الموضوع: تقييم الm11 من الاول للاخر

اخر موضوع المساحات ...

بعد لف و انتظار اسبوع تم تركيب موتور مساحات bmw نفس القواعد و الاكس و تم تقسيم الضفيرة بتاعة الفيشة من غير قص ولا كسر علشان لما ربنا يكرم و نجيب الاصلي...

النتيجة
الحمد لله المساحات شغالة .... بس في حاجتين..

اول ما تدور العرابية المساحات بتشتغل منها لنفسها " عيب تقسيمة الفردة رقم 4 لم يستدل عليها ولا علي وظيفتها "
تاني حاجة ... المساحات كانت الاشارة الواحدة بتلف 3 مرات ... يعني شدة الدراع = 3 مسحات ....دلوقت مع المتور الجديد = اقل من 4 مسحات ...
ده مخلي المساحات مش بتركن صح ... يعني كل ما تشغل المساحة تركن في وضع مختلف ....

انا عرفت اتعامل ان اخليها تركن مكانها بالخبرة مش اكتر ..... و بحمد ربنا اني انجزت قبل يوم المطرة بتاعة امبارح .... بس للاسف لازم ابرم لحد ما اجيب المتور الاصلي

التكلفة كانت موتور بتركيبه 180 و كهربائي للتقسيم 30 ...

هفيدكم بالاصلي ان شاء الله حين ايجاده

بسم الله


اولا ..
الحمد للع علي عند الشيخ طه اتصرف في ترس ... و خلص الموضوع علي 200 جنيه .
طبعا كتير فحت بس فضل يحلف و يجيب في شهود انه شاري الترس من واحد ب 150 جنيه لانه مش موجود في السوق علشان دخلة الصيف ....
الحمد لله المساحات ظبطت

ثانيا ..

العفشة ....
بالمصادفة عرفت راجل محترم اسمه احمد معاه ام11 و الكلام جاب بعضه و قالي علي عفشجي في عين شمس و ان احمد ده كان في ناس قايلنله هيحتاج مساعدين و تظبيط علبة دريكسيون "زي الكلام اللي اتقالي بالظبط" و لما راح للعفشجي ده الموضوع خلص علي جلب و بارات و تياش و بقت تمام
المهم عديت عليه "علي العفشجي" كشف بجد"نزل تحت العربية علي مجرة و هز العربية و الدريكسيون و قدام و را وانا معشق" ... و في الاخر قالي كل اللي محتاجة
الجلب الكبيرة امامي
بارات
تياش ميزان امامي و خلفي
احتمال بيض "هيبان لما يتفك"

قالي المساعدين تمام ...علبة الدريكسيون تمام ...

هكمل معاه للاخر و اديكم نتيجة نهائية ان شاء الله تكون علي خير

بسم الله

الحمد لله تم تغيير الاتي
بارات دريكسيون كاملة
بارات ميزان "تيش ميزان"
جلب مقصات كبيرة
تياش ميزان خلفي

و في يوم اخر تم عمل رجلاش علبة الدريكسيون
+ محاولة تغيير جلب شداد خلفي" اللي هوه مقص علوي خلفي او بيسموه مقص هلال"

بس نتيجة عدم توافر الجلب الصح تم تركيب جلب اصغر جنب واحد بس لحين توافر الجلب او المقص ايهما اسرع

المرتين اللي اتعمل فيهم شغل اتعمل معاهم ظبط زوايا ....

الحمد لله العفشة بقت احسن بنسبة 90 % و اللي فاضل بس الشدادات الخلفي و تبقي 100 %

في مشاركة قريبة نوافيكم بالمبالغ

كمان علي جانب الموضوع تم تغيير الاتي

قاعدة موتور "فوق الفتيس"
قاعدة موتور " شداد قنطرة"
ماستر دواسة دبرياج" بيرشح زيت"
قربة مياة دورة مياة

ايه يا جدعان..هو مفيش حد بيرد ليه..يا هيما الله يسترك يا شيخ شوف الحوار ده..انا كنت بعته قبل كده..

سلام عليكم
ازيكم يا جدعان..ازيك يا هيما
الله يباركلكم فيه مشكله بسيطه كده بقالها اسبوع او اكتر شويه
الصبح بدري لما اجي ادور العربيه احسها بتترج على خفيف كده..و لو الجو برد قوي..تترج جامد شويه لمده نص دقيقه او اقل و بعدين قشطه..و لو العربيه سخنه اصلا او الجو زي اليويمن دول مثلا..مفيش لا رجرجه ولا بتاع..

ايه الاحتمالات بقى..قواعد موتور..لو لو هي..اعمل ايه عشان اتاكد قبل ما اتعامل.
ايه تاني ممكن يكون عمل المشكله..

جزاكم الله خير و ربنا يبعد عنكم و عن عربياتكم الرجرجه و المرجحة و الزغزغه

حاجتين تانيين بالمرة
انا عايز على دخله الصيف اغير القربه و انظف الريداتير و الكلام ده..السؤال بقى..القربه النظيفه منين و هل ممكن القربه الاستيراد افضل من اللي اشتريها من المحل ولا ايه..

حاجة تانيه غربيه جدا بقى..لاحظت اني لما اركن العربيه في مستوي غير افقي و اجي ادور العربيه..مش بتدور علطول..اه والله يا جدعان..
ده يطلع ايه ده يا جدعان..فلتر بنزين مثلا و لا طرمبه ضعيفه ولا ايه

بارك الله فيكم و في دوابكم

بص يا سيدي ....

اولا رجة ازاي يعني ؟؟؟ المتور متلت مثلا ولا المتور مظبوط و بتحس بهزة او ذبذبة في الجسم العربية ؟؟؟

لو قصدك ذبذبة بس و المتو مظبوط يبقي القواعد نشفت او في قاعدة مقطوعة ...
الام 11 و 12 فيها قاعدة فوق الفتيس .. قاعدة تحت قربة المياة .. قاعدة من عند القنطرة ...

لو بتحس ان المتور هوه اللي مشمظبوط يبقي ان اوان السرفسة .... فلتر بنزين و طقم بوجيهات .... وقتها تشوف بقي اي حوار الدوران علي وضع مش مستوي .... متبدأش بالطرمبة و يطلع في الاخر مثلا فلتر البنزين هوه اللي مسدود ....

كل ما هتقول معلومات اكتر هنوصل للحل اسرع ان شاء الله

سلام عليكم
ازيك يا هيما

بص يا حج..هي مش متلته ولا مربعه..يمكن دلوقتي مش بحس باي حاجة خالص..الفكرة ان في الايام البرد قوي اللي فاتت.لما كنت باجي ادور العربيه..تلاقيها و لمدة 10 ثواني كده بتترج و بعدين تبقى تمام خالص..حاليا مثلا اكمن الجو كويس..بقيت مش بحس خالص بالحوار ده..و يمكن غالبا ده زيت موتور يمكن لان لو مشكله سرفسه كانت المشكله دي هتفضل موجوده ايا كانت حرارة الجو...لكن عموما انا هعمل حوار السرفسه ده عشان ده وقته..العربيه عامله 35 الف دلوقتي ..و بردو هشوف قواعد الموتور احتياطي عشان اطمن.

موضوع انها ساعات مش بتدور علطول..هشوف البطاريه الاول و بعدين هشوف الامور هتمشي ازاي..

المهم دلوقتي بقى: قربه المياه عشان انا كده بقيت رسمي من ملاك الام 11..القربه شرخت على خفيف و عايز انزل الاميريه بكرة اظبط الحوار ده...نصيحتك بقى..قربه استيراد ولا قربه جديدة من عند زكي جرجس..مين الاحسن..و هل ممكن قربه ال 516 تشتغل عادي ولا لازم بتاعتها..عشان بس يبقى فيه قدامي بدائل.

ظبطني انهارده عشان الحق اشوف انا هعمل ايه..تسلم يا كبير

بالنسبة للقرب .... كله زي بعضه ... احسنها هيقعد سنة و كام شهر .... مش فارقة ...اهم حاجة خلي بالك ان في قرب موجودة اصلي بعلامة شيري مطبب فيها مخرج .... فبدل ما تفضل رايح جاي اتأكد من كل المخارج القربة ....

لازم بتاعتها ...مينفعش ال 516
وهات جديد لان الاستيراد ممكن تبقي يادوب و متستحملش ... و كده كده الاصلي بيضرب ... اي الجديد في الاستيراد :)

في ناس ركبت بتاع الانوس بس وقتها مش هتركب حساس المية و مش هتقولك لو المية قلت

تسلم يا هيما
ربنا يباركلك يا معلم
هبقى اظبط و اروح لابنانوب عشان حوار السرفيس ده

متعرفش حد في الاميريه عشان موضوع غسيل دورة المياه و تركيب القربه و الجو ده ؟