الموضوع: معلش يا شباب نتكلم بالعقل و المنطق شويه

طبعا محدش مايتمناش انه يركب bmw او Audi او toyota لكن
هتلاقي اي حد هنا في المنتدى عربيته تاعباه دايما جايبها مستعملة او استيراد
لكن ان اللي عنده عربيه زيره و مهتم بيها مافيش حاجة فيها هتبوظ او حتى تقرفه
و بعدين الصدفه السعيده ان كلنا هنا معانا لانوس في نفس الوقت و اعتقد لو محدش عنده لانوس خالص هنتوزع عالمنتديات الاخرى و دي حاجة انا ماحبهاش

المشاركة الأصلية كتبت بواسطة romeo_6887

هو ايه اللي مخلينا نستحمل قرف الدايو ده ؟ ما العربيات مليه الدنيا اهه و مفيش منها مشاكل ده حتي الصيني مشاكله مش بالكم ده انا كل ما انزل بالعربيه اتلاقي فيها مشكله شكل و كل ما اخش علي القسم ده اتلاقي مشكله شكل في عربيه واحد مننا هو ايه مخلينا نستحمل القرف ده ؟ ده غير قرف الشيفروليه اللي انا توقعت انه هيقل بعد ما دايو قفلت لكن هيهات ازاي يقل ؟ بلاوي منيله بنيله في الشيفروليه برضه هي مش زي الدايو اه بس برضه مشاكل كتير علي عربيات جديده و حديثه ايه اللي غاصبنا علي العربيات دي و احنا عارفين ان كلها عيوب اي نعم هي عيوب مش كارثيه بس برضه ميمنعش انها عيوب مقرفه و ساعات بتوقف العربيه خالص و تخيلك تكع فلوس و كل يوم و التاني عند الميكانيكيه وصرف هنا و هناك و ياريت العربيه بتتظبط بعد كده لكن لا طبعا لازم صرف اكتر و اكتر انا طبعا مش بعيب في العربيه بس بتكلم عن 3000 جندي صرفتهم علي العربيه لغايه النهارده ده غير تضييع الوقت و سماع كلام ملوش لزمه من صحاب الشغل اللي انا فيه و يا ريت العربيه ماشيه عدل فايه اللي مخلينا نستحمل القرف ده ؟ ما نشتري اي عربيه تانيه و خلاص و المشكله ان كلنا بنخش ننصح الناس بيها و احنا عارفين ان كلها وجع دماغ و قرف
يا لمبه تشيك تنور من غير سبب واضح
يا لمبه بطاريه تنور مش عارف من ايه
يا لمبه زيت تنور و الزيت لسه جديد
يا طلمبه بنزين تضرب كل شويه
يا موتور يخف فجأه كده ليه متفهمش
يا عفشه تلاقيها جابت ارض ارض فجأه
معلش يا شباب بفضفض معاكم و انا مش قصدي اتكلم عن العربيه بطريق وحشه و لا حاجه بس حاسس هيجيلي ضغط من اللي بيحصل لينا عموما و ليا خصوصا و ياريت نتناقش بهدوء

بص يا روميو باشا
انا مش مختلف معاك
اوي

ومعايا تقريبا نفس عربيتك ( جوليت )
بس اولا
اعتقد ان عربيتك انت تحديدا هي الي فيها مشاكل زيادة عن اللزوم
مش كل العربيات الدايو
علشان ما نبقاش بنحسد حد
عربيات دايو كتير ماشية بالسنة ومابتحصلش فيها حاجة وناس اعرفهم

بس هرجع واقولك
علي حاجة انا مقتنع بيها
رغم ملكيتي للدايو
طبعا مافيش كوري يتقارن بياباني
دا حاجة عندي من المسلمات بها
تمام

والصيني
هاتلي عربية صيني نفس موديل عربيتك
يعني المفروض ماشية بقالها 10 سنين
وفيها مشاكل اقل
تمام برضه

حاجة بقي بسيطة في الاخر

اكيد الي يخليني اجيب جوليت وما اجبش تويوتا اكيد
مش اقتناعي بالدايو انها احسن من التويوتا
لاء ترجع لاسباب مادية

ومين قاللك ان العربيات التانيه مش مقرفه برضه
مدام العربيه مستعمله اكيد بيطلع فيها عيوب و الشاطر بقى اللى يقدر يظبط العيوب بتاعته دي
بقى كل اللي حصلك في العربيه دي و بتفكر تغير العربيه و مفكرتش تغير الميكانيكي
مهو لمبه التشك تنور اكيد ليها سبب
و لمبه البطاريه كذلك
و الزيت برده
و اكيد لما انت سبت دول و طنشتهم طلمبه البنزين باظت و الموتور خف

وبعدين خد بالك بقى انت بتقول صرفت 3000 جندي طب مهي لو نفس المشاكل اللى عندك في عربيه تانيه اكيد كنت هاتصرف ضعفهم
اسمحلى انا مختلف معاك تماما
الدايو عربيات اعتماديه و اكتر عربيه مناسبه للى زي على الاقل ماديا و تشغيليا

لاسف انا مختلف معاك يا روميو انا معايا لانوس 2003 مشتريها مستعملة وكان فيها شوية مشاكل بسيطة وانا بعون الله ظبطها بقيت زي الفل وبحبها جدا واحب اقولك ان معظم المشاكل اللي بتحصل في عربيتنا في مصر بترجع لسوء حالة الطرق من مطبات وحفر وطرق مزدحمة وانا عن نفسي لي اصدقاء معاهم لانسر وكرولا وعندهم بردة مشاكل فيها بس الفرق ان المشاكل عندهم بتتكلف كتير جدا في حلها ودي وجهة نظري المتواضعة

مع احترامى لكلام حضرتك.ماينفعش ان احنا نعمم الكلام ده

اى نوع عربية فى الدنيا مهما كانت هاتلاقى فيها كده وكده

انا برضه اعرف ناس معاها لانسر وتعبانها منها اوى

وناس تانيه معاها 128 وزى الفل معاها

وكل ده بيعتمد على حاجه واحده فقط وهى حــــــــــــــــــــــال ة العربـيه

انت ممكن تشترى عربيه بي ام وصاحبها مثلا كان هامل فيها جدا فتطلع عينك

وممكن تشتري زى ما حضرتك بتقول توك توك وصاحبه كان حاطته جوه عنيه زى عياله ...هايريحك اكيد

ناس كتير معاها لانوس هنا واكيد برضه مريحاها والحمد لله
هى عمليه حظ برضه صدقنى .او بمعنى تانى رزقك بقي

معلش

عارف ياروميو العربيات دي حظوظ فعلا

وانا واحد من الناس اللي حظها كويس والحمد لله , العربيه اللي معايا دي موديل 2000 اشترتها وحالتها كانت زيرو بكل المقاييس , مفيش فيها حتى لمبه محروقه او حاجه محتاجه تتغير ... الخ

واول مره دخلت بيها على الميكانيكي كان بعدها بـ سنه تقريبا , لزوم السيرفيس و و و يعني حتى مكنش فيها مشكله معينه

وبالتالي الواحد بيحترم ان العربيه شايلاه وبتعززه وقت اللزوم

لكن للاسف في ناس تانيه بيحصل معاها عكس اللي حصل معايا تماماً !!!!!!!!! يعني فعلا الموضوع حظوظ بنسبه كبيره

انا كمان عايز اشبهلك العربيه دي بالصديق , على اد ما هو صديق مخلص جدا و وفي على الاخر لكن اكيد فيه عيوب , وبالرغم من كده انت بتستحمله وتعديله وتبلعله زي ما بيقولوا
وده لانه بيكون عزيز عليك لدرجه اكبر من انك تتخلى عن الصداقه دي
وعلى اد ما انت بتستحمله هو كمان بيستحملك وقت الشده , وبيرفع راسك في الاوقات الحرجه فعلا
وياسلام بقه على قمه الرضاء لما تجيب لصحابك ده هديه !! طبعا في حالتنا هنقول الهديه بالنسبه للعربيه انك بتعملها صيانه او بتعمل upgrade لحاجه معينه فيها , بتلاقي صاحبك ده وقتها شايلك من على الارض شيل

فـ بما اننا بشر وكلنا احيانا بنغلط وبنتعلم من غلطنا وفي غيرنا بيستحملنا , فالجماد (العربيات) كمان كده و لازم نستحملها لانها اكيد رفعت راسك وراسي في موقف معين في يوم من الايام

وخلي بالك العربيه بينشأ بينك وبينها حاله نفسيه بجد , وكل ما رضيت عنها واديتها هي كمان بترضي وبتديك اكتر

معلش طولت عليك بس فعلا العربيه سواء دايو او غيرها اكيد ليها اخطاء وعيوب زيها زي اي نوع تاني

عالاقل اخطاء الدايو ومشاكلها في حاجات بسيطه , لمبه تشيك او صباع حراره و و و
لكن في عربيات تانيه فيها عيوب جسيمه وبتخلي الشركات المصنعه تسحب خطوط انتاجها بدل المره اتنين

انا من رأيي نقول الحمد لله اوي على اللي احنا فيه كأصحاب دايو