=================================اولا انا بعتذر لتاخري فى الرد وده كان بسبب دور برد محترم وللأسف انا لما بيجيلى برد مبعرفش اجمع خالص وبحس ان دماغي كلها سايحه على بعضها
و انا صبرت علي الرد ده بالذات لحد ما ابقى على رواقه كده علشان احاول اوصله بطريقه سهله وياريت يا جماعه تركزوا معايا نقطه نقطه
أول حاجة كيفية حساب نسبة المكسب بطريقة صحيحه
لو افترضنا ان تاجر اشترى سلعه ب 10 قروش وبعها ب 14 قرش يعنى مكسبه 4 قروش وعايزين نحسب النسبة
الطريقه الاولي ( الغلط ) : اننا نحسب المكسب من تمن السلعه الل اتباعت بيه يعني 100×(4 ÷14) = 28.5 % ودي طبعا حسبه غلط
الطريقه الثانيه ( الصحيحه) : اننا نحسب المكسب من تمن السلعه الل اشتريتها بيه( راس المال ) يعني 100×(4 ÷ 10)= 40%
اللى هيا ببساطه نسبة المكسب الى رأس المال 10:4 (4 المكسب) الى (10 رأس المال) = 40 %
طبعا الطريقة الاولي غلط وهيا دي الل ديما بيستخدمها التجار والمستثمرين لانه ببساطه بالطريقه دى استحاله توصل نسبة المكسب الى 100%
(بيستخدم التجار والمستثمرين الطريقه الثانيه فقط فى دراسات الجدوى المعده لأخذ قروض من البنوك فقط )
مثال للتوضيح
لو تاجر اشترى سلعه ب 1 قرش وبعها ب 4 قروش يعنى مكسب 300%
لو حبينا نحسبها بالطريقه الاولى 100×(3 ÷4) = 75 % شوفتو بقى الفرق قد ايه( من 300% الى 75% ) وبالطريقه الاولي استحاله تطلع المكسب 100% حتى لو التاجر اشترى السلعه ب 1 قرش وبعها ب 1000 قرش وجربوا انتم بنفسكم
للأسف اغلب الناس بتنخدع فى النقطه دي وبتحسبها بالطريقه الاولي زى ما التاجر بيقول لكن فى الحقيقه التاجر بينه وبين نفسه بيحسب بالطريقه التانيه وبتتحسب فى السوق فى نهاية كل صفقه " الجنيه عمل كام جنيه ؟"
تاني حاجه : هحاول أرد على 3 اسئله مهمين بصوره سهله وبدون كلكلعه
1- ليه دورة رأس المال فى مجال استيراد السيارات متكونش أكتر من 3 شهور ؟
الاجابة : لان بكل بساطه اللى متابع اخبار السيارات هيعرف ان أغلب الوكلاء بيستوردو فى السنه الواحده أكتر من 4 دفعات وهوا طبعا مش هيستورد شحنه جديده وهوا عنده منها كتير في مخازنه
2- ليه بنحسب كل دفعه لوحدها وليه منقولش انه دفع تمن الدفعات دى كلها الاول مره واحده وبعد كده الشركه هيا الل بتبعت ليه العربيات على دفعات ؟
الاجابه : ده مش صحيح لان ال بيحصل ان الشركه مش بتستلم تمن العربيات غير لما الدفعه توصل المينا ويستلمها المستورد هيا واوراق ملكيتها ( وده بيكون عن طريق وساطة احد البنوك الل بيضمن حقوق كل طرف باستخدام احدي الطرق البنكيه كخطاب الضمان او الاعتماد البنكي أو أحدى الطرق البنكيه الاخرى ) طبعا لو حد هنا ليه فى الاستيراد و التصدير بيكون فاهم النقطه دي كويس
3- ليه لو حبيت اشتري عربيه من الخارج وشحنتها ودفعت جماركها هيقف سعرها عليا بنفس ثمن الوكيل او المستورد مش أقل ؟
الاجابة : لان انت لو اشتريتها من الخارج بتكون اشترتها من المعرض يعنى بيكون مضاف الى سعرها الاصلي مصاريف شحن وضرايب البلد اللى انت اشتريت منها بالاضافه الى مكسب وكيل البلد والمعرض ودول الطبيعي يكون هامش ربحهم اعلى من هامش ربح التاجر فى مصر ( المفروض) لان الايجارات والعماله بره بتكون اغلى من هنا
وبعد كده هندخل فى مرحلة الشحن الل هتكون طبعا ضعف المبلغ الل بيدفعه المستورد لانه بيشحن بالمئات لكن انت بتشحن عربيه واحده فأكيد السعر هيختلف اختلاف كبير
ندخل بعد كده على الجمارك والضريبه ودي هتفرق كتير لانك هتتحاسب على السعر الل انت اشتريت بيه من المعرض برا ( الل مضاف عليه مصاريف الشحن والضرايب بتاعت البلد الل اشتريت منها وكمان مكسب الوكيل والتاجر بتعها) فبتدفع 40% جمارك على ثمن العربيه المضاف اليها كل ده وبعد كده تدفع 15% من اللى هيطلع
علشان كده بتلاقي نفسك دافع جمارك وضريبه حوالي 60 الف فى حين ان الوكيل مش بيدفع فى نفس العربيه أكتر من 32 الف لأن بيتحاسب على سعر السياره (الصافي) بأسعار الشركه الام بدون اي زيادات
تالت حاجه زي ما وعدتكم اننا نحسب بطريقه حقيقيه نسبة المستورد او الوكيل السنويه ونوجه انظاركم على نقط مكنتوش بتاخدو بالكم منها زي :أول نقطه الجمارك والضرائب : ودي فى الغالب المشترى هو الل بيدفعهم مش المستورد أو الوكيل لان الل بيحصل اول ما دفعة العربيات تنزل المينا بتلاقي المستورد بيتصل بيك ويقولك العربيه وصلت وبيروح مدفعك حوالى 30 الف والباقي لما تستلم كمان تلات او اربع ايام ( ومش بتكون لسه خلص ورقها الجمركي )
وحتي لو الوكيل او المستورد مخدش من صاحب السياره جمركها وضريبتها قبل تسليمها ليه ( وده معدش بيحصل الا قليل ) بياخد من اصحاب الشركات والمعارض الل بيكونوا حجزين كميات كبيره وطبعا تمن السيارة واحده يزيد عن المبلغ المطلوب كجمرك وضريبه لثلات سيارات ونصف اخري
النقطه دي حبيت اوضحها علشان ابين ليه المستورد او الوكيل بيحاول يعطش السوق علشان أول ما يتصل بيك ويقولك العربيه وصلت ياخد منك تمن الجمرك والضريبه عشان ميدفعهمش من معاه أو حتي يوفر كام الف مصاريف خطاب البنك علشان يضفهم لربحه واهو الناس مبسوطه ومحدش واخد باله
نيجي بقى لتاني نقطه ( الاهم ) وهي حساب نسبة الربح السنويه للمستوردين والتجار
اولا نحسب نسبة المكسب فى الدوره الواحدة
نبدأ بثمن العربيه الواحده تمام زي ما حسبها الدكتور اسماعيل = 50318 جنيه ( رأس المال )
هنزود عليهم الجمارك 40% وبعدين ضريبة المبيعات 15% يبقى = 81012 جنية
هنزود كمان 4 الاف شحن وتخليص اوراق + 6 الاف جنيه مكسب المعرض ( بحسب بزياده اهوه ) يبقى الاجمالي 91 الف جنيه
يعنى مكسب الوكيل مش أقل من 20 الف جنيه فى كل عربيه ( الل هوا مدفعش فيها أكتر من 50 الف لان زي ما وضحت قبل كده ان مش هوا الل بيدفع الجمارك والضريبه يا العميل يا اصحاب المعارض يا بالكتير جواب من البنك هيكلفه الف او اتنين )
وبكده تكون نسبة ربحه = (المكسب) 50:20 (رأس المال) = 100×(20÷50) = 40%
يعني لو كسب فى كل عربيه 20 الف بس يكون نسبة ربحه فى الصفقه الواحده = 40%
نيجي بيقى نحسب نسبة الربح السنوي بصوره مركبه (نفس المثال الل عملته قبل كده لكن بتغير النسبه الى 40%)
لو افترضت ان وكيل سيارات معايا 100 قرش مثلا وهيستثمرهم لمدة سنة فى استيراد السيارات
أول دوره:هنحسب نسبة صافي الربح وهيا 40% × 100 قرش يبقى كده مكسبه 40 قرش
ويبقى كده رأس المال بقى 100 + 40 = 140 قرش
ثاني دورة : بعد ما ضفنا ربح الدوره الاولي لراس مال الجديد هنحسب نسبة 40% × 140 قرش هيعطينا مكسب 56 قرش
ويبقى كده رأس المال بقى 140 + 56 = 196 قرش
ثالث دوره : بعد ما ضفنا ربح الدورة الثانيه للراس مال الجديد هنحسب نسبة 40% × 196 قرش هيعطينا مكسب 78.4 قرش
ويبقى كده رأس المال بقى 196 + 78.4 = 274.4 قرش
رابع دوره : بعد ما ضفنا ربح الدورة الثالثه للراس مال الجديد هنحسب نسبة 40% × 274.4 قرش هيعطينا مكسب 109.76 قرشويبقى كده رأس المال بقى 274.4 + 109.76 = 384.16 قرش
لما نحب بقى نحسب مكسبه السنوي الصافي من 384.16 قرش دول هنشيل منهم ال 100 (رأس المال الاساسي) يبقى الناتج 284.16 قرش
يعنى نسبة الربح الصافي السنوي 284.1 %
ودي نسبة فلكيه بجدانا بصراحه مكنتش عايز اصدم الناس واحسبها بالطريقه المظبوطه مش بالطريقه الل الوكلاء بيضحكو علينا بيها بس اعمل ايه انتم ال استفزتوني :_alshmokh08[1]:
اتمني ان اكون قد وفقت فى عرض وجهة نظري بصوره سهله وبسيطه
وبعتذرلك يادكتور اسماعيل على تأخري فى الرد وان كنت بتساءل ليه مش بياخدو حد من هنا من طنطا يمسكلهم وزارة الماليه او حتى الاستثمار عشان بس يعرف يحسبلهم الحسبه مظبوط
تحياتي
اولا مافيش اعتذار بين الاخوة والحبايب
ثانيا :الف سلامة عليك ومنه لله البرد اللى حجبك عنا
ثالثا:انت صبرت علشلان تفهمنا ببساطة هههه هههه امال لو استعجلجت كنت كتبت كام صفحة !!!!!!!!!!!!!!!!
رابعا ودا الاهم ايه حكاية ياخدو حد من هنا من طنطا اوعى تكون طنطاوى وماتقوليش .....هازعل قوى
قرات الرد على عجالة ولكن محتاج اقراه تانى بتانى ومحتاج ناس تقا وتقوللنا راىها
خالص تحياتى
المفضلات