الموضوع: لادا زيرو عاوز نصيحة

المشاركة الأصلية كتبت بواسطة nawafith

مشكور أخي Wolf2
اليوم كلمت وكيل الصيانة الخاص بالسيارات الروسية وأكد لي أنه لا خطورة في الأمر أبداً طالما أن مستوى الزيت عاد إلى وضعه الطبيعي بل أكد لي أيضاً أنه يجب تغيير زيت الشنجمان والكورنة كلما مشت السيارة 20000 كم

جميل و ان موافقك و كلام الباشمهندس على راسى بس عن تجربه ده هيتسبب فى قصر عمر الكورونه و الدليل لو سيارتك زيرو او تعرف حد معاه عبيه جر خلف زيرو شوف فى manual guide بتاعه فى اى توصيه من النوع ده و راجع موقع مرسيدس فى هذا الشأن هو بالأنجليزى ايوه بس حاول تترجمه و شوف الأسئله حول الكورونه فى مواقع السيارات مع الوكلاء (المحترفيييييييييين !!!!!!!!!!! ) مش الى تروحله بعيب فى العربيه وانت لسه فى الضمان يقولك ما كل الى واقفين دول زيك و دة عيب تصنيع و خطأ فنى أو المصنع و تلاقى نفسك بتكلم واحد مش مهتم اصلا بحاجه اسمها خدمه ما بعد البيع و بعد كده مستنى أى إجابه صادقه مهنيه محترفه (أشك ) و طبعا انا ماتمناش ليك الا كل خير تحياتى

سؤال برة الموضوع انت جايب لادا عشان تشغلها تاكسى؟
ولا ليك انت؟
ولو ليك""" ايه اللى خلاك تجيبها عن باقى العربيات؟

المشاركة الأصلية كتبت بواسطة Abdm

يا أستاذ ولف أنا كتبت هنا كتيير عن البحث عن حلول لبعض مشاكل اللادا مثل :
ملص بيض المقصات وكيفية تجنب حدوث ذلك بيقولوا عملوا تعديل فى اللادا المصرى لكن هل تم نفس التعديل فى الروسى بالنسبة للبيض المقصات والعفشة أم لا ومشاكل تربط العفشة كل شوية والبيض الكتير قوى بتاع المقصات الواحد هيلاحق علية اذى .
المشكلة التانية مشكلة السخونة وخاصة فى اللادا الروسى الغير معدلة ذى المصرى فى موضوع السخونة هل تم عمل تعديل لذلك
أنا لم أجد اجابات واضحة عن اللادا الروسى الجديدة خاصة فهل لديكم اجابات تفصيلية عن ذلك
رجاء الرد الشافى الوافى لانى كنت ناوى أجيبها وما زلت لكنى متردد جدا لانى مش فاضى للمشاكل الكتيير ووجع الدماغ وأنا بتكلم عن الروسى الزيرو هتريحنى وأنسها كتتير ولا لآ رجاء التوضيح بالتفصيل عن جميع النقاط عل وعسى أروح أجيبها وجزاكم اللة خيرا .

شوف يا سيدى تيجى نتكلم بصراحه ولا نضحك على بعض؛؛؛؛؛؛؛؛
أولا زى ما بيقولو المعروض على قد المدفوع .
ثانيا احنا بنشكر فى لادا بصراحه من وجهه نظرى عشان شويه أسباب بسيطه ( مع العلم أنى من عشاق لادا ) و هاتكون أنتا السبب أنى أتكلم بصراحه يمكن ما تعجبش كل الناس و خصوصا الى كان متردد زى حضرتك فى الشراء و بعدين قرا كلمتين فى هذا المنتدى الموقر و قام و قال اركب زيرو ب حاجه و خمسين الف واديها ماشيه و لما تقابلنى مشكله ابقى اسئل حد عارف او اعمل search عل المنتدى و مثيله للخروج من الأزمه ( الشيء بالشيء يذكر )و بسبب هذا المقال هيراجع نفسه عموما اسمع يا سيدى او إقرا .
لادا فى المقارنه مع فيات حتى اواسط التسعينات تكسب ؛؛؛؛؛؛؛؛ حلو.
لادا فى المقارنه مع السيارات السويدى تكسب حتى التسعينات
لادا فى المقارنه مع اليابانى القديم ( تمانينات ) و الأمريكى و الأوروبى عموما تمانينات ( تكسب )
لغايه كده حلو ماشى .
وده ليه عشان قطع غيارها حنينه ( 2105 - 2107 )- الميكانيكه مش محتاجه عباقره - العربيه واسعه و شنطتها واسعه - و يعنى ؛؛؛؛؛؛ روسى هى دى أشهر الأسباب
لادا بقى فى الألفيه الجديده و دخول الكورى و الصينى الفول اوبشن أو حتى الفاضى منه عذرا عذرا ( تخسر)
ده انتا لما تركب باور و تكييف العربيه لو زيرو تلخبط فى المشى و انا اتحدى الوكيل المصرى لو عرف يظبط العربيه بيهم الأتنين مع بعض
وده يرجع لسببين ( اولا معدل التطوير فى أشهر سياراتان للادا بطيئ جدا - إصدار موديلات جديده تحت مسمى لادا بسيط و متواضع امثال لادا سمارة و اليكو و نيفا و النوعيات الى فاتت ديه فيها مشاكل فى توافر قطع الغيار مع ان الشيء ده محيرنى هى مش اى شركه بتعمل عربيه بتكسب على الأقل من بيع قطع غيارها 30 سنه على الأقل و لا العيب فى التوكيل مش عارف .
شكلك تهت منى ياعم من الأخر لو تعرف على الأقل 20 % عن لادا روح اشتريها لو ماتعرفش هاتزعل منها و هتحس ان ناس كتير ( خدعوك فقالوا) و هيساعد على ده (الوكيل المتواضع داخل مصر) ده لو انتا مصرى
( اسف الآفكار مش مترتبه لأنى موجود فى الغردقه حاليا و حبيت ارد يمكن تعرف تلم كلمه من المقال على اختها عذرا و للموضوع بقيه كتييييييييير )تحياتى

المشاركة الأصلية كتبت بواسطة abdm

شكرا ليك جدا يا أستاذ ولف أنا الحمد للة أعرف كتيير عن اللادا وقريت تقريبا كل المواضيع ومن زمان وأنا متابع وعلشان كدة أنا مش كرها وميال ليها لآنها عربية قوية وتستحمل شوارعنا الجميلة ومش ضعيفة وأنا مش فارق معايا الباور أو التكييف لآنى ممكن أجيب عربية زيرو صغيرة من غير تكييف أو باور ذى الماروتى أو الآلتو أوبيكانتو فاضية مع الوضع فى الآعتبار الآلتو والبيكانتو قطع غيارهم غالية ومش منتشرة على خلاف الماروتى واللادا على الرغم من قوة العفشة فى اللادا لكن من الجانب الآخر لها عيوب كتيير أنا خايف منها التى تخص العفشة حتى لو زيرو لانهم والله أعلم تقريبا ما عملوش تعديل فى الروسى ذى المصرى لآنى أنا يهمنى الروسى فقط وميزة الشنطة والوسع فى اللادا أفضل . فهل أهم حاجة موضوع العفشة دة متعب قوى ولا ملوش مشاكل
وموضوع السخونة فى الروسى هل أنا هشترى عربية زيرو وأروح أغير دورة التبريد بتعتها وأصرف وهى لسة جديدة ولا موضوع السخونة فى الروسى مش موجود تم تعديلة . يا ريت المساعدة بقدر الامكان فى الآجابة عن الآسئلة دى علشان ناوى أخد قرار بأذن الله فى اليومين اللى جايين فى الآسبوع دة وجزاكم اللة خيرا

جزاكم و نحن ان شاء الله.
شوف هو الموضوع بمزاج الوكيل يعنى ايه ؛؛؛؛ يعنى ممكن تلاقى شحنه نازله متعدله لمصر أو ماتلقيش عموما كده او كده إختيارك للروسى يجب الا تتراجع عنه و لو حظك جه فى حته مش متعدله زى الى حصل معايا ؛؛؛؛ الموضوع بسيط خالص اولا تغير الردياتير بآخر 3 ماسوره لإن الى نازل فيها 2 ماسورة بس ؛ ثانيا تتخلص من المروحه ( 4 ريشه بتاعتها ) و تجيب واحده 6 أو 7 ريشه تويوتا و تركبها مكانها بس يا سيدى و ماتدخلش نفسك فى مصاريف تانيه و أهى شغاله معايا بقالها 5 سنوات و زى الفل ما شاء الله و شوف فى عز الحر كنت بروح بيها بورسعيد و ارجع تانى و هى ماتقولش يعنى هى يابانى ( الحمد لله )
نيجى بقه للطامه الكبرى ألا و هى العفشه و ما أدراك ما العفشه
صولات و جولات معاها ؛؛؛؛؛؛؛ المهم هاقولك معلومه -عفشه لادا مافيهاش مشكله بتاتا بتاتا بتاتا ----- أصبر بس عليا المشكله فى وزن الموتور و هو ده السبب الرئيسى فى استهلاك العفشه و ملص البيض و تقل الدريكسيون و تكسير المقصات و استهلاك الكاوتش الأمامى و لادا مش قادرة تخفف الوزن ده بحتته تعديل بسيطه أو حتى تركب اسكاترة فى عاربياتها المهم خد بالك من البيض اهم حاجه ركز اهم حاجه و يجب تغييره كل 20000 كيلو على الأكثر و سيبك بقه من الى بيتشحم و فشر التجار ده أنا يهمنى بيضه ماتملصش فى ضربه فرامل و لا مطب و لا ملف عاصى شويه ده المهم ( البيض ده هاتلاقيه الألمانى و هو بدون مشاحم ) و أغلى من الى موجود 3 مرات ده من الآخر و على بلاطه و باقى مكونات العفشه سهله بس مش زى البيض و موضوع تربيط العفشه ده بسيط جدا يا سيدى عند اى أسطه بليه مفتاحين 17 و 19 و 23 و هايربطهاك فى عشر دقايق ب 10 جنيه و أبقى بص عليها كل شهر مرة و خلاص ياعم ---- العربيه اعتماديه جدا بس انتا تعرف تخليها تشقى معاك فى كل حته - على فكرة انا مافيش عربيه صمدت معايا زيها و كنت و ما زلت أخرج يوم الأجازه بتاعتى الآقى نفسى رايح اسكندريه اسماعيليه بورسعيد انا و صاحبى نتغدى من ورا زوجاتنا ونيجى و ما شيلش همها إطلاقا شويه بنزين يا معلم و زيتك تمام و متع نفسك و ما تشيلش هم قطع الغيار كله ببلاش مش زى انواع تانيه ( فيات طبعا ) لازم لها طقوس معينه قبل ما تسافر و ظبط و مراجعه طب شوف لما اوقفها تلات اربع ايام ماخرجش بيها مش هاتصدق تعطل بقه و تلخبط و تتنيل لمده ساعه زى ما تكون زعلانه و بعدين تتظبط من نفسها - عموما كله بسيط و توكل على ربك - شرط ان تكون فلوسك حلال -- عذرا ما تفهمنيش غلط بس ده لكل القراء و فى الأول و الأخر احنا محتاجين بركه ربنا فى كل حاجه مش كده -- مرسيدس - لاد ا ستر ربنا أفضل تحياتى و سعيد بالرد عليك