post3875159164

*مع العلم إن أحنا الزيت بتاعنا لونة مش أحمر,, بس دا مثال لشكل الزيت الأوتو لما بيجي ينزل بيبقي عامل أزاي,, واللي بيحصله لما بيتمشي عليه أكتر من 40 ألف كيلو من غير تغيير.



ومفيش جمايل ولا حاجة, كفاية بس أنك تحل المشكلة وتبقي تطمنا إنه أتحلت.