الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة mnomno

جزاك الله كل خير و الله على هذا المجهود الرائع ربنا يبارك لحضرتك و يكفيك و ايانا شر الطريق

وجزاك الله خيرا على كل كلمة جميلة حضرتك كتبتها

المشاركة الأصلية كتبت بواسطة layali

استاذ حسين بجد ماشاء الله عليك ,حضرتك وفيت وكفيت

الله يبارك فى حضرتك

واحب اقول لحضرتك انى اشتركت فى المنتدى مخصوص علشان موضوع حضرتك لأنى كنت متبعاه من فتره
وانا سعيده جدا للتواصل مع حضرتك لانك عندك قدره على توفير المعلومه وشرحها بشكل بسيط

وانا عشان ومازلت اشعر بمشكلة السائق الجديد ... مازلت اكتب فى الموضوع ده ... مع انى اتحسنت كثير قوى .. المهم إن الحمد لله إن فيه استفادة

وان شاء الله هطبق الخطوات دى وهقول لحضرتك على نتيجة التجربه

أنا شخصيا جربت الطريقة دى بقالى اسبوعين ... واكتشفت ان هى دى فعلا الطريقة العلمية فى ركن السيارة ... بدون تجربة وخطأ ... من اول مرة
لكن المشكلة الحقيقية فى الاماكن الضيقة ... هى دى اللى عايزة شوية تفكير ... لو عرفت حلها هاكتبه على طول

وعلى فكره حضرتك رافعت من روحى المعنويه والنفسيه اتجاه عربيتى لانى بصراحه بكون مكسوفه وانا سيقاها

هههههههه
ربنا يبارك لك فيها
وعلى فكرة ماتفكريش فى الكلام ده
انا والدى الله يرحمه كان راكب فيات 1300 موديل حاجة وستين ... طبعا العربية دى دلوقتى راحت عليها خالص ... لكن لما كان بيركبها ويمشى بها ... كنت احب اراقبه وهو بيمشى بيها بكل مهارة وهدوء وعدم عصبية ... وكان كل العربايت اللى حواليه حديثة وسريعة لكنه كان ماهر جدا جدا جدا ... وبأقل سرعة واقل مجهود ... الاقيه ماشى تمام التمام ... وانا جالس بجواره فى منتهى الهدوء والإطمئنان
اهم حاجة فى السيارة "السائق الماهر" ... وانها توصلنا بالسلامة

المشاركة الأصلية كتبت بواسطة magid1010

السلام عليكم ورحمة الله وبركاته

وعليكم السلام ورحمة الله وبركاته

ازيك يا استاذ حسين
اهلا بحضرتك استاذ ماجد
ليك وحشه
وانت اكيد لك وحشة كبيرة
والله متشكر على توضيح طريقه الركن و لو ان ما حدش عايزها الايام دى لان كله بيركن فى الحته اللى تريحه هههههههههه

هههههههه
المشكلة انك تلاقى حتة تركن فيها اصلا
يعنى انا بقالى اسبوعين مكسل انزل "روكسى" عشان اصلح جهاز الكمبيوتر بسبب ركن السيارة
وشكلى كده هانزل "بتاكسى" واريح دماغى وامرى لله هههههههه

انا اعيزك تقرا الموضوع ده و تقولى رايك
http://www.nilemotors.net
/nile/203950-a.html

ده موضوع طويل قوى يا مان
ههههههههه
وانتم وحشتونى وعايز اتكلم معاكم

المشاركة الأصلية كتبت بواسطة toty858

موضوع مفيد جدا بجد
استاذ حسين وكل الناس اللى شاركو بالموضوع جزاكم الله خيرا بجد

وجزاك خيرا عن كل كلمة طيبة حضرتك بتكتبيها ... شكرا لتشجيعك

انا لسة مخلصة كورس مدرسة السواقة
المدرسة كانت كويسة
انا كنت بتعلم على اتوماتيك ف الموضوع سهل شوية

اجمل حاجة فى الدنيا كلها وفى مصر خصوصا هى العربايت الاوتوماتيك .... خصوصا فى شوارع المحروسة

المشكلة ان عربيتى زيرو
وطبعا مش قادرة اوصفلكو الرعب اللى بكون فية وانا راكباها لنها لسة عليها الاقساط وبقول حرام العربية يجرالها حاجة وهي لسة عليها اقساط هههه

ربنا يبارك لحضرتك فيها
فعلا "العين فلقت الحجر"
هههههههههههه
وفعلا ان فيه نسبة كبيرة من الخوف بسبب "ان الواحد بيكون خايف قوى على عربيته خصوصا لو كانت جديدة"
لكن إن شاء الله خير
وكل شىء هايكون تمام التمام ... لكن ... بعدالتدريب والفهم الجيد جدا

المهم انا عندى مشاكل في السواقة
طبعا اكيد الركنة
و الجنب اليمين للعربية نش بقدر المسافة صح
يعنى ممكن جنب العربية يتحك بسهولة اوى وعايزة اعرف ازاى اقدر السمافة صح

ببساطة
اول ما مراية عربيتك تكون بجوار مراية العربية الامامية
توقفى تماما
طبعا موش هاتلزقى عربيتك فى العربية التانية
هاتبعدى عنها حوالى 90 سم
ودى حاجة مهمة قوى
بعنى لو اقتربت زيادة عن اللزوم من السيارة الامامية
وكمان كان المكان ضيق شوية
فى الحالة دى اكيد السيارة هاتحك بالسيارة الامامية
وكمان اوعى تكسرى الدركسيون عكس الرصيف .. إلا .. بعد ما اكصدام سيارتك يتخطى اكصدام السيارة الامامية
المهم

ممكن تستعملى 2 كرتونة ورق
وتبدأ التدريب عليهم
بحيث انك لو خبط الكرتون الورق مايحصلش حاجة للعربية


اليو تيرن من كتر الخوف انى اطلع في نص الشارع بلزق اوى في الرصيف لدرجة ان العربية طلعت منى على الرصيف مرة

المشهد للأسف بشوفه كثيير
وكتبت فيه وحذرت منه
والنهاردة بالذات شاهدته وتوقعته من السيارة التى تسير امامى ... لكن ربنا ستر ... وعجل سيارته حك فى الرصيف
والصح من وجهة نظرى هى الابتعاد عن الرصيف حوالى متر على الاقل
ولا ابدأ فى الدخول فى اليوتيرن ... إلا .. بعد ما مقدمة السيارة تتخطى الرصيف
انا بمشي في الزحمة بس
يعنى لو طريق سالك شوية بخاف اسرع العربية لحسن يحصل موقف وملحقش اقف

مافيش مشاكل من موضوع السرعة ده
ومن خاف سلم
فى الاول فقط هاتستمرى حضرتك ماشية على سرعة بطيئة
وبعد مدة سوف تجدى انك تلقائى بتمشى اسرع وهكذا
اهم حاجة انك دائما تاركة مسافة كافية بينك وبين السيارة التى امامك
على الاقل 3 او 4 متر حسب سرعتك
والنصيحة هنا لكل السائقين سواء قديم او جديد ... انك لا تنظر للسيارة التى امامك فقط ههههههههه لو قدرت انك تنظر للسيارة رقم 3 امامك هههههههههه يبقى كويس جدا ... لأن فى الحالة دى هاتكون فيه فرصة للتوقف والتوقع ممتازة .... لدرجة ان فيه ناس وانا منهم ... ممكن انظر من خلال زجاج السيارة التى امامى
الخلاصة:

• اتركى مسافة كافية بينك وبين السيارة التى امامك

• وانظرى الى الامام على قدر المستطاع عشان لو شاهدت اى مشاكل ... تكونى مستعدة على طول

• والالتزام بالحارة التى تمشى فيها ... اوعى تنقلى نفسك من حارة الى حارة الا فى الضرورة القصوى خصوصا مع المبتدأين ... ودى اخطر حاجة بتعرض العربية للخبطات بدون داعى
• واحترسى اثناء عبور التقاطعات
  

وسؤال مهم
لو انا ماشية على سرعة ودوست فرامل فجاة مرة واحدة اية اللى هيحصل

لا قدر الله

• لو كان فيها عربية ملاكى ماشية خلفك بسرعة ... فى الغالب هايحصل احتكاك من الخلف

• اما لا قدر الله لو كان فيه سيارة نقل او اوتوبيس ... اكيد المشكلة هاتكون اكبر ... ربنا يحفظ الجميع
  

• زى ما بقول لحضرتك ... لازم تنظرى الى الامام بشكل كافى

• واذا حصل وضغطى على الفرامل اضغطى عليها بالتدريج

• ومن اللممكن الضغط عليها ضغطات متقطعة للتحذير ... عشان السيارة التى فى الخلف تعمل حسابها

• لدرجة احيانا وانا متوقف تماما ... اشاور بإيدى للسيارة التى فى الخلف عشان يعرف انى متوقف تماما وما يسرحش ومرة واحدة يفاجىء انى متوقف

• احيانا واعتقد ان ده صح ... بستخدم نور الإنتظار لتحذير السيارة التى فى الخلف خصوصا لو كان فيها مطب صناعى على طريق سريع .. وخايف من سرحات السيارة القادمة من الخلف ... على طول بنور الإنتظار

• والافضل طبعا انى اترك الحارة اليسرى للسيارات اللى عايزة تجرى جامد ... لان التوقف المفاجىء فى الحارة اليسرى بيكون خطر جدا

• والافضل من وجهة نظرى هى الحارة الوسطى ... عشان لو ظهر اى مشاكل على الطريق ... هايكون لحضرتك فرصتين انك تتحركى ناحية اليميى او ناحية اليسار

• اما لو انا ماشى على الشمال فقط وحصل اى مشكلة ... فى الحالة دى من الممكن انى اطلع فوق الرصيف

• اما لو كنت ماشى فى الحارة اليمنى وظهر اى مشكلة ... فى الحالة دى من الممكن احتك بالسيارات الراكنة او بالمشاة

• واخيا ... لازم اتوقع المشاكل التى تواجه السيارات التى تسير امامى .... يعنى انا شايف مشكلة هاتحصل للسيارة التى امامى ... على طول ما فيش داعى انى اقترب منها ... لانه اصلا عنده مشكلة وهايحاول يبتعد عنها وفى نفس اللحظة انا ماشى بجواره

الكلام كثير وربنا هو الستار فى الاول والآخر
واحنا لازم ناخد بالأسباب ونتعلم كويس حتى ولو كنا سائقين جيدين لازم نعرف كل جديد كل يوم

وميرسي مقدما للى هيساعدونى


كل سنة ومصر بخير وانتم كلكم بخير

مع اطيب التمنيات
اخوكم حسين غزالة