تقييم الm11 من الاول للاخر

**hemaa_82** · 25-11-2012 10:47 AM

اتصلت ب ابو الفتوح قالي كل الستوك منهم اتسحب الفترة اللي فاتت و اداني نمرة المعرض الرئيسي 26387889كلمتهم قالي للاسف خلال شهر شهر و نص ... سألته طب ليه قالي ان في مكونات في الجمارك لسة مدخلتش فمعطلة خطوط التجميع ...امبارح كنت في ابو رواش و قالي الراجل بتاع المخازن ان في قطع غيار دخلت كتير بس مش كل البنود ... لسة مفيش علب باور و مفيش جلب

**Hindam** · 07-12-2012 07:24 AM

ايه يا جماعة مفيش اخبار جديدة علي العربية .. بدأ انتاجها تاني وللا لسه؟؟

**ELSHYMEDO** · 08-12-2012 10:48 PM

M11 و m12 هتلاقيها في المعارض ممكن تبقى بزيادة ألف عن سعر المصنع

**hemaa_82** · 16-12-2012 10:45 AM

بسم الله

انا طبعل عامل 51الف ... و بقالي حبة عايز اجرب المتحدة ....توكلت علي الله و رحت الجمعة اللي فاتت قبل الصلاة...

روحت علي 10:00 الصبح ...لقيت م/ محمد رشاد تقريبا اول واحد

دخلت ....
غيرت زيت متور شيل 10 الاف "5w-40"
5 لتر ب 345 جنيه
فلتر زيت شيري اصلي برقم الكود
30 جنيه
تيل فرامل شيري خلفي اصلي
220 جنيه "فيه مضروب ب 100 ... و ان اسائل في التوكيل علي التيل ب 250 "
بوجيهات بوش صيني اصلي 3 شمعة بالكود بتاع الكاتالوج ...
110 جنيه ...و عنده روسي ب 60 و NGK ب 90
غيرت زيت فتيس اخيرا بالمرة
65 جنيه
خد مصنعيات 100 جنيه ....
ربط عفشة و ظبط فرامل يد و شال المواسك الل بتخلي وير الفرامل يصوصو و غير بوجيهات و غير تيل ورا و كشف علي امامي و نظف فلتر الهوا بال 100 دول .... انا شايف انه مش كتير الحمد لله

قلتله علي ان في التوكيل كانو قالو الجلب عايزة تتفير لقاها مشققة بس قالي عادي و حرام نغيرها دلوقت
قلتله علي تنشيع زيت الباور قالي الخرطوم الاصلي انضف من اللي موجود و طالاما مش بتنقص جامد خليها .... انا نقصت عندي بعد سنتين و نص
سألته عن حالة علبة الدركسيون علشان بدأت احس برجة خفيفة في الملفات لو الارض مكسرة قالي الناحية اليمين حلوة و الشمال بدأت تخف انما لسة شوية ... و قالي انها بتتصلح ب 500 الي 550 ... و جديدة بحوالي 1800 انما لسة كتير عليها
ثبتلي الفبرة اللي تحت الاكصدام الامامي و ثبتلي الاكصدام الخلفي من تحت "كانو سايبينه لما ركبوه في التأمين في ابو رواش و حسبنا الله و نعم الوكيل"

خلصني قبل الصلاه .... و بيتابع بنفسه كل حاجة .....

تقديري العام للمكان انه جيد جدا ... محتاج مكان اوسع و انضف علشان يبقي ممتاز ....
عنده قطع غياره و مش بيمشورك ....يستاهل الشكر ..

شكرا محمد رشاد و دوما للامام ان شاء الله

**hemaa_82** · 16-12-2012 11:10 AM

طبعا في بلدنا المحبوبة و سبحان الله ... اول ما تعمل اي صيانة للعربية ايا كان نوعها الشعب يحب يبارك ....

ركنت العربية تحت البيت عند ابويا و الناحية التانية من الرصيف فاضية .... واحد تييييييييت غالبا "لني ما شفتش بس ده التحليل المنطقي" ماشي بسرعة ... لقي بلاعة قام واخدها في النص و خبط الرفرف الامامي شمال و كسر حرف الاكصدام الامامي من الناحية الشمال ....

طبعا نزلت لقيت كدة دمي فار و جه في بالي ان الاكصدام ب 500 في التوكيل و يا عالم هلاقيه ولا لا ....
مشيت و انا بزبد و برغي و عمال اسب والعن في اهل اللي خبطها و عمال احسبن علي اللي جابوه ....
دخلت اسحب فلوس من البنك في جسر السويس لاقيت ام 12 جاية تركن و مفيهاش اكصدام امامي خالص ... حبة و لاقيت شاب نزل و جه البنك ....بقوله و لاقيت بقي اكصدام ولا لا ...قالي لاقيته و اشتريته بس مش لاقي كلبسات .... بكام يا عمنا ...قالي ب 450 ...من فين يا سيدنا ....قالي عارف الحرفيين قولتلو حبيبي... قالي تدخل جمال عبد الناصر لحد اول صيدلية علي اليمين واخدة ناصية تدخل يمين "اللي هوة دخلة الحرفيين القديمة اللي مليان بي ام و مرسيديس" هتلاقي قدام علي الشمال محل اسمه صدام عنده كل حاجة الاسبيرانزا ....
شكرته لحد الصبح و اسمه احمد علي العموم لو كان من الاخوة هنا يبقي شكرا تاني ...
رحت لعم صدام .... يا عمنا عندك الاكصدام ده ...قالي لا بس اجيبهولك الاثنين ...بكام يا سيدنا ..قالك 750 ... قلتله لا كتير انت بايعه ب 450 بأمارة كذا كذا ....قالي لا والله بايعه ب 550 لميكانيكي و ممكن يكون تبع الراجل ....قلتله طب انا هكلمك الاثنين و نشوف بكام ..و سألته هيبقي فيه حاجة ولا فاضي قالي لا فاضي....

المهم مشيت و انا مستغلي الثمن ...لقيت مراتي بتقولي في محل علي اليمين معلق اللوجو بتاع اسبيرانزا .... بصيت لقيت كله علب قلت لنفسي هيطلع كلها حاجات خفيفة و مش هلاقي و لو لقيت هيبقي غالي علشان جديد... و بعدين قلت لنفسي هوه السؤال بفلوس ....يالله يا عم

نزلت ..المحل اسمه الملكة ... الي واقف شابين لذاذ بشوشين .... سالتهم عندكم اكصدام ام 11 لقيته بيقولي امامي ولا خلفي ....طبعا انا انبهرت .... قلتله امامي ... قالي موجود ...بكام يا سيدنا ...قالي ب 265........طبعا انا فتحت بقي من الازبهلال ...لقيته بيقولي وعلشان انا هقفل بعدك هديهولك ب 250 .... قلتله هات واحد .....

جابلي الكصدام جديد فبر اسود بكيسه و عليه اللازقة بتاعت الكود ...و طلع منه جزء و تناه جامد علشان يوريني انه طري مش سهل الكسر ...دفعت و خدت منه كارت علشان اللي يحتاج يبقي يسأل بالتليفون ...

ان شاء الله علي الجمعة الجاية هروح اركبة عند السمكري اللي في عين شمس ...

و حسبنا الله و نعم الوكيل و منشوفش حاجة وحشة في حد

**hemaa_82** · 17-12-2012 03:17 PM

السلام عليكم ...

من ساعة ما غيرت التيل وانا حاسس بتقل في العربية بس فضلت اقول لنفسي التيل بيطبع ...المهم جت امبارح وانا في صلاح سالم و الدنيا زفت قامت قافشة علي حق بقي .... دخلت التعاون لقيت ميكانيكي ...فك يا عم .. فتح وقالك عايزة طقم اصلاح بستم ....قولتله لا يا معلم افصلي الفرامل علي الفردة دي....جاب مسمار و تيله بفتلة و حطه جوة ماسورة الباكم و فعلا فصل الفرامل و العربية مشيت علي 3 عجلات فرامل ....
كلمت محمد رشاد بتاع المتحدة و قلتله قالي شرفنا 10 دقايق و هتتحل...
رحت النهاردة فكوا العجلة و شحموها و خففوا رجلاش فرامل اليد و بقت حلاوة الحمد لله ...جم في الحساب كام قالولي لا احنا اسفين اساسا ان حضرتك عطلت و مفيش اتعاب ....
حتي استاذ محمود حسين مدير المركز قالي ممكن نركبلك الاكصدام المكسور ببلاش بس انا كنت مستعجل فقلتله بعدين بقي اجيبلك الجديد تركبهولي ....

نوافيكم بكل جديد ان شاء الله

**kimocyc** · 17-12-2012 05:57 PM

أستاذ hema_82 مبروك الصيانة..

وسؤالي: دي اول مرة تجربة لزيت شيل 5w40 ؟؟ عايزين تقرير لو اول مرة استخدام بعد موبيل 1..

**bassem.naguib** · 17-12-2012 09:15 PM

ازيك يا هيما عامل أيه ... ويا ترى المركز ده (المتحدة) كويس ولا أيه النظام .. وهل هو شغال في كل الصيني (بي واي دي جاك ، شيري ...إلخ ) ولا اسبرانزا بس .. ويا ريت العنوان بتاعه بالتفصيل الممل .