الموضوع: اية اسباب فشل الشارك

المشاركة الأصلية كتبت بواسطة h_a_t_em

انا يا باشا معايا بومه 2008 1600 اوتوماتيك اللي هي كلاسيك

يبقى انا زي ما قولت لحضرتك هات الفل اوبشن علشان تحس بالفرق لا الشارك لو جيبتها كلاسيك هتحس انك راكب عربيه اعلى واوسع وطبعا مع الفروق الموجوده في تابلوه السيارة (حساب الحرارة والبنزين ,,,,الخ بيبقى ديجيتال) لكن مع الكامله هتحس بالفخامه ان شاء الله ربنا يقدرك وتجيبها بجد

البومه موديل قديم وبدايته فى فى بدايه الالفيه الجديده خد وقته وعمل مبيعاته وتقنياته انتقلت لمرحله التكهين وانتهى من على وش المنافسه , ملوش لزمه نجيب سيرتها فى الموضوع

اصل العمليه مش تسارع وبس وحتى لو كانت فالبومه اخف من الشارك بفرق محترم هو اللى بيديها التفوق لكن ابدا مفيش حاجه تانيه تطلعها من الشارك اللى الزياده فى وزنها عامل مهم فى جانب التقنيه والامان

نقطه ومن اول السطر , شارك هى اول عربيه فى رنج سعرها بالامكانيات دى الناس كلها ترقبت وصولها بلهفه كبيره لكن الوكيل كان مصمم يحط البومه فى المقدمه لحسن الناس تنساها و استسهل الحصول على مبيعات بدل عناء الترويج لعربيه جديده واعتقد فريق المبيعات بتفكيرهم العقيم ان البومه هتسوق الشارك بسمعتها لغايه ما اللعبه وصلت بيهم للوضع الحالى البومه فيه ولعت والشارك ماتت وانتهى دورها فى السوق

الشارك لم تفشل كعربيه , لكن فعليا هى فشلت فى جذب المصريين وخسرت مكان كلمه لانسر فى السوق

البومه لا ترتقى للمقارنه بالسيراتو والالنترا الجديده وحلو عليها قوى تتحط مع الصنى والبيرسونا والاسكالا و كمان السيمبول , لكن مش علشان سعرها بقا 130 الف جنيه نحطها فى نفس الفئه مع السيراتو اللى فى دولاب التكنولوجيا والهندسه تبص على البومه من فوق تشوفها نمله

الشارك نزلت غاليه فى وقتها وده بوظ اول ظهور ليها وبعدين ظهرت الالنترا بسعر اقل وامكانيات مغريه اكتر بكتير من الشارك فعملت مبيعات كتير عليها وكانت الشارك مازالت محلك سر ومن ثم كانت السيراتو اللى فيها كل اللى كان بيحلم بيه اى حد بسعر تحفه وتوكيل واخد العميل فى حضنه ووجهت الضربه القاضيه للشارك وفين بقا التوكيل خد باله بعدها ب 6 شهور ان العربيه غرقت فراح رخص الاسعار بعد ما خلاص السيراتو خدت فلوس كل اللى كان حتى بيفكر فى الشارك

الشارك تخسر دلوقتى اداء ( موتور مايفك وكل الكلام ده وبرده تسارع وملفات وثبات تخسر قصاد السيراتو ) , تخسر اعاده بيع , تخسر كصفقه ماليه وهى زيرو , تخسر توكيل

فبالتالى وضعها زى ما هو دلوقتى

طبعا كلامك رائع جدا يا استاذ احمد نوح , لكن احنا مش عاوزين ندخل عربيه تالته معانا وهي السيراتو وخلينا نركز في الموضوع , هو فيه بس حاجة انا اعترض عليها في كلام حضرتك وهي انا مش عارف ازاي قارنت السيراتو بالشارك , انا مش بقلل من السيراتو بس هو علشان معظم خصائص المميزة لاي عربيه موجوده في الشارك في المقابل السيراتو لديها بعض العيوب التي قد تمنعي من اني افكر فيها وافكر اني اشتريها وطبعا قسم الكيا يشهد على ذلك انا مش بفتي ولا بجيب كلام من عندي , وبعدين احنا مش عاوزين ندخل في حوارات ان الياباني احسن من الكوري والقصص دي علشان ما نفتح مواضيع جديدة احنا في غنى عنها
في المقابل انا اتفق معاك في انها تخسر اعاده بيع و كصفقه ماليه وهى زيرو , والحقيقه مش فاهم يعني ايه تخسر توكيل ؟؟

المشاركة الأصلية كتبت بواسطة h_a_t_em

كلامك منطقي طبعا يا باشا بس هل الشارك تخسر بكل المقاييس امام السيراتو اصل بصراحه بعد كلامك ده لو اي حد بيفكر في الشارك و قر االكلام ده هيشلها من دماغه فهل السيراتو كعربيه خلت صفقه اللانسر خسرانه ولا نقدر نعيب ده علي الظروف و سوء التسويق بتاعها و لكن هي عربيه كويسه ؟

اللانسر خسرت شوط كبير فى انها تعمل لنفسها نجاح ايام ما كانت لوحدها فطبيعى صورتها اتهزت وده مكانش عامل مساعد ليها لما كثر المنافسين فى الفئه دى , الشارك اكيد تتميز فى حاجات عن السيراتو والكروز والفلوانس والالنترا وهما منافسينها الرئيسيين , بس بشكل عام لمن لا يحب الشارك لذاتها هى عمليا خسرانه

المشاركة الأصلية كتبت بواسطة kemoelord

طبعا كلامك رائع جدا يا استاذ احمد نوح , لكن احنا مش عاوزين ندخل عربيه تالته معانا وهي السيراتو وخلينا نركز في الموضوع , هو فيه بس حاجة انا اعترض عليها في كلام حضرتك وهي انا مش عارف ازاي قارنت السيراتو بالشارك , انا مش بقلل من السيراتو بس هو علشان معظم خصائص المميزة لاي عربيه موجوده في الشارك في المقابل السيراتو لديها بعض العيوب التي قد تمنعي من اني افكر فيها وافكر اني اشتريها وطبعا قسم الكيا يشهد على ذلك انا مش بفتي ولا بجيب كلام من عندي , وبعدين احنا مش عاوزين ندخل في حوارات ان الياباني احسن من الكوري والقصص دي علشان ما نفتح مواضيع جديدة احنا في غنى عنها
في المقابل انا اتفق معاك في انها تخسر اعاده بيع و كصفقه ماليه وهى زيرو , والحقيقه مش فاهم يعني ايه تخسر توكيل ؟؟

ما هو للأسف يا كيمو علشان نقول هى ليه فشلت , واذا كانت فشلت بالفعل او لا لازم نقارنها بنفس العربيات من نفس الفئه السعريه ونشوف ايه وضعها

كلام الناس عن السيراتو فى قسم كيا صدقنى تاخده من اللى معاهم السيراتو نفسهم وثقه , عندك مثلا هنا فى القسم وفى كل المنتدى هتلاقى كلام عن البومه من اللى قلبك يحبه ومع ذلك كله ولا ليه اساسا من الصحه وده حال اى عربيه ناجحه فى السوق علشان معظم مستهلكى السيارات فى مصر من النوع اللى بيوجعهم انهم مبيكونوش من ضمن مالكى العربيه الكسبانه فى الفئه فيبقى كل همهم تعييب بقيه العربيات اللى كانت قصادهم , اللى يقولك الفيرنا مش ثابته على 200 ( وايه اللى وداك ناحيه ال 200 اساسا !! ) واللى يقولك البومه شكلها وحش ومفيهاش اى ميزه ( وهو اقصى معرفته بيها انه ركبها ايجار ) ونفس الكلام اللى بيتقال عن السيراتو انها بتحب تنام على جنبها كتير مع ان كل اللى نعرفه عن الحاجات اللى بتزود الثبات موجود فى العربيه دى من كاوتش عريض لجنط 17 لشكل انسيابى لأرتفاع معقول وحتى فرامل محترمه , علشان كدا بقولك احكم بعقلك على العربيه وسيبك من الكلام اللى رايح جاى ملوش لزمه وكله هيبان اول ما عربيه جديده تنزل تاخد الهوجه من السيراتو

انا متفق مع حضرتك مفيش مقارنات بين اليابانى والكورى هى عربيه ناجحه وعربيه فاشله من اى من الطرفين لكن بلد المنشأ شخصيا لا اراها مقياس للتقييم فى ايامنا دى , جزئيه الوكيل اقصد بيها معامله ونظافه واعتناء وفتره ضمان عربيات كيا مقابل ميتسوبيشى

واكيد لو حضرتك عملت صيانه لعربيتك الميتسوبيشى قبل كدا ودخلت بدون واسطه شوفت قد ايه الوضع سئ جدا جدا

بعد المناقشات دي انا اتضح لي اني كنت ظالم الشارك
يبدو فعلا انها سيارة رائعة

المشاركة الأصلية كتبت بواسطة kemoelord

مش الجيربوكس ده (cvt) الي كانت الناس بتحلف بيه في البومه قبل ما يغيروا الجيربوكس فيها ويتبدل بالجيربوكس استبترونك في موديلات 2010 , وبعدين حضرتك بتقول قتل العربيه ليييييييه ممكن توضحلي وتقولي الاسباب ؟؟؟!!! ,

بص يا باشا
الفتيس ال cvt في حد ذاته تكنولوجيا عبقرية ، لأنه بيديك أداء معقول جدا مع توفير رائع في استهلاك الوقود.

الهدف منه ان دايما ال rpm بيبقى شبه ثابت أثناء التسارع نتيجة التغيير المستمر في التروس. طبعا سيارات الركوب العادية الشركات المصنعة بتظبط كنترولر الفتيس انه يحافظ على عدد اللفات المثالي اللي بيحقق أقصى عزم وبالتالي أقصى توفير في الوقود. طبعا الكلام ده بيفقدك الكثير من القدرة الحصانية لأننا كما اتفقنا ان المايفك موتور لفات عالية، وبالشكل ده مع ال cvt عمره ما حيوصل للفات العالية دي.

يعني مثلا أقصى عزم لموتور الشارك بيكون عند 4000 rpm فلو لاحظت حتلاقى الشارك الأوتوماتك مهما قرصت عليها ال rpm بيلعب في رانج ال 4000 فهل تعتقد انك بكده طلعت قدرة الموتور كامله؟؟؟؟؟

ولو شغلت السبورت مود حتلاقي ال rpm في رانج ال 5000 يعني مازال بعيد جدا عن الردزون

على العكس من ذلك المانوال بتتحكم فيه براحتك

ممكن حد يسأل طب ليه مثلا مخلوش ال cvt يشتغل على أعلى rpm في السبورت مود عشان يطلع أقصى قدرة؟؟
الجواب بكل بساطة ان الموتور حيفوت ويقفش في فترة قليلة جدا نتيجة الحمل الزائد عليه، يعني تخيل نفسك راكب عربية مانوال وقارص على الأول على الردزون طول الوقت