غفوة أثناء القيادة ( كيفية تجنبها للنقاش)

**د.محمود صلاح** · 22-11-2009 10:18 AM

السلام عليكم

اسمحوا لى اطرح موضوع للنقاش ,

من منا لم يغفل او ينعس أثناء القيادة ؟ وبالذات فى المسافات الطويلة

هل تعلم ان من أهم اسباب الحوادث هو النوم خلف الدركسيون ؟

وان غفوة ثانية واحدة تساوى 27 متر تقريبا قد يحدث فيها ما لا يحمد عقباه ؟

هل تعلم ان من ينامون اثناء القيادة هم من قدامى السائقين ( يمكن من كثرة الثقة ) , اما المستجدين فتلاقيهم مركزين ومصحصحين

من اهم النصائح لتنجنب النوم اثناء القيادة : -

1- تجنب القيادة لمدة اكثر من ساعتين دون استراحة
2- تجنب السفر لمدة 10 ساعات فى اليوم
3-تجنب السفر فى اوقات النوم مثل العصاري وآخر الليل
4-تجنب الأكل الكثير حيث يؤدى للتخمة والشعور بالنعاس
5- محاولة شرب منبهات مثل القهوة والشاى والكوكا
6-محاولة التحدث مع من بجوارك
7-فى حالة القيادة بمفردك حاول تشغيل صوت كاسيت مزعج عشان ماتنامش وبلاش الاغانى الهادية اللى بتنعس
8-افتح الزجاج وطلع راسك برة - عشان تبرد وماتنامش - ههههه
10-محاولة قزقزة لب او مسليات حيث ان مخك لن ينام وانت بتاكل
11- اخيرا اذا غالبك الشعور بالنعاس اركن على جنب خارج الطريق تماما وفى منطقة ماهولة وحاول تريح فى مكانك حتى ولو ل 5 دقائق .

أى افكار ؟

**adel1414** · 22-11-2009 10:25 AM

موضوع رائع فعلا..لان غفوة بسيطة ممكن تساوى حياة

**Michael_Lanos** · 22-11-2009 10:35 AM

انا عن نفسي احب اشرب طول ما انا سايق (بس اكون ضامن وجود حمام او مكان للراحه) وكمان اتسلى بحاجه اسمعها ولو فيها حكايه كمان تخلى الواحد يندمج معاها، وبرده الكلام مع اى حد مسلى

لكن لو بابا بيكون جنبي كل شويه خد بالك يا مايكل، سوق بالراحه، الرادار يا مايكل، عاوزين نوصل البيت سلام ... طبعا بيسليني برده وبيبقى نفسي انام بس مين يسيبك تنام بقه.

**ZALABANY** · 22-11-2009 10:47 AM

أنا بأه مش عارف ألاقي حل للي انت بتقول عليه ده وما بعرفش افوق نفسي نهائيا لدرجة اني مره كنت راجع من اسكندرية ونمت 3 مرات وفي كل مره اركن على جنب انام تلت ساعه وقوم اغسل راسي ووشي بميه ساقعه واطلع على الطريق انام برده عشان كده ما برداش اطلع على الطريق الا لما ابقى نايم كويس بس احيانا الظروف بتحكم مش عارف اعمل ايه

**Hegazio** · 22-11-2009 10:59 AM

المشاركة الأصلية كتبت بواسطة zalabany2007

أنا بأه مش عارف ألاقي حل للي انت بتقول عليه ده وما بعرفش افوق نفسي نهائيا لدرجة اني مره كنت راجع من اسكندرية ونمت 3 مرات وفي كل مره اركن على جنب انام تلت ساعه وقوم اغسل راسي ووشي بميه ساقعه واطلع على الطريق انام برده عشان كده ما برداش اطلع على الطريق الا لما ابقى نايم كويس بس احيانا الظروف بتحكم مش عارف اعمل ايه

ممكن تسوق سريــــر !!!

**kemo0o** · 22-11-2009 11:08 AM

للاسف الموضوع ده حصل لي كتيير وكنت بعلي الكاسيت ع الاخر بس مفيش فايدة.

في الاول كنت بقاوم نفسي عشان عاوز اوصل البيت بس كنت بوصل البيت وانا مش فاكر انا مشيت ازاي ولا ايه اللي حصل والله

بس دلوقتي !! أركن على جنب وانااااااااااااااااااااام ولما اصحى ابقى اروح .... ولكن في اوقات الواحد بيكون مضطر فنصيحة مني افتح شبابيك العربية ع الاخر وياريت لو تخلي ايدك برة الشباك هتفوق شوية .

وربنا يستر

**Islam_galal** · 22-11-2009 12:16 PM

سفر الفجر خطر جدا للي مش نايم كويس ، لأن طلوع النهار أثناء القيادة بيخللي مخي يتيبس تماما و النوم بيبقي لا إرادي

اللب من أفضل الحلول و معاه حاجة ساقعه و الأفضل لو جنبك حد و تفتح معاه أي موضوع مستفز أو مثير

شكرا للموضوع ، مهم جدا جدا