الموضوع: مساعدة فى تبطيل السجاير

المشاركة الأصلية كتبت بواسطة magyver

وانا كماااااااااااااان
اموووووت كدة بس ابطلها ومش عاارف

يلا انضم معانا علشان نبطلها سوا

المشاركة الأصلية كتبت بواسطة terrible_darsh

بص اهم حاجة انك متبطلش مرة واحدة هتتعب جامد و معتقدش انك هتقدر تكون قدها و انا بكلمك بصراحة .

الموضوع نفسي بحت مش موضوع نيكوتين داخل الجسم !

انت لو قدرت تواجهها نفسياً صدقنى و الله هتبطلها و انت مقتنع تماماً ..

و اهم شيء انك متقعدش مع حد بيدخن لفترة مش قصيرة و ابعد عن صحابك اللى بيدخنوا فترة مش قصيرة برده و جهز نفسك لحياة جديدة ..

و استعين بربنا اولا و اخيراً و ربنا معاك .

مشكلتى بجد ان كل صحابى مدخنين ومش عارف اعمل اية

بس على فكرة انا لما ببقى فى فترة مش بشرب سجاير
بحب اقعد معاهم اكتر علشان اقاوم السجاير نفسها

المشاركة الأصلية كتبت بواسطة samehafez

ايوه ثواني بس اولع سيجارة عشان امخمخ و اقولك علي الخلاصة
- ما تشربش سجاير اول ما تصحي من النوم حاول يوم ورا يوم تخلي فيه وقت طويل ما بين ما تصحي من النوم و اول سيجارة لحد ما تكون اول سيجارة دي بعد الغداء
- لو وصلت لمرحلة انك بتبتدي تدخن من بعد الغداء ابتدي خلال الفترة دي قلل من المشروبات اللي بتدخن معاها ( شاي , قهوة , نسكافيه )
- متعزمش علي حد بسجاير و متقبلش عزومة حد
- لو انت حاليا بتشرب علبة او علبة ونص في اليوم لو مشيت علي النظام ده بعد شهرين هتلاقي نفسك بتشرب 6 او سبع سجاير

كده انت وصلت للمرحلة اللي ممكن فيها تبتدي تطبق اي نصيحة من نصايح تبطيل السجاير
لبان - تفاح - هولز اللي انت عاوزه

لو الطريقه دي مشيت معاك يا ريت تقوللي ..... عشان ابتدي فيها

ههههههههههههه
ولعت السجارة يا راجل

هنجرب ونشوف

بس شهرين كتير اوى

المشاركة الأصلية كتبت بواسطة samir_adel

يا باشا اللبان و هو انتاج شركة كبيرة اسمها نيكورت و جاية من اسم نيكوتين. المهم اللبان دة جربتة كتير جدا و تأثيرة مش قد كدة! نيكورت عملت بادج لاصق.. 5 ملي و 10 ملي.. هي العلبة ب 170 جنية فيها 7 لصقات و كل يوم لصقة.. هتحس ان صدرك مقفول! و لو شربت كام سجارة مش هتحس انها بتدي في دمك زي الأول و هترميها قبل ما توصل لأخرها و في خلال الأسبوع هتكون مبطل و متنساش ان هي 60% عادة و 40% ادمان يعني ال60% دول شغل عزيمة و ارادة و جرب و هتدعيلي.

الف شكر يا غالى على النصيحة والمعلومات دى

ادعيلنا نبطلها نهائى بقى

المشاركة الأصلية كتبت بواسطة egyzizo

بصوا يا جماعة أنا هاقول لكم خبرتى فى الموضوع ده ...

- التبطيل لازم يكون مرة واحدة ، قطع فجائى ، موضوع التدريجى ده عمره ما هينفع .. حدد معاد للبدء ، تكون غاسل الطفايات اللى فى البيت ومخلص كل السجاير (أو راميها) بحيث ما يكونش فيه سجاير تحت ايدك واتكل على الله.

- لو عديت أسبوع ، يبقى قطعت 80% من المشوار، عشان كده افترض فى نفسك الضعف ، ورتب أسبوع تكون فيه بدون مشاغل ، واقعد فى البيت ولا تخرج لأى ظرف من الظروف ، قضيها نوم ، وتليفزيون ، وجرايد ، وألعاب كمبيوتر و واستحمام ، ولب وسودانى إلخ إلخ ألخ .. ونظرتك لنفسك فى الأسبوع ده هتكون : أنا عايز أعدى النهارده بس بدون سيجارة ، وبكره يحلها حلال .. ولما ييجى وقت النوم تشكر ربنا انه فوت اليوم ده بدون سجاير ، وتستعد لاستقبال يوم جديد .. هتلاقى الأسبوع عدى ، وهتلاقى نفسك فى اليوم الثامن بتصحى من النوم وانت مابتفكرش فى سيجارة اصطباحة زى زمان.

- فى الفترة التالية هتكون الأمور أخف كتير ، بس هيكون فيه أحيانا أوقات (اشتياق) (craving) للسيجارة ، ودى لما تيجى ماتقلقش لأنها بتقعد 3 دقائق فقط بالكتير ، فلو استحملت الشوق ده لمدة 3 دقائق هيعدى بسلام ، وممكن التغلب عليه بشرب كوباية مياه ، وممارسة الشهيق والزفير العميق (دى حاجات مجربة).

- لما يعدى أسبوعين تلاتة كده ، واللا شهر ، هتحس بالانتصار ، وهيجيلك وسواس ان الحمد لله انا انتصرت على السيجارة ومابقيتش عبد لها ، ومش هيحصل حاجة لما أشرب سيجارة كل كام يوم ، طالما مافيش ادمان زى زمان ..
هنا حاااااااااااااااااااااااا ااااااااااااااااسب ..
ضع هذه القاعدة الذهبية حلقة فى ودنك : (بينك وبين الفشل سيجارة واحدة) (you are one cigarette away from failure) وكررها بينك وبين نفسك .. وحط فى نفسك قناعة ان اللحظة اللى هتشرب فيها سيجارة واحدة هتهد فيها اللى عملته كله.

- لا تقدم الطعام اللى الوحش الصغير اللى عايش جواك ..
انت لما كنت مدمن دخان ، كان عايش جواك وحش كبير مسيطر عليك ، ولما بطلت بضعة أسابيع ، الوحش ده ضعف جداً وبقيت انت مسيطر عليه ، وهيفضل يضعف ، يضعف إلى أن يموت ، فلو جيت انت فى نص المشوار واديته ياكل (سيجارة) ، هيصحصح تانى ويسيطر عليك ، فخللى بالك : (donot feed the little monster)

- ضع فى مخيلتك النجاح ودايماً خليك باصص ليه ، ولا تفترض الفشل ، وان شاء الله هتنجح ..

- ملاحظة مهمة ، الفشل ليس نهاية المطاف ، بل أن الفشل هو خطوة مهمة فى تحقيق النجاح .. لأن الفشل مرة واثنين يعطى خبرة ممتازة هتساعدك فى المرة اللى هتنجح فيها ..
يعنى أقصد انك لو جبت واحد جرب يبطل 3 مرات قبل كده وفشل ، هتبقى فرصة نجاحه أكبر بكتير من واحد بيجرب يبطل لأول مرة ، لأن اللى فشل عنده خبرة أكتر من اللى بيبطل لأول مرة.

وربنا معاكم ..

ملحوظة : أنا رائيي الشخصى ان اللبان واللزقات والأدوية دى كلها وسائل بتساعد بنسبة ضعيفة ومش هتفيد لو ما كنتش راجل وواخد الموضوع جد ، فمافيش داعى للتكاليف اللى مالهاش لازمة ، لأنك لو راجل بجد هتنجح من غيرها ..


مع تحيات ..
زيزو
اليوم رقم 9 بدون دخان ..
تاريخ التبيطيل : الخميس 26/11/2009

+11111111111111

انت راجل مية مية

انا كنت بعمل كدة

بس كنت بجى عند حتتة انى احن دى وما اقدرش اقاوم

المشاركة الأصلية كتبت بواسطة zaza_lanos

هاجر وسيب البلد ومش هتحتاج الى التدخين

اروح فين طيب قولى انت

اسافر بوركينا فاسو

اه والله انا بردو واقع فى المصيبة دى ومش عارف انيلها (ابطلها) فى ناس بتقولى ان السواك كويس وحلو وبيساعد على ترك التدخين