الموضوع: كوري ولا ياباني؟؟؟

المشاركة الأصلية كتبت بواسطة momopersona

فى فرق واضح بين الصينى والكورى
وفى فرق واضح برده بين الكورى واليابانى
فى انظمة التعليق والثبات وفى المواتير وتجميعها على السرعات العالية وفى وسائل الامان وفى مشاكل التقفيل اللى بدأت تظهر فى النيو اكسينت مثلا اهى وفى الشكل وطول العمر

نيجى بئا للخامات اعتقد وبالاخص هيونداى خاماتها ضايعة تابلوه بيشقق والتانى بلاستيك وده طبعا الناس عاجبها لانهم شايفينه ضريبة السعر الرخيص والماليزى نفس النظام بس ارحم شوية من هيونداى
شوفت بئا السيراتو وخاماتها ؟؟؟؟؟والله بمنظر التابلوه ده مادفعش فيها 80 الف ولا الله على شكل العفشة الخلفيه مشكله والله اوحش من الصينى بس الناس شايفينها على قد تمنها اللى هو حوالى 110 مثلا لان موتورها جبار على الورق بس بشهادة ملاكها اداءها تعبان اوى مقارنة باليابانى

حتة بئا الثقة فى الماليزى على فكرة 90 % من الناس واثقين فيه اوى بس بيخافو من اسعار قطع الغيار واعادة البيع والكلام ده

وبرده هائولك الكورى حاجة واليابانى حاجة تانية خالص

حتة تكنولوجيا بتاعة اليابانى انا مش قصدى ان هى مش مستخدمة فى الكورى او الكورى اقل لا انا قصدى ان شوف مثلا العربية الاوتوماتيك اليابانى بكام والكورى بكام الفرق مش 40 و50 الف لا 20 و30
شوفت الفتيس الmmt والcvt مشكله

الجودة تتمثل فى ان عربية ماتسخنش وتكسفك فى الخامات اللى بتعيش فى عمر الموتور وغيره وده اكيد فى فرق كبير لصالح اليابانى ولا ايه ؟؟؟؟؟؟؟

انا والله فاهمك بس وجهة نظرى مختلفة وده مايسيئش لوجهة نظرك بس هى مناقشة عادية دردشة يعنى ولو مدايقاك بلاش منها يا سيدى

- أنظمة التعليق فى اليابانى والكورى زى بعض

بالعكس دا فى عربيات زى الالنترا وال i30 نظام تعليقهم الخلفى Multi Link

اللى هو المفروض أفضل من Beam Axle

انا طبعا مش خبره اوى فى موضوع العفشات والتعليق بس اللى فهمته ان ال Multi Link افضل من ال Beam Axle

تخيل بقى ان السيفيك والكورولا والسوبارو والتيدا والسيتى وال Sx4 كل دول مش Multi Link

العربيات اليابانى اللى Multi Link هما اللانسر بوما والشارك والمازدا 3 الجديده

يعنى الالنترا وال i30 نظامهم زى الشارك والمازدا والمفروض انهم أفضل من الباقى

اه وعلى فكره الاوبترا كمان Multi Link :)

- تجميع السرعات مش هو المقياس والفيرنا بتجمع بسرعه رهيبه وتمنها 60 الف جنيه

- وسائل الامان بتبقى متوفره ب 2 ايرباج و Abs زى اغلب العربيات اليابانى

- التقفيل ممتاز ووارد ان يحصل مشاكل فى اى نوع

لما تقول الكورى فيه مشاكل فى التقفيل يبقى انت كدا بتعمم

انما المشاكل بتبقى متفاوته ونسبتها قليله

مش مشكله عامه واساسيه زى بروتون مثلا

- خامات هيونداى مش سيئه الا لو كنت بتبص لعربيه زى الفيرنا مثلا

لكن الانترا كويسه

والسيراتو فعلا خاماتها مش ممتازه لكن فى ال Ex وما فوق كويسه

ومجملا خامات الاتنين افضل من الماليزى والفرق واضح جدا

- موضوع التكنولوجيا

شوف الفتيس ال MMT نجح فى مصر ولا لأ ؟ وال Cvt أهو اتغير وهاينزل تبترونيك

لو هاتقوللى ان العيب فى المستخدم المصرى

وبتتكلم عامة عن التكنولوجيا اليابانيه بصفه عامة مش فى مصر

طيب فين العربيه اليابانى اللى الفتيس الاوتوماتيك بتاعها 6 سرعات زى الكروز ؟

- انا عربيتى ب 94 الف واوتوماتيك

ولا بتسخن ولا خاماتها بتكسفنى وعايشه مع غيرى من زمان وان شاء الله هاتعيش معايا طول ما باحافظ عليها

فين الجوده اليابانيه اللى هادفع فيها الفلوس دى كلها ؟

طبعا ليك كل الحق تختلف معايا زى مانا مختلف معاك وادينا بندردش ومش متضايق خالص على فكره

المشاركة الأصلية كتبت بواسطة tutankhamoun

خامات أيه اللي وحشة في البروتون ؟؟؟؟؟ .... هو ليه في تعميم في الكلام ؟؟؟
عموما برضه العربية معايا بقالها سنتين و نصف و 30 ألف كم و مركونة طول النهار في الشمس في الصيف و مع ذلك مفيش حاجة باظت مثلا من الشمس و العربية لسة شغالة كويسة و لسة مغيرتش فيها حاجة و لله الحمد .
و بعدين المكونات الخاصة بالعربية اللي راكبة في بروتون من أفضل الشركات المغذية للعربيات .
تكييف سندن ياباني .
نظام كهرباء بوش .
فرامل بوش .
الضفيرة الكهربائية بوش .
بطارية جافة ممتازة .
فتيس من ميتسويشي .
نظام iafm تم تطويره بالتعاون مع شركة بوش الألمانية و بيتم صناعته في كوريا و ماليزيا .
................... الخ .

فين الخامات الوحشة دي ؟؟؟؟؟

عربيات تم تطويرها مع شركة لوتس و بتتباع في أنجلتر و الكل عارف أن السوق الأنجليزي من الأسواق الصعبة جدا للدخول فيها بسبب أشتراطات الجودة .....
و محدش يقولي العربية مختلفة ......... لاني شوفت بعيني .... العربيات كلها تقريبا واحد اللي هنا و اللي في السوق الأنجليزي ( بروتون ) .

عموما هي في الأخر حالة نفسية بسبب الأسم ......
زي بتوع الياباني لما الكوري يتشقلب و يتشال و يتحط ........ هايفضله يقولوه أن الكوري تعبان .... مع أنهم نسيوا الياباني في بدايته كان عامل ازاي و الناس كانت بتقول عليه أيه .
و برضه نفس الموضوع متكرر مع الماليزي .... و اللي راكب كوري محسسنا أن الماليزي حاجة كوخة .

أنا معايا بروتون و ركب أوروبي كتير و ركبت ياباني ..... و معايا تجربة مع حاجات كوري الالنتر .... دايو ليجانزا و لانوس ... فيرنا .... ماتريكس ... الأوبترا .....
و مش شايف أن و لا واعربية من دول أحسن من الجين 2 في حاجة .... كل عربية منهم لها شخصية متميزة عن التانية ... و ده لا يقلل من الكوري اللي أنا جربته و لا يزود الجين 2 و لا يقللها .

و ربنا يبارك للي معاه كوري ........ و يبارك للي معاه ماليزي ..... و اللي معاه ياباني .. و اللي معاه أوروبي .

استاذ توت تحياتى ليك

انا اكيد مش هاقدر أقيم العربيه زى حضرتك لانك مالك ليها بقالك سنتين ونص

وانا ماقولتش انها بتبوظ من الشمس

انا كلامى مع مومو فى نقطة الخامات

هو بيقول انه شايف ان البروتون خاماتها افضل من الكورى وان الكورى بصفه عامه خاماته سيئه

وان السيراتو خاماتها سيئه

وانا باقول ان الكورى افضل

وانا شخصيا لما باركب الجين مبستريحش لتقفيلها وخاماتها

وللتوضيح أكتر

انا ومومو ماكناش بنتكلم على خامات العربيه من مكونات زى ماحضرتك تفضلت وذكرت مكونات الجين

انا كان قصدى على التابلوه - الجلد - البلاستيك - الفرش - تقفيل الابواب

ارجو انك تكون فهمت قصدى

المشاركة الأصلية كتبت بواسطة tutankhamoun

أستاذ حسام ..... لك تحية خالصة مني .
أنا قلت أن كل عربية لها شخصيتها و البروتون جين 2 لها شخصية رياضية و بالتالي خامات داخلية رياضية ) تقفيل بلاستيك في الأبواب و بالتالي شكل شبابي زيادة عن اللزوم .
و معاك في النقطة دي ......
أنا شوفت الأوبترا مثلا كتقفيل داخلي نقدر نقول زيها زي الواجا البريمويم ..... شوف الواجا البريميوم عاملة ازاي و يمكن الواجا كمان أفضل .
بس ده ينطبق على الجين 2 و البيرسونا فقط بعكس الواجا و بكدا كل عربية لها زبون مختلف و لها أهداف مختلفة .

و أنا زيك مختلف مع مومو في رأيه عن العربيات الكوري .... لأني بحترمها جدا خصوصا أنهم بيقدموا حاجة محترمة بسعر كويس و منافس .

و أنا قلت رأيي قبل كدا أن الكوري متطور و تتطور كتير و الموضوع مش مرتبط بتاريخ شركات .
و إلا الفيات تكتسح مثلا شركة زي الهوندا ..... و ده مش حاصل على أرض الواقع .

المهم الشركة وصلت لأيه .... مش متأسسة أمتى .

كلامك مظبوط وأكيد حضرتك أدرى بالواجا وبروتون عموما عنى

انت استاذنا وانا دايما باستفيد من ارائك ومشاركاتك

دى حقيقه والله مش مجامله