الموضوع: عربيتى اتبهدلت على ايدك يا مصر , منك لله يا مصر

انا متأسف انى مكنتش برد , كنت مستنى بس اشوف كل الخساير واصورلكم المطب الفتاك وحالا هرد على كل الردود

دى اليافطه اليتيمه اللى قبل المطب بمسافه بسيطه ومفيش عليها نور وبليل مش عاكسه وبتبقى ملهاش اى لزمه



وده ارتفاع المطب مقارنه بالبومه اللى المفروض عاليه , مش هوندا ولا BMW مثلا الله يكون فى عون اللى راكبهم





طبعا اثار العدوان واضحه قوى قوى على المطب , اخوكم مشارك فى الخطوط البيضا دى يا رجاله وان شاء الله من كتر التخبيط فيه هنجيب أجله

المهم امبارح حصل موقف كوميدى جدا مع المطب , كان معاى واحد صاحبى وانا داخل الشارع من الاتجاه اللى طالع وبشاورله على المطب الناحيه التانيه , وفجأه , اييييييييييييييييئ

شاب بعربيه الفئه الثالثه تسعينات ( حسب ما لمحت فى الضلمه ) , فرامل شديده جدا ومن ثم طار من على الارض بدون مبالغه واتهبد فى الارض بكل عنف زى ما حصل معاى بالظبط

وقولت لصاحبى اهو ده بقى المطب اللى بقولك عليه :)

فيش فايده

يا ولاد المجانين !!! ده مطب ولا هضبه المقطم دي لو عربية هامر يدوب تعرف تعديه بالعافية ! نفسي أعرف أيه سياسه المطبات في البلد ؟؟

أنا لسه كنت ماشي بالعربية وفجأة نزلت في بلاعة وبسبب كده حصل كسر للصاج اللي فوق المساعد الشمال ومبقتش عارف امشي ولا اسافر بيها عشان الكسر ميزيدش

الحمد لله وقدر الله وماشاء فعل

المشاركة الأصلية كتبت بواسطة MohaMed_Refaat

الف حمد الله على سلامتك يا احمد وربنا يعوضك خير وياجرك فى مصيبتك ويخلفك خيرا منها :::

فعلا مشكلة المطبات دية حاجة مقرفة بجد وخصوصا المطبات علوها زاد بشكل فج اصبحت زى متكون تلة او جرف صغير :::

الغريبة انى عمرى مشوفت مطبات فى الاقصر ابدا الا لازم تكون ملونة بفسفور وتكون متدرجة بميل مش عارف اشمعنى المدن السياحية بيهتموا بيها فى المطبات وكل شئ .....

الله يسلمك يا محمد , المطبات بقت هضاب يا باشا ده انت بتطلع تشوف السما وتنزل تعد الحصا وانت فوق المطب

المشاركة الأصلية كتبت بواسطة Ahmed Hassan

ايوه كده... نبص للجزء المليان من الكبايه (بس الراجل يلاقي الكبايه اصلا!!)

الحته اللي في الشكمان دي شكلها كدا shield فوق الماسوره مش هيه الماسوره... علشان كده مش هتلاقي تسريب. بس ممكن دلوقت او بعدين تعمل معاك صوت شخشخه.

بالنسبه للكابوت في الغالب هتلاقي المشكله اللي عند القفل بسبب المفصلات. ضبطهم الاول قبل ما تخلي حد يلعب في القفل و باذن الله هيضبط معاك.

برده الكلاكس هتلاقي الصاموله اللي ماسكه الكلاكس نفسه عايزه تتربط لان المفروض هيا الارضي بتاع الكلاكس.

باذن الله كله يتضبط و ترجع العربيه زي الاول. و تكون جاهز لمغامره جديده

والله انا ولا عملت فيها اى حاجه من يومها لأنى مش فاضى نهائى , بس هو الكبوت مقفول سليم انما بيترج سنه وهو قافل وهو تقريبا المفصلات او وضع القفل نفسه مش مظبوط

الجديد بقا هو صوت صفاره لما بشغل التكييف وشويه اعراض تزييق كتيره كدا بتظهر مع الوقت , ربنا يسهل وافضى اشوف ايه الوضع

المشاركة الأصلية كتبت بواسطة Ralliart

اهو طريق المنصوره ده من كتر ما اتزاولت بقيت كل ما اشوف يافطه بقول دعاء الاستخاره (ادوس ولا ما ادوسش )
والغريب ان اخويا كان مستحقرني وبيقولي يابني مفيش هنا مطب انت مش عارف تحفظهم!!!
وكأن انا الغلطان !!

لالالا , على الطريق ده بالذات ببقى ماشى 80 او احيانا 70 ومبجريش الا اذا كان فى حد قدامى علشان لما اشوف العفشه اللى ورا عنده الحق اهدى براحتى

المشاركة الأصلية كتبت بواسطة mohamed_mohsen

الف سلامه عليك.....و حسبي الله نعم الوكيل في الناس اللي مابتراعيش ربنا و تعمل اللي علي مزاجها
و مصر....مصر باعتنا,,,,بالرخيص قوي :(

الله يسلمك يا محمد , مصر بتسلم عليك :)

المشاركة الأصلية كتبت بواسطة M.Mosaad

خدها نصيحه كل ما الطريق يبقي حلو تعرف ان في مطب او حفرة في طريقك حاجة كدة جر رجل

الشوارع كلها افخاخ لأصطياد العربيات و لو حطلك يافطة قبله مش هتاخد المطب يبقي كدة المطب او الحفرة ملهمشي فايدة لان الناس هتاخد بالها

انا بقي عندي سؤال ايه فايدة الكام مطب اللي في الشارع دة ورا بعض يعني مين هيهدي عندهم كلم سيخ حديد و خلاص زي اللي محطوطين عند بيت الريس كدة ملهومشي اي معني غير خراب العفشة

حاجة تقرف

مهو ده اللى حصل , بعد عمل الاسياخ الكل بقا يجرى اكتر فالموضوع استدعى منهم مهندس تخصص خطوط دفاع عسكرى من سلاح المهندسين وقام عمل المطبين دول

المشاركة الأصلية كتبت بواسطة gebreel

يا باشا القصة مش في انك تاخد حاجة منهم او لأ الفكرة في ان ممكن حد غيرك ميعرفش اي حاجة عن المطب ده و يلبس فيه و ميعرفش يتصرف و تبقى النتيجة مش كويسة و بالتالي اسمحلي اققلك انك ممكن تشيل ذنب كل واحد يلبس في المطب و ده نتيجة انك مأخدتش اي فعل تجاه الناس اللي مبتهتمش بحاجة دي و لو اخدت موقف و محدش عمل حاجة يبقى انت عملت اللي عليك
و افتكر الحديث اللي فيما معناه من وجد منكم منكرا فليغيره بيده فان لم يستطع فبلسانه فان لم يستطع فبقليه و هذا اضعف الايمان
و ان باللي انت هتعملو ده ان شاء الله تاخد ثواب اماطة اذي عن الطريق و في كل الاحوال انت كسبان ثواب =)

صدقنى انا حاولت اخد موقف , بس مش مع اداره الفندق لأن الناس اللى بتخلف عمل المطب ده انا شخصيا مش مستعد ارخص كرامتى فى الكلام معاهم وسماع ما لا يرضينى

لكن الكل بيرد على محاولتك لأخذ الموقف برد بسيط قوى , هو انت يعنى اول ولا اخر من ياكل مطب !!!

المشاركة الأصلية كتبت بواسطة AMIRELGOHARY

المشكلة طبعا مش مصر فى حد ذاتها لكن الحكومة اللى بتصرف الفلوس غلط والناس اللى كل انتخابات يروحو ينتخبوهم تانى.
جربنا الناس دى 100 مرة ومش نافعيين. عايزيين حد يبص على تجربة ماليزيا و تركيا مش يقارنا بجزر القمر واوغندا.

يا باشا مهو انا وانت والناس اللى فوق واللى تحت هى مصر , مصر دى كيان وهمى احنا الى بنمثله

المشاركة الأصلية كتبت بواسطة pro_samir

يا راجل خضتني عليك

ربنا ستر الحمد لله ان جت علي كدة وحمد الله علي سلامتك

ومش هحكيلك عن حاجة لأني مش عارف احكي عن اية ولا اية

نموت نموت وتحيا المطبات

بحب مطباتك يا مصر

الله يكرمك يا محمد باشا , دى كانت رحله طيران صغيره كدا :)

فيفا مطبات

المشاركة الأصلية كتبت بواسطة hany_mohamed

الحمد لله انك بخير
وحسبى الله ونعم الوكيل فى الناس دى ...

الله يسلمك يا استاذ هانى , وحسبنا الله ونعم الوكيل

المشاركة الأصلية كتبت بواسطة dolly13

هاقولك ايه
الف سلامة عليك وربنا يسترها علينا
لكن ليه تعيب فى مصر مالهاش ذنب
الذنب ذنبنا كلنا
ذنب المسؤولين بتقاعسهم وتفضيل مصالحهم الشخصية
وذنبنا لاننا سكتنا على حقوقنا وحقوق مصر واهى ضاعت خلاص
مصر مجنى عليها زينا بالظبط مالهاش ذنب
ايه رايك كنوع من المشاركة الايجابية انك تتكلم مع برنامج توك شو وياريت لو برنامج عمرو اديب ويبقى فيه صور للاشكال البشعة من المخالفات اللى فى الشارع من بالوعات مفتوحة الى المطبات الخصوصى الغير مطابقة للمواصفات
اهى محاولة ممكن اوى تساعد فى الحد من هذه الظاهرة
وربنا معاك

صدقينى حضرتك حاولت انشر ولو ربع صفحه عن المطب ده واللى حتى يومنا هذا بشوف ناس بتطير من فوقه الا ان كل محاولاتى قابلها الفشل , وللأسف مش مستعد اسيب شغلى والف ادور على حل للمطب لانه مش من مسؤوليتى نحو المجتمع انى احميهم من المطب , ده مسؤوليه واحد قاعد فى مكتبه ومشغل التكييف وبيتفرج على العربيات اللى بتطير كل يوم من الشباك وفرحان

وهو الراجل ده بقا مصر , زى ما باقى الفاسدين كلهم مصر والصالحين برده , بس لكثره الفاسدين المشاركين فى تكوينها وصلت هى لكونها فاسده بشكل عام

المشاركة الأصلية كتبت بواسطة memo_p910

نفس المطبات الحديديه دي عملوها على الكورنيش والحل انك تزود السرعه اما الحل مفيش حل الا التغيير ( نعم للبرادعي ) ومحدش يقولي متتكلمش سياسه في المنتدى بس فعلا الوضع اصبح لا يطاق وماينفعش ندفن راسنا في الرمل

مهو سبب كل الازمه ان الكل من فتره كبيره اتعود على الجرى فى الحته دى بسبب المطبات الصغيره , وبالتالى الكل ذاق طعم الحريه مع المطب الكبير

المشاركة الأصلية كتبت بواسطة أم حمـــاس

مكنش يومك النهاردة يا استاذ نوح

فين بشمهندس سمير الشهاوي مش كان ناوي يرفع قضية علي هيئة الطرق والكباري؟

اه والله مكنش يومى نهائى , اتأخرت على الامتحان ومحليتش كويس واتخانقت فى الشغل وختمت بالمطب

المشاركة الأصلية كتبت بواسطة muhmado_furp

معلش يابوحميد
ده قدر العربيات في مصر وبعدين قدرنا نتحمل تكلفة صيانه اكتر من اي مكان في العالم بسبب الاوضاع الي احنا فينا
وبعدين هنعمل ايه
زي ماقال بعض الزملاء تحفظ المطب وتتعايش
ودايما افترض الاسوء في اي مكان
يعني خلي عند هوس دايما في اي مكان جديد انه هيطلعك مطب
وقدر الله وما شاء فعل

واحشنى والله يا استاذنا

ادينا بنشمى نحسس على الارض علشان النقر والحفر والبلاعات والمطبات وعيون القط والخنادق والمواسير والاسياخ , وع ذلك لا ننجى من دب ولا طاخ كل فتره

المشاركة الأصلية كتبت بواسطة windsofchange

قدر الله وماشاء فعل يارب اصلح احوالنا

الحمد لله على كل حال

المشاركة الأصلية كتبت بواسطة dode2002

حسبنا الله ونعم الوكيل

حسبنا الله ونعم الوكيل

المشاركة الأصلية كتبت بواسطة ihabchina

وانا بتعلم سواقة زمااااااااااااااااااااااا اااااااااااان قالولى اصحابى ان اهم حاجة انك مش تعرف الفرق بين البنزين والفرامل الاهم انك تعرف وتحفظ عن ظهر قلب فين بلعاتك ومطباتك ونقرك وفحتك فين وكل حاجة فى الطريق ولو فى بلاعة جدية او مطب جديد او نقرة او اى مصيبة ونبى ونبى ابقى قلنا عليا !! ههههههههههههههههههههههههه ه

ههههههههههههههههههههه , دلوقتى فصل فى مدرسه قياده تعليم القياده هو كيف تتفادى المطبات وازاى تاخد كل نوع وتتعامل مع انواع العوائق دى ازاى

المشاركة الأصلية كتبت بواسطة ahmedbasto

ولا يهمك لازم تعيش

بالظبط , حياتى مش هتقف على مطب , مسيرها هتنزل من فوقه :)

المشاركة الأصلية كتبت بواسطة darkangel007

يا حبيبتى يا مصــــــــــــــر!

هطرقع من الحب

المشاركة الأصلية كتبت بواسطة hish172005

كل واحد مسؤل عايز ينهب على طول يفكرفى عمل بلاوى على الطريق..شوف سياخ الحديد اللى معموله بعرض الطريق فى طريق مصر اسماعليه وشوف الكبيات اللى معموله فى صلاح سالم ونفق الازهر..يا خساره عليكى يامصر عمرك ما هتتادمى...

اه كله كوم واللى فى طريق الاسماعيليه ده كوم تانى , اهو ده بقى الهبل بعينه

المشاركة الأصلية كتبت بواسطة ابو حسين

حسبي الله ونعم الوكيل

وحمدا لله علي سلامتك

الله يسلمك يا ابو حسين

المشاركة الأصلية كتبت بواسطة El Prince

المفروض نمشى فى شوارعنا بدبابات t55
أو بعربيات نص جنزير على أقل تقدير ...

المهم تكون فول اوبش ..

مين قالك ان ده الحل , يا باشا هتلاقى كل فخ وفخ يهد اجدع دبابه والغام حيه وشغلانه , اصل انت لو سولت لك نفسك انك ممكن تجرى فى البلد دى تبقى غلطان

لسه من فتره شاب ب X3 أكل مطب قدامى ولا كأنها عربيه عاليه , الواد طار من ارتفاع المطب بالعربيه

المشاركة الأصلية كتبت بواسطة El.Hossieny

الف سلامة عليك يا عم نوووووووووووووح ..... معلش متزعلش نفسك بجد .... انت اكيد بعد اكتر من 25 سنة عايش في البلد تكون عرفت انك لازم تقول حصل خير و متسناش تغيير يحصل .... او ادعي و قول ربنا يخرجنا من البلد دي بالخير

الله يسلمك يا حسينى , لالا ابدا انا مش مستنى تغيير بالعكس المطب ده اول ما افضى شويه هروح اسهر هناك كل يوم بليل اتفرج على المواطنين وهما بيمارسو هوايه الطيران الحر

ده شئ مسلى جدا والله , ربنا يكرمهم على اللى بيعملوه علشان اسعادنا

وربنا يخرجنا منها على خير ونسيبلهم بقا البلد يعملوا فيها ما بدالهم

المشاركة الأصلية كتبت بواسطة gebreel

يا نهار ابيض ده المطب بعلو الرصيف يعني اكنك طلعت على الرصيف بس السؤال هل الخطوط الصفراء دي عاكسة يعني بتبان باليل ولا لأ لأني من التصوير ده شايف انهم حاطين يافطة بس قريبة و مخططين المطب

الخطوط الصفراء دى يا باشا دهان الشقه عندى بيعكس افضل منها , ولا الهوا بليل ولا بتبان اصلا

اليافطه كذلك فى ملف ومش واضحه تماما بالذات بليل لأن مسارك وانت داخل الملف بيخلى نورك مش معكوس على اليافطه بعكس ما يكون الطريق مستقيم , ده بجانب انها زى ما واضحه قريبه قوى وعلى مستوى غير مستوى المطب

بمعنى انك لو على افتراض شوفتها , وبدات تهدى بشكل عادى شويه هى على مستوى نوعا ما قليل الانحدار يتبعه مستوى منحدر اكتر لا توضح الرؤيه عليه الا لما تدخل وفى اوله على طول المطب علشان كدا انت دايما بتاخد المطب على غفله

المشاركة الأصلية كتبت بواسطة amr100

فيش فايده

ولا الهوا

المشاركة الأصلية كتبت بواسطة zakiali

يا ولاد المجانين !!! ده مطب ولا هضبه المقطم دي لو عربية هامر يدوب تعرف تعديه بالعافية ! نفسي أعرف أيه سياسه المطبات في البلد ؟؟

دى معديه يا باشا , تحتها الميه علشان تروح البر التانى

سياسه المطبات فى البلد دى , تبقى راجل لو عرفت تاخده على التانى

المشاركة الأصلية كتبت بواسطة M.Osman

احمد بيك نوح ... هو دا المطب ؟

شوفت طريق المنصورة المحلة ؟؟؟
صدقني دا كدا حلو ...
و شكله بيشيل العربية كلها من غير ما تحك ...

بصراحه مشوفتوش , هو اه صحيح بياخد العربيه كلها بس بيرفعها الى عنان السماء ويهبدها فى الارض تانى

الطلعه والنزله اساسا صعبه قوى فبتطير العربيه او بتاخدها لفوق بعنف حتى لو طالع براحه

المشاركة الأصلية كتبت بواسطة ainshouka

أنا لسه كنت ماشي بالعربية وفجأة نزلت في بلاعة وبسبب كده حصل كسر للصاج اللي فوق المساعد الشمال ومبقتش عارف امشي ولا اسافر بيها عشان الكسر ميزيدش

الحمد لله وقدر الله وماشاء فعل

لا حول ولا قوه الا بالله , ربنا يرحمنا جميعا