وعاوزة اعرف لو بعد الشر
خبطت حد
اعمل ايه
هينزل يبهدل الدنيا
انا اقول له ايه ولا اعمل ايه
وعاوزة اعرف لو بعد الشر
خبطت حد
اعمل ايه
هينزل يبهدل الدنيا
انا اقول له ايه ولا اعمل ايه
لا حاولي تطفي كل الانوار و الراديو قبل الدوارة
بالنسبة للدبرياج ممكن تكوني بترفعي رجلك بسرعة فالعربية بتفصل ,. خلي حد تاني يجرب يعملها - لو مااتحركتش يبقى ممكن يكون حساس الدبرياج عندك واطي و محتاج يعلى .. ممكن و انتي بتعملي صيانة الالف كيلو تقولي لهم عليها في التوكيل .. و لما تشتغل معاكي ما تعمليهاش كتير .. يادوب بس تحركي العربية من وضع الثبات و بعدين تنزلي سنة بنزين و تنقلي على التاني على طول
الراديو واحدة واحدة هتتعودي عليه .. و ممكن يكون حد جنبك بيكلمك و انتي بتكلميه و انتي سايقة - بالممارسة هتتعودي على كل دا
في كذا نقطة عمياء في كل العربيات و اشهرهم جنب الباب الخلفي يمين و شمال و دي عشان تتغلبي عليها في كذا طريقة :
بتميلي راسك لحد ما يلمس الشباك اللي جنبك و تظبطي المراية الشمال لحد ما تشوفي ديل العربية بتاعتك و نفس المسافة بتميلي براسك بيها ناحية اليمين و تظبطي المراية اليمين لحد ما تكشفي ديل العربية من اليمين ( فتحة التانك ) - و بكدا ممكن تشوفي مساحة اكبر في النقطة العمياء يمين و شمال
الطريقة التانية و دي هتضطري تلزقي مراية صغيرة تحت الشماسة اليمين ( في الزجاج الامامي من الداخل ) و توجههيها للخارج و واحدة زيها في الجنب الشمال قصادك و توجههيها ناحية الشمال بس دا هيحسسك انك قلبتي عربيتك ميكروباص هههههههههههه عشان معظم سواقين الميكروباص بيعملوا كدا و المراية لو محدبة هيكشفلك مساحة اكبر و هتشوفي كل شبر جنب عربيتك
الملفات الواسعة (دوران للخلف داخل المدينة ) بتاخديها على الواسع و تكسري الدركسيون للنصف و تلزمي الحارة اليمين بعد الدوران - اما لو طريق سريع وعايزة تعملي دوران للخلف بتكسري الدركسيون للآخر و بتلزمي اقصى اليسار بعد الدوران مع مراقبة المراية اليمين لحد ما تاخدي سرعة الطريق و مع كل دوران لازم تدي اشارة
خروج لوحدك بالعربية دا هيتحدد لما يكون معاكي حد بيسوق كويس .. يشوف سواقتك عاملة ازاي و هو يقولك اذا كنتي واثقة من نفسك و مركزة و تقدري تمشي بالعربية لوحدك ولا لسه بتتلخبطي و مبتعرفيش تتصرفي خصوصا في الزحمة و واضح من كلامك انك عاوزة ممارسة كتير يعني كل يوم مش اقل من ساعة سواقة
و ربنا يستر طريقك
دي حسب مين فيكو اللي غلطان .. و على حسب هو محترم ولا قليل الادب
اهم حاجة انتي ما تتحركيش بالعربية الا لو حسيتي انك واثقة من سواقتك كويس و سرعة رد فعلك لازم تكون لحظية عشان الخبطة او الحادثة لا قدر الله بتحصل في جزء من الثانية و خلي بالك معظم السواقين اللي في مصر لما بيشوفوا بنت سايقة عربية بياخد عنها فكرة انها مابتعرفش تسوق و في اللي ممكن يزنق عليكي و اللي يصدر لك النور العالي ماتستعجليش على رزقك لسه ياما هتشوفي بلاوي و قرف كتير في مصرنا الحبيبة ههههههههههههههه
و المبدأ المتعارف عليه ان اللي جاي من ورا هو دايما اللي غلطان
انا كذا مرة كنت هلبس في اللي قدامي بسبب انه بيفرمل فجأة و في اللي فوانيس الاستوب بتاعته عطلانة بس كل التحية و التقدير لفرامل اللوجان اللي بتلحقني
انا لسة واخدة العربية لوحدي بقالي شهرين بس مبسوقهاش بانتظام يعني ممكن مرة وللا مرتين في الاسبوع ... بس لحد دلوقتي مشكلتي اللي معقداني في حياتي العربية لما تبطل مني لسة مش عارفة اظبط رجلي علي البنزين والدبرياج ومش عارفة حظبطها امتي مشكلتي طبعا بتكبر لما اقف عند مطب او مطلع كوبري بتبقي مأساه ليا وللي ورايا
السلام عليكم ورحمة الله ...أنا قريت الموضوع كلة وفعلا استفدت منة كتير ...جزاكم الله كل خير ..أنا بسوق بقالى 3 شهور بس واول ما اتعلمت اتعلمت على مانيوال بس يدوبك الاول والتانى مسوقتش مانيوال كتير وبعدها استلمت من شغلى عربية اتوماتيك والحمد لله كان ماشى الحال بدون اى خسائر تذكر لانى كنت بحاول على قد ما اقدر اتعلم بدون خسائر لغاية من فترة بسيطة عملت حادثة كنت داخل على اشارة وكنت باجرى ولما شوفت الاشارة اصفرت والعربيات هدت مسكت فرامل تدريجى لغاية ما وقفت منى بالعافية بحوالى 20 سم عن العربية الى قدامى وبعدها بثوانى سمعت سحفة كاوتش وطك ببص لقيت واحد دخل فية من ورا والاكصدام اتخرشم بغض النظر عن الخسائر بس اضايقت انى عملت اول حادثة لية وبعد ما كنت واثق من نفسى حسيت انى رجعت تانى للخوف الى كان موجود فى مرحلة التعليم ياترى ازاى اقدر اتفادى مشكلة الناس الى بتجرى من ورايا انا دلوقتى كل شوية اعد ابص فى المراية واهتم بالى ورايا اكتر من الى قدامى وفى الاخر قولت ابطل اسوق وباروح شغلى مع واحد صاحبى ...والمشكلة كمان انهم هيدونى مانيوال بدل الاتوماتيك وانا قلقان من الموضوع دة لانى حاسس انى نسيت المانيوال لانى مكنتش متمرس فيها ...كل الشكر لاعضاء المنتدى المحترمين واسف للاطالة
مبروك اولا عالعربية و ربنا يديكي خيرها و يكفيكي شرها
ثانيا مرة ولا مرتين في الاسبوع قليل اوي .. لازم تمارسي السواقة بمعدل اكتر من كدا - حاولي كل يوم انشالله ربع ساعة .. عشان تتغلبي على مشكلة تبطيل العربية و متقلقيش انا كنت زيك في الاول و العربية كانت بتبطل مني فوق ال7 مرات .. و حاولي تمارسي الموضوع دا في شارع فاضي الاول كذا مرة لحد ما رجلك تحفظ بنزين العربية و دبرياجها
ثالثا .. لو بطلت منك في مطلع كوبري اول حاجة ارفعي فرامل اليد .. و موري العربية و دوريها و انتي ضاغطة دبرياج و بعدين انقلي على اول غيار و تكة بنزين صغيرة اوي الاول و ارفعي من عالدبرياج بالتدريج و في نفس اللحظة تنزلي فرامل اليد .. و جربي و انتي في شارع فاضي الاول كذا مرة لحد ما تتعودي ...
( ملحوظة : فرامل اليد في اي مطلع من وضع الثبات مهمة عشان العربية ما تسرحش منك و تخبطي في اللي وراكي )
في حاجة كدا جربيها بردو ... بعد ما العربية تدور . . انقلي على الاول و ارفعي رجلك من عالدبرياج بمعدل بطئ جدا بدون لمس دواسة البنزين خالص .. هتلاقي عربيتك بتتحرك لوحدها .. بعدها انزلي عالبنزين بالراحة لحد ما يوصل rpm 2.5 و انقلي الغيار ... جربي الاختبار دا كتير هتلاقي رجلك اتعودت تمشي العربية من وضع الثبات بدون الضغط على دواسة البنزين
و ابقي عرفيني نتايج التجربة ايه :top_posters:
السلام عليكم ورحمة الله وبركاته
اهلا وسهلا بحضرتك
مرة ثانية
بالنسبة لموضوع ان العربية بتبطل فى بداية التحرك على الغيار الاولانى
القصة دى بتحصل كثير ومع اى حد
يعنى انا مثلا
الميكانيكى ضبط الكاربراتير "على الشعرة"
عشان اقلل من استهلاك البنزين
النتيجة ان العربية كانت بتبطل منى لحد ماتعودت على الوضع الجديد
ايه المطلوب
________
الدبرياج عند ارتفاع معين
يعنى لما بترفع رجلك على دواسة الدبرياج تدريجى
عند ارتفاع معين العربية بتتحرك
يبقى المطلوب
__________
انى اتمرن على ان رجلى لاترتفع عن الحد ده
خصوصا فى بداية التحرك على الغيار الاولانى
التمرين المطلوب
_____________
التوقف فى مكان خالى
هارفع رجلى من على الدبرياج بشكل بطىء جدا
العربية عند حد معين هاتتحرك
بعد العربية ما تتحرك نصف متر
اضغط على الدبرياج مرة ثانية على الآخر
العربية هاتتوقف لانك فصلت الحركة
اعد التمرين مرة اكثر من مرة
لحد ما رجلك تتعود على هذا الارتفاع
إحساس رجلك على الدبرياج هاتبقى هايلة
طبعا موش محتاج اضغط فرامل
موش محتاج اضغط بنزين
كل التركيز على الدبرياج
ايه اللى فاضل
___________
فاضل بعد ماتمرن كويس قوى
اضغط سنة بسيطة بنزين
واول ماهرفع رجلى من على الدبرياج
زى ماتمرنت كويس
العربية هاتتحرك فى منتهى السهولة والهدوء
ارجوا ان اكون وضحت
مع اطيب التمنيات
اخوكم حسين غزالة
لو سمحتم عايزة نصايح لسواقة الاوتوماتيك انا اتعلمت شوية على مانوال بس جبت عربية اوتوماتيك و حاسة اني متلخبطة و مش عارفة اجمع و انا سايقة
بالعكس انا بشوف الاوتوماتيك أسهل كتير من المانوال
حاولي تستعيني بحد يدربك في الأول لحد ما تتعودي عليها
وبعدين الموضوع كله بنزين وفرامل ولا فيه دبرياج ولا أول وثاني
اتمرني كويس وحاولي تحسي بالعربية امتى تزودي بنزين وامتى تخففي امتى تزودي الفرامل وامتى تخففي وامتى توقفي
الموضوع بالتمرين هتلاقيه سهل أن شاء الله
D تستخدميها للسواقة
P تركنى عليها العربية وتدورى الموتور عليها
N ده المور وتدورى الموتور عليه
R ده الرجوع لخلف
تدورى الموتور على P او N
وانتى دايسة فرامل تنقلى لل d
تدوسى بنزين هتمشى
لو عايزة تغيرى وترجعى ورا
العربية تكون واقفة تماما
تدوسى فرامل تجيبى R
ولو هتطلعى قدام نفس الوضع
تقف
تدروسى فرامل
تجيبى D
تمشى
فى الاشارارت ممكن تجيبى N بس رجلك على الفرامل او تشدى فرامل اليد لو الوقفة طويلة
ما تجبيش على N وانتى ماشية
شكرا للنصائح انا فعلا عارفة الحاجات دي لكن هل عادي في الاول اني مبقاش عارفة انقل رجلي بين البنزين و الفرامل و برتبك شوية بحس ان في حاجة ناقصة ( اللي هي الدبرياج ؟؟) و المشكلة في اليوتيرن كانت عندي في المانوال و الاتوماتيك المانوال كانت بتبطل مني انما الاتوماتيك بتجري مني في الملف مبعرفش اسيطر عليها
كل ملف ليه سرعة حسب
درجة الانحناء مثلا 30 ولا 45 درجة
ميل الملف : الطريق فى الملف لو مصمم بميل عكس اتجاه الدركسيون بيدى ثبات اكتر
حاولى تظبطى سرعتك قبله والتزمى بحارة علشان ما تخبطيش لاقدر الله فى حد
وبصفة عامة شيلى رجلك من البنزين وهدى بالفرامل قبل الملف
وحاولى ما تدوسيش فرامل قوية جوى الملف
وبلاش كسر عنيف للدركسيون الا اضطرارى
ولو العربية لقتيها مش لامة معاكى ساعات بيكن شعرة بنزين هى الحل
بس دى عايزة حس اعلى شوية فخليها بعدين تكونى اتعودتى على العربية اكتر
[gdwl]ارجوكم يا جماعة الخير شرح ركن العربية بالراحة و بالصور ....حقيقى عندى مشكلة فيها ...طبعا موازى و عمودى معلش طمعانة فى كرم الخبراء الافاضل:N_no[1]:[/gdwl]
نبتدى بالعمودى
تقفى بعد عربيتين من مكان الركن اللى عاوزاه
تقيسى على مرايتك
يعنى مرايتك عند حد تانى عربية
تلفى دركسيونك يمين للاخر ( أو شمال )
ترجعى لورا
عينك فى المرايات الجانبية والنصف
وهنلاقى العربيه اتركنت فى المكان اللى احنا عاوزينه وباقل مجهود ممكن
لو لقيتى انك ممكن تخبط فى عربية او مش سايبة مسافة كافية لنزولك ونزول او صعود السائق التانى تعدلى نفسك بانك
توقفى الحركة
تحركى الدركسيون عكس الاتجاه الاول
تطلعى لقدام شوية بحيث تظبطى دخولك عمودى
ترجعى لوار سنة سنة
الركن الموازى
تقفى موازية للعربية التانية بينك وبينها حوالى 40 سم
وبعدها بحوالى 30 سم
تلفى الدركسيون ناحية الرصيف لاقصى درجة ولو انتى فى شارع رئيسى تاخدى بالك وانتى بتلفى من العربيات شمالك فلازم تبصى فى المراية الشمال
اما الرصيف يبان فى المراية اليمين نفرمل
نغير اتجاه الدركسيون ونكمل رجوع ورا
ممكن نحتاج ظبط للعربية
سنة قدام او ورا
thnxxxx
انا استفدت كتير من الموضوع ده
امبارح كانت اول مره اسوق عربيه مانيوال "عربيتي الجديده"
قبل كده سقت اوتوماتيك بس مسافه قصيره جداً
بس امبارح اخدت العربيه من شبرا الخيمة ل شبرا مصر للوكاله وبعدين التحرير و لفيت ف وسط البلد ورجعت ع الزمالك وبعدين كورنيش عائداً ل شبرا الخيمة و بعدين رحت مدينة نصر و رجعت شبرا الخيمة وركنت العربيه
نصيحتى لكل الناس "جمّد قلبك بس بعقل عشان متإذيش نفسك او تإذى اللي جنبك .. اعرف امكانياتك و امكانيات عرابيتك قبل ما تحاول تعمل حاجة جديده او حركه جديده"
**كان عندي فكره عن السواقه وانا بحب العربيات من زمان ومطلع الرخصة ع عربيه منوال بس مكانش فيه ممارسه تقريبا إلا كل فين و فين
انا لسه متعلم جديد بس شغلى فى طلعة
السيارة بتركن فى طلعة و بالتالى لما تيجى تتحرك هترجع لورا
كيف التصرف:
اضغط فرامل و دبرياش
شغل السيارة(فرامل اليد طبعا مشدودة)
شيل رجلك من على الفرامل و اضغط بنزين لغاية الار بى ام يبقى حوالى 2 و نص
(فرامل اليد ما زالت مشدودة)
ارفع رجلك بالتدريج من على الدبرياج لغاية ما مؤشر الار بى ام يبدأ ينزل ساعتها ثبت رجلك فى هذا الوضع
نزل فرامل اليد بالتدريج
ستلاحظ ان السيارة ثابته مكانها او بدأت تتحرك ببطء للامام
دوس بنزين اكتر و ريح دبرياج سنه بسيطة السيارة ستتحرك
اى مشاكل اى لخبطة ارفع فرامل اليد
محتاجه تعود بس بعد كده بتبقى سهله و هى مهمة على مطالع الكبارى المزدحمة
مشكلتى بقى فى الطرق السريعة
لما احب انقل من حارة لحارة على سرعة عالية و الطريق مزدحم شوية مش باعرف--لان اكثر من مرة النقطة العمياء بيكون فيها سيارة و بالتالى محتاج انظر فى المرايا و فى النقطة العمياء و متابعة امامى على سرعة عالية ثم اتخاذ قرار الحركة فى جزء من الثانية
كما انى موسوس بالنسبة للنقطة العمياء
فما هى النقطة العمياء و كيف اتأكد انها خالية من السيارات(هل هى بجانب السيارة ام خلف السيارة؟
هل هناك مرايا تخلصنى منها
سيارتى التو 2009
انا اخدت 7 حصص مع مدرب وبعدين بقالى تلات ايام بطلع بالعربية لوحدى بس طبعا لمدة ساعة واحدة والساعة 6 الصبح علشان الشوارع تبقى فاضية بس لسه بخاف اوى رغمم ان العربيات بتبقى قليلة اوى بس بحس برهبة كبيرة اوى وكمان بنزل من العربيه حاسة ان رجلى مش حاسة بيها ياترى الاحساس ده هيروح امتى نفسى امشى فى الزحمة بس خايفة اخبط او اتخبطت تنصحونى ابتدى امشى فى الزحمة بعد اد ايه ؟
جمدى قلبك .. انسى الكلكسات اللي وراكى .. لو حد شتم بصى لنص الكبايه المليان واعتبريه ف ميزان حسناتك .. انا بقالي 10 بسوق وتقريباً لفيت القاهره كلها .. عامل 550 كم من ساعة ما ركبت العربيه .. لو حسيتى انك ارتبكتى شغلى الانتظار و اقفلى الازاز وامشى براحتك ع جنب لحد ما اعصابك تهدى .. بصى ف المرايه "مش عشان الميك طبعاً :d" لا عشان لو هتغيرى حارتك او هتلفى متخبطيش حد
موضوع ممتاز وانا قريتة مرتين لغاية دلقوتى واستفدت منة كتير ...أنا سقت اتوماتيك حوالى 4 شهور وبقالى تقريبا 3 اسابيع بسوق مانيوال بس مش مرتاح مع المانيوال رغم انى اتعلمت على مانيوال فى الاول ...بس اكبر مشكلة مقابلانى دلوقتى مش قواعد السواقة ولا التحكم فى الدريكسون الى مقابلنى الغيارات ساعات بلاقى العربية بتنتش منى ولما بارفع رجلى من ع الدبرياج بحس ان العربية بتسحب لورا وبحاول ادرب على الرفع سنة سنة وباردو مفيش فايدة وساعات بانسى ادى الغيار المناسب ويا اما الاقى العربية صوتها على او سحبها قل يعنى حاسس ان الغيار واخد كتير من تركيزى ودة بيعملى مشكلة وانا مش عارف اعمل اية انا مبسوقش كتير يعنى ممكن انزل مرتين تلاته فى الاسبوع لان شغلى مش محتاج عربية ومعظم سواقتى فى الروقان باتجنب الزحمة ولو سقت فى الزحمة مع المانيوال اعصابى بتتعب وباتخنق ارجو النصيحة وانا متابع معاكو باهتمام وشكر خاص لاستاذ حسين
القيادة الدفاعية
https://imageshack.com/i/5k11509140j
مع اطيب التمنيات
اخوكم حسين غزالة
موضوع أكثر من رائع للمبتدئين امثالي شكرا لصاحب الموضوع ولكل المشاركين
موضوع مهم جدااااااااااااااااا
تسلم ايدك
موضوعك رائع يا استاذ حسين وانا كنت متابعاك كزائرة وسجلت مخصوص علشان اشكرك لانى استفدت كتير اوووى من حضرتك خصوصا انى جديدة في موضوع السواقه ومحتاجه نصايح حضرتك ومتابعتك
يا ريت تككمل يا استاذ حسين ولا علشان انا سجلت الموضوع خلص ومافيش تفاعل بجد محتاجلكو
بجد موضوع تحفة للمبتدئين
موضوع جميل وربنا وفقك واظن دلوقتي انت بقيت مدرب
لمَ لا تظهر الصور عندي
السلام عليكم
فى الاول احب اشكركم على الكلام الجميل
للاسف الشديد
انى مشاركاتى اصبحت قليلة
والسبب
ان كثير من المواضيع بتكون موضحة بالصور والرسومات
وبعد فترة ... كل الصور تتمسح .. بغض النظر عن اهمية الموضوع
الحكاية دى بتسبب لى احباط
تخيلوا ... عشرات المواضيع ... ومرة واحد كل المواضيع تتحول الى كلام فقط بدون اى صورة توضيحية
على العموم انا تحت امركم فى اى حاجة
تحياتى
حسين غزالة