نصائح جميلة وممتازة .... وفعلا هى محتاجة شوية تعود
نصائح جميلة وممتازة .... وفعلا هى محتاجة شوية تعود
موضوع فوق الممتاز استفدت منه كتير وليا سؤال انا محتاجه عربيه مستعمله وسعرها فى حدود 10 او اقل تنصنحنى بنوع ايه وشكرا لحضرتك
والله موضوع ممتاز وعمال اتعلم منه كل شويه حاجه
بس بصراحه موضوع كبير برضو ومش هقدر اقري كله
ومعلش عندي كام سؤال كده
دلوقتي انا كنت اتعلمت السواقه من حوالي 6 سنين كانت عربيه بيري وكانت العربيه صغيره وعلى القد كدا وكله كان تمام دلوقتي الحج معاه جيلي ام جراند العربيه فعلا فرق شاسع بين اللى اتعلمت عليها وبين دي دي كانها سفينه كدا كبيره جدا غير التانيه
المهم انا اتعلمت تقريبا فى 2010 وبطلت سواقه جيت السنه دي اسوق لقيت الدنيا ملغبطه وخدت وقت فى حاجات كتيره وعندي اخطء كتيره ديما الناس بتعلقلي عليها فلوسمحت عايز نصيحتكم وخبرتكم اعمل ايه فيها
1- دلوقتي بيني وبين الغيار الاول تقريبا فى طار قديم انا بدي العربيه الاول وبعدين التاني على طول ولو رجعت للاول لازم لازم العربيه تقف مني ودا طبعا بيخلي شكلي وحش قدام الناس ولو زحمه مقلوش بقا على اللى بيحصل فى ايه الحل لمشكله زي دي
2- للما بدي العربيه التاني والتالت العربيه كلها بتتهز مني واللى راكبين معايا لازم يعلقو عليا وكذلك الرابع لكن الخامس مفهوش حاجه مش عارف برضو ايه الحل للمشكله دي
3- المريا اليمين مش عارف اظبطها على ايه بالظبط يعني ابقي مبين حته من العربيه ولا مبين الشارع ومش شايف العربيه والارتفاع برضو قد ايه يعني المفروض من الاخر ابقي شايف ايه منها
4-دلوقتي انا متعود وانا داخل على مطب ببقي محمل فرامل لحد ما العربيه تنزل من علي المطب بشيل رجلي واحد صحبي كان سايق عربيته ورايا ولما وصلنا قالي انا بتدوس فرامل وانت على المطب وان انا كده مش سواق السواق لازم يشيل رجله قبل المطب ويسيب العربيه براحته عايمه
يا رب تفديوني وشكرا مقدما وان شاء الله هضيف شوية مشاكل تاني معايا
السلام عليكم انا عارفه انه موضوع. تافه واتقال كتير
بس انا لسه جديدة في الجروب وفي السواقه والعربية كمان
انا جبت عربية اوبل فيكترا 94 اتوماتيك هي كويسه بس محتاجه تظبيطات كتير
مشكلتي اني بتعلم السواقه لسه ومش ببقي عارفه امشي مستقيم بلاقي المدربه تقولي سنه يمين وانا مش ببقي عارفه اني محتاجه اخش يمبن شويه انا بقالي كتير في نفس المشكله اعلاجها ازاي
شكرا مقدما
جزاكم الله خيرا موضوع اكثر من رائع
https://photos-2.dropbox.com/t/2/AAD...68&size_mode=3
اول سيارة اشتريها
غلط انى بعتها
الحمد لله على كل حال
اخوكم حسين غزالة
الحمد لله بعد تعب وعناء فى اعداد
اول كتاب فى سلسلة _ اساسيات القيادة الدفاعية
مفيد جدا لكل سائق مبتدىء ... لكى يتخلص من الخوف بشكل علمى
https://s13.postimg.org/vnozsuaiv/Capture.png
لتنزيل الكتاب
http://tinyurl.com/hatg2mb
انتظروا كتب اخرى
مع اطيب التمنيات
اخوكم حسين غزالة
تم تعديل رابط الكتاب
الرابط يعمل لمدة 28 يوم من الآن
اساسيات القيادة الدفاعية
تحياتى
مع اطيب التمنيات
اخوكم حسين غزالة
الف مبروك ....جعله الله فى ميزان حسناتك
انا قريت الموضوع كله قبل كدا واستفدت منه بس بعيدوا تانى دلوقتى عشان اشتريت عربيه وبنزل بيها الصبح مع ولادى وجوزى نروح المدرسه حاسه انى بتحسن وبنزل بيها لوحدى حوالين البيت بالف بيها كتير واتعود اطلع وارجع لورا واتعود على الفرامل والغيارات بس عندى لسه مشكله المرايات والنقطه العمياء هلى فى مرايات ممكن اجيبها غير مرايات الجنب ومرايا الصالون ولو فى نصايح او تدريبات ممكن اعملها عشان ابفى واثقه فى نفسى وانا بسوق والخوف يروح وشكرا لحضراتكم على المجهود العظيم ده
http://www.nilemotors.net/Nile/data:...6CCoTdRoIKD//Z
المراية الصغيرة دى بتتباع فى محلات الاكسسوار ب 5 جنيه وتتلزق
عملية فى النقطة العمياء
اعملى داونلود للكتاب الاول
وانتظرى الكتاب الثانى
الصور مشكلة قديمة والمنتدى للأسف مابيرفعش صور
تحياتى
انا بقرا الموضوع كله من اول خالص ووصلت للصفحه 25 ولسه هكمل وبصراحه بشكر جدا استاذ حسين غزاله ع هذا الموضوع الرائع
وكل الاخوه الافاضل الى ردت ع الموضوع واستفدت منه كتيير جدا
بس كان عندى كام استفسار لانى لسه مبتدىء واتمنى حد يفيدني
- اول حاجه انا عندى مشكله كبيره ف الرجوع للخلف خصوصا وانا راكن صف تانى لاني بكون سايب مسافه صغيره جدا بينى وبين العربيه الى راكنه صف اول وطبعا بيكون امامى عربيات راكنه برده صف اول وتانى والمشكله انى اما باجي ارجع للخلف مش بعرف اتحكم او ارجع ازاى بشكل سليم وبالتالي ممكن احك ف العربيات الى راكنه صف اول واعرض عربيتهم وعربيتى للحك واتمنى انى احل الموضوع ده واقدر اتحكم ف الرجوع للخلف فى مساحات ضيقه بشكل جيد
- تانى حاجه احيانا وانا ماشى والطريق يزدحم لكنه لم يتوقف وطبعا انا ماشى ع التانى بسرعه قليله جدا والسرعه بتنزل لحد 20 ويمكن اقل فى الوقت ده بحاول اجيب الغيار الاول لكنه مش بيجى معايا خالص ومش عارف ايه السبب سألت اخويا قلي لازم عشان تجيب الغيار الاول تكون العربيه واقفه خالص لانه مينفعش اجيب الغيار الاول والعربيه ماشيه حتى لو ماشيه بسيط خالص
- تالت حاجه واسف على الاطاله اني سمعت ان اما اجي اجيب اى غيار بعد الاول بشيل رجلي من ع الدبرياش بالكامل بعد كده ابدأ ادوس فرامل هل المعلومه دى صح ولا غلط لان انا بعانى من مشكله وهى تقطيع السياره او تنطيطها اما بنقل الغيار وبحاول اتخلص من المشكله دى
بالنسبة للرجوع للخلف .. تختاج التدريب فى اماكن خالية ... وتستخدم جيركل مياه مكان السيارة اللى هاتركن خلفها
يفضل الركن فى مكان واسع بين سيارتين فى الاول
وماتحولش تركن السيارة فى مكان ضيق خصوصا انك مبتدأ
فى الاماكن المزدحمة ... ممكن تترك السيارة تسير لوحدها دون الضغط على البنزين ... ضع رجلك فقط فوق الفرامل لتهدئة السيارة حسب الرغبة .... اذا ظهرت مساحة خالية اضغط بنزين خفيف .... واذا شعرت انها سوف تتوقف تماما .. انقل الغيار الاول ... واستمر فى السير
نصائح سائق جديد
اول كتاب لتعليم اساسيات القيادة الدفاعية
tinyurl.com/Needfordpeed
انا بشكر الاستاذ حسين جدا جدا وبشكر لكل اللى شاركوا فى الموضوع الرائع دة ودى اول مشاركه ليا لسه مبتداأة ولسه فى خوف وقلق مبقدرش اطلع بالعربيه لوحدى لازم حد معايا مش عارفه اتغلب على الموضوع دة ازاى
جزاكم الله خيرا وجعلة في ميزان حسناتك
فى لخبطه فى الصفحات يعنى وصلت للصفحه العاشرة واجى ادوس ع السهم يروح ناقلنى ع صفحه ١١٥ حد يقولى اقلب فى صفحات الموضوع ازاى ومنين والف شكر
هوة محدش بيدخل ع الموضوع انتوا فين ياجماعه
موضوع النقطة العمياء هام جدا فالنقاط العمياء تتسبب فى كثير من الحوادث لانه لا يمكن للسائق رؤيتها الا من خلال النظر فوق كتفه
تظهر اهمية النقاط العمياء عند الانتقال من حارة الى اخرى او الالتفاف
وللتقليل من النقاط العمياء ينصح بالاتى :
استخدام مرايا واسعة الزاوية للجانبين
تعديل وضع مرايا الجانبين لتظهر اكبر قدر من الطريق واقل قدر من جسم السيارة
تعديل وضع مرايا الصالون لتظهر الزجاج الخلفى على يمين السائق قدر الامكان
وكلما اتسعت زاوبة المرايا وتعديلها بشكل صحيح تقل منطقة الرؤية العمياء
اما مايجب على السائق فعله عند الانتقال من حارة الى اخرى ان يتاكد من خلو المسار الذى يريد الانتقال اليه من اى سيارة
ويتم ذلك بالنظر فى المرايا الجانبية مع اعطاء الاشارة المناسبة والبدء فى عملية الانتقال فورا طالما السيارات الاتية من الخلف بعيدة بمسافة مناسبة
حيث ان التاخر فى عملية الانتقال تعطى السيارات القادمة من الخلف انطباعا بان السائق لن يغير مساره او انه ربما نسى الاشارة مفتوحة فيحدث حينها ما لا يحمد عقباه
وقبل البدء فى عملية الانتقال يفضل قيام السائق بالنظر بشكل سريع خلف كتفه ليتاكد من عدم وجود سيارات بالنقطة العمياء
يحدث هذا الامر بشكل تلقائى بعد التعود عليه
ينبغى الحذر جدا من هذه المنطقة حيث ان عدم مراعاتها يؤدى الى حادث فورى فالسيارة القادمة من الخلف والموجودة فى نقطة انعدام الرؤية لن تجد الوقت ابدا لتفادى السيارة القادمة باتجاهها
والله الموفق للجميع
تركبى مرايا كبيره فى صالون العربيه
[quote=نفرت ويجا;3876118898]انا بشكر حضرتك جدا جدا ان حضرتك رديت عليا واستفدت جدا من المعلومات اللى من دهب دى[/quote
العفو يا فندم هذا ما أدين به لمن علمنى
اذا عندك اى سؤال اخر انا تحت امرك
استخدم الإشارة المناسبة .... لكن مهم جدا انك بعد ما تستخدم الإشارة ... مهم جدا انك تنتظر شوية ... وتنظر فى المرايات جيدا وتشوف "رد فعل" السيارات القادمة من الخلف ... هل عملوا حسابك ... وشايفين اشارتك جيدا ... فى الحالة دى انقل نفسك الى الحارة.... دي مشكلتي ساعات مش ببقي عارفه هما عملوا حسابي ولا لا لما بدي الاشاره مش ببقي عارفه الصح ايه والانتظار اللي ورايا مش بيصبر انا لسه ف الاول والف شكر
السلام عليكم ورحمة الله وبركاته
وحشنى جدا
وآسف على التأخير الطويل ... بسبب العمل
واضح ان فيه صفحات كثيرة جدا اتمسحت ولا اعلم السبب
المهم
هاحاول نعمل دورة جديدة فى تعلم القيادة ومشاكلها من أول وجديد
وكل عام وانتم بخير
مع اطيب التمنيات
اخوكم حسين غزالة
شكرا لحضرتك على التواصل
ربنا يسهل انشاء الله
القيادة الدفاعية 2017
مقدمة
فى البداية انا هاتكلم بالعامية عشان نفهم بعض بطريقة سهلة
سؤال
ليه احنا لازم نحسن مهاراتنا فى قيادة السيارة
فى الفترة الماضية اصيب اكثر من 3 مليون شخص فى حوادث طرق ... توفى منهم اكثر من 40 الف بنى آدم ..
اخطاء القيادة
اكثر من ثلث الحوادث سببها اخطاء من الشخص اللى سايق العربية ... يعنى حوالى 6 مليون حادثة سببها ان الشخص اللى سايق العربية موش فاهم حاجة فى اى حاجة
طيب لو سعادتك اهتميت شوية بموضوع تحسين مهاراتك فى قيادة السيارة يحصل ايه ؟ ... يحصل ان حوالى 4 مليون حادثة ممكن نمنع حدوثها ... مطلوب منك فقط تهتم بنفسك وتحسن مهارتك فى قيادة السيارة
تكلفة القيادة السيئة ايه ؟
التكاليف مرتفعة جدا .. وفيات لا قدر الله .. اصابات ... اضرار فى الممتلكات ... وممكن طبعا لا قدر الله تفقد وظيفتك بسبب اصابة فى حادثة ...
الخلاصة: تكلفة الحوادث السنوية حوالى 150 مليار دولار
https://img1.mrkzgulf.com/i/00112/b2k7j1tqo1lb_t.jpg
اضغط على الصورة للتكبير
http://typeanything.com/img/posts/dd...e297cdf561.jpg
سعادتك ممكن تعمل فرق كبيير
فى 2001 يتوفى شخص كل 12 دقيقة ... انا آسف على المقدمة السيئة دى لكن الخبر الحلو ... ان معظم الناس ممكن تحسن طريقة القيادة فى وقت قليل جدا ... وان عشان تكون سائق جيد الموضوع ده موش بالصدفة او نتيحة انك بتسوق مدة طويلة
لأ الموضوع بالدراسة والعلم والفهم والتفاعل كلنا مع بعض ... كلنا مع بعض بنتعلم من بعض ونصحح لبعض
موش عيب اننا نصحح لبعض ونتعلم من بعض ... وهانفضل نتعلم حتى ولو كنت سائق قديم
تابع
مع اطيب التمنيات
اخوكم حسين غزالة
معنى الـقيادة الدفاعية
القيادة الدفاعية تساهم فى :
- انقاذ الارواح
- توفير الوقت
ههههه وتوفير الوقت هنا موش معناه ان سعادتك تجرى العربية وتفضل تتنطط بين العربيات وتعمل فيها سواق ميكروباس شاطر ... وان هاتعدى من كل العربيات اللى حواليك وتوفر بالطريقة دى الوقت .... لا طبعا ... هاتوفر الوقت بأنك توصل البيت سليم ههههههههههههههه
بدون اى عطلة بسبب اى حادثة لا قدر الله
- توفير المال
ما هو انت لو سواق عاقل هاتوفر فلوس ... يعنى موش معقول كل يوم تخرج بالعربية ترجع بمشكلة نتيجة حادث ... وطبعا صيانة السيارة هاتكلفك فلوس .. او هاتدفع فلوس للناس اللى انت عمال تخبط فيها
ده غير انك ممكن تخسر وظيفتك نتيجة حادث لا قدر الله وده كمان يتقدر بالفلوس
قواعد القيادة الدفاعية سهلة موش صعبة ... كل المطلوب منك الرغبة انك عايز تتعلم ... واليقظة .. والمهارة ... والصبر .. والتعاون ... والاخلاق
تابع
مع اطيب التمنيات
اخوكم حسين غزالة
شخصيتك فى القيادة
الأول لازم تعرف انت شخصيتك فى القيادة ايه ؟
يعنى مثلا: هل انت خجول ... حذر ... ولا جرىء ومتهور
وفيه ناس طريقتها فى القيادة مختلفة عن شخصيتها فى الحياة ... فى العمل مؤدب واخلاق ... ههههههههه وفى الشارع وهو سايق عربيته ماتشوفش وحش ... متهور ومجنون .. فى الشارع شخصيته مختلفة تماما عن البيت والعمل ...
- المشغول علطول
طول ما هو ماشى بالعربية عمال يخطط للشغل بتاعه ... ويفكر فى الشغل امبارح ... واذا كان نسى حاجة فى المقابلة بتاعة امبارح او نسيت حاجة فى السوبر ماركت .. او عمال يعمل "شات" على الموبايل هههههههه علطول شاغل نفسه ... طبعا اللى زى ده عمره ما هايكون مركز على الطريق ...
اذا فضلت مركز على اى حاجة ثانية بخلاف الطريق اللى انت ماشى عليه ... النتيجة هاتكون موش كويسة نهائى
- السائق البطىء المتردد
وده اللى ماشى بشكل بطىء علطول ... او مرة يمشى عادى ومرة ثانية يتوقف فجأءة او يمشى بشكل بطىء .. وخواف زيادة عن اللزوم ... ده محتاج انه يتعلم القيادة الدفاعية وهاتحسن من طريقة قيادته فعلا
- السائق الجرىء
اللى ماشى امامى ده لازم اعدى منه ... وسع يا ابنى ... هههه ... ده السواق الجرىء اللى فاكر نفسه عشر رجالة وعايز يعدى من اللى حواليه وانه اشطر من كل اللى حواليه وانه لازم يعدى منهم ويوريهم يعنى ايه سواقة ؟ ... اللى زى ده لو فكر شوية انه ممكن يوصل بالسلامة وانه يفكر فى سلامة العربيات اللى حواليه ... هايوصل البيت فى امان بإذن الله وبدون مشاكل على الاطلاق.
- المتسرع
ده المجنون رسمى ... اهم قاعدة عنده انك تبقى ماشى ورايا .... هههه
وده النصيحة له مبدئيا انه ينزل بدرى 10 دقائق ويزود كمان 10 دقائق عشان يلاقى مكان يركن فيه ... بالطريقة دى ممكن اعصابه تهدأ شوية على الطريق
- النائم على نفسه
ده ماشى فى السرحان ... من المشاهد اللى حواليه وصوت الموتور هايخليه ينام على نفسه ... لو شعرت انك عايز تنام ابسط حاجة اركن على جنب واخرج من العربية وشم شوية هواء واشرب لك فنجان قهوة وارجع ثانى للعربية وكمل مشوارك
- المتردد
وده اللى ماشى موش عارف هو رايح فين ... هادخل هنا ... ولا هادخل هنا ... ولا هاغير حارتى للحارة الثانية ... لو انت سائق متردد حاول تعرف طريقك كويس قبل ما تتحرك بالعربية ... لو انت من النوع المتردد ... اركن على جنب وموش عيب انك تسأل على المكان اللى انت رايح له ... وحدد انت عايز تعمل ايه ؟
- السائق الجيد
ده السائق الحريص اللى مركز قوى وبيشغل دماغه كويس وبيركز على الطريق كويس وبيتجنب كل السلبيات السابقة ... وبيطبق قواعد القيادة الدفاعية مضبوط
تابع
مع اطيب التمنيات
اخوكم حسين غزالة
متطلبات القيادة الدفاعية1- المعرفة
تحتاج الى معرفة المخاطر وتجنب الاصطدامات وقوانين المرور
بالمعرفة تعرف كيفية التصرف الصحيح فى كل الحالات وبسرعة ... تتعلم قيادة سيارتك بطريقة آمنة وصحيحة
2- الاستعداد
ان تكون فى حالة استعداد لاى ظروف على الطريق ... بتهتم بكل شىء يحدث امامك وخلفك وحواليك .. وتنظر فى المرايا بشكل مستمر ... وفى حالة انتباه دائم اثناء القيادة
3- البصيرة
اكثر حاجة تخاف منها الحاجة اللى موش متوقعة ... توقع دائما ان السائقين حولك سوف يتصرفوا خطأ وليس بطريقة صحيحة ... نقول بالبلدى كده .. انت العاقل الوحيد والباقى مجانين هههههههه .... دائما تنظر الى الامام على قدر المستطاع لكشف اى مخاطر على الطريق ... يعنى موش طول الوقت بتنظر على كبوت عربيتك ... او بالكثيير تنظر الى السيارة التى امامك وفجأة عند حدوث اى مشكلة على الطريق تعرض نفسك الى الحوادث ... وطبعا الاهمال فى صيانة عربيتك يعرضك للحوادث
4- التفكير السليم
طول ما انت ماشى بالعربية بتشغل دماغك وتفكر صح وبسرعة وتقدر تسيطر على سلوكك ... وتقاوم الإغراء فى انك تعمل اى حركة مالهاش لازمة على الطريق تعرضك للخطر ... او انك تحاول تتجاوز السائقين الآخرين ... وانك لا تمر من السائقين الآخرين الا بعد التأكد ان عملية المرور منهم عملية آمنة ... وان تمر من السيارات الأخرى بطريقة آمنة وبدون ازعاج للسيارات الاخرى
5- المهارة
ودى مهمة جدا ... كيف تسير بطريقة آمنة ... كيف تخطار الغيار المناسب للفتيس ... كيف تضغط على الفرامل ... كيفية عمل الصيانة اللازمة للسيارة ... كيف تسير فى المنعطفات والتقاطعات
القيادة الدفاعية ببساطة
طريقة تفكير سليمة وسريعة وآمنة ...
تابع
مع اطيب التمنيات
اخوكم حسين غزالة
تجنب الحوادث
من الآن نبدأ الكلام المهم جدا جدا
ـــــــــــــــــــــــــ ـــــــــــــــــــــــــ ــــ
1- توقع الحوادث
سعادتك تنظر الى الامام على قدر المستطاع ... على الاقل تنظر الى التقاطع التالى او الى 2 تقاطع قادمين امامك .... للدرجة دى ...ايوه للدرجة دى .... لازم تنظر الى الامام على قدر المستطاع وتتوقع ان اى سيارة تخرج لك من اى تقاطع ...
طيب لو امامك اى منحنى ... نفس الكلام ... تتوقع ان فيه عربية هاتظهر لك فى المنحنى القادم ....
انظر الى السيارات القادمة من خلفك ... انظر فى المرايات الجانبية كل 5 ثوانى ... يعنى ما تفضلش سرحان وتنظر الى الامام فقط ... لا انظر فى المرايات الجانبية كل 5 ثوانى ... عشان لو وجدت اى سيارة قادمة من الخلف ... لا تفاجأ بها ... وتعمل حسابها ... وما دام السيارة القادمة من خلفك عدت منك بدون اى كلاكس ... يبقى فى الغالب انت ماشى بالعربية تمام التمام وعامل حساب كل حاجة
2- افهم الطريقة الدفاعية
طول ما انت بتتوقع المشاكل ... هاتمشى بالعربية عشرة على عشرة ... انت لا تتعلم تحريك العربية ... يعنى موش بتتعلم تدوس بنزين وفرامل ... ده اسهل حاجة ... انت بتتعلم تشغل دماغك وحواسك وتركيزك بطريقة علمية وواضحة ...
3- اتصرف صح فى التوقيت الصح
ما دام قدرت تحدد مصادر الخطر ... يبقى هاتقدر تتصرف صح وفى التوقيت الصح .... هاتقدر تتصرف مع مواقف كثير هاتقابلك ومواقف مختلفة ... عادى خالص ... لان كل المواقف دى انت هاتكون متوقعها وموش مفاجأة لك ... وطبعا التدريب ثم التدريب ... مافيش داعى للاستعجال وبعد كده تقول انا خايف ... كيف تتحكم فى سرعة العربية .. كيف تختار السرعة المناسبة فى المواقف المختلفة
لازم تترك مسافة كافية بينك وبين السيارة التى امامك ... على الاقل لازم تشوف عجل العربية اللى ماشية امامك خصوصا لو كنت ماشى بسرعة بطيئة ... اما لو كنت ماشى بسرعة اعلى ... يبقى فى الحالة دى لازم المسافة بينك وبين السيارة اللى ماشية امامك تكون اوسع من كده
وكمان استخدام الاشارات المناسبة فى المواقف المختلفة
تابع
مع اطيب التمنيات
اخوكم حسين غزالة