فكرة حلوة ...
ممكن أبدأ :
أغرب و أظرف موقف حصل معايا كان زمان فى اولى كلية ، و ماكنتش لسه طلعت رخصة و طبعا ممنوع اسوق العربية ...
كنت راجع من رحلة مع الكلية ، و كان يوم غريب من اوله ، ختم بأن اتوبيس الرحلة عطل و رجعنا بالعافية عند الكلية الساعة 11 مساء بدل 7 او 8 مساء..
و كانت الدنيا شتاء و مافيش صريخ ابن يومين فى الشارع ...
و طبعا كنت عايز اروح فشاورت و اول تاكسى وقف ركبته بدون تفكير ... شئ عادى ...
و لكن اصبت بالذهول لما شفت السواق و عينيه نص مقفولة ، و عمال يغنى و يصقف و يضحك بجنون ، و يعوم بالتاكسى يمين و شمال و هو عمال يقول "ايه الزحمة دى .. شفت انا خدت الغرزة دى ازاى ؟؟" و ينطلق فى ضحك هستيرى و يرجع يغنى و يصقف تانى ، و كل شوية يروح ضارب فرملة جامدة و يضحك و يقول "ربنا ستر ... كنت هاخبط" ... مع ان مافيش قدامه حاجة ...
طبعا انا دمى نشف ... و اول ما ضرب فرملة و وقف رحت فاتح الباب و قلت له انا نازل هنا علشان عايز اشترى حاجة ، و سبت له حق التوصيلة و جريت ...
و طبعا استنيت لما نشفت فى البرد لما لقيت تاكسى تانى .. بس اتأكدت ان السواق مفتح و صاحى مش مسطول او مبرشم زى الأولانى ...
و تحياتى...
المفضلات