نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

اقتباس:

---

المشاركة الأصلية كتبت بواسطة ahmed shohayit

جزاكـ الله خيرااااا
و اتمنى لكـ حياة سعيدة

---

كلام جميل من انسان جميل

مع اطيب التمنيات
اخوكم حسين غزالة

[B

فكر كسائق

قائد السيارة دائم التفكير ..... ليس كراكب .... لكنه يفكر كسائق ... يفكر فى المواقف المختلفة التى تدور حوله .... ولا يمكن للسائق انه يلغى تفكيره .... فى اللحظة اللى هايبطل يفكل فيها هايعرض نفسه لخطر كبير


فكر اين انت ذاهب
قبل ما انزل مشوار ... لازم اكون عارف انا رايح فين ... وهاوصل المكان ده من اى طريق ... ما بنزلش الشارع وخلاص ... وافضل اسأل واعمل مشاكل فى الطريق واعطل الدنيا كلها

فكر فى الطريق
فكر فى الطريق اللى انت اخترته .. فكر فى التقاطعات والميادين اللى هاتقابلك ... تخيلها فى ذهنك .. وفكر هاتتصرف ازاى فى المواقف المختلفة

اذا كنت موش عارف الطريق
اسأل قبل ما تمشى ... استخدم خريطة ورقية ... ودى جميلة جدا ورخيصة ... وممكن تستخدم "google map"
المهم الكلام ده تعمله فى البيت موش وانت ماشى على الطريق
وفيه ناس عندها فى الموبايل "gps" وده بصراحة ممتاز جدا ... ببساطة هاتعرف انت فين


الوقت
حاول تنزل بدرى شوية ... عشان تمشى براحتك وبدون استعجال ... وتوصل فى ميعادك بدون قلق ... ولو قدرت تروح المشوار ده فى يوم بدرى شوية ... وتتعرف على المكان قبل ما تروحه فى اوقات الزحمة يبقى هايل
يعنى انا مثلا كنت عايز اروح السيدة زينب ... ببساطة نزلت يوم الجمعة الصبح بدرى ... ولفيت السيدة زينب اكثر من مرة ... لحد ما حفظت المكان كويس .... دلوقتى الحمد لله ... لو نزلت فى اى وقت خلاص حفظت الطريق ... والطرق الجانبية لو حصلت اى ظروف


وانت ماشى
على الطريق خلاص انت عرفت هاتبدأ منين .... وعارف متى سوف تهدأ من سرعتك ... ومتى سوف تزيد من سرعة السيارة .... وفى اى منطقة سوف تراعى الاشارات والتقاطعات .... ومتى هاتغير حارتك ... وامتى هاتلف يمين او شمال .... كل ده انت راجعته قبل ما تنزل الشارع ... وهاتبدأ تنفيذه بدقة


ماتسرحش
ما تفكرش فى اى حاجة غير الطريق ... وركز وانت ماشى كويس جدا
هههههههههه
يعنى انا رايح المعادى
وماشى على الكورنيش
وبدل ما اوصل المعادى ... طلعت كوبرى غلط ... وجدت نفسى ماشى على طريق حلوان تقريبا
ههههههههههه
المهم رجعت تانى وربنا ستر
السرحان موش كويس .... حتى ولو انت مذاكر الطريق

وبعد ما توصل
فكر ايه اللى حصل وانت ماشى
ايه اللى لازم تاخد بالك منه فى المرة اللى جاية
التقاطعات
المناطق المزدحمة
المناطق المكسرة فى الطريق ههههههههههه والمطبات اللى انت كلتها وانت ماشى
فكر المرة اللى جاية ان شاء الله هاتعمل ايه ؟
عشان توصل بالسلام


القيادة
موش مجرد مهارات لتحريك السيارة
كل يوم هانتعلم مع بعض حاجة جديدة ان شاء الله


المرة القادمة
كيف تحسب المسافات


مع اطيب التمنيات
اخوكم حسين غزالة

[/B]

موضوع جميل قوووووى

السلام عليكم أستاذ حسين
موضوع حلوووووو قووووى ومجهود راءع
أحب أقولكم أنى مستجدة فى السواقة بسوق اوتوماتيك وبتعبير اللى بيسوق مانيوال بطل
الحمد لله اتعلمت وبقيت اروح بالعربيه الشغل فى سموحه وانا ساكنه فى ميامي ووديت الولاد سان إستيفانو ورحت فتح الله
طيب فين المشكلة ؟؟؟
المشكلة دلوقتي بقالى ١٠ ايام مطلعتش بالعربيه ليه مش عارفه جوزى أجازه وبيودينى ويجيبنى وانا مرتاحه كده يعنى مكسله ورجعت أخاف تانى مع ان الخوف مكنش راح اولانى
انا حسه ان الموضوع نفسى وعارفه ان ١٠ ايام مش كتير بس كتير لمبتدءه زىى
خصوصا ان الموضوع اتكرر معايا لما خبطت مره وانا رايحه الشغل وداخله سموحه من ناحيه كيروسيز وماشيه فى حارتى كان فيه عربيه ماشيه فى نفس اتجاه العربيات اللى داخله سموحه زىى بس هو ماشى فى الحارة اللى خارجه من سموحه على شارع أبوقير اتفاجىء بتوكتوك قدامه فحب يدخل معانا فى حارتنا اللى داخله سموحه فكسر جامد عليا مع أنى فرملت ومقدرش المسافة اللى داخل عليها اللى هى بينى وبين العربية اللى قدامى الحمدلله كانت بسيطه رفرف واكسدام رديت الرفرف عشان الباب مكنش بيفتح بسهوله وسايبه الاكسدام محتاج دهان عشان العين ههههههههه
المهم بعد الخبطه دى قعدت أسبوع لحد ما رجعت اسوق تانى يعنى الموضوع اتكرر أنى انقطع عن السواقة وده مضايقنى وعاوزه اتغلب عليه خصوصا أنى لسه فى الاول

السلام عليكم
ربنا بجد يكرمك على المجهود اللى انت بتعملة يا استاذ حين بجد مجهود جبار انا على فكرة بقرا فى الموضوع بقالى حوالى 5 ايام ودلوقتى فى الصفحة 73 المهم انا طبعا مبتدا ومطلع رخصة من 7 سنين وكنت اخدت كورس كدة برضة من 7 سنين وطلعت الرخصة بواسطة المهم انا جبت عربية دلوقتى وجربت اسوق ولقيت نفسى كويس لدرجة انى مشيت على 130 على الكورنيش فى اسكندرية وكنت مبسوط وعندى ثقة فى نفسى تانى مرة نزلت خبطت ضهر العربية ففى عبية تلاجة نقل والازاز اللى عندى اللى ورا وقع كلة وطبعا فقدت الثقة خالص وبقت بمشى على اقل من مهلى ولازم يكون معياا حد وطبعا عندى مشكلة فى الركنة وعندى مشكلة انى مش بتحرك بالعربية كتير ولازم يكون حد معايا لدرجة انى فكرت ابيع العربية من خوفى اللى نتج من الخبطة مش عارف بفكر اشوف حد يدربى تانى غير صحابى وقريبى وطبعا والدى بيسوق بقالى 15 سنة بس لما بيركب معايا بتلبش ويخوفنى زيادة مش عارف اعمل اية

السلام عليكم أستاذ حسين

وعليكم السلام ورحمة الله وبركاته

موضوع حلوووووو قووووى ومجهود راءع

كثر خيرك ده بس من ذوقك

أحب أقولكم أنى مستجدة فى السواقة بسوق اوتوماتيك وبتعبير اللى بيسوق مانيوال بطل

كلنا بنتعلم وهانفضل نتعلم من المواقف المختلفة اللى بتمر بنا

الحمد لله اتعلمت وبقيت اروح بالعربيه الشغل فى سموحه وانا ساكنه فى ميامي ووديت الولاد سان إستيفانو ورحت فتح الله

كويس قوى ... ولو انى ضعيف جدا فى اسكندرية ماعرفش فيها حاجة خالص ههههههههه

طيب فين المشكلة ؟؟؟
المشكلة دلوقتي بقالى ١٠ ايام مطلعتش بالعربيه ليه مش عارفه

[[b]لازم ممارسة

جوزى أجازه وبيودينى ويجيبنى وانا مرتاحه كده يعنى مكسله ورجعت أخاف تانى مع ان الخوف مكنش راح اولانى

[b]
الخوف ده هايروح بعد التدريب بشكل علمى
وممكن الخوف يرجع فى اى وقت لو الواحد حصله اى موقف
حتى ولو كان متمرس وقديم فى السواقة
الخوف شىء طبيعى لكن لو كان فى حدوده المعقولة

لدرجة انه لو واحد قديم فى السواقة
وحصله موقف
النصيحة بتكون
اركن عربيتك ... واشرب لك حاجة ساقعة
وهدى اعصابك
وارجع اركب عربيتك تانى
ده للناس القديمة فى السواقة
ما بالك بالناس الجديدة ... الخوف شىء طبيى ... يروح بالعلم والمعرفة


انا حسه ان الموضوع نفسى وعارفه ان ١٠ ايام مش كتير بس كتير لمبتدءه زىى
خصوصا ان الموضوع اتكرر معايا لما خبطت مره وانا رايحه الشغل وداخله سموحه من ناحيه كيروسيز وماشيه فى حارتى كان فيه عربيه ماشيه فى نفس اتجاه العربيات اللى داخله سموحه زىى بس هو ماشى فى الحارة اللى خارجه من سموحه على شارع أبوقير اتفاجىء بتوكتوك قدامه فحب يدخل معانا فى حارتنا اللى داخله سموحه فكسر جامد عليا مع أنى فرملت ومقدرش المسافة اللى داخل عليها اللى هى بينى وبين العربية اللى قدامى الحمدلله كانت بسيطه رفرف واكسدام رديت الرفرف عشان الباب مكنش بيفتح بسهوله وسايبه الاكسدام محتاج دهان عشان العين ههههههههه


المشى الداخلى مافيش فيه خطورة
لا قدر الله لو حصل حاجة بتتصلح
الخطر لو المبتدأ استعجل ومشى على الطريق السريع

المهم بعد الخبطه دى قعدت أسبوع لحد ما رجعت اسوق تانى يعنى الموضوع اتكرر أنى انقطع عن السواقة وده مضايقنى وعاوزه اتغلب عليه خصوصا أنى لسه فى الاول

اخرجى بالعربية لوحدك
الصبح بدرى
امشى كل يوم نصف ساعة فقط
يعنى من الساعة 6.5 لحد 7 صباحا

وبعد كده
اخرجى فى اوقات الزحام
امشى حوالين المنزل

وبعد كده اخرجى مشاوير داخلية
ومعاكى حد راكب جنبك حتى ولو مابيعرفش يسوق
هاتاخدى ثقة جامدة بوجوده جنبك
بواب العمار مثلا

خدى وقتك
شهر .. شهرين ثلاثة
موش مهم الاستعجال
المهم انى امشى بشكل علمى وانى اكون فاهم

موش كل واحد بيحرك العربية
بيعرف يسوق

التعليم شىء
وتحريك العربية
شىء آخر

ابدأى من الغد
الساعة 6.5 صباحا
اخرجى بالعربية لوحدك
فى الطرق الداخلية
موش على طريق سريع
وارجع البيت الساعة 7
استمرى فى الحكاية دى زى ما انت عايزة

واحنا مع بعض نتشاور
ونتعلم مع بعض من اخطائنا
وانا تحت امرك

مع اطيب التمنيات
اخوكم حسين غزالة

السلام عليكم

وعليكم السلام ورحمة الله وبركاته

ربنا بجد يكرمك على المجهود اللى انت بتعملة يا استاذ حسين بجد مجهود جبار
الشعور بالخوف شعور وحش قوى ... وانا مريت بنفس الشعور لدرجة انى فكرت ابيع العربية فى نفس الاسبوع اللى انا اشتريت فيه العربية ... وللاسف مافيش حد من اللى ركبوا معايا قالى اى حاجة من اللى مكتوب .... كل اللى انا عرفته من الاجانب ومقالتهم المتخصصة فى القيادة ... وطبعا فادتنى جدا جدا جدا ... ومازالت بتعلم منها كل يوم .... واتمنى لكم التوفيق والسعادة


انا على فكرة بقرا فى الموضوع بقالى حوالى 5 ايام ودلوقتى فى الصفحة 73
عشرة على عشرة .... دى بداية صح ... استمر فى القراءة حتى ولو شعرت انك اصبحت كويس جدا ... استمر لازم هاتلاقى كل يوم حاجة جديدة تضاف الى رصيد خبراتك


المهم انا طبعا مبتدا ومطلع رخصة من 7 سنين وكنت اخدت كورس كدة برضة من 7 سنين وطلعت الرخصة بواسطة المهم انا جبت عربية دلوقتى وجربت اسوق ولقيت نفسى كويس لدرجة انى مشيت على 130 على الكورنيش فى اسكندرية
كويس جدا انك عندك ثقة فى نفسك .... لكن خطأ كبير جدا انك تمشى على الطريق سريع ... الطريق السريع مشاكله قليلة جدا ... لكن خطيرة جدا ... خليك فى الداخلى فترة لحد ما تشعر بالتمكن الكبير ... وكل طريق وله مهاراته سواء داخلى او طوالى ... واضح انك من النوع الجرىء هههههههههههههههه ....


وكنت مبسوط وعندى ثقة فى نفسى تانى مرة نزلت خبطت ضهر العربية ففى عبية تلاجة نقل والازاز اللى عندى اللى ورا وقع كلة وطبعا فقدت الثقة خالص وبقت بمشى على اقل من مهلى ولازم يكون معياا حد
قدر الله وماشاء فعل ... كويس جدا وجود حد راكب جنبك ... حتى ولو مابيعرفش يسوق ... هاتاخد ثقة جامدة بوجوده بجوارك ... الاهم هو التدريب بشكل علمى ... كل مهارة تكون انت عارفهة كويس وعارف ايه المطلوب لتنفيذها

وطبعا عندى مشكلة فى الركنة
كلنا عندنا مشكلة فى الركنة .... هات واحد قديم فى السواقة ومتعود يركن فى مكان واسع ... وخليه يركن فى مكان ضيق ....هههههههههه "هايغنى ظلموه" .... ركن السيارة له قواعد ... وفيه مشاركات كثير بخصوص ركن السيارة فى نفس الموضوع .... ممكن بعد ما تقرأ المشاركات دى .... تجيب جيركل مياه فارغ ... وتحطه بجوار الرصيف وتحاول تركن خلفه .... وتفضل تتمرن على الموضوع ده لحد ما تلاقى نفسك استاذ .... بس حاول تقرأ المشاركات الخاصة بركن السيارة الاول


وعندى مشكلة انى مش بتحرك بالعربية كتير ولازم يكون حد معايا لدرجة انى فكرت ابيع العربية من خوفى اللى نتج من الخبطة
انا فى الاول فكرت ابيع العربية فى نفس الاسبوع من غير ما اخبط حاجة .... الخوف هو اللى بيعمل كده وموش هاتتخلص من الخوف ... الا بعد ما تقرأ كويس المشاركات ... وتتعلم بشكل علمى ... وتاخد وقتك زى ما انت عايز ... شهرين ثلاث ستة اشهر ... موش مهم .... المهم ما تستعجلش خالص .... وكله هايبقى تمام التمام

مش عارف بفكر اشوف حد يدربى تانى غير صحابى وقريبى
المهم فى المدرب انه يكون فاهم كويس قوى ... وبيعرف ينقل المعلومة كويس قوى ... موش كفاية انه يكون بيعرف يسوق كويس .... اقرآ المشاركات وخلى اى حد يخرج معاك .... وحدد الاول ايه هى المهارة اللى انت عايز تتمرن عليها .... المهارات كثير قوى ... وكل مرة اتعلم وركز على مهارة معينة لحد ما تلاقى نفسك استاذ ..... مثلا عايز تطلع كوبرى وتقف عليه وتستمر فى السير ...... يبقى ده موقف صعب ورخم للمبتدأ ... استمر فى التدريب على المهارة حتى لو فضلت شهر ... المهم بعد ما تخلص تعليم مهارة معينة ... انقل على مهارة اخرى ... وهكذا

وطبعا والدى بيسوق بقالى 15 سنة بس لما بيركب معايا بتلبش ويخوفنى زيادة مش عارف اعمل اية
اخويا الكبير نفس القصة ... بيسوق كويس جدا ... لكن عصبى جدا .... ومابيعرفش ينقل المعلومة .... وكل اصحابى نفس الحكاية .... لازم تقرأ كويس .. والحاجة اللى تقرأها اخرج اتمرن عليها .. وهكذا ... واكتب كل تجربة بتمر بها ... ونتناقش فيها مع بعض .... ما فيش اى مشكلة خالص .... لحد ما هاتلاقى نفسك استاذ وبتعلم ناس تانية

وانا عن نفسى فى انتظار
مداخلاتكم
عشان اعرف آخر تجاربكم
ونتعلم مع بعض

مع اطيب التمنيات
اخوكم حسين غزالة

ماتشرحوا شويه للاوتوماتيك

انا متشكرررره لحضرتك جداااا يا أستاذ حسين
انا فعلا من كم يوم بدأت اطلع تانى بالعربيه اول يوم رحت فتح الله بس وانا راجعه وبلف فى شارع ٤٥ العربية حكت حاجه بسيطه فى الرصيف تانى يوم وديت الولاد كورس الرسم ورحت الشغل
هو انا حسه شويه ان السواقه فى إسكندرية اسهل من القاهرة
كمان ظبط المرايا اللى قريته هنا فى الموضوع نفعنا جداً لأنى تقريبا كنت بشوف عربيتى ومبشوفش العربية اللى جمبى
بس مش فاهمه موضوع نص المرايا سماء ونص ارض

اقتباس:

---

المشاركة الأصلية كتبت بواسطة islamabady1980

ماتشرحوا شويه للاوتوماتيك

---

الاوتوماتيك سهل رجلك اليمين بين البنزين والفرامل والشمال مبنستخدمهاش خالص
انت مثلا دايس بنزين وبدأت تشوف زحمه تبدأ تلم سرعتك بالفرامل بحيث ان لو الطريق العربيات فيه هتتوقف متضغطش فرامل مره واحده