الموضوع: تقييم الm11 من الاول للاخر

سلام عليكم

اهلا بيك يا طارق و ربنا يوفقك للخير ان شاء الله

اولا احب امسي على كل الناس الحلوة اللي هنا و اولهم طبعا البرنس ابو بريبئ مخروم حبيب قلبي هيما

بص يا سيدي..انا كان معايا لانوس كوري كامله موديل 2002 كانت بتاعه واحد جارنا و كان محافظ عليها جدا و هي ما شاء الله عليها و ربنا يبارك في اللي اشتراها زي الفل..

حبيت اعلى شوية و فكرت في عربيات كتير..الاوبترا و الصني و البي واي دي و الانترا ..المهم مكنش في دماغي قوي بصراحة الاسبيرانزا عشان كنت عامل زيك كده..ماشي وراء كلام الناس من غير مانا احكم بنفسي..المهم دورت كتر بصراحة عشان الاقي حاجة نظيفة من الماركات اللي قلت ليك عليها دي و مفيش حاجة عدلة..كله عشش فراخ و عايزين فيها فوق تمنها الطبيعي 5 الاف على الاقل..المهم في الوقت ده بردو حصل ظروف و المبلغ اللي كنت عامل حسابي اشتري بيه العربيه قل شويه..و اضطريت اني انزل شويه بنوع العربيه..فكرت بقى في الزفته اللي اسمها فيرنا مع اني مش بحبها و برو ملقيتش..و بعدها فكرت في البريلليانس و لاقيتني مش مرتاح ليها لانها مش منتشرة قوي و قطع غيارها مش سهله اوي تتجاب..و بعدين رجلي حدفتني هنا..قريت كلام الناس كلها عن الm11 و بصراحه كانت من العربيات اللي شكلها عجبني جدا..و لما قريت عنها كتير بصراحه عجبتني اكتر..قعدت فترة طويله بتاع يمكن شهر و نص عايش معاها و اعرف عنها كل حاجة..و طبعا كلمت هيما و ناس تانيه عشان اعرف منهم عن العربية..و اكتشتفت ان فيه راجل في عيلتنا معاه نفس العربيه و كلمته و قالي توكل على الله..المهم استخرت ربنا و اشتريتها ..عربيتي موديل 2010 ..

طبعا فرق شاسع بين اللانوس و الام 11..بجد في كل حاجة..ثبات رهيب بمعني الكلمه لدرجة ان العادي بتاعي دلوقتي في السواقه من 130 و طالع..ولا تقولي بقى تريللا جنبك تطيرك و لا مش عارف ايه..راحة في السفر..موتور ممتاز ما شاء الله عليه..شكل خرافي جميل جدا..امكانيات روعه زي مانت اكيد قريت..و طبعا فيه سلبيات بس مش جوهريه..يعني مثلا موضوع التقفيل..عادي يعني ممكن انت تظبط شويه الديفوهات اللي ممكن تيجي فيها بفلوس عبيطه..موضوع تسقيف الموتور ده بقى مهارة سواق..امتى تنقل الغيار و امتى تقرص على العربيه..
افتكر لما كنت بشغل التكييف في اللانوس كانت بتقلب بطة بلدي..في الام 11..ولا اي حاجة..عادي جدا و متحسش انه حمل على الموتور..صاجها تقيل و محمل و وزن العربيه تقيل مش زي اللانوس ورقه..استهلاك البنزين بتاعها عادي..زي اللانوس و ساعات بتبقى اقل لو انا مشيت على مهلي بالعربيه..مشاكل العربيه..الحمد لله بفضل الله مفيش اي مشكله لحد دلوقتي بعد استخدام حوالي 3 شهور و تقريبا 10 الاف كم..
يا طارق انا هقولك كلمة ابرك من 10..العربية فلوسها فيها والله..و زي اي عربية بردو محتاجة ايدك تبقى فيها و تراعيها..اما لو اهملتها..هتزعلك..

انت بس قبل اي حاجة اركبها و سوقها و شوف..لو مرتاح يبقى خلاص..

ربنا يوفقك و ييسر لك و لينا الحال ان شاء الله

العفو يا طارق على ايه يا عم
كلنا اخوات هنا و اكيد هيجي اليوم اللي انت هتساعد فيه حد بردو

انا لما دورت ملقيتش حاجة عدله والله في العربيات التانيه..تخيل كان معروض قدامي فيرنا 2008 عبارة عن عشه فراخ و ماشيه 180 الف كم و بكام..58 الف..ليييييييييييه يعني

و بعدين العربيه الام 11 الحمد لله ربنا يبارك لينا فيها..كويسه و ما شاء الله عليها..و اكيد محتاجة صيانه زي اي عربيه بي ام دبليو و مرسيدس حتى..المهم لما تختار هات من بعد موديل 2011..و تكون ماشيه كم قليل..اقل من 30 الف كم..و روح بيها مركز المتحدة او حتى بنزينة كالتكس او مركز زيوت وولف و هم هيحللوا كل حاجة فيها..بعد كده غير زيت و شوف السيور و الكلام ده و ان شاء الله موفق و ابقى طمنا عليك

انا عايز بس اعرف مين اللي مطلع ان الفرامل وحشة ؟؟؟؟؟و علي اي اساس ؟؟؟

ازيك يا هيما
اقولك سر....................

العربيه دي صيني..يععععععع..فراملها عليها بيبي و كاكا..و الموتور ممكن يقع و انت ماشي...بس اي عربيه تانيه بتطير و تمشي في المياه و على الحيطة و ممكن تبقى سفينة فضاء كمان...يا سيدي ريح الزبون..بس عارف..اراء الناس في اي حاجة معينة بتتوقف على طبيعه الشخصية نفسها..يعني الشخصية المتمردة و المستقله عن تبعيه اي انسياق وراء كلام الناس..بتلاقيهم مغامرين شويه و عندهم استعداد انهم يعملوا اي حاجة و اكيد طبعا بتبقى محسوبة مش مغامرة و خلاص و بعدين نلبس في الحيط...اما الناس اللي عايشين و بس و ملهومش تاثير قوي على المجتمع و كلمة توديه و كلمة تجيبه و ممكن يغير قراره لمجرد ان حد لعب في دماغه..تلاقي ده بيمشي وراء كلام الناس و بس ايا كان..و ممكن يكون فيه احسن من اللي ممكن يعمله بس هو بقى عايز يريح دماغه...مش معنى كده ان الواحد ميسالش..لا طبعا يسال..بس يسال على الحاجة اللي هو شايف انها انسب اختيار بناءا على قراره هو..

سيبك انت..انا عايز سندوتش فول من عم محمد اللي في ميدان المطريه

لا احنا في الدقي جنب الشغل عربية الفول بتاعة ام عبير ايه حكاية ... فول و فول بالبيض انما ايه ... كباب والله