الموضوع: فضفضه ومخاوف (الساجا الموديل الجديد من بروتون)

المشاركة الأصلية كتبت بواسطة ahmedfathy77

السلام عليكم ورحمة الله وبركاته

طبعا الاخوة استفاضوا فى شرح الفروق بين العربيات اللى فى نفس الفئة السعرية واللترية اللى ممكن تنافسها الساجا بس انا ليا شوية ملاحظات :
1- لو استخدم التوكيل نفس اسلوبه العقيم فى الدعاية عن الجين 2 والبيرسونا هتبقى افشل عربية فى مصر ليه
- زى ما الدكتور محمد قال اللى بيلفت نظرنا للجين والبيرسونا هو شكلها والعربية مش وحشة بس مش مبهره زى الجين فالنقطه دى معطلة معاها .

2- الناس اللى بتشترى فى فئة التسعين الف غير اللى بتشترى فى فى فئة الستين الف لان الفئة الاولى ممكن تشترى عربية مش معروفة اوى على سبيل المغامرة زى اللى اشتروا جين فى الاول على الرغم ان مكنش فيه اى حاجة معروفه عنها يعنى شاريها لمزاجه انما الفئة التانية مش فئة مزاجات خالص دى فئة العربية لازم تكون فيها عملية جدا وموفرة فى كل حاجة وقصة المزاج دى انساها .

3- بروتون ملهاش قاعدة كويسة لمحلات بتبيع قطع غيارها فى مصر هى متركزة فى تلات اربع مدن كبيرة فى مصر مش عاوز اقول ان فى اماكن ومدن كتير جدا متعرفش بروتون اصلا صحيح العربية بدات تنتشر اليومين دول بس مش كفاية خالص لعربية المفروض تنتشر فى طبقات مختلفة وفى اماكن مختلفة.

4- سعر قطع غيار العربية وانتشارها اعتقد ان ده هيكون كلمة السر ومفتاح انتشار العربية دى خاصة انى بثق فى عربيات بروتون جدا ومعتقدش انها هتكون عربية وحشة بس مش واثق ان قطع الغيار هتغرى الناس انها تشتريها

5- الميكانيكية كلها فاهمه فى اللانوس دلوقتى بس طبعا نسبة مش كبيرة بتفهم فى بروتون انا بتكلم على عربية المفروض انها تتباع فى مصر كلها مش بتكلم عن القاهره والاسكندرية والمنصورة وخلاص.

6- الدعاية الدعاية الدعاية ياما عربيات معفنة اتباعت فى مصر وهى متستاهلش وعربيات جامدة جدا واقفه محلك سر بسبب الدعاية .

فى النهاية ياريت الجماعة بتوع التوكيل يفكروا كويس لو عاوزين ينجحوا العربية دى ويسالوا نفسهم سؤال لو انا واحد جاى يشترى عربية فى الفئة دى ايه اللى هيخلينى اسيب اللانوس اللى اثبتت كفاءة منقطعة النظير فى السوق لدرجة ان اعضاء موقع كونتاكت كارز اختاروها احسن عربية مستعملة فى السوق المصرى واللوجان واشترى الساجا لو عرفوا يحددوا الاسباب دى كىيس ويركزوا عليها فى حملة اعلانية محترمة ممكن ساعتها العربية تسمع بعد سنة مثلا

مفيش حاجة مستحيلة المهم بذل الجهد المطلوب لنشر العربية

+1111111111111111
طبعا الكلام اللى ما ينفعش ييجى بعده كلام كالعادة
واحشنى جدا يا باشا و ميرسى على المشاركة الجامدة