سخونة الفليشيا

**secondhand** · 16-08-2013 07:56 AM

انا بقالي فتره بعاني من مشكلة السخونة في السفر امبير الحرارة بيعدي الميه ولو قرصت توصل ل110 واقف شوية لحد ماتبرد وامشي تاني واخلي عيني على عداد السرعه ميعديش 90 علشان بعد كده العربية بتولع رغم ان المكنة حلوة وبتجيب 130 مرتاح ولو قرصت تجيب اكتر وانا طريق سفري مفتوح
غيرت الريدياتير والمشلكة زادت وبقت بتسخن لو جريت على 90 حتى بقيت بسافر وانا ماشي 60 او 70 بالكتيير والمشوار بعد ماكان بياخد ساعتين بالكتير بقى بياخد اكتر من تلت ساعات
بعد كده بقت المية بتنقص جامد واكتشفت ان غطا القربة كان بيهوي وجبت واحد جديد ومشكلة نقص المية قلت بس لسه بتنقص كل يومين بتنزل لعلامة المينيمم تقريبا
وافتح القربة الاقي ضغط هوا جامد طالع والميه بتفور وبتطلع بره القربة
خرجت الهوا من الماتور كذا مره ولسه برضو بياخد هوا
ومره لقيت فجأة امبير الحرارة وصل لـ110 والشكمان بيجيب دخان ابيض وقفت وفتحت الكابوت لقيت خرطوم الراجع انفجر من الضغط ووقفت واتصلت باخويا جابلي خرطوم وجه ووقفت بتاع ساعتين يومها لحد ما جالي وركبنا الخرطوم ومشيت
طبعا شكيت في الجوان ولما كنت بغير الريدياتير الميكانيكي قالي الجوان سليم ولما الخرطوم ضرب رحت لميكانيكي تاني وقالي برضو الجوان سليم ونظبط تاكيهات ونطلع الهوا من دورة اتبريد ونشوف وظبطناها ونفس المشكلة وغسلت دورة التبريد وغيرت الميه وحطيت ميه خضرا وبرضو لا جديد
العربية ممتازة جوة البلد انما اول ما بركب الطريق السريع وعداد السرعه يوصل لـ90 امبير الحرارة يتحرك مع عداد السرعه لفوق
اخر حاجه اول امبارح ظهر طحينة وميه على غطا الزيت دورت هنا في المنتدى ولقيت موضوع عن البلوك سيل
رحت جيبته وحطيته في الريدياتير واتبعت التعليمات
وكان لازم اسافر امبارح بعد الاحداث اللي حصلت دي لظروف خاصة
ملاحظاتي بعد ماحطيت البلوك سيل وسافرت حوالي 150 كيلو
الميه نقصت بسيط حوالي 200 مل
السخونة افضل بتوصل ل95 ولو قرصت لـ120 كيلو السخونة توصل 100
الطحينة ظهرت تاني على غطا الزيت
ولاحظت ان المروحة بقت بتشتغل لما امبير الحرارة يطلع فوق التسعين بحاجة بسيطة رغم انها الاول كانت بتشغل تحت ال90 بدرجتين مثلا وتفصل على 70 مش عارف بقى الامبير اللي بيهيس ولا صباع الحرارة
مع العلم بأن المروحة شغالة كويس والعربية راكب ليها تكييف وراكب على سربنتينة التكييف مروحة بتشتغل مع مروحة الريدياتير حتى لو التكييف مش شغال وانا طبعا مابشغلوش علشان بيسخن العربية من غير حاجه
وقبل المشاكل دي كانت السخونة مقبولة ومكانتش بتعدي التسعين غير بحاجه بسيطة وتسخن جامد بس لو شغلت التكييف
عندي برضو مشكلة تانيه ظهرت بس ملهاش علاقة بموضوع السخونة
لما العربية بتبقى واقفة او ماشي على الاول وبلف الدريكسيون يمين او شمال جامد بسمع طقطة مش عارف بقى دي ممكن تكون مشكلة ايه بالظبط مع العلم بأني مغير مساعدين وكاوتشات كبالن داخلية وخارجية من قريب والمشكله دي ظهرت بعدها بأسبوع تقريبا
لو حد عنده حلول او افكار تاني ممكن اعملها بنفسي ياريت لاني مسافر بكره ان شاء الله والايام دي ايام صعبة ومش هلاقي حد فاتح النهارده وهيبقى خطر ان الواحد يقف على طريق
وربنا يسترها علينا جميعا

**sakr_skoda** · 16-08-2013 08:52 AM

بالنسبة لموضوع السخونة حضرتك استخدمت البلوك سيل وجاب معاك نتيجة ودا يبدو ان اصل المرض هو وش السلندر ذاته حضرتك عاوز تفك الوش وتكشف علية وتختبره وممكن يكون من الشمايز او البساتم بلوكة الموتور ذاتها ممكن يكون فيها المشكله....

دلوقتى مؤقتا ارفع سربنتينة التكييف وخرجها برة العربية بكدا حيبقى الهواء الداخل للريداتير مباشر بدون عوائق حيخفف معاك السخونة....*

المشكلة الثانية....

هذه مشكلة اسكاترا الدريكسيون ممكن تكون عاوزة تنظيف وتشحيم وبص كدا على الجلد بتاعها لو مقطوع غيره....

**aw2100** · 18-08-2013 12:09 AM

خدها قاعده طالما العربية بتاخد هواء لازم العربية تسخن والمروحة ماتشتغلش بانتظام وطالما مافيش تنفيس عندك او تنقيط من خراطيم ومواسير دورة المية والمية بتنقص كل دى اعراض جوان وش السلندر او الوش نفسة هو اللى بينفخ الهواء فى دورة التبريد وده بيظهر اولا وبعد فترة يبتدى يظهر طحينة فى الزيت فلو لسه مغير الجوان عند ميكانيكى موثوق فية والكهرباء والتكايات مظبوطه الطبيعى لموتور الفليشيا الحرارة لاتزيد عن ال90 حتى لو عز الظهر وماشى على 120 ولما توصل من مشوار طوالى مهما يكون مدته خراطيم الموتور ماتكونش منفوخة قوى وكمان القربة ولما تفتح غطاء القربة مافيش فسسس كتير وضغط جامد وخصوصا لو مليها مية حمراء نضيفة والمية ماتنقصش ولا مم لمده اسبوعين على الأقل ده اللى لاحظته بعد تغيير جوان الوش والموتور بحمد الله اتظبط وده طبعا مع تغيير رادياتير جديد تحياتى!!

**secondhand** · 18-08-2013 07:37 AM

المشاركة الأصلية كتبت بواسطة giedo

المشكلة الاولى جاوبلك عليها عملاق سخونية الاسكودا اللى جرب كل حاجة علشان يقضى على مشكلة سخونية الاسكودا ( أ/ صبحى )
أما المشكله التانية زى ماقال الاستاذ صبحى .. حتروح للعفشجى حيفك طارة الدركسيون ويشحم العمود ويزيته... وتنتهى المشكلة بإذن الله

الف شكرا ياريس وربنا يكرمك

**secondhand** · 18-08-2013 07:41 AM

المشاركة الأصلية كتبت بواسطة aw2100

خدها قاعده طالما العربية بتاخد هواء لازم العربية تسخن والمروحة ماتشتغلش بانتظام وطالما مافيش تنفيس عندك او تنقيط من خراطيم ومواسير دورة المية والمية بتنقص كل دى اعراض جوان وش السلندر او الوش نفسة هو اللى بينفخ الهواء فى دورة التبريد وده بيظهر اولا وبعد فترة يبتدى يظهر طحينة فى الزيت فلو لسه مغير الجوان عند ميكانيكى موثوق فية والكهرباء والتكايات مظبوطه الطبيعى لموتور الفليشيا الحرارة لاتزيد عن ال90 حتى لو عز الظهر وماشى على 120 ولما توصل من مشوار طوالى مهما يكون مدته خراطيم الموتور ماتكونش منفوخة قوى وكمان القربة ولما تفتح غطاء القربة مافيش فسسس كتير وضغط جامد وخصوصا لو مليها مية حمراء نضيفة والمية ماتنقصش ولا مم لمده اسبوعين على الأقل ده اللى لاحظته بعد تغيير جوان الوش والموتور بحمد الله اتظبط وده طبعا مع تغيير رادياتير جديد تحياتى!!

هو فعلا امبارح سافرت تاني والعربية كانت كويسه لحد ماوصلت القاهرة وبدأت تسخن جامد
لقيت المروحة مش شغاله فتحت القربة وسبت الميه تغلي وتفور بره القربة لقيت المروحة اشتغلت
زودت ميه بدل اللي اتكبت وسبت المروحة شغاله لحد العربية مابردت ومشيت وراحت عملت نفس الحركة تاني مرتين لحد ماوصلت البيت
والف شكر ياريس

**romany_ac** · 18-08-2013 12:28 PM

[QUOTE=secondhand;3875138129]هو فعلا امبارح سافرت تاني والعربية كانت كويسه لحد ماوصلت القاهرة وبدأت تسخن جامد
لقيت المروحة مش شغاله فتحت القربة وسبت الميه تغلي وتفور بره القربة لقيت المروحة اشتغلت
زودت ميه بدل اللي اتكبت وسبت المروحة شغاله لحد العربية مابردت ومشيت وراحت عملت نفس الحركة تاني مرتين لحد ماوصلت البيت
والف شكر ياريس[/QUOT
نفس المشكلة بكل تفاصيلها عندى وبردة الميكانيكى قلى وش السلندر مفهوش حاجة ومش عارف اعمل اية؟

**mohamed878** · 21-08-2013 03:33 PM

انا عندي وش سلندر شوف لو ينفعك

**secondhand** · 22-08-2013 07:48 PM

المشاركة الأصلية كتبت بواسطة mohamed878

انا عندي وش سلندر شوف لو ينفعك

ليك رساله على الخاص يا محمد

الموضوع: سخونة الفليشيا

LinkBack

أدوات الموضوع

عرض

-

المواضيع المتشابهه

دليلك لعلاج سخونة الفليشيا

الى كل من يعانى مشكلة سخونة الفليشيا اليكم الحل السحرى

سخونة الفليشيا

اسباب سخونة الفليشيا والسيارات عموما

سخونة الفليشيا

الكلمات الدلالية لهذا الموضوع

المفضلات

المفضلات

ضوابط المشاركة