نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

**husseinoo** · 07-05-2011 12:02 PM

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

الشوارع الضيقة ذات الإتجاهين

التعامل مع السيارات القادمة

فى الصورة السابقة يظهر فيها ان السيارة الزرقاء تريد المرور من سيارة النقل الحمراء
ولذلك قبل المرور من السيارة الحمراء ... كان لا بد ان يقترب من الخط الفاصل المتقطع ... لكى يستطيع رؤية السيارات القادمة بشكل جيد

وإذا ظهرت له فرصة جيدة للمرور ... ينطلق بلا تردد ... خصوصا لو كانت سرعته مناسبة للمرور
يعنى موش معقولة انه يحاول يمر من السيارة الحمراء بسرعة بطيئة ويستمر فى السير بجوارها مده طويلة وبالطريقة دى يعمل بجوارها "بلوك" يمنع السيارات من المرور فى الاتجاهين

كذلك الاخوة اللى بيحاولوا المرور من السيارة الحمراء بدون النظر الى السيارات القادمة ... ويقول لك بيعمل بالعربية "غرزة" .... ههههههههه لكن بالمنظر ده هاتكون آخر غرزة يعملها هههههههه ربنا يسترها مع الجميع.

انظر الى الصورة السابقة
تلاحظ ان السيارات القادمة سيارات نقل واتوبيس
وطبعا لازم اعمل لهم حساب كويس جدا
واوسع لهم على قدر الإمكان خصوصا فى الملفات
فى شارع ضيق فى السيدة زينب فيه نفس المواصفات ... لو قربت متر واحد بطريقة خطأ وقابلك اوتوبيس ... على طول الدنيا كلها هاتقف بالساعات خصوصا فى المنحنيات.

فى الصورة السابقة يظهر ان صاحب السيارة الزرقاء ينظر جيدا فى المرآة الموجودة فى صالون السيارة
ويرى فيها سيارة نقل تريد المرور منه
والله لو فيه فرصة انه يوسع للسيارة النقل عشان تمر منه .... مافيش مشاكل
اهم حاجة لا تعرض نفسك للخطر عشان السيارة الموجودة فى الخلف عايزة تمر على حسابك.

فى الصورة يظهر انك تريد المرور من السيارة النقل
لكن قبل المرور لازم يكون فيه اتساع كافى للمرور
لازم تتأكد من المساحة اللى هاتمر فيها هل تكفى للمرور
ام يفضل الإنتظار حتى تظهر فرصة اخرى.

فى الصورة السابقة حاجة مهمة قوى
يوجد امام السيارة النقل واحد راكب موتوسيكل
عشان كده لازم السائق الذى يسير خلف السيارة النقل يحاول ينظر جيدا على جانب السيارة النقل قبل المرور منه
لانه فى الوقت اللى هايمر من السيارة النقل ... ثم العودة الى مكانه الطبيعى على الطريق ... فى الوقت ده لا قدر الله ممكن يخبط الراجل اللى راكب الموتوسيكل.

فى الصورة يظهر حاجة خطيرة جدا
وهى ان السيارة الحمراء اثناء مرورها كانت تسير فى المنطقة العمياء للسيارة النقل
يعنى سائق السيارة النقل لا يرى السيارة الحمراء فى المرايه
لذلك لا يجب على السيارة الحمراء الاستمرار فى السير مدة طويل بهذا الشكل وإلا عرض نفسه لخطر كبير جدا
فى ناس كثير تستمر فى السير بجوار سيارات اخرى فى المنطقة العمياء وتعتقد ان السيارة التى بجواره تراه بشكل جيد
ما بالك لو انت مشيت بالسيارة خلف النقل واقتربت منه بشكل كبير ... فى الحالة دى اكيد سائق النقل لا يراك فى اى مرايه
لذلك من الافضل الابتعاد على قدر الإمكان من السيارة النقل وعدم الإقتراب منها سواء من الخلف او السير بجوارها مدة طويلة

ارجوا ان اكون وفقت
مع اطيب التمنيات
اخوكم حسين غزالة

**husseinoo** · 18-05-2011 06:04 PM

بسم الله الرحمن الرحيم
اللهم صل على محمد وعلى آله وصحبه أجمعين

تعلم القيادة فى 10 ايام

المواقف الخطيرة فى التقاطعات

التوقع شىء جيد
مثلا فى الصورة السابقة ... لو تخيلت ان السيارة الحمراء سوف تمر من امامك بسلام ... فى الحالة دى سوف تستمر فى السير بدون توقف
والمفاجأة ان السيارة الحمراء تتوقف بسبب ظهور السيارة النقل
والنتيجة هاتكون موش تمام ....
طبعا الموقف ده بيحصل عندنا بشكل اصعب من كده كثيير ... انك تلاقى عربية امامك وداخلة مثلا شمال ... ومرة واحدة يتوقف ... فى الوقت اللى حضرتك متوقع انه يستمر فى السير ... وكمان كل تركيزك على مؤخرة سيارته ... وموش شايف بشكل جيد ما يحدث امام السيارة التى تمر امامك

الخلاصة: لازم تنظر على السيارة الحمراء وكمان على السيارات التى تسير امامها ... وتهدىء من سرعتك ورجلك تكون جاهزة فوق الفرامل حتى تمر بسلام

تغيير الحارات اثناء السير فى الزحام

طبعا من اهم الاشياء قبل ما ننقل نفسنا من حارة الى حارة ... لازم ننظر بشكل جيد جدا فى المرايات ... خصوصا المراية الجانبية
اذا كان هناك مشكلة فى تغيير الحارة خصوصا فى الزحام ... خلاص ... كبر دماغك واصبر شوية حتى تظهر لك فرصة تانية
وطبعا من اخطر الاشياء "الموتوسيكلات" ... لازم تحترس منها جدا جدا .... خصوصا فى الزحام ... ممكن تلاقى الموتوسيكل دخل امامك من اى جانب
وكمان ممكن يمشى فى مساحة لا تتخطى المتر الواحد
حاول تشغل حاسة السمع جيدا .... اذا سمعت موتوسيكل ... على طول اعمل له حساب .... خصوصا المجانين عندنا كتير قوى
ويفضل انك تترك له دائما مساحة بجوار الرصيف ... عشان اللى عايز يمر منك يمر بسلام
واذا سمعت او شوفت موتوسيكل ... لازم تعتبره سيارة ... وتترك له مساحة كافية من كل الاتجاهات

ده انا بشوف موتوسيكلات عليها عائلة كاملة الام والاب والاولاد ...
او الاسطى والصنايعية كمان هههههههههه

واليومين دول ... عيال صغيرة كثير قوى راكبة الموتوسيكلات الصينى الرخيصة ... والجرى بدون عقل خالص ... شغل مجانين ... ربنا يستر
والاخطر من كده ... بيركبوا كشافات زينون او تشبه الزينون ... اضاءة بيضاء قوية جدا ... ومرة واحدة ينورها "الغبى" فى مرايتك ... يخليك موش شايف امامك ... ربنا يستر

الخلاصة: يفضل انك تعمل كونتاكت بالنظر مع السيارة المجاورة لك ... انا عن نفسى اعطى اشارة ... وكمان اخرج ايدى ... واعتذر واقدم فروض الطاعة قبل ما انقل نفسى من حارة الى حارة ... خصوصا فى الزحام ... لكن لو كان ورايا تاكسى او عربية نصف نقل ... انسى الكلام ده ... فى الغالب هاتشوف " قلة ادب" وموش هايسمح لك بالدخول امامه عشان كده لازم تحترس بشده قبل الإنتقال من حارة الى حارة.

تجنب الاصطدام بالسيارة المجاورة لك

طبعا من اهم الاشياء انك تتجنب السير فى المنطقة العمياء للسيارات الاخرى ... يعنى تحديدا عند الباب الخلفى للسيارة الاخرى
وخصوصا فى الملفات والشوارع الضيقة
واذا كان السيارة المجاورة لك كبيرة ... مثلا كان بجوارك سيارة اوتوبيس او سيارة نقل ... لازم تحترس جدا خصوصا فى الملفات ... واوعى تمشى بجوارها مده طويلة ... ولو كان خلفك سيارة مثلا تاكسى وتضرب لك كلاكسات عشان تدخل بجوار الاوتوبيس ... اوعى تسمع الكلام ... ولا تعبره فى "الجزمة" القديمة ... سورى .. انا آسف انى اقول الكلام ده
لان "شوارعنا" مليانة ناس متخلفة على الآخر ... عشان يمشى متر واحد .... مافيش مشاكل عنده انه يضرب لك كلاكسات عشان تتحرك من امامه ... إن شالله تطلع على الرصيف او تخبط فى اى حاجة ... مالوش دعوة ... وبناء عليه: اهم حاجة انك تمشى صح ... وبشكل محترم ... ولا تتأثر بكلاكسات الغير محترمين.

التعامل مع الاوتوبيسات

دائما لازم تترك مسافة كافية خلف الاوتوبيس
وتوقع ان الاوتوبيس سوف يتوقف فى اى وقت ... وعندنا الاوتوبيس ممكن يتوقف فى اى مكان عشان زبون ... بالذات اننا جدعان قوى ... وممكن يتوقف فى منتصف الشارع ... عادى خالص ... عينك على اشارات الاوتوبيس ... لانك موش هاتشوف اى حاجة غير الإشارات ... اول ما نور الفرامل ينور ... توقف على طول بشكل تدريجى
ههههههههه ده إذا كان نور الفرامل شغال اساسا فى الاوتوبيس

اذا قررت انك تعدى من الاوتوبيس ... لازم تحترس من الناس اللى نزلت من الاوتوبيس وقررت انها تعدى الشارع ... لانك سوف تفاجأ بظهورهم مرة واحدة امامك
عشان كده لازم تضرب كلاكسات بشكل مستمر ومتقطع عشان الناس تاخد بالها وربنا يستر

التعامل مع الحالات الطارئة

لازم تصحصح كويس جدا اذا سمعت صوت سيارة اسعاف او سيارة شرطة ...
هههههههههه احنا فى الطبيعى لازم نصحصح اذا سمعنا صوت سيارة ميكروباص او سيارة مينى باص "اخضر"
على طول لازم تشوف لك اى مكان توسع فيه للباشا يمر ... "ويغور" بعيد عنك ... عشان المجانين فى نعيم
طبعا احيانا يفضل انك تستمر فى السير الى الامام ... لان مافيش مكان عشان توسع للسيارة القادمة من الخلف ... النتيجة هاتكون سيئة لو قررت انك تتركه يمر منك فى الوقت اللى الشارع ضيق جدا ... الافضل انك تستمر فى السير وتكبر دماغك

الخلاصة: اوعى تعرض نفسك للخطر عشان ميكروباس او مينى باص او اى حاجة عايزة تمر منك بالعافية خصوصا فى الشوارع الضيقة

طبعا لاحظتم ... أن اخلاق الواحد بدأت تتغير بعض الشىء ... وده غصب عن الواحد والله .... بقالى مدة طويلة انزل كل يوم منطقة بعيدة وزحام شديد ... بالتحديد "السيدة زينب" ... اروح المشوار ده بالنهار زحمة شديدة جدا وبالليل "اعوذ بالله" ... اليوم الوحيد اللى تلاقى الشوارع كويسة ... لما يكون فيه ماتش كورة ... هههههههههه يعنى دلوقتى عندى اضحى بالماتش فى مقابل انى اوصل فى سلام هههههههههههه مع انى بحب مشاهدة الكورة.

تابـــــــــــــع

ارجوا ان اكون وفقت
مع اطيب التمنيات
اخوكم حسين غزالة

**husseinoo** · 20-05-2011 08:15 PM

المشاركة الأصلية كتبت بواسطة magid1010

الف شكر ليك يا استاذ حسين الواحد بيستنى اضافه جديده لموضوعك بفارغ الصبر
شكرا لحضرتك على تشجيعك الايجابى

كنت عايز اخد رايك فى حاجه انا بقالى سنه بسوق و نفسى اسافر بالعربيه من العريش لطنطا كل لما انوى ارجع فى كلامى يمكن علشان المشوار طويل شويه رايك اتوكل على الله و لا استنا شويه و ايه الاحتياطات لما الواحد يسافر مشوار طويل

والله اسئلتك جميلة قوى

وفى نفس الوقت ... لازم الواحد يعترف انه ليس عندى معلومات بخصوص الموضوع ده
ولكن من وجهة نظرى المتواضعة اعتقد ان الاول لازم الواحد يكون سافر قبل كده مسافات معقولة ... مثلا من طنطا الى القاهرة ثم العودة
وبعد الواحد ما يتعود على المشوار ده
ممكن يسافر ابعد من كده
ولكن المشوار ده يتوقف على حالة السيارة ... يعنى لازم تكون حالتها كويسة
والكاوتش لازم يكون سليم
والاستبن لازم يكون سليم
ويفضل ان الكاوتش يكون تيوبلس تحسبا لاى موقف لا قدر الله
واعتقد يفضل انه يكون معاك حد تانى بيعرف يسوق عشان تبدل معاه مثلا كل 100 كيلوا على الاقل

ولازم تريح كل 100 او 150 كيلوا ... لازم تريح فى الطريق 20 دقيقة او نص ساعة على الاقل

ويفضل طبعا القيادة بالنهار ... وعدم زيادة السرعة عن 90

لو عرفت حاجة تانية مهمة هاكتبها إن شاء الله

مع اطيب التمنيات
اخوكم حسين غزالة

**sara2001** · 24-05-2011 12:59 AM

أستاذ / حسين
الف مبرووووك تكريم المنتدى
وجزاك الله كل خير على تعبك ومجهودك معانا

**husseinoo** · 24-05-2011 12:51 PM

المشاركة الأصلية كتبت بواسطة reco1

السلام عليكم أستاذ حسين
أتمنى أن تكون فى أحسن صحة
فى الصفحة رقم 9 المشاركة رقم 84 كان فيه صورة مرفقة مع الشرح
الشرح مازال موجود و لكن الصورة إتمسحت من المرفقات ياريت لو الصورة مازالت موجودة تنزلها لنا مرة أخرى حتى و لو فى آخر صفحة
إحنا عارفين حضرتك تعبت كتير فى الموضوع ده و لكن لأهمية الموضوع طلبت تكملة الصور الناقصة لأن الموضوع يعتبر مرجع مهم لكل من يريد أن يتعلم السواقة صح
و شكراً لحضرتك مرة أخرى

اهلا وسهلا بحضرتك
هو فعلا للاسف الموضوع صوره اتمسحت من الموقع ... ولم يكن فى حساباتى ان حاجة زى كده هاتحصل ... على العموم انا رسمت الموقف ده مرة تانى
لكن المرة دى هانتظر منكم اجابات

هاسأل بعض الأسئلة وارجوا من حضراتكم الإجابة:

1- افرتض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده

2- افترض ان السيارة الخضراء ترغب فى الدخول على اليوتيرن

3- افترض ان السيارة الصفراء ترغب فى الدخول على اليوتيرن
4- افترض ان السيارة الصفراء ترغب فى السير على طول

5- افترض ان السيارة الحمراء ترغب فى الاتجاه الى اليمين طوالى
6- افترض ان السيارة الحمراء ترغب فى الاتجاه الى اليمين ثم الى اليوتيرن
7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار

ملحوظة هامة:
طبعا انا ذكرت ان ده منزل كوبرى يعنى العربية نازلة بسرعة
وفيه عربيات احيانا تركن صف ثانى وعلى الناصية "سورى حاجة فى منتهى الغباء"

لو فيه اى سؤال تانى انا ماكتبتوش يا ريت نشارك كلنا عشان نتعلم مع بعض

وشاكر مقدما كل الاصدقاء المشاركين فى الموضوع ده

مع اطيب التمنيات
اخوكم حسين غزالة

**husseinoo** · 24-05-2011 12:55 PM

المشاركة الأصلية كتبت بواسطة sara2001

أستاذ / حسين
الف مبرووووك تكريم المنتدى
وجزاك الله كل خير على تعبك ومجهودك معانا

شكرا لحضرتك على كلماتك الرقيقة
والفضل كله يرجع لربنا ولتشجيعكم المتواصل

المشاركة الأصلية كتبت بواسطة noreen

شكرا للافكار القيمة والف مبروك التكريم

متشكر جدا لحضرتك
واتمنى انى اكون عند حسن ظنكم

مع اطيب التمنيات
اخوكم حسين غزالة

-

-

الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

LinkBack

أدوات الموضوع

عرض

-

-

-

-

-

-

المواضيع المتشابهه

الى احلى اعضاء تعالو نقعد مع بعض شوية ....(موضوع جديد)..

يوميات سائق جديد ؟!

ارجو النصيحة لوجه الله انا لسه متعلم السواقة جديد اشترى مستعمل ولا جديد؟

استفسار من سائق جديد فى الغيارات

جديد في السواقة؟ اجيب جديد ولا مستعمل

الكلمات الدلالية لهذا الموضوع

المفضلات

المفضلات

ضوابط المشاركة